Mateo 9 - Bulu Ntam Pɔpwɛ mʋ́a Israel Ɩlʋ

Tsukʋlɛ Osinpʋ Tsa

¹ Mʋ́ sʋ Yesu leyinki wie ɔklʋntɔ, fa ɔpʋ amʋ yɔ wulu amʋʋ otsie mʋ́tɔ amʋsʋ.

² Ɩnʋ a, akʋ bɔsʋra tsukʋlɛ osinpʋ akpasʋ ba mʋ. Brɛá Yesu lowun ánɩ́ bahɔ mʋ gyi a, ɔlɛbla tsukʋlɛ osinpʋ amʋ ɔbɛɛ, “Mɩ bi, klʋn ɩdɩ fʋ asɩ. Nasi fʋ lakpan kie fʋ.”

³ Ɩnʋ Mose mbla asunapʋ akʋá bʋtsie ɩnʋ bɛblɩ wa nwuntɔ bɛɛ, “Oyin anfɩ labɔ mbusuo.”

⁴ Yesu lɛbɩ amʋ́ agywɩɩn. Mʋ́ sʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛ ɩnɩ odu gywɩɩn?

⁵ Mɔmʋ bɔ́wa ablɩlɛ dʋn? ‘Nasi fʋ lakpan kie fʋ.> ntɛ ‘Kʋsʋ tsu fʋ akpa afʋnatɩ?>

⁶ Tamɛ ndekleá mlɩbɩ ánɩ́ mɩ, Nyankpʋsa-Mʋ-Bi anfɩ mbʋ tumi ɔyɩ anfɩtɔ si aha lakpan kie amʋ́.” Ɩnʋ ɔlɛbla tsukʋlɛ osinpʋ amʋ ɔbɛɛ, “Ndɛ fʋ bla mbɛɛ, kʋsʋ. Tsu fʋ akpa afʋnatɩ yɔ woyitɔ!”

⁷ Ɩnʋ ɔlɔkʋsʋ natɩ yɔ woyitɔ.

⁸ Ɩnɩ lɔwa amʋ́ fɛ́ɛ́ wanwan, bɛkanfʋ Bulu ánɩ́ alapʋ tumiá igyi alɩ ha anyankpʋsa.

Mateo Tɩ

⁹ Brɛá Yesu lɔpʋ ɔyɔ a, olowun lampoo ɔhɔpʋ ɔkʋá bʋtɛtɩ mʋ Mateo tsie lampoo ɔhɔkpa. Mʋʋ ɔlɛbla mʋ ɔbɛɛ, “Bobuo mɩ.” Ɩnʋnʋ Mateo lɔkʋsʋ buo mʋ.

¹⁰ Mateo lɛtɩ Yesu mʋa mʋ akasɩpʋ atɔ ogyikpa mʋ woyitɔ. Lampoo ahɔpʋ pʋ́ lakpan abwɛpʋ tsɔtsɔɔtsɔ bɛba atɔ amʋ ogyikpa.

¹¹ Farisifɔ amʋ benya wun amʋ́ alɩ, bɛfɩtɛ mʋ akasɩpʋ amʋ bɛɛ, “Ntogyi sʋ mlɩ osunapʋ mʋa aha anfɩ odu bʋtɔwa ɩbɩ gyi atɔ?”

¹² Yesu lonu asʋn anfɩ, ɔlɛbla amʋ́ ɔbɛɛ, “Alɔpʋ lehian ɩlɔ ɔtsapʋ, megyi aha ánɩ́ ɩwɩ bʋ amʋ́ ɔnlɩn.

¹³ Mlɩyɔ amlɩyɛfɩtɛ Bulu asʋn anfɩ bɔwanlɩn tswɩ anfɩ asɩ. Bɛɛ, ‘Nwewun ntekle, megyi igyiha.> Mmɛba aha wanklaan ɔtɩkpa, lakpan abwɛpʋ ɔtɩkpa nɛba.”

Ɔnɔklɩ Ɩwɩ Asʋn Fɩtɛhɛ

¹⁴ Ɛkɛ ɔkʋ Asu Ɔbɔpʋ Yohane akasɩpʋ bɛba Yesu wa bɛfɩtɛ mʋ bɛɛ, “Ntogyi sʋ anɩa Farisifɔ anɩtɛklɩ ɔnɔ, tamɛ fʋ akasɩpʋ mʋ́ bʋtamaklɩ ɔnɔ?”

¹⁵ Yesu lɛlɛ mʋ́ ɔnɔ ɔbɛɛ, “Ɔtsɩ ɔkpaɩnpʋ anyawieá bʋbʋ mʋ wa bégyi awɩrɛhɔ? Ɛkɛkɛɛkɛ! Tamɛ ɛkɛ kʋ bɛ́ba ánɩ́ bɛ́kpa ɔka otsiapʋ amʋ natɩ si amʋ́. Alɩ nkɛ amʋtɔ bɛ́klɩ ɔnɔ nɩ.”

¹⁶ “Ɔhaa tamapʋ tati pɔpwɛ tan tati dada. Tsufɛ tati pɔpwɛ amʋ bɛkpɩkpɩ tsii dada amʋ kʋ lɛ, ha ɔtankpa ɩnʋ bɛ́latɛɩ tsɩa.

¹⁷ Alɩ kɛn bʋtamapʋ nta pɔpwɛ wa ɔwʋlʋ-kpakpa kɛntɛ wuhɛtɔ nɩ. Nta pɔpwɛ amʋ ibófu fa kɛntɛ amʋ, tsitsa, ibéyinta kɛntɛ amʋ ɛ. Ɩnɩ sʋ ɔwʋlʋ-kpakpa kɛntɛ pɔpwɛtɔ bʋtɔpʋ nta pɔpwɛ wa, mɛnɩ mʋ́ anyɔ amʋ fɛ́ɛ́ bétsia.”

Ɔhandɛ Ɔkʋ Mʋ Bi Mʋa Ɔtsɩ Ɔkʋ Ɩlɔ Tsa

¹⁸ Brɛá Yesu dɛtɔɩ a, Yudafɔ ofiakpa ɔhandɛ ɔkʋ lɛba bɛda akpawunu mʋ ayabitɔ, kokoli mʋ ɔbɛɛ, “Mɩ bi tsɩhɛ lawu seseesei, tamɛ ba afʋbɔpʋ ɩbɩ dɩnka mʋsʋ onya nkpa.”

¹⁹ Mʋ́ sʋ Yesu lɔkʋsʋ, mʋa mʋ akasɩpʋ bobuo ɔhandɛ amʋ.

²⁰ Ɔtsɩ ɔkʋá obugya dɛ mʋ wʋlɩ nfi duanyɔ nɩ lɔtsʋn yɔ Yesu ɔma, pʋ ɩbɩ da mʋ tati osiebi.

²¹ Tsufɛ ɔlɛblɩ wa mʋ nwuntɔ ɔbɛɛ, “Nɩ nɔpʋ ɩbɩ da mʋ tati kpan a, ɩlɔ bési mɩ.”

²² Yesu lɛdamli kɩ mʋ, bla mʋ ɔbɛɛ, “Mɩ bi, klʋn ɩdɩ fʋ asɩ. Fʋ hogyi latsa fʋ ɩlɔ.” Ɩnʋnʋ ɔtsɩ amʋ ɩwɩ lɔwa mʋ ɔnlɩn.

²³ Brɛá olowie ɔhandɛ amʋ woyitɔ a, olowun ɩkpɛ afʋlɩpʋ, nu awɩrɛhɔ agyipʋ amʋ okitikiti.

²⁴ Olegya amʋ́ ɔbɛɛ, “Mlɩdalɩ nfɩ! Otsibi amʋ mɔkʋwu, dɩdɩ ɔdɛ.” Aha amʋ bɔmɔsɩ mʋ.

²⁵ Brɛá amʋ́ fɛ́ɛ́ bɛdalɩ ba wunsɩnɛsʋ a, Yesu lebitiwie obu amʋʋ otsibi amʋ da mʋ́tɔ amʋtɔ yɛkɩta mʋ ɩbɩ, ɔlɔkʋsʋ.

²⁶ Asʋn anfɩ lɛklɛɩ wa ɔmá amʋtɔ fɛ́ɛ́.

Ansibi Abwiepʋ Ɩlɔ Tsa

²⁷ Yesu lɛdalɩ ɔyɔ a, ansibi abwiepʋ abanyɔ akʋ bobuo mʋ, bʋdɛ okitikiti sʋra kpoli mʋ bɛɛ, “Owie Dawid mʋ na, wun anɩ nwɛ!”

²⁸ Brɛá olowie-woyitɔ a, ansibi abwiepʋ amʋ bɛba mʋ wa. Yesu lɛfɩtɛ amʋ́ ɔbɛɛ, “Mlɩlahogyi mlɩaa, nɛ́talɩ ha mlɩ ansibi bóbwii?” Bɛlɛ mʋ́ ɔnɔ bɛɛ, “Anɩ Wie, Ee!”

²⁹ Mʋʋ ɔlɔpʋ ɩbɩ dada amʋ́ ansibi, bla amʋ́ ɔbɛɛ, “Ɩba mʋ́tɔ ha mlɩ, mlɩ hogyi ɔnɔ.”

³⁰ Ɩnʋ bɔwa atɔ wun bɩ. Yesu lɛda amʋ́ ɔla ɔbɛɛ, bʋmábla ɔhaa.

³¹ Tamɛ brɛá bɛdalɩ bɔyɔ a, bɛda mʋ ɔkan ɔmá amʋ fɛ́ɛ́tɔ.

Omumu Ɩlɔ Tsa

³² Benya natɩ alɩ, bɔpʋ oyin ɔkʋá ɔŋɛ lalahɛ bʋ mʋtɔ, sʋ alatɔ omumu ba Yesu.

³³ Olenya gya ɔŋɛ lalahɛ amʋ lɛ oyin amʋtɔ alɩ, ɔlɔwa tɔɩ bɩ. Aha amʋ fɛ́ɛ́ bowun, sʋ ɔnɔ lobwie amʋ́. Mʋ́ sʋ bɛblɩ bɛɛ, “Anɩmɔkʋwun ɩnɩ odu Israelfɔtɔ kɩ!”

³⁴ Farisifɔ amʋ bɛblɩ bɛɛ, “Ɔŋɛ lalahɛ owie tumi ɔdɛpʋgya ɔŋɛ lalahɛ lɛ ahatɔ.”

Aha Nwewun

³⁵ Yesu leki awulu pʋ́ nkuda fɛ́ɛ́ asɩ, suna atɔ Yudafɔ ofiakpa. Ɔlɛda Bulu iwiegyi amʋ ɩwɩ asʋn wanklaan ɔkan, ɔlɛtsa ɩlɔ kugyikʋ fɛ́ɛ́.

³⁶ Brɛá olowun ɔdɔm amʋ a, amʋ́ asʋn lɔwa mʋ nwɛ. Bʋgyi fɛ akufa ánɩ́ bʋma ɔkpapʋ, tsufɛ asʋn dɛ amʋ́ han, bʋma tɔtɔ bwɛtɔ.

³⁷ Mʋ́ sʋ ɔlɛbla mʋ akasɩpʋ ɔbɛɛ, “Atɔ kpɔtɩhɛ amʋ ɩtsɔ, tamɛ mʋ́ akpɔtɩpʋ bʋmɔtsɔ.

³⁸ Mʋ́ sʋ mlɩkokoli ndɔ mʋ wie, ɔwa atɔ akpɔtɩpʋ tsɔtsɔ abʋba bɔkpɔtɩ atɔ amʋ.”