Israelfɔ Ɩlʋ 16 - Bulu Ntam Pɔpwɛ mʋ́a Israel Ɩlʋ

Nana Bulu Gyi Mɩ Ogyikpa

Dawid ɩlʋ.

¹ Oo Nana Bulu, hɔ mɩ; tsufɛ fʋ nasrɩ tanʋ.

² Nabla Nana Bulu mbɛɛ, “Fʋgyi mɩ Wie. Mma itoyile kʋkʋʋkʋ dʋn fʋ.”

³ Bulu aha ánɩ́ bʋbʋ ɔsʋlʋsʋ gyi anumnyampʋá mɩ ansɩ tɛhɩɛ gyi amʋ́ ɩwɩ.

⁴ Aha ánɩ́ bʋbuo ɩkpɩ bʋtekle asʋn tsɔtsɔɔtsɔ ha amʋ́ ɩwɩ. Mmɔ́ɔwa ɩbɩ amʋ́ afɔdɩɛ obugyatɔ. Mmɔ́ɔpʋ amʋ́ ɩkpɩ ada dɩnka mɩ ɔnɔsʋ.

⁵ Nana Bulu, fʋgyi mɩ ogyikpa pʋ́ togyitɔá ɩbɔ́fʋn mɩ. Fʋtogyo mɩ ɔsʋlʋ ha mɩ.

⁶ Ɔsʋlʋ amʋʋ bɔbɔɩ ha mɩ amʋ legyi mɩ ansɩ. Lɛlɛ, mbʋ ogyikpa wanklaan!

⁷ Nɛ́kanfʋ Nana Bulu, mʋtosuna mɩ asʋn. Mɩ ɩklʋn ɛ tɔtɔɩ kpla mɩ onye.

⁸ Mɩ ansɩ dɩn Nana Bulusʋ bregyibrɛ. Ɔlɩɩ mɩ gyɔpɩsʋ. Mʋ́ sʋ tɔtɔ ɩmɛ́ɛlɛ mɩ da.

⁹ Mʋ́ sʋ ansɩ tegyi mɩ, mɩ ɔkla ɛ dɛ ansigyi nya. Tɔtɔ mɛdɛ mɩ han,

¹⁰ tsufɛ fʋméesi mɩ wa afulitɔ. Mmɔkʋkpa fʋ ɔma. Mʋ́ sʋ fʋmɛ́ɛha mmɔ́ɔplɔ.

¹¹ Fósuna mɩ nkpa ɔkpa. Fʋ wa ansigyiá ɩlɔfʋn bʋ. Fʋ gyɔpɩsʋ ansigyiá ɩma ɔka bʋ.