Israelfɔ Ɩlʋ 143 - Bulu Ntam Pɔpwɛ mʋ́a Israel Ɩlʋ

Bulu, Fʋsʋ Mɩ Ansɩ Dɩn

Dawid kanfʋ-ɩlʋ.

¹ Oo Nana Bulu, nu mɩ kokoli. Ɔnɔkwalɩpʋ fʋgyi. Mʋ́ sʋ yaa asʋ afʋnu mɩ ɩpabwii. Fʋ yilebwɛ sʋ sɔ mɩ ɔnɔ.

² Fʋ osumbi ngyi, mágyi mɩ asʋn, tsufɛ nyankpʋsa ɔkʋkʋ mégyi yile ɔbwɛpʋ fʋ ansɩtɔ.

³ Tsufɛ mɩ olupʋ amʋ dɩn mɩsʋ, alayia mɩ manta ɔsʋlʋtɔ. Alaha ntsie okluntɔ, fɛ ɔha ánɩ́ olowu dodoodo.

⁴ Ɩnɩ sʋ ɩlakpɔn mɩ ɔkla, mɩ klʋn lakpawie mɩ ɩwɩtɔ.

⁵ Nakaɩn bɩmbɩsʋ. Nagywɩɩn fʋ bwɛhɛ fɛ́ɛ́, pʋ́ fʋ ɩbɩ ɔnɔ gyumagyihɛ ɩwɩ.

⁶ Natsu ɩbɩ fʋa sɩsɩ fʋ, tsufɛ fʋ ɩwɩ ɔmɛwʋlɩ dɛ mɩ ɔkla, fɛ ɔsʋlʋ dɛ ntsu dunka lɩlɩtɔ. Ɩya.

⁷ Kokoli Nana Bulu, wa ɔsa sɔ mɩ ɔnɔ. Tɔtɔ bwɛ ma mɩ ɩnʋ. Mádamli ɔma ha mɩ, nɩ megyi alɩ nɔ́bwɛ fɛ aha ánɩ́ bʋda afulitɔ.

⁸ Ha mɩ anwun fʋ ɔdwɛá ɩma ɔka nyankɩgyinyankɩ, tsufɛ fʋsʋ mɩ ansɩ dɩn. Suna mɩ ɔtɩnɛá ntsʋn, tsufɛ fʋ ɩbɩtɔ napʋ mɩ ɔkla wa.

⁹ Oo Nana Bulu, kokoli lɛ mɩ mɩ alupʋ ɩbɩtɔ, fʋ nasrɩ tanʋ.

¹⁰ Fʋgyi mɩ Bulu, suna mɩ fʋ ɔdwɛla. Fʋ Ɔŋɛ wanklaan ɔkpa mɩ tsʋn ɔkpa tswiihɛsʋ.

¹¹ Oo Nana Bulu, fʋ ɩda sʋ laha mɩ nkpa. Fʋ yilebwɛ sʋ lɛ mɩ tsu ɩkplantɔ.

¹² Fʋ ɔdwɛá ɩma ɔka sʋ lɛ mɩ alupʋ ɩnʋ, afʋmɔ aha ánɩ́ bʋdɩn mɩsʋ, tsufɛ fʋ osumbi ngyi.