Israelfɔ Ɩlʋ 111 - Bulu Ntam Pɔpwɛ mʋ́a Israel Ɩlʋ

Nɔ́pʋ Mɩ Klʋn Fɛ́ɛ́ Da Nana Bulu Ɩpan

¹ Mlɩkanfʋ Nana Bulu! Nɔ́pʋ mɩ klʋn fɛ́ɛ́ da Nana Bulu ɩpan, brɛá aha ánɩ́ amʋ́ asʋn da ɔkpa befia.

² Nana Bulu gyumagyihɛ lomoni. Aha ánɩ́ amʋ́ ansɩ tegyi mʋ́ ɩwɩ fɛ́ɛ́, bʋtɛkasɩ atɔ tsu mʋ́tɔ.

³ Mʋ gyumagyihɛ lɛlɛ mʋ obú pʋ́ mʋ numnyam ɔwan. Mʋ yilebwɛ bʋ ɩnʋ brɛ fɛ́ɛ́.

⁴ Ɔtɛha bʋtɛkaɩn mʋ ofulasʋ. Awɩtɔlɛpʋ pʋ́ nwɛ owunpʋ Nana Bulu gyi.

⁵ Ɔtɛha aha ánɩ́ bʋtenya mʋ ifu atogyihɛ. Ɔtamatan mʋ ntam amʋsʋ ɛkɛkɛɛkɛ.

⁶ Ɔlɔpʋ ɔmá-ɔmá ɔsʋlʋ ha mʋ aha, pʋsuna mʋ tumiá ɔbʋ mʋ gyumagyihɛsʋ.

⁷ Mʋ atɔ bwɛhɛ fɛ́ɛ́ igyi ɔnɔkwalɩ, ɩda ɔkpa. Aha bɛ́talɩ pʋ ansɩ dɩnka mʋ mbla fɛ́ɛ́sʋ.

⁸ Ɔlɔbwɛ mʋ́ ɩlɩɩ kinkiinkin brɛ fɛ́ɛ́. Bɔ́pʋ ɔnɔkwalɩ mʋ́a yilebwɛ gyi mʋ́sʋ.

⁹ Ɔlɛka lɛ mʋ aha, ka mʋ ntam tswɩ ha brɛ fɛ́ɛ́. Ɔlɔwankɩ, mʋ ɩda bʋ ifu.

¹⁰ Nyansa otsuakpa gyi Nana Bulu ifunya. Aha ánɩ́ bʋtegyi mʋ́sʋ bʋtonu asʋn asɩ wanklaan. Aha bʋkanfʋ mʋ brɛ fɛ́ɛ́.