Israelfɔ Ɩlʋ 25 - Bulu Ntam Pɔpwɛ mʋ́a Israel Ɩlʋ

Nana Bulu, Suna Mɩ Fʋ Ɔtsʋnkpa

Dawid ɩlʋ.

¹ Oo! Nana Bulu, fʋsʋ napʋ mɩ ɩklʋn dɩnka.

² Oo! mɩ Bulu, fʋsʋ mɩ ansɩ dɩn. Máha pɛlɩ ɩkɩta mɩ. Máha ansɩ igyi mɩ alupʋ mɩ sʋ.

³ Lɛlɛ mʋ́ a, pɛlɩ mɛ́ɛkɩta aha ánɩ́ amʋ́ ansɩ dɩn fʋsʋ ɛkɛkɛɛkɛ. Aha ánɩ́ bʋtamagyi amʋ́ asʋn blɩhɛsʋ mboun pɛlɩ bɛ́kɩta.

⁴ Oo Nana Bulu, ha mɩ ambɩ fʋ ɩkpa. Suna mɩ fʋ ɔtsʋnkpa.

⁵ Kpa mɩ ambuo fʋ ɔnɔkwalɩ, afʋsuna mɩ atɔ, tsufɛ fʋgyi mɩ nkpa ɔhɔpʋ Bulu. Fʋ ansɩtɔ ndɛkɩ ɔyɩkɛhɛ fɛ́ɛ́.

⁶ Anɩ Wie Bulu, kaɩn fʋ nwewun pʋ́ fʋ ɔdwɛá ɩma ɔkasʋ, tsufɛ ɩbʋ nʋ tsu bɩmbɩ ɔpá.

⁷ Nana Bulu, mákaɩn mɩ nyebitɔ lakpan mʋ́a mɩ bwɛhɛ lalahɛ. Mboun fʋ ɔdwɛá ɩma ɔka pʋ́ fʋ wanklaan sʋ kaɩn mɩsʋ.

⁸ Ɔha wanklaan Nana Bulu gyi. Mʋ asʋn da ɔkpa. Mʋ́ sʋ otosuna lakpan abwɛpʋ ɔkpa.

⁹ Ɔtɛkpa ɩwɩasɩ abapʋ, bʋtɔbwɛ yile. Otosuna amʋ́ mʋ ɔkpa.

¹⁰ Nana Bulu ɩkpa fɛ́ɛ́ igyi ɔdwɛá ɩma ɔka mʋ́a ɔnɔkwalɩ, ha mʋ ntam pʋ́ ɔnɔá ɔlɛlɛsʋ agyipʋ.

¹¹ Oo Nana Bulu! Fʋ ɩda sʋ si mɩ lalahɛ kie mɩ. Ɩbʋ mʋ́tɔá ilomoni dʋbɩ.

¹² Ma tenya Nana Bulu ifu? Mʋgyi ɔha ánɩ́ Nana Bulu tosuna ɔtsʋnkpa.

¹³ Mʋ obétsia ɔdwɛtɔ, mʋ abi-aná bégyi ɔsʋlʋ amʋ.

¹⁴ Nana Bulu tɛlɛ mʋ nwuntɔ asʋn suna mʋ ifu anyapʋ. Ɔtɛha bʋtɛbɩ mʋ ntam.

¹⁵ Mɩ ansɩ dɩn Nana Bulusʋ brɛ fɛ́ɛ́, tsufɛ mʋ ɔbɛ́lɛ mɩ ayabi lɛ ayibitɔ.

¹⁶ Damli ansɩ kɩ mɩ, afʋwun mɩ nwɛ. Tsufɛ ɔbakʋlɛ ngyi. Mɩ ɩla bʋ nwɛ.

¹⁷ Nwɛla ɩtɔ mɩ klʋntɔ. Lɛ mɩ tsu mɩ ɩkplantɔ.

¹⁸ Kɩ mɩ ɩkplan pʋ́ mɩ asʋn wunhɛ, afʋsi mɩ lalahɛ fɛ́ɛ́ kie mɩ.

¹⁹ Kɩ alɩá mɩ alupʋ bʋhɩɛ bʋtsɔ, bapʋ owuntɔlɩn bʋdɛ mɩ lu.

²⁰ Kpla mɩ ɔkla wa ɩwɩtɔ, afʋlɛ mɩ. Máha pɛlɩ ɩkɩta mɩ, tsufɛ fʋ nasrɩ tanʋ.

²¹ Fʋsʋ mɩ ansɩ dɩn, gyo mɩ ɩwɩ; tsufɛ mɩ asʋn da ɔkpa, ɔlala ma mɩ ɩwɩ.

²² Oo Bulu, lɛ Israelfɔ lɛ amʋ́ ɩkplan fɛ́ɛ́tɔ.