Israelfɔ Ɩlʋ 104 - Bulu Ntam Pɔpwɛ mʋ́a Israel Ɩlʋ

Bulu Numnyam Itsia Brɛ Fɛ́ɛ́

¹ Oo mɩ ɔkla, kanfʋ Nana Bulu. Nana Bulu mɩ Bulu, fɔkʋkʋ moni o! Fʋdɩdɩ obú mʋ́a numnyam.

² Fʋdɩdɩ wankɩ fɛ tati. Fʋlɛtɛɩ nwʋlʋtatɔ fɛ fʋ tati-obu.

³ Feyi fʋ woyi dɩnka ɔsʋsʋ ntsusʋ, pʋ́ agyinde bwɛ fʋ keke, fʋtɛnatɩ afu abambasʋ.

⁴ Fɔpʋ afu bwɛ fʋ abɔpʋ, bwɛ ogya plɛnplɛn fʋ asumpʋ.

⁵ Fɔwa ɔyɩ ntswɩasɩ, mɛnɩ ɩmɛ́ɛkpɩnkɩ ɛkɛkɛɛkɛ.

⁶ Fɔpʋ ɔpʋ okluklukpa tɛɩ bun mʋ́sʋ fɛ tati. Ntsu lɔbʋla dɩnka abʋsʋ.

⁷ Brɛá fɛlɛ ɔnɔ a, ntsu amʋ ɩlɛsrɩ. Ɩlɛsrɩ natɩ brɛá fʋ ɔmɛ lɛlɩn fɛ ɔprada.

⁸ Ntsu amʋ lɔbʋla dɩnka abʋsʋ, kplɩ bowie abʋnkpatɔ, ɔtɩnɛá fɛha mʋ́ fɛɛ, ɩdɩ.

⁹ Fɔtswɩ ɔka ha mʋ́, mɛnɩ ɩmɛ́ɛdafa mʋ́sʋ. Fowun ɩmɛ́ɛtra tsu ɔsʋlʋ ɛkɛkɛɛkɛ.

¹⁰ Fɛha ntsu letii wa abʋnkpatɔ, ɩdɛtsʋn abʋ nsɩnɛ.

¹¹ Ilemli ntsu nunhɛ ha pututɔ-mbwɩ. Pututɔ mpɔnsʋra aná ɛ bʋtɔpʋka amʋ́ ɔmɛwʋlɩ itin.

¹² Ntsu amʋ ɔnɔ nyi abambitɔ mbubwi bɔbwɛ amʋ́ asia wa, bʋtɛdɩnka mʋ́tɔ wa ɩlʋ.

¹³ Fʋtɛha nyankpʋ totswie tsu fʋ woyitɔ ɔsʋsʋ wʋlɩ abʋsʋ. Fʋ gyumagyihɛtɔ-abi labʋla ɔsʋlʋsʋ.

¹⁴ Fʋtɛha ɩfa tɔkwɛ ha woyitɔ-mbwɩ. Fʋtɛha nyankpʋsa atɔ abi otodu, pʋnya atogyihɛ tsu ɔsʋlʋtɔ,

¹⁵ nta ánɩ́ ɩbɛ́ha mʋ ansɩ bégyi, ofobiá ɔbɛ́kpa wa akɩlɛ pʋ́ atogyihɛá ɩbɔ́wa mʋ ɔwʋnlɩn.

¹⁶ Fʋ nyi amʋ fɛ́ɛ́ tenya ntsu bregyibrɛ. Lebanon ndum ánɩ́ foswie ɛ.

¹⁷ Mbubwi bʋtɔlʋ amʋ́ asia wa nyi amʋtɔ. Ntsusʋ-akpakpa bʋtetsia kwɩan nyitɔ.

¹⁸ Abrɛ ɔdɩkpa gyi abʋ amʋsʋ, awɩa bʋteŋain abwi mbɔtɔ.

¹⁹ Fɔbwɛ ɔtsra ánɩ́ isuna ɩbrɛtɔ, owi yin brɛá ɔtɔpʋkplɩ wie.

²⁰ Fɔbwɛ oklun, igyi onye. Alɩ brɛ amʋtɔ pututɔ-mbwɩ fɛ́ɛ́ bʋtɛdalɩ nɩ.

²¹ Agyata bʋtokpoun dunka tɔá bɛ́kɩta, pʋnya atogyihɛ tsu Bulu wa.

²² Owi ɩdalɩ a, bʋteyinki yɔ amʋ́ ɔdɩkpa,

²³ nyankpʋsa ɛ tɛdalɩ yɔyɔ mʋ agyʋma alɩɩ yɛfʋn ntʋpwɛsʋ.

²⁴ Oo Nana Bulu, fʋ gyumagyihɛ ɩhɩɛ tsɔ o! Nyansa fɔpʋbwɛ mʋ́ fɛ́ɛ́. Fʋ atɔ bwɛhɛ labʋla ɔyɩtɔ fɛ́ɛ́.

²⁵ Ɔpʋ da a. Ilomoni, ɩlɛtɛɩ. Mʋ́tɔ mbwɩ ayile mʋ́a akusubi bʋma ɩklatɔ.

²⁶ Ntsusʋ-yibi na mʋ́sʋ, ɩdɛyɔ ɩdɛba. Fɔbwɛ Leviatan, oteplei mʋ́tɔ.

²⁷ Amʋ́ fɛ́ɛ́ bʋkɩ fʋ ansɩtɔá fɛ́ha amʋ́ atogyihɛ mʋ́ brɛtɔ.

²⁸ Fʋtɛsankɩ ɩbɩtɔ, pʋ atɔ wanklaan sɩsɩ amʋ́, bʋtɔtɔsɩ gyi mwɛ.

²⁹ Nɩ fɛdamli ɔma ha amʋ́ a, ifu tɛkɩta amʋ́. Nɩ fepio amʋ́ ɔŋɛ lɛ a, bʋtowu yinki yɔ ɩsɩtɔ.

³⁰ Fʋtɔpʋ fʋ ɔŋɛ sɩsɩ, bʋtɛbɛlɩn. Fʋtɛla ɔsʋlʋ bwɛ.

³¹ Nana Bulu numnyam itsia brɛ fɛ́ɛ́. Mʋ ansɩ igyi mʋ gyumagyihɛ fɛ́ɛ́ ɩwɩ.

³² Ɔdamli kɩ ɔsʋlʋ a, ɩtɛkpɩnkɩ. Ɔpʋ ɩbɩ da abʋ a, ogyasi tɛdalɩ tsu mʋ́tɔ!

³³ Nɔ́wa ɩlʋ ha Nana Bulu mɩ nkpatɔ fɛ́ɛ́. Nɔ́wa ɩlʋ kanfʋ mɩ Bulu brɛ anfɩ ntsie nkpa anfɩ.

³⁴ Mɩ agywɩɩn anfɩ ɩwa mʋ ɔdwɛ, tsufɛ mʋtɛha ansɩ tegyi mɩ.

³⁵ Ha lakpan abwɛpʋ abʋta lɛ ɔsʋlʋsʋ. Lalahɛ abwɛpʋ bʋmátra tsia! Mɩ ɔkla, kanfʋ Nana Bulu! Mlɩkanfʋ Nana Bulu!