Israelfɔ Ɩlʋ 141 - Bulu Ntam Pɔpwɛ mʋ́a Israel Ɩlʋ

Bulu, Ndɛ Fʋ Kpoli

Dawid kanfʋ-ɩlʋ.

¹ Oo Nana Bulu, fʋ ndekpoli, kɔsɩ ba mɩ wa. Yaa asʋ nu mɩ ɔmɛ, afʋsɔ mɩ ɔnɔ.

² Mɩ mpaɩ ɩwa fʋ ɔfan fɛ ɔhɩɛn, afʋhɔ mɩ ɩbɩá natsu fʋa fɛ ntʋpwɛsʋ afɔdɩɛ.

³ Oo Nana Bulu, kɩ mɩ tɔɩtɔ, mɛnɩ mmɛ́ɛblɩ asʋn lalahɛ, afʋgyo mɩ ɔnɔ.

⁴ Máha lalahɛbwɛ ɩdɩnka mɩ ɔwɔlɩ, antsia bwɛ lalahɛ. Máha mɩ antsia lalahɛ abwɛpʋ ɔpasuatɔ, amʋ́ atɔ debidebi ɩdɩnka mɩ ɔwɔlɩ.

⁵ Ha ɔha yile ɔpɩtɩ mɩ atɔ, awɩtɔlɛ alawa ha mɩ. Ha ɔha yile otswii mɩ, dwɛ ɔtɔdwɛ mɩ. Máha mɩ ankina mʋ́, tsufɛ mɩ mpaɩ tɔkʋsʋ lɩɩ lalahɛ abwɛpʋsʋ.

⁶ Nɩ bɛkpa amʋ́sʋ agyipʋ tsu abʋtasʋ bɛda a, lalahɛ abwɛpʋ amʋ bónu mɩ asʋn, wun ánɩ́ ɔnɔkwalɩ igyi.

⁷ Alɩ amʋʋ bʋtobwie abwi, ɩtɛdasaɩn wʋlɩ ɔsʋlʋsʋ amʋ a, alɩ amʋ́ awú bɛ́dasaɩn, bʋmóopula amʋ́ nɩ.

⁸ Tamɛ mɩ Wie Nana Bulu, mɩ ansɩ dɩn fʋsʋá fɛ́kpa mɩ. Fʋ natanʋ, máha abʋmɔ mɩ.

⁹ Máha mɩ ankpa wie ayibiá bafɩnɩ mɩ, pʋ́ lalahɛ abwɛpʋ amʋ agblatɔ.

¹⁰ Ha amʋ́ onuto awʋlɛ ɩlɛ amʋ́tɔ, afʋha mɩ annyankɩ mʋ́sʋ tsʋn.