Israelfɔ Ɩlʋ 33 - Bulu Ntam Pɔpwɛ mʋ́a Israel Ɩlʋ

Nana Bulu Asʋn Da Ɔkpa

¹ Yile abwɛpʋ, mlɩwa ɩlʋ ansigyisʋ ha Nana Bulu. Ɩbʋ alɛá aha ánɩ́ amʋ́ asʋn ɩda ɔkpa bɛ́kanfʋ mʋ.

² Mlɩpʋ nsankuo kanfʋ mʋ. Mlɩda ɩfɛ idu ɔsankuo, amlɩwa ɩlʋ dɛdɛ ha mʋ.

³ Mlɩwa ɩlʋ pɔpwɛ ha mʋ. Mlɩda ɔsankuo amʋ wanklaan, amlɩkplʋn ansigyisʋ ha mʋ.

⁴ Tsufɛ Nana Bulu asʋn da ɔkpa. Mʋ bwɛhɛ fɛ́ɛ́ igyi ɔnɔkwalɩ.

⁵ Otekle yilebwɛ pʋ́ asʋngyi ɔnɔkwalɩsʋ. Mʋ ɔdwɛá ɩma ɔka labʋla ɔyɩ.

⁶ Mʋ asʋn blɩhɛ ɔlɔpʋbwɛ ɔsʋsʋ, Ɔnɔ kɛkɛ ɔlɛlɛ, ntsrakpabi fɛ́ɛ́ bɛdalɩ.

⁷ Ɔlɛkpla ntsu fɛ́ɛ́ wa tsukʋlɛ bwɛ ɔpʋ. Oletin mʋ́ wa tsukʋlɛ ha mʋ ɩwɩ.

⁸ Ɔsʋlʋsʋ atsiapʋ fɛ́ɛ́, bʋnya Nana Bulu ifu. Ɔyɩtɔ atsiapʋ fɛ́ɛ́, bʋbu mʋ.

⁹ Tsufɛ ɔlɛblɩ, ɩlɛba mʋ́tɔ. Ɔlɛlɛ ɔnɔ, ɩlɛlɩɩ kinkiinkin.

¹⁰ Nana Bulu tɛha ɔmá-ɔmá asʋn tesin amʋ́ ɔnɔ, oteyinta amʋ́ nhɩhɩɛtɔ.

¹¹ Nana Bulu asʋn mʋ́ ɩda brɛ fɛ́ɛ́. Mʋ nhɩhɩɛ ɛ bʋ ɩnʋ yɛtʋ ɔha abi-aná fɛ́ɛ́.

¹² Ansɩ igyi ɔmá oduá Nana Bulu gyi amʋ́ Bulu. Aha ánɩ́ ɔlɛlɛ pʋ́ amʋ́ bwɛ mʋ ogyikpa.

¹³ Otowun atɔ tsu ɔsʋsʋ kein, ɔdɛ anyankpʋsa fɛ́ɛ́ wun.

¹⁴ Otsie mʋ obiasʋ ɔsʋsʋ, ɔdɛ ɔsʋlʋsʋ atsiapʋ fɛ́ɛ́ wun.

¹⁵ Mʋlɔbwɛ okugyiɔkʋ ɩklʋn. Mʋ́ sʋ otonu amʋ́ bwɛhɛ asɩ.

¹⁶ Megyi ɩsa akɔpʋ ɔdʋdʋɔ tɛha owie tegyi ɩsʋ. Megyi ɩsa ɔkɔpʋ onuto ɔwʋnlɩn tɛha mʋ ɔtɔyɔ ɩsa ba.

¹⁷ Ɔpɔnkɔ megyi tɔtɔ ɩsa ɔkɔkɛ. Mʋ ɔwʋnlɩn kpɔnkpɔntɩ amʋ ɩmɛ́ɛtalɩ hɔ ɩsa ɔkɔpʋ nkpa.

¹⁸ Kɩ, Nana Bulu ansɩ dɩn aha ánɩ́ bʋtobu mʋsʋ. Amʋ́gyi aha ánɩ́ amʋ́ ansɩ dɩn mʋ ɔdwɛá ɩma ɔkasʋ.

¹⁹ Ɔbɛ́lɛ amʋ́ tsu lowutɔ, hɔ amʋ́ nkpa akʋnbɩ.

²⁰ Anɩdɛ Nana Bulu ɔkpa kɩ. Mʋgyi anɩ bʋalɛ ogyipʋ pʋ́ anɩ ɩwɩ ɩban.

²¹ Mʋ sʋ ansɩ dɛ anɩ gyi, anɩ ansɩ dɩn mʋ ɩda wankɩhɛ amʋsʋ.

²² Nana Bulu, ha fʋ ɔdwɛá ɩma ɔka ibuo anɩ, fɛ alɩá anɩ ansɩ dɩn fʋsʋ.