Israelfɔ Ɩlʋ 145 - Bulu Ntam Pɔpwɛ mʋ́a Israel Ɩlʋ

Nana Bulu Tegyi Mʋ Asʋn Fɛ́ɛ́sʋ

Dawid kanfʋ-ɩlʋ.

¹ Mɩ Bulu pʋ́ mɩ Wie, nótsu fʋ fʋa, kanfʋ fʋ ɩda brɛ fɛ́ɛ́.

² Nɛ́kanfʋ fʋ ekekegyiɛkɛ, wa fʋ ɩda numnyam brɛ fɛ́ɛ́.

³ Nana Bulu, fomoni, ɩkanfʋ letsia fʋ. Ɔhaa mɛ́ɛtalɩ bɩ alɩá fomoni.

⁴ Otuntufla kugyikʋ bɛ́lɛ fʋ gyumagyihɛ bla amʋ́ abi-aná. Bɛ́lɛ fʋ gyumagyihɛ akpɔnkpɔntɩ ɔwan.

⁵ Nétsia gywɩɩn fʋ numnyam kpɔnkpɔntɩ pʋ́ fʋ ofula akpɔnkpɔntɩ ɩwɩ.

⁶ Ɔhagyiɔha ɔbɛ́da fʋ ofula akpɔnkpɔntɩ ɔkan. Mɩ ɛ nɛ́blɩ alɩá fɔkʋkʋ moni.

⁷ Bɛ́lɛ fʋ awɩtɔlɛ tsɔtsɔɔtsɔ amʋ blɩ; kplʋn wa ɩlʋ ansigyisʋ kanfʋ fʋ yilebwɛ.

⁸ Awɩtɔlɛpʋ mʋ́a nwɛ owunpʋ Nana Bulu gyi. Ɔtamakɔsɩ nya ɔblɔ, mʋ ɔdwɛá ɩma ɔka ɩhɩɛ tsɔ.

⁹ Nana Bulu bʋ alɛ ha ɔhagyiɔha. Mʋ nwewun ɩdɩn mʋ atɔ bwɛhɛ fɛ́ɛ́sʋ.

¹⁰ Oo Nana Bulu, fʋ atɔ bwɛhɛ fɛ́ɛ́ bɛ́da fʋ ɩpan. Aha ánɩ́ bʋtamakpa fʋ ɔma ɛ bɛ́kanfʋ fʋ.

¹¹ Bɛ́blɩ fʋ iwie ogyikpa numnyam pʋ́ fʋ tumi ɩwɩ asʋn.

¹² Ɩbɛ́ha ɔhagyiɔha ɔbɛ́lɛ fʋ gyumagyihɛ akpɔnkpɔntɩ blɩ, fʋ iwie ogyikpa numnyam pʋ́ obúá ɩbʋ mʋ́sʋ.

¹³ Fʋ iwie ogyikpa bʋ ɩnʋ brɛ fɛ́ɛ́. Abi-aná bɛ́ba bɔtʋ fʋ iwiegyi. Nana Bulu tegyi mʋ asʋn fɛ́ɛ́sʋ ɔbʋ awɩtɔlɛ mʋ gyumagyihɛ kugyikʋtɔ.

¹⁴ Ɔtɔwa aha ánɩ́ bʋdɛdɩda ɔwʋnlɩn, tswii aha ánɩ́ baklowa lɩɩ.

¹⁵ Aha fɛ́ɛ́ bʋkɩ fʋ ansɩtɔá fɛ́ha amʋ́ atogyihɛ mʋ́ brɛtɔ.

¹⁶ Fʋtɛsankɩ ɩbɩtɔ ha akɩankpapʋ fɛ́ɛ́, pʋ́ tɔá bʋdekle bʋla amʋ́.

¹⁷ Nana Bulu bwɛhɛ fɛ́ɛ́ ɩda ɔkpa. Ɔbʋ awɩtɔlɛ mʋ gyumagyihɛ kugyikʋtɔ.

¹⁸ Ɔma ɩfɔ aha ánɩ́ bʋtokpoli mʋ wa, aha ánɩ́ bʋtokpoli mʋ ɔnɔkwalɩsʋ.

¹⁹ Ɔtɔbwɛ mʋ ifu anyapʋ atɔá bʋdekle ha amʋ́. Otonu amʋ́ isu, hɔ amʋ́ nkpa.

²⁰ Nana Bulu tɛkɩ ɔhagyiɔha ánɩ́ ɔtɔdwɛ mʋsʋ, tamɛ ɔbɔ́mɔ lalahɛ abwɛpʋ fɛ́ɛ́.

²¹ Nóbwii ɔnɔ kanfʋ Nana Bulu. Ɔhagyiɔha ɔbɛ́kanfʋ mʋ ɩda wankɩhɛ amʋ brɛ fɛ́ɛ́.