Mateo 27 - Bulu Ntam Pɔpwɛ mʋ́a Israel Ɩlʋ

Yesu Kpa Ya Pilato

¹ Ɔyɩkɛhɛ nyankɩ-nyankɩ a, Bulu igyi ahapʋ dɛhɛn pʋ́ Yudafɔ ahandɛ amʋ bɛkɩta agywɩɩn bɛɛ, bɔ́mɔ Yesu.

² Mʋ́ sʋ bɛklɩ mʋ, pʋ mʋ yɛwa Pilato ɩbɩtɔ. Mʋgyi Roma ɔhandɛá ɔdɛ Yudea ɔmásʋ gyi nɩ.

Yuda Iskariot Ɩwɩsian

³ Yuda amʋʋ ɔlɛlɛ Yesu ha amʋ lowun ánɩ́ baha Yesu ɩpɔn. Ɩlɛhan mʋ. Mʋ́ sʋ oleyinkia sika fututu adʋasa amʋ ya Bulu igyi ɔhapʋ dɛhɛn pʋ́ Yudafɔ ahandɛ amʋ.

⁴ Ɔlɛbla amʋ́ ɔbɛɛ, “Nalɛ ɔha ánɩ́ ɔmɔkʋbwɛ lakpan kʋkʋ ha. Mʋ́ sʋ nabwɛ lakpan.” Mʋʋ bɛbla mʋ bɛɛ, “Anɩmeyin mʋ́ ɩwɩ kʋkʋ. Fʋ asʋn igyi.”

⁵ Mʋ́ sʋ Yuda lɔtswɩ sika fututu amʋ sɩsɩ amʋ́ Bulu ɔtswɛkpa wunsɩnɛsʋ ɩnʋ, natɩ yesian ɩwɩ.

⁶ Bulu igyi ahapʋ dɛhɛn amʋ bɔtɔsɩ kɔba amʋ, blɩ bɛɛ, “Anɩ mbla mɛha ɔkpa ánɩ́ abɔ́pʋ kɔba anfɩ odu wa Bulu ɔtswɛkpa kɔbatɔ, tsufɛ mʋ́ ɩwɩ mɛtɩn. Obugya kɔba igyi.”

⁷ Mʋ́ sʋ bɔbwɛ agywɩɩn, pʋ kɔba amʋ yɛhɔ atɔ ɔpwɛpʋ ɔkʋ ɔsʋlʋ, pʋ ɩnʋ bwɛ afɔɔá bʋbʋ Yerusalem opulakpa.

⁸ Ɩnɩ sʋ bɔtʋ ɔwʋlʋ anfɩ wanlɩnbɩ bʋtɛtɩ ɩnʋ bɛɛ, “Obugya ɔsʋlʋ.”

^9-10 Ɩnɩ lɛha Bulu asʋn amʋʋ ɔlɛblɩ tsʋn mʋ ɔnɔsʋ ɔtɔɩpʋ Yeremiasʋ amʋ lɛba mʋ́tɔ. Ɔbɛɛ, “Botsu sika fututu adʋasa amʋʋ Israelfɔ begyi mʋ ibia, hɔ mʋ amʋ yɛhɔ atɔ ɔpwɛpʋ ɔkʋ ɔsʋlʋ, fɛ alɩá Bulu lɛbla mɩ.”

Yesu Pilato Ansɩtɔ Lɩɩ

¹¹ Yesu lɩɩ ɔmásʋ ɔkɩpʋ Pilato ansɩtɔ. Mʋʋ Pilato lɛfɩtɛ mʋ ɔbɛɛ, “Fʋgyi Yudafɔ owie amʋ nɩ?” Yesu lɛbla mʋ ɔbɛɛ, “Ee, mʋ́ fablɩ a.”

¹² Tamɛ brɛá Bulu igyi ahapʋ dɛhɛn pʋ́ Yudafɔ ahandɛ amʋ bɛka asʋn dɩnka Yesusʋ a, ɔmɛlɛ kʋkʋ ɔnɔ.

¹³ Mʋʋ Pilato lɛfɩtɛ mʋ ɔbɛɛ, “Fʋmɛdɛ asʋn anfɩ bakla dɩnka fʋsʋ anfɩ nu?”

¹⁴ Tamɛ Yesu metepi bwii ɔnɔ. Mʋ́ sʋ ilobwie Roma ɔhandɛ amʋ ɔnɔ.

Yesu Lowu Ɩpɔn Ha

¹⁵ Ofifigyiofi, nɩ bʋdɛ Israelfɔsʋ Katsʋn Nkɛ gyi a, Roma ɔhandɛ amʋ tesi obu ɔdɩpʋ ɔkʋlɛá ɔdɔm amʋ bʋdekle ha amʋ́.

¹⁶ Alɩ brɛ amʋtɔ a, obu ɔdɩpʋ ɔkʋá alahɔ ɩda, bʋtɛtɩ mʋ Baraba da obu.

¹⁷ Mʋ́ sʋ brɛá Yudafɔ amʋ fɛ́ɛ́ bebefia a, Pilato lɛfɩtɛ amʋ́ ɔbɛɛ, “Ma nsi ha mlɩ? Baraba loo ntɛ Yesu, bʋtɛtɩ mʋ Kristo amʋ?”

¹⁸ Tsufɛ Pilato yin ánɩ́ Yesu ɩwɩ olu sʋ Bulu igyi ahapʋ dɛhɛn pʋ́ Yudafɔ ahandɛ amʋ bakɩta mʋ ba mʋ.

¹⁹ Brɛá Pilato tsie ɔdɛ Yesu asʋn amʋ gyi a, mʋ ka lɔwa obi mʋ wa ɔbɛɛ, “Mábwɛ oyin anfɩ mʋ asʋn da ɔkpa anfɩ tɔtɔ. Tsufɛ igye onye a, nokun okude wun mʋ, ifu lɛhɩɛ kɩta mɩ.”

²⁰ Tamɛ Bulu igyi ahapʋ dɛhɛn pʋ́ Yudafɔ ahandɛ amʋ bɛha ɔdɔm amʋ ɔnɔ bɛɛ, bʋkokoli Pilato osi Baraba, abʋmɔ Yesu.

²¹ Mʋ́ sʋ Roma ɔhandɛ amʋ lɛlafɩtɛ ɔdɔm amʋ ɔbɛɛ, “Aha abanyɔ anfɩtɔ ɔmɔmʋ nsi ha mlɩ?” Botsu ɔnɔ bɛɛ, “Baraba!”

²² Mʋʋ Pilato lɛtra fɩtɛ amʋ́ ɔbɛɛ, “Ntɔ mbwɛ Yesu, bʋtɛtɩ mʋ Kristo, (ɔha amʋʋ Bulu lada mʋ ofuli amʋ)?” Amʋ́ fɛ́ɛ́ bɛbla mʋ bɛɛ, “Da mʋ manta oyikpalihɛsʋ!”

²³ Pilato lɛfɩtɛ amʋ́ ɔbɛɛ, “Ntogyi sʋ! Tsitsa mɔmʋ alabwɛ?” Ɩnʋ bɛlakplʋn kʋklʋkʋʋ bɛɛ, “Da mʋ manta oyikpalihɛsʋ!”

²⁴ Brɛá Pilato lowun ánɩ́ alabwɛ kasian, kpokiti mboun dekle ɩda ɩnʋ a, olotsu ntsu fwɩ ɩbɩ amʋ́ ansɩtɔ ɩnʋ, bla amʋ́ ɔbɛɛ, “Mɩ ɩbɩ anyɔ ɩma oyin anfɩ lowutɔ. Mlɩ asʋn igyi.”

²⁵ Yudafɔ amʋ fɛ́ɛ́ bɛbla mʋ bɛɛ, “Mʋ lowu ɩsʋbɩtɩ ɩba anɩa anɩ abi-anásʋ!”

²⁶ Ɩnʋ Pilato lesi Baraba ha amʋ́, ɔlɛha mʋ ɩsa akɔpʋ bɛpɩtɩ Yesu atɔ. Ɔlɔpʋ mʋ wa amʋ́ ɩbɩtɔ ɔbɛɛ, bʋyɛda mʋ manta oyikpalihɛsʋ.

Yesu Ahinla Bwɛ

²⁷ Ɩnʋ ɔmásʋ ogyipʋ amʋ ɩsa akɔpʋ bɛkpa Yesu ya mʋ woyitɔ. Bɛtɩ amʋ́ aba ɩsa akɔpʋ atrahɛ amʋ fɛ́ɛ́, bɛda Yesu ɔbʋn.

²⁸ Bɔwɔɩ Yesu atadɩɛ, pʋ liga pɛpɛ ɩkʋ wa mʋ.

²⁹ Bɔlʋ obungyo-awu, bwɛ mʋ́ owiepa bun mʋ nwun. Bɔpʋ oyi kʋ wa mʋ gyɔpɩ ɩbɩtɔ, fɛ akɔnfra. Bɛda akpawunu mʋ ansɩtɔ, bʋdɛ mʋ ahinla bwɛ bɛɛ, “Yudafɔ Owie, fʋ nkpasʋ ɔnlɩnsʋ!”

³⁰ Botu atsʋnɔ wʋlɩ Yesu, swɩɩ mʋ oyi amʋ pʋpɩtɩ mʋ nwuntɔ.

³¹ Bɔbwɛ mʋ ahinla ta a, bɔwɔɩ amʋ́ liga pɛpɛ amʋ, yinkia mʋ onuto atadɩɛ wa mʋ, bɛkpa mʋ dalɩ bɔyɔ abʋyɛda mʋ manta oyikpalihɛsʋ.

Yesu Da Manta Oyikpalihɛsʋ

³² Brɛá bɔyɔ a, befia Kireneyin ɔkʋá bʋtɛtɩ mʋ Simon. Ɩsa akɔpʋ amʋ bɛka mʋ hɩɛ bɛɛ, ɔhɔ oyikpalihɛ amʋ sʋra.

³³ Boyowie ɔtɩnɛkʋá bʋtɛtɩ ɩnʋ Golgota. Mʋ́ asɩ gyi, “Nwun Okokobi Otsiakpa.”

³⁴ Bɔpʋ afa kɩtakɩta wa ntatɔ tin Yesu ɔnɔ bɛɛ onun, tamɛ brɛá ɔlɛda mʋ́ ɔnɔ a, olekina nun.

³⁵ Bɛda mʋ manta oyikpalihɛ amʋsʋ ta a, beye mʋ atadɩɛtɔ. Ɩnʋ bɔtswɩ abi pʋkɩ ɔhagyiɔha ogyikpa.

³⁶ Besi bʋtsie ɩnʋ, bʋdɛ mʋ ɩwɩ gyo.

³⁷ Mʋʋ bɔwanlɩn tɔá sʋa bʋdɛ mʋ da manta oyikpalihɛsʋ, da manta mʋ awunsʋ bɛɛ, “Yesu, Yudafɔ owie amʋ nɩ.”

³⁸ Bɛda awikplu abanyɔ ɛ manta nyikpalihɛsʋ tsɩa mʋtɔ. Ɔkʋlɛ bʋ mʋ gyɔpɩsʋ, ɔkʋlɛ ɛ bʋ mʋ bɩnasʋ.

³⁹ Ɩnʋ atsʋnpʋ bɔkpʋkpʋ nwuntɔ, blɩ Yesu ɩwɩ abususʋ bɛɛ,

⁴⁰ “Yɛ fʋ fɛɛ fɛ́talɩ bwie Bulu ɔtswɛkpa amʋ, lapwɛ mʋ́ nkɛnsa owitɔ nɩ? Hɔ fʋ ɩwɩ! Nɩ lɛlɛ Bulu mʋ Bi fʋgyi a, kplɩ tsu oyi amʋsʋ akɩ.”

⁴¹ Alɩ kɛn Bulu igyi ahapʋ dɛhɛn, Mose mbla asunapʋ pʋ́ Yudafɔ ahandɛ amʋ ɛ bɔbwɛ mʋ ahinla nɩ.

⁴² Bɛblɩ bɛɛ, “Ɔlɔhɔ aha nkpa, tamɛ ɔmɛtalɩ hɔ mʋ ɩwɩ. Nɩ mʋgyi Israelfɔ owie amʋ a, ɔkplɩ tsu oyi amʋsʋ, mɛnɩ abɔ́hɔ mʋ gyi.

⁴³ Yɛ ɔbɛɛ Bulu mʋ Bi mʋgyi, mʋ ansɩ dɩn Bulusʋ. Bulu ɔlɛ mʋ sei, akɩá otekle mʋ asʋn.”

⁴⁴ Alɩ kɛn awikplu amʋʋ bɛda manta nyikpalihɛsʋ mʋ wa amʋ ɛ bɔbwɛ mʋ ahinla nɩ.

Yesu Lowu

⁴⁵ Owi lɛta ɔsʋlʋ amʋsʋ fɛ́ɛ́, tsu doduanyɔtɔ alɩɩ yɔfʋn ntʋpwɛ dɔsatɔ. Owi mɛtra lɩn ɛ.

⁴⁶ Dɔsa amʋtɔ a, Yesu lɔkplʋn kʋklʋkʋʋ Hebri ɔblɩtɔ ɔbɛɛ, “Eli, Eli, Lama Sabaktani?” Mʋ́ asɩ gyi, “Mɩ Bulu, mɩ Bulu, ntogyi sʋ fakpa mɩ ɔma?”

⁴⁷ Brɛá aha amʋʋ bʋlɩɩ ɩnʋ amʋtɔ akʋ bonu asʋn anfɩ a, bɛblɩ bɛɛ, “Ɔdɛ Elia kpoli.”

⁴⁸ Ɩnʋ amʋ́tɔ ɔkʋ lɛsrɩ yotsu ɔsapɔ, pʋda nta ɔdaɩtɔ, pʋyi oyisʋ, tsu mʋ́ fʋa, pʋtin mʋ ɔnɔ ɔbɛɛ onun.

⁴⁹ Tamɛ mʋ aba atrahɛ amʋ bɛbla mʋ bɛɛ, “Si alɩɩ kɩ bɛɛ, Elia ɔbɛ́ba bɔhɔ mʋ.”

⁵⁰ Yesu lɛtra kplʋn kʋklʋkʋʋ, ɔlɛlɛ ɔŋɛ.

⁵¹ Ɩnʋ Bulu lɛbalɩ tati amʋʋ bɔpʋka Bulu Ɔtswɛkpa obu amʋtɔ anyɔ, tsu awunsʋ beyi asɩ kɩaan. Ɔlɛha ɔsʋlʋ lɛkpɩnkɩ, ɔlɛha abʋta lɛmamaɩn.

⁵² Olefinfinki ntsan, aha wankɩhɛ tsɔtsɔɔtsɔ bɔkʋsʋ tsu afulitɔ.

⁵³ Yesu kʋsʋ tsu afulitɔ ɔma a, aha wankɩhɛ anfɩ bakʋsʋ tsu afulitɔ anfɩ bɔyɔ Yerusalem wulu wankɩhɛ amʋtɔ, yɛlɛ ɩwɩ ɔwan suna aha tsɔtsɔɔtsɔ.

⁵⁴ Brɛá ɩsa akɔpʋ ɔhandɛ pʋ́ ɩsa akɔpʋ amʋʋ bʋdɛ Yesu ɩwɩ gyo amʋ bowun ɔsʋlʋkpɩnkɩ amʋ pʋ́ tɔá ɩdɛ mʋ́sʋ yɔ fɛ́ɛ́ a, ifu lɛhɩɛ kɩta amʋ́, bɛblɩ bɛɛ, “Lɛlɛ, Bulu mʋ Bi oyin anfɩ gyi.”

⁵⁵ Atsɩ tsɔtsɔɔtsɔ bobuo Yesu, bʋdɛ mʋsʋ kɩ tsu Galilea ɔmátɔ. Amʋ́ ɛ besi lɩɩ tsutsuutsu, bʋdɛ mʋ kɩ sɩsɩ.

⁵⁶ Amʋ́tɔ akʋ gyi, Magdalayintse Maria mʋa Maria ánɩ́ ɔlɔkwɩɩ Yakobo mʋa Yosef pʋ́ Sebedeo mʋ ka ánɩ́ ogyi Yakobo mʋa Yohane aná oyin.

Yesu Pula

^57-58 Brɛá owi dɛpɔn a, Arimateayin ɩwɩ onyapʋ ɔkʋá bʋtɛtɩ mʋ Yosef, alamli Yesu ɔkasɩpʋ lɔyɔ Pilato wa, yɔkʋlɩ mʋ ɔbɛɛ, osi Yesu fuli amʋ ha mʋ. Pilato lɛha ánɩ́ bʋsi fuli amʋ ha mʋ.

⁵⁹ Mʋ́ sʋ Yosef lɔpʋ ɔhrada ánɩ́ ɩlɛtɩn wanklaan kɩklɩ fuli amʋ ɩwɩ,

⁶⁰ ɔlɔpʋ mʋ yɛwa ɔbɔ pɔpwɛá alada bʋtatɔ yaɩ ha mʋ ɩwɩtɔ. Mʋʋ olemina ibwi yileyile kʋ tin ɔbɔ amʋ ɔnɔ, ɔlɛnatɩ.

⁶¹ Magdalayintse Maria mʋa Maria nyɔsɩ amʋ besi bʋtsie ɩnʋ fʋn, bʋdɛ ntsan amʋ kɩ sɩsɩ.

Yesu Ntsan Gyo

⁶² Yudafɔ ɩwɩsʋ ɔdakɛ ɔyɩkɛhɛ, igyi ɔkpʋnʋ ɔdakɛ a, Bulu igyi ahapʋ dɛhɛn, Farisifɔ amʋ fɛ́ɛ́ pʋ́ Pilato befia.

⁶³ Bɛbla mʋ bɛɛ, “Owie, anɩlakaɩn ánɩ́ brɛá ofunupʋ anfɩ tsie nkpa a, ɔlɛblɩ ɔbɛɛ, ‘Nkɛnsa ɔma a, Bulu ɔbɛ́lakʋsʋa mɩ tsu afulitɔ.>

⁶⁴ Mʋ́ sʋ ha abʋyegyo mʋ ntsan amʋ ɔnɔ wanklaan, yɔfʋn ɛkɛ sasɩ. Nɩ megyi alɩ mʋ akasɩpʋ amʋ bóyowi mʋ lɛ, bɛmlɛ aha bɛɛ alakʋsʋ. Ɩba alɩ a, akasɩpʋ amʋ ahamlɛ bɔ́dʋn mʋ klɛ.”

⁶⁵ Pilato lɛbla amʋ́ ɔbɛɛ, “Ɩsa akɔpʋ nɩ. Mlɩha amʋ́ abʋyegyo ɩnʋ wanklaan alɩá mlɛtalɩ.”

⁶⁶ Mʋ́ sʋ bɛyɛtan ɔbɔ amʋ ɔnɔ wanklaan, ha agyopʋ bogyo mʋ́ asɩ.