Israelfɔ Ɩlʋ 22 - Bulu Ntam Pɔpwɛ mʋ́a Israel Ɩlʋ

Nana Bulu Bʋ Iwiegyi

Dawid kanfʋ-ɩlʋ ha ɩlʋ osunapʋ. Bɔ́pʋ bakɛ nani ɔmɛ wa mʋ́.

¹ Mɩ Bulu, mɩ Bulu, ntogyi sʋ fakpa mɩ ɔma? Nasu kpoli fʋ nwɛsʋ, tamɛ mɩ Ɔhɔpʋ Bulu, fawa ɩfɔ mɩ wa.

² Mɩ Bulu, ntokpoli fʋ ɔyɩkɛhɛ, fʋtamanu mɩ isu. Ntamasi fʋ kpoli onye, tamɛ ɩwɩ molwii mɩ.

³ Tamɛ fʋ mʋ́ fʋna ɔtsan. Israelfɔ kanfʋ gyi fʋ obia.

⁴ Fʋsʋ anɩ anain bɔpʋ ansɩ dɩnka. Bɛdɩnka ansɩ fʋsʋ, fɛlɛ amʋ́ tsu ɩkplantɔ.

⁵ Fʋ bosu kpoli, fɛlɛ amʋ́. Fʋsʋ bɔpʋ ansɩ dɩnka, pɛlɩ mɛkɩta amʋ́.

⁶ Tamɛ mɩ mʋ́ a, nyambi ngyi. Mmegyi nyankpʋsa. Ɩwɩ nyankɩla ngyi ha anyankpʋsa. Ɔhaa tamafia mɩ.

⁷ Ɔhagyiɔha owun mɩ ɔtɔbwɛ mɩ ɔblɔla. Bʋtenyankpa ansɩtɔ, kpʋkpʋ nwuntɔ, blɩ bɛɛ,

⁸ “Mʋ ansɩ dɩn Nana Bulusʋ, ɔhɔ mʋ. Mʋ ansɩ tegyi mʋ ɩwɩ. Mʋ́ sʋ ɔlɛ mʋ!”

⁹ Fʋlɛlɛ mɩ tsu mɩ yin opunitɔ. Fɛha nɔpʋ ansɩ dɩnka fʋsʋ brɛá ndenyɔpʋ.

¹⁰ Besi mɩ dɩnka fʋsʋ tsu brɛá bɔkwɩɩ mɩ. Tsu mɩ yin iputɔ ɔpá fʋgyi mɩ Bulu.

¹¹ Máwa ɩfɔ mɩ ɩwɩ, tsufɛ ɩkplan latʋ mɩ ta. Ɔhɔpʋ má mɩ ɩnʋ.

¹² Mɩ alupʋ bakafia mɩ, fɛ nnantswie yinhɛ tsɔtsɔɔtsɔ. Basan ɔmátɔ nnantswieá bʋbʋ ifu babomli mɩ.

¹³ Mɩ alupʋ anfɩ bayaa ɔnɔ gblaun wa mɩ. Fɛ gyata ɔtrapʋ dekpoun, ɔdɛ ɔbwɩá alakɩta tɩtɩ.

¹⁴ Mɩ ntsantsin yɔyɔɔyɔ, fɛ ntsu batsɛɩ wʋlɩ. Mɩ ɩklʋn labwɛ fɛ okpin, ɩlaŋlaɩn wa mɩ ɩwɩtɔ.

¹⁵ Ɔwʋnlɩn lata mɩtɔ fɛ planfɔ. Mɩ ɔdandʋ laklɩ mɩ ɔnɔtɔ. Faha nda lowu ɔbɔnɔ.

¹⁶ Akɩaɩ bakafia mɩ. Aha lalahɛ bada ɔbʋn wa mɩ. Amʋ́ ayín lafuti mɩ ɩbɩ pʋ́ mɩ ayabi fɛ gyata.

¹⁷ Nɛ́talɩ kla mɩ awú fɛ́ɛ́. Mɩ alupʋ bówun mɩ, lɛ ansɩ yi mɩsʋ.

¹⁸ ­­Beye mɩ atadɩɛ ha aba, bɔtswɩ abi mɩ atadɩɛ tɩntɩnsʋ.

¹⁹ Oo Nana Bulu, máwa ɩfɔ mɩ ɩwɩ, mɩ ɔwʋnlɩn ɔwapʋ, wa ɔsa bɔhɔ mɩ.

²⁰ Hɔ mɩ lɛ ɔdayi ɔnɔ. Hɔ mɩ ɔkla ɔkʋkʋnʋ ɔkʋlɛ lɛ akɩaɩ anfɩ ɩbɩ.

²¹ Lɛ mɩ tsu agyata anfɩ ɔnɔ. Tsú akpokpo anfɩ bʋbʋ ɩyɩn anfɩ nsiebi ɔnɔ.

²² Nɛ́kla fʋ bwɛhɛ suna mɩ apio. Nɛ́kanfʋ fʋ anɩ ɔpasuatɔ.

²³ Nana Bulu ifu anyapʋ fɛ́ɛ́, mlɩkanfʋ mʋ. Yakob abi-aná, mlɩwa mʋ numnyam. Israel abi-aná, mlɩbu mʋ.

²⁴ Tsufɛ ɔtamakɩ ohiani mʋ ipian owunkɛ, ki nwun. Ɔtamadamli ɔma ha mʋ. Osu kpoli mʋ a, ɔtɔsɔ mʋ ɔnɔ.

²⁵ Fʋtɛha ntɛkanfʋ fʋ aha tsɔtsɔɔtsɔ ansɩtɔ anɩ ɔpasuatɔ. Nɛ́ka fʋ ɩkɔá notsula fʋ ifu anyapʋ ansɩtɔ.

²⁶ Aha ánɩ́ bʋma tɔtɔ bégyi mwɛ. Fʋ adunkapʋ bɛ́kanfʋ fʋ. Ɩwa alɛ ha amʋ́ brɛ fɛ́ɛ́!

²⁷ Nana Bulu, ɔyɩtɔ aha fɛ́ɛ́ bɛ́kaɩn fʋsʋ, damli kɩ fʋ. Abusuangyiabusuan bósum fʋ.

²⁸ Tsufɛ Nana Bulu bʋ iwiegyi. Mʋdɛ ɔmá fɛ́ɛ́sʋ gyi.

²⁹ Ɔyɩtɔ ɩwɩ atsupʋ fɛ́ɛ́ bɛ́ba ɩwɩasɩ sum mʋ. Aha ánɩ́ bowun ánɩ́ bʋmɛ́ɛtalɩ hɔ amʋ́ ɩwɩ nkpa fɛ́ɛ́, pʋ́ aha ánɩ́ bóbowu bóbun sum mʋ.

³⁰ Abi-aná fɛ́ɛ́ bósum mʋ. Bɛ́blɩ mʋ ɩwɩ asʋn suna amʋ́ aná.

³¹ Bɛ́da mʋ yilebwɛ ɔkan suna aha ánɩ́ bɛ́bɛlɩn ánɩ́ mʋlabwɛ.