Israelfɔ Ɩlʋ 27 - Bulu Ntam Pɔpwɛ mʋ́a Israel Ɩlʋ

Nana Bulu, Fʋ Ndedunka

Dawid ɩlʋ.

¹ Nana Bulu tɔwankɩ mɩ ɔkpasʋ, ɔtɔhɔ mɩ nkpa. Ma nénya ifu? Nana Bulu ntɛsrɩ tanʋ mɩ nkpatɔ fɛ́ɛ́. Ma ɔbɛ́ha opuni bétsii mɩ?

² Nɩ aha lalahɛ, alupʋ pʋ́ adʋn bɔkʋsʋ bɛɛ bɔ́wɩ mɩ a, bósutin dɩda kpla.

³ Ɩsa akɔpʋ bɛkafia mɩ kʋraa a, opuni méetsii mɩ. Nɩ ɩsa ɩda mɩsʋ kʋraa a, nɔ́pʋ ansɩ dɩnka Bulusʋ.

⁴ Toku kʋlɛ pɛ ndɛ Nana Bulu kʋlɩ. Mʋ́ ɔkpa négya. Mʋ́gyi; nétsia mʋ woyitɔ mɩ nkpatɔ fɛ́ɛ́, pʋ mɩ ansibi wun alɩá ɔbʋ alɛ, gywɩɩn mʋ́ ɩwɩ mʋ ɔtswɛkpa ɩnʋ.

⁵ Tsufɛ ɔbɔ́pʋ mɩ ŋain mʋ otsiakpa mɩ ɔkplankɛ. Obéŋain mɩ mʋ woyitɔ. Obótsu mɩ dɩnka ɩbʋta fʋahɛsʋ, mɛnɩ mɩ alupʋ bʋméenya mɩ.

⁶ Mʋ́ sʋ négyi adʋn amʋʋ bɛkafia mɩ klinklin amʋsʋ. Nɔ́pʋ ansigyi bɔ afɔdɩɛ mʋ otsiakpa. Nɔ́pʋ ɔmɛá ɩbʋ anulɛ wa ɩlʋ, da ɔsankuo ha mʋ.

⁷ Nana Bulu, nosu kpoli fʋ kʋklʋkʋʋ a, nu. Wun mɩ nwɛ, afʋsɔ mɩ ɔnɔ.

⁸ Mɩ ɩklʋn ɔbɛɛ, “Dunka mʋ!” Mʋ́ mbɛɛ, “Nana Bulu, fʋ ndedunka.”

⁹ Mápʋ ansɩtɔ ŋain mɩ. Mápʋ ɔblɔ wuta mɩ fʋ osumbi tɛɩa fʋ ɩwɩ. Fʋgyi mɩ ɔbʋapʋ. Mátswɩ mɩ tsalɩfwɩ. Mɩ nkpa ɔhɔpʋ Bulu, mákpa mɩ ɔma.

¹⁰ Tsufɛ mɩ sɩ mʋa mɩ yin basi mɩ tswɩ, tamɛ Nana Bulu mʋ́ ɔbɔ́hɔ mɩ.

¹¹ Nana Bulu, mɩ alupʋ sʋ suna mɩ fʋ ɔkpa, afʋkpa mɩ tsʋn ɔkpa tswiihɛsʋ.

¹² Mási mɩ, ankpa wie mɩ alupʋ ɩbɩtɔ, tsufɛ adansɩfɔ afunupʋ bakʋsʋ mɩsʋ, bʋdɛ mɩ huna.

¹³ Nahogyiá nówun Nana Bulu alɛ asa nówu.

¹⁴ Dɩnka ansɩ Nana Bulusʋ, afʋwa ɩwɩ ɔwʋnlɩn. Nya ɩklʋn, afʋkɩ Nana Bulu ɔkpa!