Israelfɔ Ɩlʋ 17 - Bulu Ntam Pɔpwɛ mʋ́a Israel Ɩlʋ

Bulu, Ŋain Mɩ Fʋ Abambasɩ

Dawid mpaɩ.

¹ Oo Nana Bulu, nu asʋn ánɩ́ ɩda ɔkpa, afʋnu mɩ isu! Nu mɩ mpaɩ, imotsu ofunupʋ ɔnɔ.

² Gyi mɩ asʋn ɔnɔkwalɩsʋ, afʋpʋ ansɩ kɩ tɔá ɩda ɔkpa.

³ Fʋtɛtɛtɛ mɩ klʋntɔ kɩ, fʋtɛsɩna mɩ onye sɔ mɩ kɩ. Tamɛ fʋmɔkʋwun tsitsa kʋkʋ mɩtɔ. Nahɩɛá asʋkpan kʋkʋ ɩmɛ́ɛdalɩ tsu mɩ ɔnɔ.

⁴ Fɛ alɩá akʋ bʋtɔbwɛ a, mɩ mʋ́ ndɛ fʋ mblatɔ. Ntamabwɛ awuntɔlɩnpʋ bwɛhɛ.

⁵ Nna fʋ ɔkpasʋ bregyibrɛ. Mmɔkʋsrɛɩ dalɩ ɔkpa amʋsʋ.

⁶ Oo Bulu, nasu kpoli fʋ, tsufɛ fɔ́sɔ mɩ ɔnɔ. Yaa asʋ, afʋnu mɩ mpaɩ.

⁷ Lɛ fʋ ɔdwɛá ɩma ɔka suna alɩá ɩbɔ́wa ifu. Fʋtɔpʋ fʋ gyɔpɩ hɔ aha ánɩ́ basrɩ tanʋ fʋ, lɛ amʋ́ alupʋá bakʋsʋ lɩɩ amʋ́sʋ ɩbɩtɔ.

⁸ Gyo mɩ ɩwɩ, fɛ alɩá fʋtogyo fʋ nsibi klambi. Ŋain mɩ fʋ abambasɩ.

⁹ Lɛ mɩ tsu aha lalahɛá bʋgya mɩ ɩbɩtɔ, tsu adʋn ánɩ́ bakafia mɩ ɩbɩtɔ.

¹⁰ Nwewun kʋkʋ ɩma amʋ́tɔ. Bʋtɔtɔɩ ɩwɩtsusʋ.

¹¹ Basrɩ gya mɩ, kafia mɩ. Bʋdɛ ɔkpa dunka ánɩ́ bɛ́lɛ mɩ da kpla.

¹² Baka gyo mɩ, fɛ gyata ánɩ́ akʋn dɛ mʋ. Fɛ gyata ɔwʋnlɩnpʋ lafɩnɩ ogyo ɔbwɩ.

¹³ Oo Nana Bulu, kʋsʋ lɩɩ mɩ alupʋsʋ, afʋba amʋ́ asɩ. Pʋ fʋ ɔdayi kɔ hɔ mɩ, tsu aha lalahɛ anfɩ ɩbɩtɔ.

¹⁴ Pʋ fʋ tumi hɔ mɩ lɛ aha anfɩ ɩbɩ. Hɔ mɩ tsu aha anfɩ banya ɔyɩ anfɩtɔ ogyikpa anfɩ ɩbɩ. Amʋ́ lanya ɩwɩ gyi sian amʋ́ abi, ɩlasian ha amʋ́ aná.

¹⁵ Tamɛ mɩ mʋ́ a, mɩ asʋn da ɔkpa. Mʋ́ sʋ nówun fʋ ansɩtɔ. Nɩ netsinki wun fʋ tsiatɔ a, nɔ́mwɛ.