Israelfɔ Ɩlʋ 103 - Bulu Ntam Pɔpwɛ mʋ́a Israel Ɩlʋ

Mɩ Ɔkla, Kanfʋ Nana Bulu

Dawid ɩlʋ.

¹ Oo mɩ ɔkla, kanfʋ Nana Bulu. Mɩ ɩklʋn fɛ́ɛ́ ɩkanfʋ mʋ ɩda wankɩhɛ.

² Oo mɩ ɔkla, kanfʋ Nana Bulu. Mátan mʋ atɔ bwɛhɛ wanklaan ánɩ́ ɔdɛbwɛ ha mɩsʋ.

³ Mʋtesi mɩ lakpan fɛ́ɛ́ kie mɩ, ɔtɛtsa mɩ ɩlɔ fɛ́ɛ́.

⁴ Mʋtɛlɛ mɩ tsu afulitɔ, ɔtɔpʋ ɔdwɛá ɩma ɔka mʋ́a nwewun tɔ mɩ nwun.

⁵ Mʋtɔpʋ atɔ wanklaan bʋla mɩ, mɩ nkpatɔ fɛ́ɛ́, ntɛlabwɛ ɔyasubi fɛ oyitsu.

⁶ Nana Bulu tegyi asʋn ɔnɔkwalɩsʋ, ɔtɛha aha ánɩ́ bʋdɛ amʋ́ sisi asʋ.

⁷ Ɔlɛha Mose lɛbɩ mʋ ɩkpa, ɔlɛha Israelfɔ bowun mʋ atɔ bwɛhɛ.

⁸ Nwɛ owunpʋ pʋ awɩtɔlɛpʋ Nana Bulu gyi. Ɔtamakɔsɩ nya ɔblɔ, mʋ ɔdwɛá ɩma ɔka ɩhɩɛ tsɔ.

⁹ Ɔtamatsia lɛ aha ɩla, ntɛ hɔ asʋn wa ɩwɩtɔ brɛ fɛ́ɛ́.

¹⁰ Ɔtamabɩtɩ anɩ ɩsʋ anɩ lakpan ɔnɔ, ntɛ pʋ anɩ lakpan ka anɩ ɩkɔ.

¹¹ Tsufɛ alɩ amʋʋ ɔsʋsʋ lɛhɩɛ fʋa tsu ɔsʋlʋsʋ amʋ a, alɩ mʋ ɔdwɛá ɩma ɔka ɛ lɛhɩɛ moni ha mʋ ifu anyapʋ nɩ.

¹² Alɩ amʋʋ owi ɔdalɩkpa ɩbʋ ɩfɔ tsu owi ɔkplɩwiekpa amʋ a, alɩ ɔtɛha anɩ lalahɛ tɔwa ɩfɔ anɩ ɩwɩ nɩ.

¹³ Alɩ amʋʋ ɔsɩ towun mʋ abi nwɛ amʋ a, alɩ Nana Bulu towun mʋ ifu anyapʋ nwɛ nɩ.

¹⁴ Tsufɛ oyin alɩá ɔlɔpwɛ anɩ. Ɔtɛkaɩn ánɩ́ ɩsɩ anɩgyi.

¹⁵ Nyankpʋsa mʋ́ a, mʋ nkɛ igyi fɛ ɩfa. Ɔtɔwa akɩlɛ fɛ ɩfa ntswɩtswɩ.

¹⁶ Afu ɩnya tsʋan mʋ́ pɛ a, mʋ́ klɛtɔ lata. Bʋtamatra kaɩn mʋ́sʋ.

¹⁷ Tamɛ Nana Bulu ɔdwɛá ɩma ɔka bʋ ɩnʋ ha mʋ ifu anyapʋ brɛ fɛ́ɛ́. Mʋ yilebwɛ ɛ bʋ ɩnʋ ha amʋ́ abi-aná.

¹⁸ Ɩbʋ ɩnʋ ha mʋ ntamsʋ agyipʋ pʋ́ mʋ mblasʋ akaɩnpʋá bʋtegyi mʋ́sʋ.

¹⁹ Nana Bulu layaɩ mʋ owie-obia ɔsʋsʋ. Mʋdɛ togyitɔsʋ gyi.

²⁰ Bulu-abɔpʋ, mlɩkanfʋ mʋ, mlɩ mʋ atumipʋá mlɩtonu mʋ ɔmɛ, mlɩtegyi mʋ asʋnsʋ fɛ́ɛ́.

²¹ Bulu-abɔpʋá mlɩtɔkɔ fɛ́ɛ́, mlɩkanfʋ mʋ, mʋ asumbiá mlɩtɔbwɛ mʋ ɔdwɛla.

²² Nana Bulu atɔ bwɛhɛ fɛ́ɛ́, ɩkanfʋ mʋ ɔtɩnɛgyiɔtɩnɛá ɔdɛ iwie gyi. Mɩ ɔkla, kanfʋ Nana Bulu!