Israelfɔ Ɩlʋ 106 - Bulu Ntam Pɔpwɛ mʋ́a Israel Ɩlʋ

Bulu, Nɩ Fʋdɛ Fʋ Ɔmá Nkpa Hɔ A, Gyi Mɩ Bʋalɛ

¹ Mlɩkanfʋ Nana Bulu! Mlɩda mʋ ɩpan, tsufɛ ɔbʋ alɛ. Mʋ ɔdwɛ ɩma ɔka!

² Ma ɔbɛ́talɩ blɩ ntobi akpɔnkpɔntɩá Nana Bulu labwɛ? Ntɛ ma ɔbɛ́talɩ kanfʋ mʋ, ɩbɔ́fʋn?

³ Ansɩ igyi aha ánɩ́ bʋtegyi asʋn ɔnɔkwalɩsʋ, bʋtɔbwɛ tɔá ɩda ɔkpa brɛ fɛ́ɛ́.

⁴ Nana Bulu, nɩ fʋdɛ fʋ ɔmá bʋalɛ gyi a, kaɩn mɩsʋ. Nɩ fʋdɛ amʋ́ nkpa hɔ a, gyi mɩ bʋalɛ.

⁵ Mɛ́nɩ nówun siadɩɛá faha aha amʋʋ falɛ amʋ. Mɩa fʋ ɔmá amʋ anya ansigyi, mɩa fʋ siadɩɛ akanfʋ fʋ.

⁶ Anɩa anɩ anain anɩlapʋ ɩla gyi fʋ. Anɩlabwɛ lalahɛ, wa owuntɔlɩn kpan.

⁷ Brɛá anɩ anain betsia Egyipte a, bʋmowun fʋ ofula labi. Bʋmɛkaɩn fʋ ɔdwɛá ɩma ɔka tsɔtsɔɔtsɔá fɔwa ha amʋ́sʋ. Ɩnɩ sʋ bɔkʋsʋ lɩɩ fʋsʋ Ɔpʋ Pɛpɛ ɔnɔ.

⁸ Mʋ́ o a, ɔlɔhɔ amʋ́ nkpa mʋ ɩda amʋ sʋ, mɛnɩ ɔbɛ́lɛ mʋ tumi kpɔnkpɔntɩ ɔwan.

⁹ Ɔlɛlɛ ɔnɔ, Ɔpʋ Pɛpɛ lɛkpɩ. Ɔlɛkpa amʋ́ tsʋn bʋnkpa kluklutɔ fɛ ɔsʋlʋkpansʋ bʋna.

¹⁰ Alɩ ɔlɛlɛ amʋ́ alupʋ ɩbɩ, ka amʋ́ lɛ adʋn tumi asɩ nɩ.

¹¹ Ntsu lɛmɛ amʋ́ alupʋ. Amʋ́tɔ ɔkʋlɛ kʋraa mésian.

¹² Ɩnʋ bɔhɔ mʋ asʋnsʋ gyi, wa ɩlʋ kanfʋ mʋ.

¹³ Ɩmɔwa ɔpá kʋkʋ bɛtan mʋ gyumagyihɛsʋ, bʋmetsia gyo mʋ otswii amʋ́.

¹⁴ Atɔ lɛhɩɛ tsia dɩnka amʋ́ ɔwɔlɩ ɔsʋlʋkpansʋ ɩnʋ. Mʋ́ sʋ bɔsɔ Bulu kɩ ɔsʋlʋ wʋlɩhɛ amʋsʋ.

¹⁵ Ɩnɩ sʋ ɔlɔbwɛ tɔá bɛfɩtɛ ha amʋ́, tamɛ ɔlɛha amʋ́ bɔlɔ ɩlɔ lalahɛ.

¹⁶ Brɛá bʋtsie amʋ́ ɔswɩɩkpa a, amʋ́ ansɩ lɛpɛ Mose mʋa Nana Bulu igyi ɔhapʋ Aaronsʋ.

¹⁷ Ɔsʋlʋ lɛyaa ɔnɔ mɛ Datan, pula Abiram mʋa mʋ aha.

¹⁸ Ogya ɛ lɛda amʋ́ abuopʋtɔ, ɩlɔhɔ awuntɔlɩnpʋ amʋ fɛ́ɛ́.

¹⁹ Bɛŋlaɩn sika pɛpɛ bwɛ ɔnantswiebi, sum mʋ́ Hɔrɛb ɩbʋasɩ.

²⁰ Bɔpwɛ ɔnantswieá ɔtɔwɩ ɩfa tunku, pʋtsɛ Buluá ogyi amʋ́ numnyam.

²¹ Bɛtan amʋ́ Ɔhɔpʋ Bulusʋ. Mʋlɔbwɛ atɔ akpɔnkpɔntɩ Egyipte,

²² bwɛ tɔá ɩbʋ ifu Ham ɔsʋlʋsʋ pʋ́ tɔá ɩbʋ wanwan Ɔpʋ Pɛpɛ ɔnɔ.

²³ Mʋ́ sʋ ɔlɛblɩ ɔbɛɛ, mɔ́mɔ amʋ́, tamɛ Moseá ɔlɛlɛ lɔkʋsʋ kokoli amʋ́ nwunsʋ, ha mʋ ɔblɔ lɛka itin, ɔmɛtra mɔ amʋ́.

²⁴ Ɩnʋ bekina ɔsʋlʋ wanklaan amʋsʋ yɔ, tsufɛ bʋmɔhɔ tɔá ɔlɛhɩɛ ha amʋ́sʋ gyi.

²⁵ Botsu ɔnɔ mʋsʋ amʋ́ tati-obuto ɩnʋ, tsufɛ bʋmobu mʋ asʋn amʋ.

²⁶ Ɩnɩ sʋ olotsu ɩbɩ fʋa ka ntam bun amʋ́sʋ ɔbɛɛ, mɛha amʋ́ bówu ɔsʋlʋkpan amʋsʋ.

²⁷ Mɛ́ha amʋ́ abi-aná bɛ́da saɩn yɔ ɔmá-ɔmátɔ, ntɛ wie aputu.

²⁸ Ɩnʋ bɔpʋ ɩwɩ yɛmanta Peor ɔkpɩsʋ, bʋdɛ atogyihɛá bapʋha afuli gyi.

²⁹ Bɔpʋ amʋ́ bwɛhɛ anfɩ wa Bulu ɔblɔ. Mʋ́ sʋ ɩlɔ lalahɛ lɛkpa wie amʋ́tɔ, bʋdewu.

³⁰ Tamɛ Finehas lɔkʋsʋ kɔ ha Bulu amʋ́ nwunsʋ, ɩlɔ amʋ lɛka itin.

³¹ Mʋ́ sʋ Nana Bulu lotsu mʋ ánɩ́ mʋ asʋn da ɔkpa brɛ fɛ́ɛ́.

³² Bɛtra wa Bulu ɔblɔ Meriba, bɛha Mose lenyaa asʋn amʋ́ sʋ,

³³ tsufɛ bɛha mʋ olenya ɔblɔ tsʋn, ɩlɛha mʋ ɔlɛblɩ mimlala.

³⁴ Israelfɔ bekina bʋmɔmɔ ɔmá-ɔmá amʋ, fɛ alɩá Nana Bulu lɛblɩ.

³⁵ Mboun amʋ́a ɔmátɔfɔ amʋ bɔbwɛ ɩkʋlɛ, bɛkasɩ amʋ́ amandɩɛ.

³⁶ Bosum amʋ́ ɩkpɩ, ilemli agbla kɩta amʋ́.

³⁷ Bɔpʋ amʋ́ abi yinhɛ mʋ́a abi tsɩhɛ kʋraa ha ɩkpɩ igyi.

³⁸ Bɛtsɛɩ obugya ánɩ́ ɔlala ma mʋ́ ɩwɩ wʋlɩ asɩ, tsufɛ bɔpʋ amʋ́ abi ha Kanaanfɔ ɩkpɩ igyi, ɩlɛha ifin lɛda ɔsʋlʋ amʋ.

³⁹ Amʋ́ bwɛhɛ anfɩ lɛha bɔkpɔɩ Bulu ansɩtɔ, mli mbʋa atɔpʋ ɔŋɛtɔ.

⁴⁰ Ɩnʋ Nana Bulu lɛhɩɛ nya ɔblɔ mʋ ɔmásʋ, mʋ ogyikpa lɔwa mʋ nyanya.

⁴¹ Olesi amʋ́ ha ɔmá-ɔmá, amʋ́ alupʋ begyi amʋ́sʋ.

⁴² Amʋ́ alupʋ bɛkpa amʋ́ manta, ha betsia amʋ́ tumi asɩ.

⁴³ Oletsia lɛ amʋ́, tamɛ bɛhɩɛá bɔ́wa asʋtɔ-ɔnlɩn. Mʋ́ sʋ amʋ́ lalahɛbwɛ lɛba amʋ́ asɩ.

⁴⁴ Mʋ́ alɩ o a, olowun amʋ́ nwɛ, brɛá olonu amʋ́ isu.

⁴⁵ Ɔlɛkaɩn ntam ánɩ́ ɩbʋ mʋa amʋ́nyɔ nsɩnɛsʋ. Mʋ ɔdwɛá ɩma ɔka sʋ, ilowie mʋ ɩwɩtɔ.

⁴⁶ Ɔlɛha amʋ́ aha ánɩ́ bɛkɩta amʋ́ ndoun bowun amʋ́ nwɛ.

⁴⁷ Oo Nana Bulu anɩ Bulu, gyi anɩ bʋalɛ! Lɛ anɩ tsu ɔmá-ɔmátɔ befia, mɛnɩ abɛ́da fʋ ɩpan, kanfʋ fʋ ɩda ansigyisʋ.

⁴⁸ Bʋkanfʋ Nana Bulu, Israel Bulu, tsu brɛá ɔyɩ mɔkʋlɩn yɛfʋn brɛá ɩtamata. Ɔmá fɛ́ɛ́ bʋblɩ bɛɛ, “Ɩba mʋ́tɔ!” Mlɩkanfʋ Nana Bulu!