Israelfɔ Ɩlʋ 36 - Bulu Ntam Pɔpwɛ mʋ́a Israel Ɩlʋ

Bulu Ɔdwɛá Ɩma Ɔka Lomoni

Dawid, Nana Bulu osumbi ɩlʋ ha ɩlʋ osunapʋ.

¹ Lakpan tɔtɔɩ kpla owuntɔlɩnpʋ ɩklʋn. Ɔtamatepi nya Bulu ifu.

² Tsufɛ ɩwɩtsu tɛha mʋ ɔtɛmlɛ ɩwɩ. Ɔtamawun mʋ lakpan, mɛnɩ obési bwɛ.

³ Asʋkpan mʋ́a afunu sɔɔn tɛdalɩ mʋ ɔnɔ. Ɔtamatra bwɛ ansɩtɩnla, ɔtamatra bwɛ yile.

⁴ Ɔtɔgywɩɩn lalahɛ mʋ ɔklansʋ. Bregyibrɛ ɔlɛda ɩwɩsʋ ha lalahɛbwɛ. Mʋ́ sʋ ɔtamakina lalahɛ kʋkʋʋkʋ.

⁵ Oo Nana Bulu, fʋ ɔdwɛá ɩma ɔka lɔfʋa wɔ ɔsʋsʋ. Fʋ ɔnɔkwalɩ ɛ ɩlɔfʋa wɔ nwʋlʋta.

⁶ Fʋ yilebwɛ lɔfʋa fɛ abʋ akpɔnkpɔntɩ. Fʋ asʋnbuatɔ bʋ oklu fɛ ɔpʋ ibuntɔ. Oo Nana Bulu, fʋtɛkɩ anyankpʋsa mʋ́a mbwɩ fɛ́ɛ́sʋ.

⁷ Oo Bulu, fʋ ɔdwɛá ɩma ɔka lɔkʋkʋ moni o. Anyankpʋsa bʋteŋain fʋ abambasɩ.

⁸ Fʋ woyitɔ atɔ ɩhɩɛ tsɔ. Mʋ́ fʋtɔpʋbʋla amʋ́. Fʋtɛha amʋ́ bʋtonun fʋ ɔdwɛ-ntsu bregyibrɛ.

⁹ Tsufɛ fʋ wa nkpa otsukpa bʋ. Fʋ wankɩtɔ anɩtenya wankɩ tsu.

¹⁰ Ha fʋ ɔdwɛá ɩma ɔka itsia aha ánɩ́ bʋyin fʋsʋ, afʋbwɛ yile ha aha ánɩ́ amʋ́ asʋn da ɔkpa.

¹¹ Máha ɩwɩ atsupʋ abʋtsatsa mɩsʋ, ntɛ awuntɔlɩnpʋ abʋwuta mɩ sɩsɩ.

¹² Kɩ awuntɔlɩnpʋ ɔdɩdakpa. Amʋ́ bawuta da, kʋsʋ ma amʋ́ ɩnʋ a.