Mateo 4 - Bulu Ntam Pɔpwɛ mʋ́a Israel Ɩlʋ

Yesu Ɩsɔkɩ

¹ Ɩnʋnʋ Ɔŋɛ Wankɩhɛ amʋ lɛkpa Yesu ya ɔsʋlʋkpansʋ, mɛnɩ Ɔbʋnsam ɔbɔ́sɔ mʋ kɩ.

² Oletsia ɩnʋ klɩ ɔnɔ ɔyɩkɛhɛ mʋ́a onye adʋana (40). Mʋ́ sʋ akʋn lɛhɩɛ kɩta mʋ.

³ Ɩnʋ Ɔbʋnsam lɔsɔ mʋ kɩ, bla mʋ ɔbɛɛ, “Nɩ Bulu mʋ Bi fʋgyi a, mʋmʋ ha abwi anfɩ ɩdamli bwɛ bodobodo.”

⁴ Yesu lɛlɛ mʋ́ ɔnɔ ɔbɛɛ, “Bɔwanlɩn wa Bulu asʋn amʋtɔ bɛɛ, ‘Megyi atogyihɛ wʋlɛ nyankpʋsa obégyi tsia nkpa, tamɛ ɔpʋ Bulu asʋn blɩhɛ ɛ tsia nkpa.> ”

⁵ Ɔbʋnsam lɛkpa mʋ ya Yerusalem wulu wankɩhɛ amʋtɔ. Ɔlɔpʋ mʋ yɛlɩɩ Bulu ɔtswɛkpa obu amʋ ɔtantra.

⁶ Ɩnʋ ɔlɛbla Yesu ɔbɛɛ, “Nɩ Bulu mʋ Bi fʋgyi lɛlɛ a, tu kpayi. Tsufɛ bɔwanlɩn wa Bulu asʋn amʋtɔ bɛɛ, ‘Bulu ɔbɛ́ha mʋ abɔpʋ bɛ́kpata fʋ ɩbɩtɔ, mɛnɩ fʋ yabi mɛ́ɛda ibwi kʋkʋsʋ.> ”

⁷ Yesu lɛlɛ mʋ́ ɔnɔ ɔbɛɛ, “Bɛtra wanlɩn bɛɛ, ‘Mákapʋ fʋ Wie Bulu kɩ.> ”

⁸ Mʋ́ ɔma a, Ɔbʋnsam lɔpʋ mʋ ya ɩbʋ fʋahɛ kʋsʋ, olosuna mʋ ɔyɩtɔ iwie ogyikpa fɛ́ɛ́ pʋ́ mʋ́ numnyam.

⁹ Mʋʋ ɔlɛbla mʋ ɔbɛɛ, “Nɩ fɛda akpawunu sum mɩ a, nɔ́pʋ ɩnɩ fɛ́ɛ́ ha fʋ.”

¹⁰ Yesu lɛbla mʋ ɔbɛɛ, “Ɔbʋnsam, natɩ tɛɩ mɩsʋ! Tsufɛ bɔwanlɩn wa Bulu asʋn amʋtɔ bɛɛ, ‘Da akpawunu ha fʋ Wie Bulu. Mʋ nkʋlɛ fʋ sum.> ”

¹¹ Ɩnʋ Ɔbʋnsam lɛnatɩ mʋ wa, Bulu-abɔpʋ bɛba bɛkɩ mʋsʋ.

Yesu Gyumagyihɛ Asɩtsua Galilea Ɔmátɔ

¹² Mʋ́ ɔma a, Yesu lonuá bakɩta Yohane tswɩ obu, oleyinki ba Galilea ɔsʋlʋsʋ.

¹³ Olotu tsu Nasaret wulutɔ yɔ Kapernaum wuluá ɩbʋ manta Galilea ɔpʋ ɔnɔ, Sebulon mʋ́a Naftali ɔsʋlʋsʋ.

¹⁴ Mʋ ɩnʋ yɔ lɛha asʋn amʋʋ Bulu ɔnɔsʋ ɔtɔɩpʋ Yesaia lɛblɩ amʋ ɩlɛba mʋ́tɔ. Ɔbɛɛ,

¹⁵ “Sebulon pʋ́ Naftali ɔsʋlʋá ɩda Yordan bʋnkpa ɔnɔ, manta Galilea ɔpʋ. Galilea ɔmátɔ ɔmá bambasʋfɔ bʋtsie.

¹⁶ Aha anfɩ bʋtsie okluntɔ anfɩ bawun wankɩ kpɔnkpɔɔnkpɔntɩ kʋ. Bʋtsie ɔsʋlʋá lowu dɛ iwie gyi mʋ́sʋ. Wankɩ kʋ lawankɩ wʋlɩ amʋ́sʋ.”

¹⁷ Tsu ɩnʋ Yesu lefi asɩ ɔdɛ Bulu asʋn ɔkan da, blɩ ɔbɛɛ, “Mlɩdamli klʋntɔ, Bulu iwiegyi lawie woyi ta.”

Akasɩpʋ Abana Lɛ

¹⁸ Ɛkɛ ɔkʋá Yesu na Galilea ɔpʋ ɔnɔ, olowun apio abanyɔ akʋ. Simon ánɩ́ bʋtɛtɩ mʋ Petro mʋa mʋ gyama Andrea, bʋdɛ asawu tswɩ, tsufɛ aye alɛpʋ bʋgyi.

¹⁹ Mʋʋ ɔlɛbla amʋ́ ɔbɛɛ, “Mlɩba bobuo mɩ. Nɔ́bwɛ mlɩ anyankpʋsa alɛpʋ.”

²⁰ Ɩnʋnʋ besi amʋ́ asawu aná tswɩ, kpla buo mʋ.

²¹ Ɔlɛnatɩ yɔ nkpa kpalobi, olowun apio abanyɔ akʋ ɛ, Yakobo mʋa mʋ gyama Yohane. Amʋ́a amʋ́ sɩ Sebedeo bʋbʋ ɔklʋntɔ, bʋdɛ amʋ́ asawu bɩn; Yesu lɛtɩ amʋ́.

²² Ɩnʋnʋ amʋ́ ɛ bɛnatɩ si amʋ́ sɩ mʋa ɔklʋn amʋ bobuo mʋ.

Yesu Atosuna, Mʋ Asʋn Ɔkanda Pʋ́ Ɩlɔtsa

²³ Yesu leki Galilea ɔmátɔ fɛ́ɛ́, suna atɔ Yudafɔ ofiakpa. Ɔlɛda Bulu iwiegyi amʋ ɩwɩ asʋn wanklaan ɔkan. Ɔlɛtsa ɔŋɛtɔ mʋ́a awutɔ ɩlɔ kugyikʋ.

²⁴ Ɩnɩ sʋ mʋ ɩwɩ asʋn lɛklɛɩ yɔ Siria ɔmátɔ fɛ́ɛ́. Bɔpʋ alɔpʋ tsua ntɩnɛ-ntɩnɛ ba mʋ. Ɔlɛtsa ɩlɔ kugyikʋ, aha ánɩ́ bʋdɛ ɩwɩɔsɩn wun, amʋ́á ɔŋɛ lalahɛ dɛ amʋ́ han, amʋ́á ɩlɔ dɩdahɛ bʋ amʋ́sʋ pʋ́ abubupʋ aná fɛ́ɛ́.

²⁵ Mʋ́ sʋ ɔdɔm kpɔnkpɔɔnkpɔntɩ bobuo mʋ. Aha ánɩ́ botsu Galilea ɔmátɔ pʋ́ Dekapoli awulu amʋsʋ, Yerusalem wulutɔ, Yudea ɔmátɔ pʋ́ Yordan ntsu ɔbɩn ɔsʋlʋ fɛ́ɛ́sʋ.