Israelfɔ Ɩlʋ 34 - Bulu Ntam Pɔpwɛ mʋ́a Israel Ɩlʋ

Kɩ Fʋ Ɔnɔ, Ɩmáwa Afunu

Dawid ɩlʋá ɔlɔwa brɛá ɔlɔbwɛ ɩwɩ gbede ɔlɔpʋ Abimelek wa, olegya mʋ.

¹ Nɛ́kanfʋ Nana Bulu brɛ fɛ́ɛ́. Mʋ kanfʋ mɛ́ɛta mɩ ɔnɔ ɛkɛkɛɛkɛ.

² Mʋ mɩ ɔkla tɔpʋtsu ɩwɩ. Ipian awunpʋ fɛ́ɛ́ bʋnu, abʋnya ansigyi.

³ Mlɩtsa mɩ awa Nana Bulu numnyam. Mlɩba abwɛ ɩkʋlɛ, atsu mʋ ɩda fʋa.

⁴ Nosu kpoli Nana Bulu, ɔlɔsɔ mɩ ɔnɔ. Ɔlɛlɛ mɩ tsu ifu kugyikʋtɔ.

⁵ Aha ánɩ́ bʋtodunka mʋ ansɩtɔ tɛtɩn. Pɛlɩ mɛ́ɛkɩta amʋ́ ɛkɛkɛɛkɛ.

⁶ Ɔwʋlaba anfɩ losu kpoli mʋ, olonu mʋ ɔmɛ, lɛ mʋ tsu mʋ ɩkplan fɛ́ɛ́tɔ.

⁷ Nana Bulu-ɔbɔpʋ togyo aha ánɩ́ bʋtenya mʋ ifu ɩwɩ, lɛ amʋ́ lɛ ɩkplantɔ.

⁸ Da mʋ ɔnɔ kɩ, afʋbɩ alɩá ɔbʋ ɔdwɛ. Ansɩ igyi ɔha ánɩ́ ɔtɛtanʋ mʋ.

⁹ Bulu aha, mlɩbu mʋ. Tsufɛ tɔtɔɔtɔ tamahian aha ánɩ́ bʋtenya mʋ ifu.

¹⁰ Ɩwɩ tɛklɩ gyata kʋraa, akʋn tɛkɩta mʋ. Tamɛ itoyile kʋkʋ tamahian ɔha ánɩ́ otodunka Nana Bulu.

¹¹ Mɩ abi, mlɩba. Mlɩyaa asʋ, mɩ ansuna mlɩ alɩá bʋtenya Nana Bulu ifu.

¹² Mlɩtɔ ma dɛ nkpa kle? Ma nkpa tɩntɩn tsia tɛpɛ ansɩ, odekleá obégyi ɔdwɛ mʋ nkpatɔ?

¹³ Mʋmʋ kɩ fʋ ɔdandʋ, ɩmáblɩ asʋn lalahɛ. Kɩ fʋ ɔnɔ, ɩmáwa afunu.

¹⁴ Si lakpan bwɛ, afʋbwɛ tɔá ɩbʋ alɛ. Dunka iwilwii, afʋgya mʋ́ ɔkpa.

¹⁵ Nana Bulu ansɩ dɩn yile abwɛpʋsʋ, otonu amʋ́ isu.

¹⁶ Tamɛ ɔtɔkʋsʋ lɩɩ lalahɛ abwɛpʋsʋ. Ɔbɔ́mɔ amʋ́ lɛ ɔsʋlʋsʋ. Ɔhaa mɛ́ɛtra kaɩn amʋ́sʋ.

¹⁷ Yile abwɛpʋ bosu kpoli Nana Bulu a, otonu. Ɔtɛlɛ amʋ́ tsu amʋ́ ɩkplantɔ.

¹⁸ Ɔma ɩfɔ aha ánɩ́ ɩlakpɔn amʋ́ wa. Ɔtɔhɔ aha ánɩ́ ɔkla lasrɩ amʋ́.

¹⁹ Yile ɔbwɛpʋ asʋn wunhɛ ɩtsɔ, tamɛ Nana Bulu tɛlɛ mʋ lɛ mʋ́ fɛ́ɛ́tɔ.

²⁰ Ɔtɛkɩ mʋsʋ, mʋ iwu kʋlɛ kʋraa tamabia.

²¹ Lalahɛ ɔbɔ́mɔ lalahɛ ɔbwɛpʋ. Bulu ɔbɛ́ha ɔha ánɩ́ otolu yile ɔbwɛpʋ ɩpɔn.

²² Nana Bulu tɔhɔ mʋ aha nkpa. Ɔtamaha aha ánɩ́ bʋtɛsrɩ tanʋ mʋ ɩpɔn.