Israelfɔ Ɩlʋ 14 - Bulu Ntam Pɔpwɛ mʋ́a Israel ƖlʋAnsɩ Ɩhɩɛ Gyi Israelfɔ Dawid ɩlʋ ha ɩlʋ osunapʋ. 1 Aha mimlahɛ nkʋlɛ dɛ amʋ́ ɩwɩ bla bɛɛ, “Bulu má ɩnʋ.” Bayinta. Bamli mbusuo abɔpʋ. Ɔbakʋlɛ kʋraa mɛ́dalɩ amʋ́tɔ. 2 Nana Bulu tɛkɩ anyankpʋsa fɛ́ɛ́ sɩsɩ tsu ɔsʋsʋ, kɩ bɛɛ, menya ɔtɩansɩpʋ ɔkʋá otodunka mʋ ɔkpa. 3 Amʋ́ fɛ́ɛ́ badamli ɔma ha Bulu. Amʋ́ fɛ́ɛ́ ɔkpa motswii. Yile ɔbwɛpʋ ɔkʋkʋ má ɩnʋ. Ɔbakʋlɛ kʋraa mɛ́dalɩ amʋ́tɔ. 4 Mʋ́ sʋ lalahɛ abwɛpʋ bʋmóonu asʋn asɩ ɛkɛkɛɛkɛ? Bʋdɛ mɩ aha wɩ fɛ iye bʋdɛwɩ, bʋtamasu kpoli mɩ. 5 Tamɛ ifu bɛ́hɩɛ kɩta amʋ́ ɩnʋ, tsufɛ Bulu buo yile abwɛpʋ. 6 Lalahɛ abwɛpʋ, mlɩteyinta ahianfɔ nhɩhɩɛ, tamɛ Nana Bulu gyi amʋ́ okpikplikpa. 7 Nhɩɛ ndɛ Nana Bulu kokoli mbɛɛ, ɔkʋ otsu Sionbʋsʋ bɔhɔ Israelfɔ. Ɛkɛá Bulu ɔbɛ́latsu mʋ aha kʋsʋ a, ɩhɩɛ wa Yakob abi-aná ɔdwɛ, ansɩ ɩhɩɛ gyi Israelfɔ. |
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
Wycliffe Bible Translators, Inc.