Israelfɔ Ɩlʋ 11 - Bulu Ntam Pɔpwɛ mʋ́a Israel ƖlʋAha Ánɩ́ Amʋ́ Asʋn Da Ɔkpa Obówun Bulu Ansɩtɔ Dawid ɩlʋ ha ɩlʋ osunapʋ. 1 Nana Bulu nasrɩ tanʋ. Ɔkpa mɔmʋsʋ mlɩdɛ mɩ bla mlɩaa, “Wa ɔsa srɩ ŋain, fɛ alɩá obubwi tofuli yɔ ɩbʋsʋ? 2 Tsufɛ aha lalahɛ baklɩ amʋ́ ɩta, bɩtɩ mʋ́. Baŋain okluntɔ bɔ́tswɩ aha ánɩ́ amʋ́ asʋn da ɔkpa. 3 Nɩ bobwie ntswɩasɩ amʋ bun a, ntɔ ɔha yile ɔbɛ́talɩ bwɛ?” 4 Nana Bulu bʋ mʋ Ɔtswɛkpa. Otsie mʋ owie-obiasʋ ɔsʋsʋ. Ɔdɛ anyankpʋsa ánɩ́ bʋbʋ ɔtɩnɛgyiɔtɩnɛ kɩ. Odewun tɔá bʋdɛbwɛ. 5 Nana Bulu tɛkapʋ yile abwɛpʋ pʋ́ lalahɛ abwɛpʋ kɩ, tamɛ otekisi aha ánɩ́ bʋtekle owuntɔlɩn. 6 Ɔbɛ́ha atonkodu mʋ́a agyawunuá ɩdɛhɔ bótswie wʋlɩ lakpan abwɛpʋsʋ. Lɩlɩtɔ afuá mʋ́ ɔnɔ bʋ ɔnlɩn ɔbɔ́pʋnuna amʋ́. 7 Tsufɛ yile ɔbwɛpʋ Nana Bulu gyi. Otekle yile. Aha ánɩ́ amʋ́ asʋn da ɔkpa obówun mʋ ansɩtɔ. |
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
Wycliffe Bible Translators, Inc.