Israelfɔ Ɩlʋ 21 - Bulu Ntam Pɔpwɛ mʋ́a Israel Ɩlʋ

Ɔsʋsʋʋsʋ Mʋ Wie Ɔdwɛ Ɩma Ɔka

Dawid kanfʋ-ɩlʋ ha ɩlʋ osunapʋ.

¹ Oo Nana Bulu, owie lanya ansigyi fʋ ɩsʋgyi sʋ. Kɩ alɩá awútɔ lakʋkʋ sankɩ mʋ.

² Tɔá ɔlɔkʋlɩ tsu mʋ ɩklʋntɔ faha mʋ a. Fʋmekina tɔá ɔlɛfɩtɛ fʋ. Ɩya.

³ Tsufɛ foyula mʋ, yile lefia mʋ. Fɔpʋ sika pɛpɛpa bun mʋ nwun.

⁴ Ɔlɔkʋlɩ nkpa, fɛha mʋ nkpa tɩntɩn; obétsia brɛ fɛ́ɛ́.

⁵ Ɩsʋgyiá fɛha mʋ sʋ alahɩɛ nya numnyam. Fapʋ obú dɩnka mʋsʋ, tsu mʋ ansɩtɔ fʋa.

⁶ Ee, faha mʋ oyula ánɩ́ ɩmɛ́ɛka itin. Fʋ wa tsia tɛhɩɛ kana mʋ,

⁷ tsufɛ owie lɔpʋ mʋ ansɩ dɩnka Nana Bulusʋ. Ɔsʋsʋʋsʋ Mʋ Wie ɔdwɛá ɩma ɔka sʋ, ɔmɛ́ɛha mʋ ɔmɛ́ɛdɩda ɛkɛkɛɛkɛ.

⁸ Fʋ ɩbɩ bɛ́da fʋ alupʋ. Fʋ gyɔpɩ bénya fʋ adʋn.

⁹ Nɩ fɛba a, fɔ́pʋ obuntɔ ogya hɔ amʋ́. Fɔ́pʋ ɔblɔ mɛ amʋ́, ogya bɔ́hɔ amʋ́.

¹⁰ Fɛ́ha amʋ́ asɩ bɛ́ta lɛ ɔyɩtɔ. Amʋ́ abi-aná bʋmɛ́ɛtra tsia anyankpʋsatɔ ɛkɛkɛɛkɛ.

¹¹ Nɩ bosuan fʋsʋ, ntɛ kʋsʋ fʋsʋ a, bʋmɛ́ɛtalɩ.

¹² Fɔ́wa amʋ́ ifu, bɛ́srɩ; tsufɛ fɔ́pʋ fʋ ɔbɩn sʋta amʋ́.

¹³ Oo Nana Bulu, fʋ ɔwʋnlɩn sʋ, aha bʋtsu fʋ fʋa. Fʋ hayinhɛgyi sʋ abɔ́wa ɩlʋ, da akwɛ kanfʋ fʋ.