Israelfɔ Ɩlʋ 18 - Bulu Ntam Pɔpwɛ mʋ́a Israel Ɩlʋ

Nana Bulu Ɔkpa lɔfʋn, Mʋ Asʋn Fɛ́ɛ́ Bʋ Mʋ́tɔ

Dawid ɩlʋ ha ɩlʋ osunapʋ. Ɩlʋá Nana Bulu osumbi Dawid lɔpʋda mʋ ɩpan brɛá ɔlɛlɛ mʋ tsu mʋ alupʋ pʋ́ Saul ɩbɩ.

¹ Oo Nana Bulu, mɩ ɔwʋnlɩn ɔwapʋ; ntɛhɩɛ dwɛ fʋ.

² Fʋgyi mɩ ɩbʋ fʋahɛ, mɩ oŋainkpa kpikpli pʋ́ mɩ ɔlɛpʋ. Mɩ Bulu, mɩ ɩbʋta ánɩ́ ntɛsrɩ tanʋ. Mɩ ɩwɩ ɩban, mɩ ɔwʋnlɩn ánɩ́ ɔtɔhɔ mɩ nkpa pʋ́ mɩ ɔtanʋkpa kinkin.

³ Ntosu kpoli Nana Bulu, ɩkanfʋ mʋ wie. Ɔtɔhɔ mɩ lɛ mɩ alupʋ ɩbɩtɔ.

⁴ Lowu ɩfla lɔwa kɩta mɩ. Ntsuá ɩbʋ ɩyɩn lɔbʋla kɩta mɩ.

⁵ Afulitɔ ɔyɔɩ lemli mɩ, lowu agbla lɛkɩta mɩ.

⁶ Nosu kpoli Nana Bulu brɛá mbʋ ɩkplan anfɩtɔ. Nɔkplʋn kpoli mɩ Bulu mbɛɛ, ɔlɛ mɩ. Olonu mɩ isu mʋ ɔtswɛkpa ɩnʋ. Mɩ okitikiti lɔtʋ mʋ. Mɩ isu lowie mʋ asʋtɔ.

⁷ Ɩnʋ ɔsʋlʋ lɛkan ɩwɩ, kpɩnkɩ. Abʋ tsitsi ɛ lɛka ɩwɩ kpɩnkɩ, tsufɛ ɔblɔ dɛ mʋ.

⁸ Mʋ ɔwɔntɩtɔ ɩdɛ ogyasi, ogya plɛnplɛn ánɩ́ mʋ́ ɔnɔ bʋ ɔnlɩn dɛdalɩ tsu mʋ́ ɔnɔtɔ. Agyawunuá ɩdɛhɔ lɛdalɩ tsu mʋtɔ.

⁹ Ɔlɛnɛ ɔsʋsʋ, kplɩ ba ayasɩ. Oklun tuun bun mʋ ayabiasɩ.

¹⁰ Ɔlɛdɩnka kerubsʋ, fuli ba. Ɔlɛdɩnka afu bambisʋ ba hwim.

¹¹ Ɔlɔpʋ oklun bun ɩwɩ. Nyankpʋ mʋ́a agyinde tuun lobomli mʋ.

¹² Mʋ ɩwɩ lɔwankɩ. Nsaɩntɔ lɛkpa ogya, atsufolibi lotswie tsu mʋ ɩwɩwankɩ amʋtɔ tsʋn agyinde amʋtɔ ba.

¹³ Nana Bulu lɛha ɔprada lɔpʋtɩ ɔsʋsʋ. Ɔsʋsʋʋsʋ Mʋ Wie ɔmɛ lɛlɩn. Nsaɩntɔ lɛkpa ogya, atsufolibi lotswie.

¹⁴ Ɔlɔtswɩ mʋ mbɩn da mʋ alupʋ saɩn. Ɔlɛha nsaɩntɔ lɛkpa ogya, begyigya.

¹⁵ Nana Bulu, fɔwa ɩyɩn, si ɔŋɛ da fwɩfwɩ; ɔpʋ bʋnkpatɔ lɛya. Ɔsʋlʋ ntswɩasɩ lɛdɩ yaya.

¹⁶ Fɔtswɩ ɩbɩ tsu ɔsʋsʋ kɩta mɩ, bɩtɩa mɩ lɛ ntsu kluklutɔ.

¹⁷ Ɔlɛlɛ mɩ tsu mɩ ɔdʋkplakpatɩ ɩbɩtɔ, lɛ mɩ alupʋ ɩbɩ, tsufɛ bʋhɩɛ bʋdʋn mɩ.

¹⁸ Bowie mɩtɔ ɛkɛá mbʋ ɩkplantɔ, tamɛ Nana Bulu lɔbwɛ mɩ ɔma ɔlɩɩpʋ.

¹⁹ Ɔlɛlɛ mɩ, pʋ mɩ ba ɔtɛɩkpa, tsufɛ mɩ asʋn tegyi mʋ ansɩ.

²⁰ Mɩ yilebwɛ sʋ Nana Bulu legyi mɩ bʋalɛ. Ɔlala ɩma mɩ ɩwɩ. Mʋ́ sʋ ɔlɔpʋ yile ka mɩ ɩkɔ.

²¹ Tsufɛ nagyi Nana Bulu asʋnsʋ. Mmɔkʋbwɛ lakpan yinki mɩ Bulu ɔma.

²² Ntegyi mʋ mblasʋ. Mmɔkʋsi mʋ amandɩɛ tswɩ.

²³ Ɔlala ɩma mɩ ɩwɩ mʋ ansɩtɔ. Ntɛkɩ mɩ ɔtsakpa, mɛnɩ mméegyi ɩpɔn.

²⁴ Mɩ yilebwɛ sʋ Nana Bulu lagyi mɩ bʋalɛ. Ɔlala ɩma mɩ ɩwɩ. Mʋ́ sʋ alapʋ yile ka mɩ ɩkɔ.

²⁵ Fʋtegyi ɔnɔkwalɩ ha ɔnɔkwalɩpʋ. Fʋma ɔlala ha ɔha ánɩ́ ɔlala ma mʋ ɩwɩ.

²⁶ Fʋtɛlɛ fʋ ɩklʋntɔ wankɩhɛ suna ɔha ánɩ́ mʋ ɩklʋntɔ lɔwankɩ. Fʋyin alɩá fʋtɔpʋkpa ɔha ánɩ́ mʋ ɔkpa lɔnɔ.

²⁷ Tsufɛ fʋtɔhɔ ɩwɩasɩ abapʋ nkpa, tamɛ fʋtɛba ɩwɩ atsupʋ asɩ.

²⁸ Lɛlɛ, fʋtɛha mɩ ɔkandɩɛ tɔwankɩ. Nana Bulu, mɩ Bulu, fʋtɛha mɩ oklun temli wankɩ.

²⁹ Fʋ sʋ ntɛtalɩ gyi adʋnsʋ. Ɩna fʋ sʋ ntɛtalɩ fuli nyankɩ abuntisʋ bwie awulu.

³⁰ Bulu mʋ́ a, mʋ ɔkpa lɔfʋn. Tɔá ɔlɛhɩɛ fɛ́ɛ́ bʋ mʋ́tɔ. Otegyi ɩban wa ɔhagyiɔha ánɩ́ ɔtɛsrɩ tanʋ mʋ.

³¹ Tsufɛ Nana Bulu ɔma a, Bulu ɔmɔmʋ bʋ ɩnʋ? Bulu ɔma a, bʋta mɔmʋ bʋ ɩnʋ?

³² Mʋtɔwa mɩ ɔwʋnlɩn, ɔtɛha ɔkpatɔ tolwii ha mɩ pisii.

³³ Mʋlɔwa mɩ ayabi ɔwʋnlɩn fɛ nani, pʋ mɩ lɩɩ ɔfʋakpa.

³⁴ Mʋtosuna mɩ ɩbɩ ɩsa kɔ, ntɛtalɩ nɛ kɔɔbrɩ ɩta.

³⁵ Oo Nana Bulu, fʋlegyi ɩban wa mɩ, hɔ mɩ nkpa. Fʋ gyɔpɩ ɩbɩ lɛkɩta mɩ lɩɩ. Fʋlaba ɩwɩasɩ, ha mɩ nabwɛ ɔha kpɔnkpɔntɩ.

³⁶ Fɔtɔ ɔkpa ha mɩ, mɩ otebi mɔtswɩ tsɛlɛ.

³⁷ Nɛdɩnka mɩ alupʋsʋ yɛkɩta amʋ́. Mmeyinki ɔma yɛfʋn brɛá bɛta fɛ́ɛ́.

³⁸ Nobwie amʋ́ bun mɩ ayabiasɩ, bʋmɛtalɩ tra kʋsʋ.

³⁹ Tsufɛ fɔwa mɩ ɔwʋnlɩn ha ɩsakɔ. Fɛba mɩ adʋn asɩ, pʋ amʋ́ wa mɩ asɩ.

⁴⁰ Fɛha mɩ alupʋ bɛsanki amʋ́ yama srɩ. Nɔmɔ aha ánɩ́ bʋdɛ mɩ ɩsa kɔ.

⁴¹ Bosu kpoli, tamɛ ɔhɔpʋ ɔkʋkʋ má ɩnʋ. Bosu kpoli Nana Bulu ɛ, tamɛ ɔmɛkpla amʋ́.

⁴² Nɔkwɛ amʋ́ pukupuku, fɛ otutu afu ansɩtɔ. Nɛtsɛɩ amʋ́ wʋlɩ, fɛ dɩnsʋ ipi.

⁴³ Adʋn bɔkʋsʋ mɩsʋ, fɔhɔ mɩ lɛ amʋ́ ɩbɩ. Fɛyaɩ mɩ ɔmá-ɔmá ɔkpapʋ. Aha ánɩ́ mmeyin kʋraa bosum mɩ.

⁴⁴ Afɔɔ bɔwɔ awunu mɩ ansɩtɔ. Benya nu mɩ ɔmɛ pɛ bagyi mʋ́sʋ.

⁴⁵ Atɛtɔ lowu amʋ́, bʋdɛkpɩnkɩ kpakpakpakpa wɔ dalɩ amʋ́ oŋainkpa.

⁴⁶ Nana Bulu tsie nkpa! Bʋkanfʋ mɩ bʋta. Bʋtsu mɩ nkpa ɔhɔpʋ Bulu fʋa.

⁴⁷ Bulu tɛka mɩ alupʋ ɩkɔ. Ɔtɛba ɔmá-ɔmá asɩ, pʋ amʋ́ wa mɩ asɩ.

⁴⁸ Mʋtɛlɛ mɩ lɛ mɩ alupʋ ɩbɩ. Fotsu mɩ fʋa dʋn amʋ́; fɛlɛ mɩ lɛ awuntɔlɩnpʋ ɩbɩ.

⁴⁹ Oo Nana Bulu, ɩnɩ sʋ nɛ́kanfʋ fʋ ɔmá-ɔmá ansɩtɔ. Nɔ́wa ɩlʋ kanfʋ fʋ ɩda.

⁵⁰ Fʋtɛha fʋ owie ɩsʋgyi akpɔnkpɔntɩ. Fʋtɛlɛ fʋ ɔdwɛá ɩma ɔka suna mɩ Dawid ánɩ́ fada ofuli mʋa mʋ abi-aná brɛ fɛ́ɛ́.