Israelfɔ Ɩlʋ 138 - Bulu Ntam Pɔpwɛ mʋ́a Israel ƖlʋBulu, Fʋ Gyɔpɩ Ɩbɩ Tɔhɔ Mɩ Nkpa Dawid ɩlʋ. 1 Oo Nana Bulu, nɔpʋ mɩ klʋn fɛ́ɛ́ da fʋ ɩpan. Ɩkpɩ amʋ ansɩtɔ ndɛ ɩlʋ wa kanfʋ fʋ. 2 Nóko nwuntɔ wa sɩsɩ fʋ ɔtswɛkpa, da fʋ ɩpan fʋ ɔdwɛá ɩma ɔka pʋ́ fʋ ɔnɔkwalɩ sʋ, tsufɛ fatsu fʋ ɩda mʋ́a fʋ asʋn fʋa dafa togyitɔsʋ. 3 Ɛkɛá nokpoli fʋ a, fɔsɔ mɩ ɔnɔ. Fɛha mɩ ɔkla lenya ɔwʋnlɩn tsɩa. 4 Oo Nana Bulu, ɔsʋlʋsʋ awie fɛ́ɛ́ bɛ́kanfʋ fʋ, tsufɛ banu fʋ ɔnɔtɔ asʋn blɩhɛ. 5 Bɔ́wa fʋ bwɛhɛ wanklaan ɩwɩ ɩlʋ, tsufɛ fʋ numnyam lɛhɩɛ moni. 6 Ɩnɩá Nana Bulu bʋ ɔsʋsʋʋsʋ kʋraa a, ɔtɛlɛ ansɩ kɩ ɩwɩasɩ abapʋ, tamɛ ɔbʋ ɩfɔ ɩwɩ atsupʋ wa. 7 Asʋn wunhɛ lobomli mɩ, tamɛ fɛ́lawa mɩ ɔwʋnlɩn. Fɔ́tswɩ ɩbɩ kɩta mɩ lɛ mɩ alupʋ ɔblɔ ɔnɔ. Fʋ gyɔpɩ ɩbɩ tɔhɔ mɩ nkpa. 8 Nana Bulu, fégyi fʋ nhɩhɩɛsʋ ha mɩ. Fʋ ɔdwɛá ɩma ɔka bʋ ɩnʋ brɛ fɛ́ɛ́. Fʋ ɩbɩ ɔnɔ atɔbwɛhɛ anɩgyi, makina anɩ. |
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
Wycliffe Bible Translators, Inc.