Mateo 7 - Bulu Ntam Pɔpwɛ mʋ́a Israel Ɩlʋ

Ɩlalɛ

¹ “Mlɩmálɛ aha ɩla, mɛnɩ Bulu ɔmɛ́ɛlɛ mlɩ ɩla.

² Tsufɛ alɩ amʋʋ mlɩdɛ aha ɩla lɛ amʋ a, alɩ Bulu ɛ ɔbɛ́lɛ mlɩ ɩla nɩ. Ɩtɔá fɔpʋsusu ha fʋ ba a, mʋ́ kɛn Bulu ɔbɔ́pʋsusu ha fʋ nɩ.

³ Ntogyi sʋ fʋdɛ ipi tukuriibi wun fʋ ba nsibisʋ, tamɛ fʋmɛdɛ ogyakpatin ánɩ́ ɩdɩn fʋ klɛsʋ mʋ́ wun?

⁴ Ntɛ ntogyi sʋ fʋdɛ fʋ ba bla fɛɛ, ‘Ha mɩ andɩnkɩ ipi fʋ nsibisʋ?> brɛá ogyakpatin dɩn fʋ klɛsʋ?

⁵ Apinabwɛbi ɔbwɛpʋ! Gyankpa dɩnkɩ ogyakpatin amʋ fʋ nsibisʋ, mɛnɩ fówun atɔ wanklaan, talɩ dɩnkɩ ipi amʋ fʋ ba klɛsʋ.

⁶ “Mlɩmápʋ Bulu atɔ wankɩhɛ ha aha ánɩ́ bʋgyi fɛ akɩaɩ. Bulu asʋn tamawa amʋ́ ogya. Bénya ɔblɔ damli dun mlɩ. Alɩ kɛn mlɩmápʋ mlɩ abuto wʋlɩhɛ ha aha ánɩ́ bʋgyi fɛ mprakuo nɩ. Tsufɛ bɛtsatsa mʋ́sʋ, tsɩa mʋ́ wa ɔdɩbatɔ.

Atɔkʋlɩ Tsu Bulu Wa

⁷ “Mlɩkʋlɩ Bulu, ɔbɛ́ha mlɩ. Mlɩdunka, mlówun. Mlɩda mʋ klʋnsʋ, obéfinki mʋ́ ha mlɩ.

⁸ Tsufɛ ɔha ánɩ́ ɔtɔkʋlɩ atɔ tenya. Ɔha ánɩ́ otodunka atɔ towun. Ɔha ánɩ́ ɔtɛda klʋnsʋ bʋtefinki ha.

⁹ Ma bʋ mlɩtɔá mʋ bi ɔkʋlɩ mʋ bodobodo a, obótsu ibwi wa mʋ ɩbɩtɔ?

¹⁰ Ntɛ nɩ ɔkʋlɩ mʋ iye a, ɔbɛ́kɩta ɩwɔ wa mʋ ɩbɩtɔ?

¹¹ Mlɩ lakpan abwɛpʋ kʋraa mlɩyin alɩá bʋtɔpʋ atɔ wanklaan ha mlɩ abi. Ntogyi sʋ mlɩ Sɩ amʋʋ ɔbʋ ɔsʋsʋ amʋ mʋ́ mɔ́ɔpʋ atɔ wanklaan ha aha ánɩ́ bʋdɛ mʋ kʋlɩ?

¹² “Bwɛ ha aha alɩá fʋdekle fɛɛ, bʋbwɛ ha fʋ. Ɩnɩ Mose Mbla pʋ Bulu ɔnɔsʋ atɔɩpʋ amʋ atosunahɛ dɛblɩ nɩ.

Ɔkpa Kplanhɛ Mʋ́a Tɛɩhɛ

^13-14 “Mlɔtsʋn ɔkpa kplanhɛ amʋsʋ a, mlɔ́yɔ nkpa ánɩ́ ɩtamatatɔ. Aha kpalobi pɛ tɛbɩ mʋ́. Tamɛ nɩ mlɔtsʋn tɛɩhɛ amʋʋ ɩbʋ atsʋnlɛ amʋsʋ a, mlɔ́yɔ ɔhɩkpa. Aha tsɔtsɔɔtsɔ tɔtsʋn mʋ́sʋ.

Oyi Pʋ́ Mʋ́ Abi Swiehɛ

¹⁵ “Mlɩkɩ wanklaan aha ánɩ́ bʋtɔwa afunu bɛɛ, Bulu ɔnɔsʋ atɔɩpʋ bʋgyisʋ. Bʋtepina bwɛ ɩwɩ fɛ akufa ba mlɩ wa, tamɛ nkpatakuá bʋbʋ ɩyɩn bʋgyi.

¹⁶ Amʋ́ bwɛhɛ mlɔ́pʋbɩ amʋ́. Bʋtamakpɔtɩ kankaba okploto oyisʋ, bʋtamakpɔtɩ tsɔkpʋn ɛ tʋnkpa ɩflasʋ.

¹⁷ Oyi wanklaan toswie abi wanklaan. Oyi lalahɛ ɛ toswie abi lalahɛ.

¹⁸ Oyi wanklaan mɛ́ɛtalɩ swie abi lalahɛ, alɩ kɛn oyi lalahɛ ɛ mɛ́ɛtalɩ swie abi wanklaan nɩ.

¹⁹ Oyiá ɩtamaswie abi wanklaan a, kun bʋtokun mʋ́ da, wa mʋ́ ogya.

²⁰ Mʋ́ alɩ sʋ a, ɔnɔsʋ atɔɩpʋ afunupʋ anfɩ bwɛhɛ mlɔ́pʋbɩ amʋ́.

Bulu Iwiegyi Amʋtɔ Awiepʋ

²¹ “Megyi ɔhagyiɔha ánɩ́ ɔtɛtɩ mɩ ɔbɛɛ, ‘Mɩ Wie, mɩ Wie> obówie Bulu iwiegyi amʋtɔ. Mboun ɔha ánɩ́ ɔtɔbwɛ mɩ Sɩ amʋʋ ɔbʋ ɔsʋsʋ amʋ apɛ ɔbɔ́yɔ ɩnʋ.

²² Bulu asʋn ogyikɛ amʋ a, aha tsɔtsɔɔtsɔ bɛ́fɩtɛ mɩ bɛɛ, ‘Mɩ Wie, megyi fʋ ɩdatɔ anɩlɛblɩ Bulu ɔnɔ asʋn, gya ɔŋɛ lalahɛ lɛ ahatɔ, bwɛ ofula ɛ nɩ?>

²³ Ɩnʋ nɛ́lɛ bla amʋ́ mbɛɛ, ‘Mmeyin mlɩ ɔkpagyiɔkpasʋ. Mlɩnatɩ tɛɩ mɩsʋ, mlɩ lakpan abwɛpʋ!>

Bʋtasʋ Pʋ́ Osublutɔ Obuyi

²⁴ “Mʋ́ sʋ ɔhagyiɔha ánɩ́ olonu mɩ asʋn blɩhɛ anfɩ, olegyi mʋ́sʋ a, ogyi fɛ ɔtɩansɩpʋá oleyi mʋ obu dɩnka bʋtasʋ.

²⁵ Nyankpʋ lotswie, ntsu lɔbʋla wa mʋ́, atsufu lɔtsʋn wʋlɩ mʋ́sʋ, tamɛ imobwie. Tsufɛ oleyi mʋ́ dɩnka bʋtasʋ.

²⁶ “Tamɛ ɔhagyiɔha ánɩ́ olonu mɩ asʋn blɩhɛ anfɩ, omegyi mʋ́sʋ a, ogyi fɛ ɔha mimlahɛ ánɩ́ oleyi mʋ obu osublutɔ.

²⁷ Nyankpʋ lotswie, ntsu lɔbʋla wa mʋ́, atsufu ɛ lɔtsʋn wʋlɩ mʋ́sʋ. Obu amʋ lobwie da asɩ gbloo!”

Túmiá Yesu Bʋ

²⁸ Brɛá Yesu lɛblɩ asʋn anfɩ ta a, mʋ atosunahɛ lɛha ɔnɔ lobwie ɔdɔm amʋ.

²⁹ Tsufɛ olosuna amʋ́ atɔ tumisʋ. Omosuna mʋ́ fɛ Mose mbla asunapʋ amʋ.