Israelfɔ Ɩlʋ 139 - Bulu Ntam Pɔpwɛ mʋ́a Israel Ɩlʋ

Bulu, Tɛtɛ Mɩ Klʋntɔ Kɩ

Dawid kanfʋ-ɩlʋ ha ɩlʋ osunapʋ.

¹ Oo Nana Bulu, fatɛtɛ mɩ ɩklʋntɔ kɩ, fabɩ mɩ.

² Fʋyɩn mɩ asɩtsia pʋ́ mɩ kʋsʋbɩ. Fʋbʋ tsutsuutsu fʋyin mɩ agywɩɩn kugyikʋ.

³ Fʋtɛkɩ mɩ natɩ pʋ́ mɩ klɛdɩsʋ, fʋyin mɩ ɩkpa fɛ́ɛ́ wanklaan.

⁴ Oo Nana Bulu, asa asʋankʋ bɛ́dalɩ tsu mɩ ɔnɔ a, fʋyin mʋ́ fɛ́ɛ́ dodo.

⁵ Fakpa mɩ wa ɩwɩtɔ, pʋ ɩbɩ bun mɩsʋ.

⁶ Asʋn anfɩ bɩ ɩhɩɛ bʋ mɩ ifu! Ɩlɛhɩɛ fʋa dʋn mɩ, mmɛtalɩ nu mʋ́ asɩ.

⁷ Nkʋnʋ nɛ́talɩ natɩ si fʋ Ɔŋɛ amʋ yɔ? Ntɛ nkʋnʋ nɛ́srɩ si fʋ yɔ?

⁸ Nɩ nɔdʋ yɔ ɔsʋsʋ a, fʋtsie ɩnʋ. Nɩ nɛyɛklɛdɩ afulitɔ kʋraa a, fʋbʋ ɩnʋ.

⁹ Nɩ nɔkʋsʋ nyankɩ kwɛ atɛ, fuli yetsia ɔpʋ ɔbɩn kʋraa a,

¹⁰ fʋ kɛn ɔbɛ́kpa mɩ. Fʋ tumi ɔbɛ́kɩta mɩ kinkin.

¹¹ Nɩ nɛblɩ mbɛɛ, “Oklun ibun mɩsʋ, wankɩá olobomli mɩ iklun bwɛ onye kʋraa a”,

¹² oklun amʋ imoklun ha fʋ. Ɩlɔwankɩ fɛ ɔyɩkɛhɛ, tsufɛ oklun mʋ́a wankɩ fɛ́ɛ́ igyi ɩkʋlɛ fʋ ansɩtɔ.

¹³ Fʋlɔbwɛ mɩ ɩwɩ atɔ kugyikʋ, fɔpʋtsa aba mɩ yin iputɔ.

¹⁴ Ntɛkanfʋ fʋ, tsufɛ alɩá fɔpʋbwɛ mɩ bʋ ifu, ɩbʋ wanwan. Fʋ gyumagyihɛ bʋ ifu, nhɩɛ nyin mʋ́ alɩ.

¹⁵ Mɩ awú kʋkʋ meŋain fʋ brɛá fɔbwɛ mɩ ŋaintɔ. Fɛhɩɛ trʋ mɩ wa abatɔ mɩ yin iputɔ.

¹⁶ Fɔpʋ ansibi wun mɩ brɛá ngyi obugya-klun. Fɔwanlɩn nkɛá négyi fɛ́ɛ́ wa fʋ ɔwʋlʋtɔ dodoodo asa bɛtakwɩɩ mɩ.

¹⁷ Oo Bulu, fʋ agywɩɩn bʋ mɩ labi dʋbɩ! Ɩdʋn mɩ kla.

¹⁸ Nɩ nɔbɔ mbɔdɩá nɛ́kla mʋ́ a, ɩdʋn ɩsɩ. Brɛá nɔkʋsʋ nyankɩ a, fʋ wa ntra mbʋ.

¹⁹ Oo Bulu, mɔ lalahɛ abwɛpʋ, obugya atsitsapʋ abʋdalɩ mɩ ɩwɩ.

²⁰ Bʋtɛtɩ fʋ ɩda lalahɛ bregyibrɛ, bwɛ lalahɛ kʋsʋ lɩɩ fʋsʋ!

²¹ Oo Nana Bulu, yɛ fʋyin ánɩ́ ntɛhɩɛ lu aha ánɩ́ bʋtolu fʋ, ntekisi aha ánɩ́ bʋtɔkʋsʋ lɩɩ fʋsʋ?

²² Ntɛhɩɛ lu amʋ́, nakla amʋ́ wa mɩ alupʋtɔ.

²³ “Oo Bulu, tɛtɛ mɩ klʋntɔ kɩ, afʋbɩ alɩá ngyi. Sɔ mɩ kɩ, afʋbɩ mɩ agywɩɩn kugyikʋ.

²⁴ Kɩ bɛɛ, agywɩɩn lalahɛ ɩkʋ bʋ mɩtɔ, afʋkpa mɩ tsʋn ɔkpa wanklaansʋ brɛ fɛ́ɛ́.”