Israelfɔ Ɩlʋ 119 - Bulu Ntam Pɔpwɛ mʋ́a Israel Ɩlʋ

Ansɩ Igyi Aha Ánɩ́ Ɔlala Ma Amʋ́ Ɩwɩ (Alɛf)

¹ Ansɩ igyi aha ánɩ́ ɔlala ma amʋ́ ɩwɩ, bʋtɛnatɩ Nana Bulu atosunahɛ ɔkpasʋ.

² Ansɩ igyi aha ánɩ́ ɔlɛ ɔnɔ bʋtegyi mʋ́sʋ, bʋtɔpʋ amʋ́ ɩklʋn fɛ́ɛ́ dunka mʋ,

³ bʋtamabwɛ lalahɛ, bʋtɛnatɩ mʋ ɔkpasʋ.

⁴ Fɔpʋ fʋ mbla ha anɩ fɛɛ, agyi mʋ́sʋ wanklaan.

⁵ Oo, tɛkɩ nɩ nɛ́talɩ natɩ fʋ amandɩɛ amʋsʋ wanklaan,

⁶ hɩɛ gywɩɩn fʋ mbla amʋ fɛ́ɛ́ ɩwɩ wanklaan a, tɛkɩ pɛlɩ mɛ́ɛkɩta mɩ.

⁷ Nɔ́pʋ ɩklʋn wanklaan kanfʋ fʋ. Fʋ amandɩɛ ɩda ɔkpa nɩ ndɛ mʋ́ kasɩ.

⁸ Nɔ́bwɛ dɩnka fʋ amandɩɛsʋ, mási mɩ wa ɔkpa ɛkɛkɛɛkɛ.

Suna Mɩ Fʋ Amandɩɛ (Bɛt)

⁹ Nkalɩ ɔyasubi ɔbɛ́ha mʋ tsiatɔ bɛ́tɩn? Nkɛtɩ ɔdɛ fʋ asʋnsʋ gyi.

¹⁰ Napʋ mɩ klʋn fɛ́ɛ́ ndɛ fʋ dunka. Máha mɩ ampan fʋ mbla amʋsʋ.

¹¹ Naŋain fʋ asʋn mɩ klʋntɔ, mɛnɩ mmɔ́ɔpʋ ɩla gyi fʋ.

¹² Oo Nana Bulu, kanfʋ ɩbwɛ fʋ klɛ. Suna mɩ fʋ amandɩɛ.

¹³ Napʋ ɔnɔ kla amandɩɛá fɔpʋ fʋ ɔnɔ wa fɛ́ɛ́.

¹⁴ Mɩ ansɩ tegyi ɔnɔá fɛlɛ ɩwɩ, fɛ alɩá mɩ ansɩ tegyi atonyahɛ ɩwɩ.

¹⁵ Ntɛhɩɛ gywɩɩn fʋ mbla amʋ ɩwɩ, pʋ ansɩ yi fʋ ɔkpa amʋsʋ.

¹⁶ Fʋ amandɩɛ sʋ awútɔ bɛ́sankɩ mɩ, mmɛ́ɛtan fʋ asʋnsʋ.

Finki Mɩ Ansibi (Gimɛl)

¹⁷ Bwɛ yile ha mɩ fʋ osumbi, antsia nkpa. Mɩ angyi fʋ asʋnsʋ.

¹⁸ Finki mɩ ansibi, fówun nówun ofula ánɩ́ ɩbʋ fʋ atosunahɛ amʋtɔ.

¹⁹ Ɔfɔɔ ngyi ɔsʋlʋ anfɩsʋ, mápʋ fʋ mbla ŋain mɩ.

²⁰ Ɩklʋn mɛdɩ mɩ asɩ, tsufɛ fʋ amandɩɛ ɩdɩn mɩ klʋnsʋ bregyibrɛ.

²¹ Fʋtɔwa ɩyɩn wa aha ánɩ́ bʋtamabu atɔ, fʋ ɩlwɩɩ dɩn amʋ́sʋ, bafwɩ dalɩ fʋ mbla ɔkpasʋ.

²² Dɩnkɩ amʋ́ nsʋpa pʋ́ amʋ́ pɛlɩ lɛ mɩsʋ, tsufɛ ndɛ ɔnɔá fɛlɛsʋ gyi.

²³ Nɩ wulu ahandɛ befia bʋdɛ mɩ ɩwɩ agywɩɩn kɩta o a, mɩ fʋ osumbi mʋ́ ntɔgywɩɩn fʋ amandɩɛ ɩwɩ.

²⁴ Fʋ ɔnɔá fɛlɛ tɛha awútɔ tɛsankɩ mɩ. Mʋ́tosuna mɩ nyansa.

Ha Mɩ Annu Fʋ Mbla Amʋ Asɩ (Dalɛt)

²⁵ Nda asɩ tantaantan, laha mɩ nkpa alɩá fʋ asʋn lɛblɩ.

²⁶ Nɛlɛ mɩ tsiatɔ suna fʋ, fɔsɔ mɩ ɔnɔ. Mʋ́ sʋ suna mɩ fʋ amandɩɛ.

²⁷ Ha mɩ annu fʋ mbla amʋ asɩ, mɛnɩ nɔ́gywɩɩn fʋ ofula ɩwɩ.

²⁸ Mɩ ɔkla dɛ awɩrɛhʋ su. Lawa mɩ ɔwʋnlɩn fʋ asʋn amʋ ɔnɔ.

²⁹ Ha afunu ɔkpa ɩwa ɩfɔ mɩ wa, afʋpʋ awɩtɔlɛ suna mɩ fʋ atosunahɛ amʋ.

³⁰ Natsu ɔnɔkwalɩ ɔkpa amʋ. Napʋ ansɩ dɩnka fʋ amandɩɛsʋ.

³¹ Oo Nana Bulu, ndɛ ɔnɔ amʋʋ fɛlɛ amʋtɔ kinkiinkin. Máha pɛlɩ ɩkɩta mɩ.

³² Nsrɩ fʋ mbla ɔkpa amʋsʋ, tsufɛ faha nhɩɛ ndɛ mʋ́ asɩ nu.

Suna Mɩ Angyi Fʋ Amandɩɛsʋ (He)

³³ Oo Nana Bulu, suna mɩ angyi fʋ amandɩɛsʋ, mɛnɩ nɛ́kɩta mʋ́tɔ yɛfʋn mʋ́ ɔnɔmɔ.

³⁴ Ha mɩ annu asʋn asɩ, ankɩta fʋ atosunahɛtɔ, ampʋ mɩ ɩklʋn fɛ́ɛ́ gyi mʋ́sʋ.

³⁵ Kpa mɩ tsʋn fʋ mbla ɔkpa amʋsʋ, tsufɛ ɩtɛha ɩwɩ tɛsankɩ mɩ.

³⁶ Damli mɩ klʋn dɩnka ɔnɔ amʋʋ fɛlɛ amʋsʋ, megyi sika ɔnsɩpɛsʋ.

³⁷ Dɩnkɩ mɩ ansɩ lɛ atɔá ɩma labisʋ, afʋha mɩ antsʋn fʋ ɔkpa amʋsʋ nya nkpa.

³⁸ Bwɛ tɔ amʋʋ fɛhɩɛ yaɩ ha fʋ ifu anyapʋ amʋ ha mɩ, fʋ osumbi.

³⁹ Lɛ mɩ lɛ nsʋpa ánɩ́ ntenya ifutɔ, tsufɛ fʋ amandɩɛ ɩbʋ alɛ.

⁴⁰ Kɩ, ndekleá négyi fʋ mbla amʋsʋ. Yile ɔbwɛpʋ fʋgyi, sʋ laha mɩ nkpa.

Máhɔ Fʋ Ɔnɔkwalɩ Asʋn Amʋ Lɛ Mɩ Ɔnɔ (Waw)

⁴¹ Oo Nana Bulu, ha fʋ ɔdwɛá ɩma ɔka pʋ́ nkpahɔ amʋʋ fɛhɩɛ yaɩ mɩ amʋ ɩba mɩsʋ,

⁴² mɛnɩ nényaa asʋankʋ kpla mɩ ɔblɔla abwɛpʋ, tsufɛ mɩ ansɩ dɩn fʋ asʋnsʋ.

⁴³ Máhɔ fʋ ɔnɔkwalɩ asʋn amʋ lɛ mɩ ɔnɔ plɩplɩplɩ, tsufɛ mɩ ansɩ dɩn fʋ amandɩɛsʋ.

⁴⁴ Nétsia gyi fʋ atosunahɛsʋ brɛ fɛ́ɛ́. Mméesi mʋ́sʋ gyi ɛkɛkɛɛkɛ.

⁴⁵ Nɛ́natɩ iwilwiitɔ, tsufɛ nakasɩ fʋ mbla.

⁴⁶ Nɛ́lɩɩ awie ansɩtɔ tɔɩ tsu ɔnɔ amʋʋ fɛlɛ amʋ ɩwɩ, pɛlɩ mɛ́ɛkɩta mɩ.

⁴⁷ Fʋ mbla amʋ sʋ awútɔ tɛsankɩ mɩ, tsufɛ ntekle mʋ́.

⁴⁸ Ntobu fʋ mbla amʋ, tsufɛ ntekle mʋ́. Nɔ́gywɩɩn fʋ amandɩɛ ɩwɩ.

Mmɔkʋsi Fʋ Atosunahɛ Amʋ Tswɩ (Sayin)

⁴⁹ Kaɩn asʋn ánɩ́ fɛhɩɛ ha mɩ fʋ osumbisʋ, ɩlaha ndɛ mʋ́ ɔkpa kɩ.

⁵⁰ Nɩ nowie ɩkplantɔ a, tɔ amʋʋ fɛhɩɛ yaɩ ha mɩ amʋ ɩtɛlalwii mɩ ɩklʋn.

⁵¹ Ɩwɩ atsupʋ bʋhɩɛ bʋdɛ mɩ ɔblɔla bwɛ, tamɛ mmɔkʋsi fʋ atosunahɛ amʋ tswɩ.

⁵² Oo Nana Bulu, nɔgywɩɩn fʋ bɩmbɩ amandɩɛ amʋ ɩwɩ a, ɩklʋn tolwii mɩ.

⁵³ Ɔblɔ tɛhɩɛ kɩta mɩ aha lalahɛ amʋʋ bakina fʋ atosunahɛsʋ gyi amʋ sʋ.

⁵⁴ Ɔtɩnɛgyiɔtɩnɛá nɔswɩɩ a, fʋ amandɩɛ amʋ gyi ɩlʋá ɩdɩn mɩ ɔnɔsʋ nɩ.

⁵⁵ Oo Nana Bulu, ntɛkaɩn fʋ ɩdasʋ onye, gyi fʋ atosunahɛsʋ.

⁵⁶ Ɩnɩ lada mɩ ɩbɩ nɩ, tsufɛ ndɛ fʋ mbla amʋtɔ.

Nana Bulu, Fʋgyi Mɩ Ogyikpa (Hɛt)

⁵⁷ Nana Bulu, fʋgyi mɩ ogyikpa. Nahɩɛá négyi fʋ asʋn amʋsʋ.

⁵⁸ Ndɛpʋ mɩ klʋn fɛ́ɛ́ kokoli fʋ, wun mɩ nwɛ fɛ alɩá fɛhɩɛ.

⁵⁹ Nɩ nɔgywɩɩn alɩá mɩ ɔkpa gyi a, ntɛdamli begyi fʋ ɔnɔ amʋʋ fɛlɛ amʋsʋ.

⁶⁰ Ntamaba yabi ɔma, ntɔwa ɔsa gyi fʋ mbla amʋsʋ.

⁶¹ Lalahɛ abwɛpʋ bafɩnɩ ayibi bomli mɩ o a, ntamatan fʋ atosunahɛ amʋsʋ.

⁶² Ntɔkʋsʋ ɔyɩnsɩnɛ da fʋ ɩpan, tsufɛ fʋ amandɩɛ amʋ ɩda ɔkpa.

⁶³ Mɩa fʋ ifu anyapʋ pʋ́ fʋ mblasʋ agyipʋ fɛ́ɛ́ bʋ mba.

⁶⁴ Oo Nana Bulu, fʋ ɔdwɛá ɩma ɔka labʋla ɔyɩ fɛ́ɛ́. Suna mɩ fʋ amandɩɛ.

Suna Mɩ Nyansa Pʋ́ Asʋn-asɩnu (Tɛt)

⁶⁵ Nana Bulu, fabwɛ yile ha mɩ, fʋ osumbi, fʋ asʋn amʋ ɔnɔ.

⁶⁶ Suna mɩ nyansa pʋ́ asʋn-asɩnu, tsufɛ nahɔ fʋ mbla amʋsʋ gyi.

⁶⁷ Nɔfwɩ dalɩ fʋ ɔkpasʋ, fɛbɩtɩ mɩ ɩsʋ, tamɛ sei ndɛ fʋ asʋn amʋsʋ gyi.

⁶⁸ Fʋbʋ alɛ, fʋtɔbwɛ yile, suna mɩ fʋ amandɩɛ.

⁶⁹ Ɩwɩ atsupʋ baka asʋn dɩnka mɩsʋ fia, tamɛ mɩ mʋ ntɔpʋ mɩ klʋn fɛ́ɛ́ gyi fʋ mblasʋ.

⁷⁰ Amʋ́ klʋntɔ bʋ odwin fɛ nfɔkpin, tamɛ mɩ mʋ́ fʋ atosunahɛ tɛha awútɔ tɛsankɩ mɩ.

⁷¹ Ɩbʋ mɩ alɛá fɛha ɩkplan lɔtʋ mɩ, mɛnɩ nɛ́kasɩ fʋ amandɩɛ.

⁷² Fʋ atosunahɛ bʋ mɩ labi, dʋn sika fututu mʋa sika pɛpɛ mpɩmpɩm.

Ha Fʋ Ɔdwɛá Ɩma Ɔka Ilwii Mɩ Klʋn (Yod)

⁷³ Ɩbɩ fɔpʋpwɛ mɩ, damli ɩbɩ mɩsʋ. Ha mɩ annu fʋ asʋn asɩ, mɛnɩ nɛ́kasɩ fʋ mbla.

⁷⁴ Fʋ ifu anyapʋ bówun mɩ nya ansigyi, tsufɛ ndɛ fʋ asʋn amʋ ɔkpakɩ.

⁷⁵ Oo Nana Bulu, nyin ánɩ́ fʋtobua asʋn ɔnɔkwalɩsʋ. Ɔnɔkwalɩ ɔkpasʋ fɛha ɩkplan lɔtʋ mɩ.

⁷⁶ Ha fʋ ɔdwɛá ɩma ɔka ilwii mɩ klʋn, fɛ alɩá fɛhɩɛ ha mɩ, fʋ osumbi.

⁷⁷ Wun mɩ nwɛ, fówun nénya nkpa. Tsufɛ fʋ atosunahɛ tɛha awútɔ tɛsankɩ mɩ.

⁷⁸ Wa ɩwɩ atsupʋ anfɩ pɛlɩtɔ, tsufɛ kʋkʋ kpalɩ bʋdɛ mɩ ɔnɔ tɩn. Mɩ mʋ́ ndɛ fʋ mbla ɩwɩ gywɩɩn.

⁷⁹ Ha fʋ ifu anyapʋá bʋyin ɔnɔ amʋʋ fɛlɛ amʋ abʋdamli ba mɩ wa.

⁸⁰ Fʋ amandɩɛ amʋ sʋ maha ɔlala itsia mɩ ɩwɩ, mɛnɩ pɛlɩ mɛ́ɛkɩta mɩ.

Fʋ Nkpahɔ Ladɩnka Mɩ Ɔwɔlɩ (Kaf)

⁸¹ Fʋ nkpahɔ ladɩnka mɩ ɔwɔlɩ alɩɩ, ɩlapian mɩ. Fʋ asʋn amʋ ɔkpa ndɛkɩ.

⁸² Nakɩ fʋ ɔkpa fɛ alɩá fɛhɩɛ alɩɩ, ansibi lawu mɩ. Ndɛfɩtɛ mbɛɛ, “Ɔmɛnkɛ fólwii mɩ klʋn?”

⁸³ Nabi tuun fɛ ɔtsabitɔ-akpankogyo, tamɛ mmɔkʋtan fʋ amandɩɛsʋ.

⁸⁴ Mɩ, fʋ osumbi nkɛ igyi afɩnɩ? Ɔmɛnkɛ fégyi aha anfɩ bʋdɩn mɩsʋ anfɩ asʋn?

⁸⁵ Ɩwɩ atsupʋ anfɩ bʋtekina fʋ atosunahɛsʋ gyi anfɩ bakwi ɔbɔ tswɩ mɩ.

⁸⁶ Fʋ mbla amʋ fɛ́ɛ́ igyi ɔnɔkwalɩ. Kʋkʋ kpalɩ bʋdɩn mɩsʋ. Mʋ́ sʋ gyi mɩ bʋalɛ.

⁸⁷ Basian mɩ mɔ, tamɛ mmɔkʋsi fʋ mblasʋ gyi.

⁸⁸ Lapʋ fʋ ɔdwɛá ɩma ɔka wa mɩ ɔwʋnlɩn, mɛnɩ négyi fʋ ɔnɔá fɛlɛsʋ.

Fʋ Mbla Amʋ Lɛhɩɛ Tɛɩ (Lamed)

⁸⁹ Oo Nana Bulu, fʋ asʋn lɛlɛ nlin ɔsʋsʋ, ɩbʋ ɩnʋ brɛ fɛ́ɛ́.

⁹⁰ Fʋ ɔnɔkwalɩ bʋ ɩnʋ ha otuntufla fɛ́ɛ́. Fɛyaɩ ɔsʋlʋ asɩ, ɩlɩɩ kinkiinkin.

⁹¹ Ɩlɩɩ fʋ amandɩɛsʋ bɔtʋ ndɛ, tsufɛ fʋ togyitɔ desum.

⁹² Nɩ fʋ atosunahɛ mɛha ɩwɩ mɛsankɩ mɩ a, tɛkɩ nowu sin mɩ asʋn wunhɛtɔ.

⁹³ Mmɛ́ɛtan fʋ mbla amʋsʋ ɛkɛkɛɛkɛ, tsufɛ mʋ́sʋ fɔtsʋn laha mɩ nkpa.

⁹⁴ Fʋbʋ mɩ, hɔ mɩ nkpa. Tsufɛ ntekleá nɛ́kasɩ fʋ mbla.

⁹⁵ Aha lalahɛ bawa oputu gyo mɩ ánɩ́ bɔ́mɔ mɩ, tamɛ ntɛhɩɛ susu ɔnɔá fɛlɛ ɩwɩ.

⁹⁶ Nawun yile fɛ́ɛ́ ɔfʋnkpa, tamɛ fʋ mbla amʋ mʋ́ lɛhɩɛ tɛɩ.

Fʋ Atosunahɛ Tɛhɩɛ Wa Mɩ Ɔdwɛ (Mem)

⁹⁷ Oo, fʋ atosunahɛ tɛhɩɛ wa mɩ ɔdwɛ. Ntɔgywɩɩn mʋ́ ɩwɩ ɔyɩkɛhɛ fɛ́ɛ́.

⁹⁸ Fʋ mbla laha natɩn ansɩ dʋn mɩ alupʋ, tsufɛ ɩda mɩ wa brɛ fɛ́ɛ́.

⁹⁹ Ntonu asʋn asɩ dʋn mɩ asunapʋ fɛ́ɛ́, tsufɛ ntɔgywɩɩn ɔnɔ amʋʋ fɛlɛ amʋ ɩwɩ.

¹⁰⁰ Ntonu asʋn asɩ dʋn ahandɛ, tsufɛ ntegyi fʋ mblasʋ.

¹⁰¹ Nalɛ ɩwɩ lɛ lalahɛ kugyikʋ ɔkpasʋ, mɛnɩ négyi fʋ asʋn amʋsʋ.

¹⁰² Fʋ onuto losuna mɩ fʋ amandɩɛ. Mʋ́ sʋ ntamasi mʋ́ tswɩ.

¹⁰³ Fʋ asʋn ɩhɩɛ bʋ mɩ ɔdwɛ. Ɩbʋ mɩ ɔdwɛ debidebi dʋn ɔkwɛn.

¹⁰⁴ Fʋ mbla tɛha ntonu asʋn asɩ. Mʋ́ sʋ nakisi afunu kugyikʋ.

Fʋ Asʋn Gyi Mɩ Ayabiasɩ Ɔkandɩɛ (Nun)

¹⁰⁵ Fʋ asʋn gyi mɩ ayabiasɩ ɔkandɩɛ, ɩtɔwankɩ wʋlɩ mɩ ɔtsʋnkpa.

¹⁰⁶ Naka ntam, tsula dɩnka mʋ́sʋ ánɩ́ négyi fʋ amandɩɛsʋ, tsufɛ ɩda ɔkpa.

¹⁰⁷ Oo Nana Bulu, lakʋsʋa mɩ fɛ alɩá fɛblɩ, tsufɛ nhɩɛ ndɛ asʋn wun.

¹⁰⁸ Nana Bulu, hɔ fʋ kanfʋ-afɔdɩɛ, afʋsuna mɩ fʋ amandɩɛ.

¹⁰⁹ Ndɛ mɩ nkpa ɩbɩtɔ, tamɛ ntamatan fʋ atosunahɛ amʋsʋ.

¹¹⁰ Aha lalahɛ bafɩnɩ mɩ yibi, tamɛ mmɔkʋfwɩ fʋ mbla ɔkpasʋ.

¹¹¹ Ɔnɔá fɛlɛ igyi mɩ siadɩɛ brɛ fɛ́ɛ́. Ɩtɛha mɩ ɩklʋn tenya ansigyi.

¹¹² Nabwɛ agywɩɩn mbɛɛ, kugyikʋá igyi négyi fʋ amandɩɛsʋ brɛ fɛ́ɛ́.

Fʋgyi Mɩ Ɔtanʋkpa Pʋ́ Mɩ Ɩwɩ Ɩban (Samɛk)

¹¹³ Ntekisi aha ánɩ́ amʋ́ agywɩɩn tamalɩɩ tsukʋlɛ, tamɛ fʋ atosunahɛ bʋ mɩ ɔdwɛ.

¹¹⁴ Fʋgyi mɩ oŋainkpa pʋ́ mɩ kʋtʋ. Fʋ asʋn ɔkpa ndɛkɩ.

¹¹⁵ Lalahɛ abwɛpʋ, mlɩkpʋkpɛ tɛɩ mɩsʋ, mɛnɩ nɛ́talɩ gyi mɩ Bulu mblasʋ.

¹¹⁶ Ha mɩ anlɩɩ kinkin fɛ alɩá fɛhɩɛ, mɛnɩ nétsia nkpa. Fʋ ɔkpa ndɛkɩ, máha pɛlɩ ɩkɩta mɩ.

¹¹⁷ Kɩ mɩsʋ wanklaan, mɛnɩ nénya nkpa, fówun négyi fʋ amandɩɛsʋ bregyibrɛ.

¹¹⁸ Fekina aha ánɩ́ bafwɩ fʋ amandɩɛ ɔkpa. Kpalɩ bʋdɛ amʋ́ ɩwɩ mlɛ.

¹¹⁹ Fʋtɔtswɩ ɔyɩtɔ lalahɛ abwɛpʋ fɛ́ɛ́ tsitsa fɛ ipi. Mʋ́ sʋ fʋ ɔnɔlɛ bʋ mɩ alɛ.

¹²⁰ Fʋ ɩwɩ ifu tɛha awútɔ tɔkpɩnkɩ mɩ. Fʋ asʋnbua bʋ mɩ ifu.

Ntekle Fʋ Mbla Asʋn Dʋn Sika Pɛpɛ (Ayin)

¹²¹ Nabwɛ tɔá ɩda ɔkpa, ɩbʋ alɛ. Mási mɩ wa mɩ asisipʋ ɩbɩtɔ.

¹²² Lɩɩ fʋ osumbi ɔma kinkin. Maha ɩwɩ atsupʋ abʋsisi mɩ.

¹²³ Nakɩ ɔkpa ha fʋ nkpahɔ pʋ́ yileá fɛhɩɛá fɔ́bwɛ ha mɩ alɩɩ, ansibi lawu mɩ.

¹²⁴ Pʋ fʋ ɔdwɛá ɩma ɔka kpa mɩ, fʋ osumbi, afʋsuna mɩ fʋ amandɩɛ.

¹²⁵ Fʋ osumbi ngyi, ha mɩ asʋn-asɩnu, fówun nɛ́bɩ ɔnɔ amʋʋ fɛlɛ amʋ.

¹²⁶ Oo Nana Bulu, ɩlafʋn ánɩ́ fɔ́kʋsʋ asɩ, tsufɛ batswɩ fʋ atosunahɛ tsalɩfwɩ.

¹²⁷ Ntekle fʋ mbla asʋn dʋn sika pɛpɛ, dʋn sika pɛpɛ onuto kʋraa.

¹²⁸ Mʋ́ sʋ natsu mʋ́á fʋ mbla amʋtɔ kugyikʋ bʋ alɛ, ntekisi afunu kugyikʋ.

Damli Kɩ Mɩ, Afʋwa Awɩtɔlɛ Ha Mɩ (Pe)

¹²⁹ Ɔnɔ amʋʋ fɛlɛ amʋ ɩbʋ wanwan. Mʋ́ sʋ ntegyi mʋ́sʋ nɩ.

¹³⁰ Nɩ bɛsankɩ fʋ asʋn amʋtɔ a, mʋ́tɔ tɔwankɩ. Ɔha ánɩ́ mʋ agywɩɩn ma ɔsa kʋraa tonu mʋ́ asɩ.

¹³¹ Nayaa ɔnɔ gblaun, tsufɛ fʋ mbla dɩn mɩ ɔwɔlɩ.

¹³² Damli kɩ mɩ, afʋwa awɩtɔlɛ ha mɩ, fɛ alɩá fʋ amandɩɛ igyi ha fʋ adwɛpʋ.

¹³³ Ha mɩ annatɩ dɩnka tɔá fɛhɩɛsʋ. Máha lalahɛ kʋkʋ igyi mɩsʋ ɛkɛkɛɛkɛ.

¹³⁴ Hɔ mɩ lɛ mɩ asisipʋ ɩbɩtɔ, mɛnɩ négyi fʋ mblasʋ.

¹³⁵ Wa awɩtɔlɛ ha mɩ fʋ osumbi, afʋsuna mɩ fʋ amandɩɛ.

¹³⁶ Mɩ ansɩ ntsú ɩsrɩ dɛtsʋn blablabla, tsufɛ aha bʋmɛdɛ fʋ atosunahɛsʋ gyi.

Nana Bulu Asʋnbua Da Ɔkpa (Sade)

¹³⁷ Nana Bulu, fʋtɔbwɛ yile. Fʋ asʋnbua ɩda ɔkpa.

¹³⁸ Yilebwɛ mʋ́a ɔnɔkwalɩwasʋ ɔnɔ amʋʋ fɛlɛ amʋ ɩlɩɩ.

¹³⁹ Fʋ asʋn amʋ sʋ ɔblɔ ɩhɩɛ dɛ mɩ, tsufɛ mɩ alupʋ batan mʋ́sʋ.

¹⁴⁰ Fɛhɩɛ sɔ tɔá fɛhɩɛ yaɩ kɩ. Mɩ, fʋ osumbi ntekle mʋ́ asʋn.

¹⁴¹ Kebikʋsʋ ngyi, bʋtamabu mɩ wa tɔtɔɔtɔtɔ, tamɛ mmɔkʋtan fʋ mblasʋ.

¹⁴² Fʋ yilebwɛ da ɔkpa brɛ fɛ́ɛ́, fʋ atosunahɛ ɛ igyi ɔnɔkwalɩ.

¹⁴³ Ɩkplan mʋ́a asʋn wunhɛ latʋ mɩ, tamɛ fʋ mbla tɛha awútɔ tɛsankɩ mɩ.

¹⁴⁴ Ɔnɔ amʋʋ fɛlɛ amʋ ɩda ɔkpa brɛ fɛ́ɛ́. Ha mɩ annu mʋ́ asɩ, mɛnɩ nénya nkpa.

Fʋ Mbla Amʋ Fɛ́ɛ́ Ɩbʋ Mʋ́tɔ (Kof)

¹⁴⁵ Oo Nana Bulu, ndɛ fʋ kpoli tsu mɩ klʋntɔ, sɔ mɩ ɔnɔ. Négyi fʋ amandɩɛsʋ.

¹⁴⁶ Ndɛ fʋ kpoli, hɔ mɩ nkpa. Négyi ɔnɔ amʋʋ fɛlɛ amʋsʋ.

¹⁴⁷ Ntɔkʋsʋ asa nsaɩntɔ tɔwankɩ, ndesu kpoli fʋ ndɛ fʋ asʋn amʋ ɔkpa kɩ.

¹⁴⁸ Onye fɛ́ɛ́ mmɛdɩdɩ, ndɛ tɔá fɛhɩɛ ɩwɩ susu.

¹⁴⁹ Oo Nana Bulu, fʋ ɔdwɛá ɩma ɔka sʋ nu mɩ isu. Fʋ asʋngyi ɔnɔkwalɩsʋ ɩlaha mɩ nkpa.

¹⁵⁰ Aha ánɩ́ bapʋ agywɩɩn lalahɛ bʋgya mɩ batʋ mɩ ta. Bʋbʋ ɩfɔ fʋ atosunahɛ ɩwɩ,

¹⁵¹ tamɛ Oo Nana Bulu, fʋbʋ mɩ wa. Fʋ mbla amʋ fɛ́ɛ́ ɩbʋ mʋ́tɔ.

¹⁵² Nɛbɩ ɔnɔ amʋʋ fɛlɛ amʋ dodoodo. Nowun ánɩ́ fɔbwɛ mʋ́ ánɩ́ ibétsiá brɛ fɛ́ɛ́.

Fʋ Asʋn Blɩhɛ Fɛ́ɛ́ Nwun Gyi Ɔnɔkwalɩ (Rɛs)

¹⁵³ Kɩ ipian ánɩ́ ndewun, afʋlɛ mɩ, tsufɛ mmɔkʋtan fʋ atosunahɛsʋ.

¹⁵⁴ Lɩɩ mʋ́tɔ ha mɩ, afʋka lɛ mɩ. Lakʋsʋa mɩ fɛ alɩá fɛhɩɛ.

¹⁵⁵ Nkpahɔ bʋ ɩfɔ lalahɛ abwɛpʋ wa, tsufɛ bʋmegya fʋ amandɩɛ ɔkpa.

¹⁵⁶ Oo Nana Bulu, fʋ nwewun ɩtsɔ. Fʋ asʋnbua ɔnɔkwalɩsʋ sʋ lakʋsʋa mɩ.

¹⁵⁷ Aha ánɩ́ bʋdɩn mɩsʋ pʋ́ mɩ adʋn bʋtsɔ, tamɛ mmɔkʋkina ɔnɔ amʋʋ fɛlɛ amʋ.

¹⁵⁸ Aha ánɩ́ bʋtɛdalɩ fʋ ɔma ɩwɩ tɔwa mɩ ɔblɔ, tsufɛ bʋtamagyi fʋ asʋnsʋ.

¹⁵⁹ Kɩ alɩá ntekle fʋ mbla, afʋlapʋ fʋ ɔdwɛá ɩma ɔka ha mɩ nkpa.

¹⁶⁰ Fʋ asʋn blɩhɛ fɛ́ɛ́ nwun gyi ɔnɔkwalɩ. Fʋ amandɩɛ kugyikʋ da ɔkpa, ibetsia brɛ fɛ́ɛ́.

Nana Bulu, Fʋsʋ Mɩ Ansɩ Dɩn (Sin)

¹⁶¹ Wulu ahandɛ bʋdɩn mɩsʋ kʋkʋ kpalɩ, tamɛ ntenya fʋ asʋn amʋ ifu tsu mɩ ɩklʋntɔ.

¹⁶² Fʋ asʋn amʋ tegyi mɩ ansɩ, fɛ ɔha ánɩ́ alamɛntɩ itoyile tsu ɩsatɔ.

¹⁶³ Ntamafia afunu, ɩbʋ mɩ nyanya, tamɛ ntekle fʋ atosunahɛ amʋ asʋn.

¹⁶⁴ Ntɛkanfʋ fʋ tse sienɔ ɛkɛwʋlɛ, tsufɛ fʋ amandɩɛ da ɔkpa.

¹⁶⁵ Fʋ atosunahɛ adwɛpʋ bʋtenya iwilwii kpɔnkpɔɔnkpɔntɩ, tɔtɔ ɩmɛ́ɛha amʋ́ abʋsrɛɩ.

¹⁶⁶ Oo Nana Bulu, fʋsʋ mɩ ansɩ dɩn ánɩ́ fɔ́hɔ mɩ nkpa. Ntegyi fʋ mblasʋ.

¹⁶⁷ Ntegyi ɔnɔ amʋʋ fɛlɛ amʋsʋ, ilegyi mɩ ansɩ.

¹⁶⁸ Ntegyi fʋ mbla pʋ́ ɔnɔá fɛlɛsʋ, tsufɛ mɩ bwɛhɛ fɛ́ɛ́ ɩda fʋ ansɩtɔ.

Dunka Mɩ Fʋ Osumbi (Taw)

¹⁶⁹ Oo Nana Bulu, nu mɩ isu, afʋha mɩ annu asʋn asɩ, fɛ alɩá fɛblɩ.

¹⁷⁰ Nu mɩ kokoli, afʋhɔ mɩ fɛ alɩá fɛhɩɛ yaɩ.

¹⁷¹ Mɩ ɔnɔ ɩbɛ́kanfʋ fʋ, lakanfʋ fʋ, tsufɛ fasuna mɩ fʋ amandɩɛ.

¹⁷² Nɔ́wa atɔá fɛhɩɛ yaɩ ɩwɩ ɩlʋ, tsufɛ fʋ mbla fɛ́ɛ́ ɩda ɔkpa.

¹⁷³ Da ɩwɩsʋ afʋgyi mɩ bʋalɛ, tsufɛ fʋ mbla nalɛ.

¹⁷⁴ Oo Nana Bulu, fʋ nkpahɔ dɩn mɩ ɔwɔlɩ. Fʋ atosunahɛ tɛha awútɔ tɛhɩɛ sankɩ mɩ.

¹⁷⁵ Ha mɩ antsia nkpa, mɛnɩ nɛ́kanfʋ fʋ, afʋha mɩ anya mbʋa tsu fʋ amandɩɛtɔ.

¹⁷⁶ Nabwɛ fɛ kufa fwɩhɛ. Dunka mɩ fʋ osumbi, tsufɛ mmɔkʋtan fʋ mblasʋ.