Israelfɔ Ɩlʋ 115 - Bulu Ntam Pɔpwɛ mʋ́a Israel Ɩlʋ

Atunku Bʋbʋ Ɔnɔ Bʋtamatɔɩ

¹ Megyi anɩ o. Oo Nana Bulu, megyi anɩ bɔ́wa numnyam. Fʋ ɩda lɛkana ánɩ́ bɔ́wa numnyam, tsufɛ fʋ ɔdwɛ ɩma ɔka, fʋbʋ ɔnɔkwalɩ.

² Ntogyi sʋ ɔmá-ɔmá bɛ́fɩtɛ anɩ bɛɛ, “Nkʋnʋ mlɩ Bulu bʋ?”

³ Anɩ Bulu bʋ ɔsʋsʋ, togyitɔá odekle ɔtɔbwɛ,

⁴ tamɛ amʋ́ atunku mʋ́ a, anyankpʋsa lɔpʋ sika fututu mʋ́a pɛpɛ bwɛ amʋ́.

⁵ Bʋbʋ ɔnɔ, bʋtamatɔɩ. Bʋbʋ ansibi, bʋtamawun atɔ.

⁶ Bʋbʋ asʋ, bʋtamanu asʋn. Bʋbʋ ɔwɔntɩ, bʋtamahɔ atɔ afu.

⁷ Bʋbʋ ɩbɩ, bʋtamakɩta atɔ, Bʋbʋ ayabi, bʋtamanatɩ, amʋ́ ɔmɛ ɛ tamalɩn.

⁸ Atunku amʋ abwɛpʋ, pʋ́ aha ánɩ́ bʋtɔpʋ ansɩ dɩnka amʋ́sʋ bʋbwɛ fɛ atunku amʋ.

⁹ Israelfɔ, mlɩpʋ ansɩ dɩnka Nana Bulusʋ. Mʋtegyi mlɩ bʋalɛ, otegyi ɩban wa mlɩ.

¹⁰ Aaron woyi, mlɩpʋ ansɩ dɩnka Nana Bulusʋ. Mʋtegyi mlɩ bʋalɛ, otegyi ɩban wa mlɩ.

¹¹ Nana Bulu ifu anyapʋ, mlɩpʋ ansɩ dɩnka mʋsʋ. Mʋtegyi mlɩ bʋalɛ, otegyi ɩban wa mlɩ.

¹² Nana Bulu ansɩ dɩn anɩsʋ, obóyula anɩ. Obóyula Israel woyi, obóyula Aaron woyi.

¹³ Obóyula akpʋnkpʋ-akaka fɛ́ɛ́á bʋtenya mʋ ifu.

¹⁴ Nana Bulu ɔha mlɩa mlɩ abi-aná amlɩhɩɛ klɛɩ.

¹⁵ Nana Bulu, ɔsʋ mʋ́a asɩ Ɔbwɛpʋ amʋ oyula mlɩ.

¹⁶ Nana Bulu bʋ ɔsʋsʋ, ɔlɔpʋ ɔsʋlʋ ha anyankpʋsa.

¹⁷ Awupʋ bʋtamakanfʋ Nana Bulu, amʋ́ mʋ́ bʋbʋ ɔtɩnɛá ɔha tamatɔɩ.

¹⁸ Tamɛ anɩ akɩankpapʋ mʋ́ abɛ́kanfʋ Nana Bulu, tsu sei pʋya brɛ fɛ́ɛ́. Mlɩkanfʋ Nana Bulu!