Israelfɔ Ɩlʋ 112 - Bulu Ntam Pɔpwɛ mʋ́a Israel ƖlʋAnsɩ Igyi Ɔha Ánɩ́ Otenya Nana Bulu Ifu 1 Mlɩkanfʋ Nana Bulu! Ansɩ igyi ɔha ánɩ́ otenya Nana Bulu ifu, mʋ ansɩ tegyi mʋ mbla ɩwɩ. 2 Mʋ abi-aná bénya tumi ɔsʋlʋ amʋsʋ. Nana Bulu obóyula ɔha ánɩ́ mʋ asʋn da ɔkpa abi-aná. 3 Obénya atɔ, nya ɩwɩ mʋ woyitɔ. Yilebwɛ mɛ́ɛkpa mʋsʋ ɛkɛkɛɛkɛ. 4 Wankɩ tɔwankɩ okluntɔ ha ɔha ánɩ́ mʋ asʋn da ɔkpa. Awɩtɔlɛpʋ, nwɛ owunpʋ pʋ́ yile ɔbwɛpʋ ogyi. 5 Ɩtɔwa alɛ ha awɩtɔlɛpʋá ɔtɔpʋ atɔ pan ɔha, ɔtɔbwɛ mʋ togyitɔ ɔnɔkwalɩsʋ. 6 Tsufɛ yile ɔbwɛpʋ ɔmɛ́ɛdɩda ɛkɛkɛɛkɛ. Aha bɛ́kaɩn mʋsʋ brɛ fɛ́ɛ́. 7 Ɩwɩklɩ tamawa mʋ ifu. Mʋ klʋn dɩn Nana Bulusʋ kinkiinkin. 8 Opuni tamatsii mʋ, ifu tamakɩta mʋ; yɛfʋn brɛá obówun ánɩ́ alagyi mʋ alupʋsʋ. 9 Ɔtɛlɛ ɩwɩtɔ kie ahianfɔ atɔ, mʋ yilebwɛ tamata. Bulu ɔbɔ́wa mʋ ɔwʋnlɩn, wa mʋ numnyam. 10 Ɔha lalahɛ obówun nya ɔblɔ, wɩ ayín, yɛ. Mʋ nhɩhɩɛ tamawa alɛ. |
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
Wycliffe Bible Translators, Inc.