Israelfɔ Ɩlʋ 19 - Bulu Ntam Pɔpwɛ mʋ́a Israel Ɩlʋ

Nana Bulu mbla lɔfʋn

Dawid kanfʋ-ɩlʋ ha ɩlʋ osunapʋ.

¹ Kɩ alɩá ɔsʋsʋ ɩdɛ Bulu numnyam ɔwan lɛ, pʋ́ alɩá nwʋlʋta lakʋkʋ ɩdɛ Bulu atɔ bwɛhɛ lɛ suna.

² Ekekegyiɛkɛ ɩdɛ mʋ ɩwɩ asʋn blɩ. Onyegyionye ɛ ɩdɛ mʋ lɛ suna.

³ Bʋmɛdɛ ɔblɩ kʋkʋ blɩ, bʋmɛdɛtɔɩ, tamɛ anɩdɛ mʋ asɩ nu.

⁴ Amʋ́ ɔmɛ towie ɔyɩtɔ fɛ́ɛ́, amʋ́ asʋn tɔyɔ ɔyɩ ɔka. Bulu labwɛ otsiakpa nwʋlʋtasʋ ha owi.

⁵ Ɔtɛdalɩ tsu ɩnʋ fɛ ɔka pɔpwɛ otsiapʋ dɛdalɩ mʋ obutotɔ. Ansɩ tegyi mʋ fɛ ɔwʋnlɩnpʋ oyetsii ɔsrɩ.

⁶ Ɔtɔkʋsʋ tsu nwʋlʋta ɔka yewie mʋ́ ɔka. Ɔtɛkplɩ yewie fʋnka nyɔsɩ. Tɔtɔ tamaŋain mʋ okunku.

⁷ Nana Bulu atosunahɛ lɔfʋn. Ɩtɔwa ɔha ɩklʋn ɔwʋnlɩn. Mʋ ɔnɔlɛ igyi ɔnɔkwalɩ. Ɩtɛha ɔha mimlahɛ tɛtɩn ansɩ.

⁸ Nana Bulu mbla ɩda ɔkpa, ɩtɛha ansɩ tegyi ɔha. Mʋ mbla lɔwankɩ. Ɩtɛtɩtɩ ɔha ansɩsʋ.

⁹ Nana Bulu ifunya bʋ alɛ. Ɩbʋ ɩnʋ brɛ fɛ́ɛ́. Mʋ asʋnbua igyi ɔnɔkwalɩ. Mʋ́ fɛ́ɛ́ da ɔkpa.

¹⁰ Ɩbʋ ibia dʋn sika pɛpɛ. Ɩdʋn sika pɛpɛ onuto-onuto. Ɩbʋ ɔdwɛ dʋn ɔkwɛn. Ɩbʋ ɔdwɛ dʋn akwatabitɔ ɔkwɛn.

¹¹ Ɩtɛda mɩ fʋ osumbi ɔla. Mʋ́sʋ gyi ɩhɩɛ bʋ labi kpɔnkpɔɔnkpɔntɩ.

¹² Ma ɔbɛ́talɩ wun tsitsa ánɩ́ mabwɛ? Si mɩ lalahɛá mmowun kie mɩ.

¹³ Máha mɩ fʋ osumbi anfɩ ankɩansɩ bwɛ lakpan. Máha mʋ́ igyi mɩsʋ, mɛnɩ ɔlala méetsia mɩ ɩwɩ. Fówun mméegyi ɩpɔn ánɩ́ nabwɛ lakpan kpɔnkpɔntɩ.

¹⁴ Oo Nana Bulu, mɩ ɩbʋta pʋ́ mɩ ɔkalɛpʋ, ha mɩ ɔnɔtɔ asʋn pʋ́ mɩ asʋn susuhɛ igyi fʋ ansɩ.