Israelfɔ Ɩlʋ 105 - Bulu Ntam Pɔpwɛ mʋ́a Israel Ɩlʋ

Mlɩda Bulu Gyumagyihɛ Ɔkan

¹ Mlɩda Nana Bulu ɩpan, amlɩsu kpoli mʋ. Mlɩda mʋ gyumagyihɛ ɔkan suna ɔmá fɛ́ɛ́.

² Mlɩwa ɩlʋ ha mʋ. Mlɩwa ɩlʋ kanfʋ mʋ. Mlɩblɩ mʋ ofula ánɩ́ alabwɛ fɛ́ɛ́.

³ Mlɩnya mʋ ɩda wankɩhɛ amʋ ɩwɩ ansigyi. Nana Bulu adunkapʋ, mlɩnya ansigyi.

⁴ Mlɩdunka Nana Bulu mʋa mʋ ɔwʋnlɩn. Mlɩdunka mʋ brɛ fɛ́ɛ́.

⁵ Mlɩkaɩn mʋ ofulabwɛ, pʋ́ mʋ asʋnbuasʋ.

⁶ Mʋ osumbi Abraham abi-aná, Yakob abiá alalɛ.

⁷ Mʋgyi Nana Bulu, anɩ Bulu amʋ nɩ. Mʋtegyi ɔyɩ fɛ́ɛ́ asʋn.

⁸ Ɔtamatan mʋ ntam amʋsʋ ɛkɛkɛɛkɛ, asʋn ánɩ́ ɔlɔpʋha otuntufla mpɩm-mpɩm.

⁹ Ɩnɩgyi ntam ánɩ́ mʋa Abraham bɛka, pʋ́ mʋ́á ɔlɛka ha Isakɩ nɩ.

¹⁰ Ɔlɛdɩnka ibwi mʋ́sʋ, ɩlɔbwɛ amandɩɛá ɩda ha Yakob ɔmá. Igyi ntam ánɩ́ ibétsia ha Israel brɛ fɛ́ɛ́.

¹¹ Ɔbɛɛ, “Fʋ nɔ́pʋ Kanaan ɔsʋlʋ ha, ɩbɔ́bwɛ mɩ siadɩɛ ogyikpa ánɩ́ fénya.”

¹² Brɛá bʋmɔtsɔ bʋgyi kpalobi ɩkʋ, bʋgyi afɔɔ ɔsʋlʋ amʋsʋ,

¹³ bɛnatɩ ki tsʋn ɔmá-ɔmátɔ, tsu iwie ogyikpa yɔ iwie ogyikpa.

¹⁴ Nana Bulu mɛ́ha ɔhaa ɔkpa osisi amʋ́. Amʋ́ sʋ ɔlɔwa ɩyɩn wa awie

¹⁵ ɔbɛɛ, “Mlɩmápʋ ɩbɩ da aha anfɩ nada ofuli. Mlɩmábwɛ mɩ ɔnɔsʋ atɔɩpʋ tɔtɔ.”

¹⁶ Ɔlɛha akʋn lɛba ɔsʋlʋ amʋsʋ, oletin amʋ́ atogyihɛ otsukpa ɔkpa fɛ́ɛ́.

¹⁷ Ɔlɔwa oyin ɔkʋ gya amʋ́ nkpa, mʋgyi Yosef amʋʋ bɛfɛ, oleyemli ɔkpábi amʋ.

¹⁸ Bɔwa mʋ ayabi kplakitsi, wa mʋ ɔmɛtɔ ɩkan.

¹⁹ Nana Bulu asʋn lɔsɔ Yosef kɩ, yɛfʋn ɛkɛá mʋ asʋn blɩhɛ amʋ lɛba mʋ́tɔ.

²⁰ Ɩnʋ Egyipte owie lɛha bɛlɛ mʋ obú. Ɔmásʋ ogyipʋ anfɩ lɛha mʋ olegyi ɩwɩ.

²¹ Ɔlɔpʋ mʋ bwɛ mʋ woyi pʋ́ mʋ atɔ fɛ́ɛ́sʋ ɔkɩpʋ.

²² Ɔlɛlɛ mʋ ɔkpa ánɩ́ ɔhɩɛ mʋ ahandɛ abʋbwɛ tɔá odekle, isuna amʋ́ nyansa.

²³ Ɩnʋ mʋ sɩ Israel lɛba Egyipte. Yakob mʋa mʋ aha bemli afɔɔ Ham ɔsʋlʋsʋ.

²⁴ Nana Bulu lɛha amʋ́ bɛhɩɛ klɛɩ, wa ɔwʋnlɩn dʋn amʋ́ alupʋ.

²⁵ Ɔlɛha Egyiptefɔ agywɩɩn lɛdamli, bolu Israelfɔ, bɔgywɩɩn amʋ́ ɩwɩ lalahɛ.

²⁶ Mʋ́ sʋ ɔlɔwa mʋ osumbi Mose pʋ́ Aaron amʋʋ ɔlɛlɛ amʋ.

²⁷ Bɔbwɛ mʋ ofula Egyiptefɔtɔ, bwɛ osuna Ham ɔsʋlʋsʋ ɩnʋ.

²⁸ Ɔlɛha oklun ɩlɛba, ɔsʋlʋ amʋsʋ ilebi tuun, bʋmegyi mʋ asʋnsʋ.

²⁹ Ɔlɛha amʋ́ ntsu lɛdamli obugya, aklɛmɛtɩ bowu.

³⁰ Nkle bɔbʋla ɔsʋlʋ amʋsʋ ɔtɩnɛgyiɔtɩnɛ, bowie yɔ amʋ́ awie obutotɔ aná fɛ́ɛ́.

³¹ Ɔlɛlɛ ɔnɔ, awʋlʋ mʋ́a ntsʋnkɩ bɔbʋla amʋ́ ɔsʋlʋsʋ.

³² Ɔlɛha atsufolibi lotswie si nyankpʋ, ɔprada lɔpʋtɩ ɔsʋlʋ amʋ fɛ́ɛ́sʋ.

³³ Oleyinta amʋ́ waɩn afla pʋ́ amʋ́ apɔntɔ, biabia amʋ́ oyi kugyikʋ.

³⁴ Ɔlɛlɛ ɔnɔ, atsantsankʋá bʋma ɩklatɔ bɛdalɩ.

³⁵ Bɔwɩ ɔsʋlʋ amʋsʋ ɩfa pʋ́ amʋ́ ndɔtɔ-atɔ fɛ́ɛ́.

³⁶ Ɔlɔmɔ amʋ́ ɔsʋlʋsʋ abitɩ fɛ́ɛ́, amʋ́ yasʋtɔ fɛ́ɛ́ abi gyankpapʋ.

³⁷ Ɔlɛha Israelfɔ bɔpʋ Egyiptefɔ sika pɛpɛ mʋ́a fututu dalɩ ɔmá amʋtɔ. Ɔpɔnpʋ ɔkʋkʋ métsia abusuan anfɩtɔ.

³⁸ Amʋ́ natɩ lɔwa Egyiptefɔ ɔdwɛ, tsufɛ amʋ́ ɩwɩ lɔwa amʋ́ ifu.

³⁹ Ɔlɛtɛɩ agyinde bun amʋ́sʋ fɛ tati, ha ogya lɔwankɩ ha amʋ́ onye.

⁴⁰ Bɛfɩtɛ mʋ iye, ɔlɛha amʋ́ apʋtsatsa. Ɔlɔpʋ ɔsʋsʋ atogyihɛ ɛ bʋla amʋ́.

⁴¹ Olefinki bʋta, ntsu lɛfɛn dalɩ mʋ́tɔ, ɩna ɔsʋlʋ wʋlɩhɛsʋ fɛ ntsu tsʋnhɛ,

⁴² tsufɛ ɔlɛkaɩn mʋ ntam amʋʋ ɔlɛka ha mʋ osumpʋ Abraham amʋsʋ.

⁴³ Ɔlɛkpa mʋ ɔmá ansigyisʋ dalɩ Egyipte. Aha amʋʋ ɔlɛlɛ amʋ, bʋna bʋdɛ ɩlʋ wa kʋklʋkʋʋ.

⁴⁴ Ɔlɔpʋ ɔmá-ɔmá ɔsʋlʋ ha amʋ́. Ɔlɛha botsu amʋ́ ɔsʋlʋsʋ atɔ bwɛ amʋ́ klɛ.

⁴⁵ Alɩá bégyi mʋ amandɩɛ pʋ́ mʋ atosunahɛsʋ, sʋ ɩnɩ fɛ́ɛ́ lɛba mʋ́tɔ. Mlɩkanfʋ Nana Bulu!