Israelfɔ Ɩlʋ 32 - Bulu Ntam Pɔpwɛ mʋ́a Israel Ɩlʋ

Aha Yile Ansɩ Igyi Bulu Ɩwɩ

Dawid atosuna ɩlʋ.

¹ Ansɩ igyi ɔha ánɩ́ Bulu lasi mʋ lakpan kie mʋ, bun ansibi mʋ lakpansʋ.

² Ansɩ igyi ɔha ánɩ́ Nana Bulu mɔ́hɔ mʋ lalahɛ, afunu ɩma mʋtɔ.

³ Tsufɛ brɛá nekina mɩ lakpan lɛ blɩ a, nosu ekekegyiɛkɛ alɩɩ wʋlɩ lɛ akankawu.

⁴ Tsufɛ fɛbɩtɩ mɩ ɩsʋ ɔpa mʋ́a onye. Ɔŋɛ lɛta mɩ awútɔ, fɛ alɩá ntsu tɛkpɩ awikpanbɩ. Ɩya.

⁵ Ɩnʋ nɛlɛ mɩ lakpan fɛ́ɛ́ bla fʋ. Mmesi kʋkʋ ŋain fʋ. Nɛblɩ mbɛɛ, “Nɛ́lɛ mɩ lakpan fɛ́ɛ́ bla Nana Bulu.” Ɩnʋ fesi mɩ ɩsʋbɩtɩ kie mɩ. Ɩya.

⁶ Mʋ́ sʋ ha aha ánɩ́ bʋtamakpa fʋ ɔma fɛ́ɛ́ abʋsu kpoli fʋ, brɛá bɛ́talɩ nya fʋ. Mɛnɩ nɩ ntsu ɩbʋla alɩágyialɩá kʋraa a, ɩmɛ́ɛkɩta amʋ́.

⁷ Oŋainkpa fʋgyi ha mɩ, fʋtogyo mɩ ɩwɩ ɩkplanbɩ. Falɛ mɩ, pʋ mʋ́ ɩlʋ bomli mɩ. Ɩya.

⁸ Ɩnʋ Nana Bulu lɛblɩ ɔbɛɛ, “Nósuna fʋ asʋn-asɩnu pʋ́ ɔkpa ánɩ́ fɔ́tsʋn mʋ́sʋ. Nɔ́tɔɩ kpla fʋ, kɩ fʋsʋ.

⁹ Mábwɛ fɛ ɔpɔnkɔ ntɛ ɔpɔnsʋraá omeyin tɔtɔ. Nkɛtɩ fapʋ datɔbi mʋ́a mʋ́ ɩwɩ ɔfɛ wa mʋ ɔnɔtɔ, bɩtɩa mʋ asa ɔtɛba fʋ wa.”

¹⁰ Ɔha lalahɛ ipian ɩhɩɛ tsɔ, tamɛ ɔha ánɩ́ ɔlɔpʋ ansɩ dɩnka Nana Bulusʋ a, ɔbɔ́pʋ mʋ ɔdwɛá ɩma ɔka gyi ɩban wa mʋ.

¹¹ Aha yile, mlɩ ansɩ igyi Bulu ɩwɩ, amlɩtswɩ ope. Aha ánɩ́ amʋ́ asʋn da ɔkpa, mlɩkplʋn kanfʋ mʋ.