Mateo 26 - Bulu Ntam Pɔpwɛ mʋ́a Israel Ɩlʋ

Yesu Nwunsʋ Kɩklɩ

¹ Brɛá Yesu losuna atɔ anfɩ fɛ́ɛ́ ta a, ɔlɛbla mʋ akasɩpʋ amʋ ɔbɛɛ,

² “Mlɩyin ánɩ́ ɩlasi nkenyɔ bégyi Israelfɔsʋ Katsʋn Nkɛ. Nkɛ amʋtɔ a, ɔkʋ ɔbɔ́pʋ mɩ, Nyankpʋsa-Mʋ-Bi anfɩ wa mɩ alupʋ ɩbɩtɔ, bɛ́da mɩ manta oyikpalihɛsʋ.”

^3-4 Alɩ brɛ amʋtɔ a, Yudafɔ Bulu igyi ahapʋ dɛhɛn pʋ́ amʋ́ ahandɛ befia igyi ɔhapʋ dɛhɛn Kaiafa woyitɔ, kɩta agywɩɩn ɔkpa ánɩ́ bɔ́tsʋn mʋ́sʋ kɩta Yesu ŋaintɔ, mɔ mʋ.

⁵ Tamɛ bɛblɩ bɛɛ, bʋmɔ́ɔbwɛ mʋ́ nkɛ amʋtɔ, mɛnɩ kpokiti mɛ́ɛda ɔmá amʋtɔ.

Ofobi Fanfaanfan Pʋwʋlɩ Yesu

⁶ Brɛá Yesu bʋ Betania wulutɔ, Simon ɔkʋá alalɔ ɩlɔ pɛpɛ kɩ woyitɔ ɔdɛ atɔ gyi a,

⁷ ɔtsɩ ɔkʋ lɛba mʋ wa. Ɔdɛ prɛntʋa wanklaan kʋá ofobi fanfan ánɩ́ ɩbʋ bia bɔ mʋ́, ɔlɛtsɛɩ ofobi amʋ wʋlɩ Yesu nwuntɔ.

⁸ Yesu akasɩpʋ amʋ benya ɔblɔ brɛá bowun ɩnɩ. Mʋ́ sʋ bɛfɩtɛ bɛɛ, “Ntogyi sʋ ɔtsɩ anfɩ layinta ofobi fanfan anfɩ?

⁹ Abɛ́talɩ fɛ mʋ́ ibia kpekple, pʋ kɔba amʋ ha ahianfɔ.”

¹⁰ Yesu lɛbɩá ɔblɔ lakɩta amʋ́. Mʋ́ sʋ ɔlɛbla amʋ́ ɔbɛɛ, “Ntogyi sʋ mlɩdɛ mʋ han? Ɩtɔ yile alabwɛ ha mɩ.

¹¹ Ahianfɔ bétsia mlɩtɔ ekekegyiɛkɛ, tamɛ mɩ mʋ́ mméetsia mlɩ wa yɔ.

¹² Alatsɛɩ ofobi fanfan anfɩ wʋlɩ mɩ, pʋla mɩ ɔyʋlʋ yaɩ ha mɩ opulakɛ.

¹³ Ɔnɔkwalɩ ndɛ mlɩ bla. Ɔyɩtɔ ɔtɩnɛgyiɔtɩnɛá bɛ́da Bulu asʋn wanklaan amʋ ɔkan a, bɛ́blɩ tɔ anfɩ ɔtsɩ anfɩ labwɛ anfɩ pʋkaɩn mʋsʋ.”

Yuda Iskariot Lotsula Ánɩ́ Ɔbɛ́lɛ Yesu Ha

¹⁴ Mʋ́ ɔma a, mʋ akasɩpʋ duanyɔ amʋtɔ ɔkʋá bʋtɛtɩ mʋ Yuda Iskariot lɔyɔ Bulu igyi ahapʋ dɛhɛn amʋ wa.

¹⁵ Ɔlɛyɛfɩtɛ amʋ́ ɔbɛɛ, “Nɩ nɛlɛ Yesu ha mlɩ a, ntɔ mlɛha mɩ?” Mʋ́ sʋ bɛkla sika fututu adʋasa (30) wa mʋ ɩbɩtɔ.

¹⁶ Tsu brɛ amʋtɔ ɔlɔwa ɔkpa dunka ánɩ́ ɔbɔ́tsʋn mʋ́sʋ lɛ Yesu ha amʋ́.

Katsʋn Atogyihɛ Gyi

¹⁷ Israelfɔ Bodobodo Mátuhɛ Nkɛ amʋtɔ ɛkɛ gyankpapʋ a, akasɩpʋ amʋ bɛba Yesu wa bɛfɩtɛ mʋ bɛɛ, “Anɩ Wie, obu mɔmʋtɔ ayɛla ha fʋ, afʋgyi Israelfɔsʋ Katsʋn Nkɛ atogyihɛ amʋ?”

¹⁸ Yesu lɛbla amʋ́ ɔbɛɛ, “Mlɩyɔ asimasi wa wulutɔ, amlɩyɛbla mʋ mlɩaa, ‘Osunapʋ amʋ ɔbɛɛ, mɩ brɛ lafʋn. Ɩnɩ sʋ mɩa mɩ akasɩpʋ aba begyi Israelfɔsʋ Katsʋn Nkɛ amʋ fʋ woyitɔ.> ”

¹⁹ Mʋ́ sʋ akasɩpʋ amʋ bɔyɛbwɛ alɩ amʋʋ Yesu lɛbla amʋ́ amʋ pɛpɛɛpɛ. Bɛla obu amʋtɔ, bwɛ Katsʋn Nkɛtɔ atogyihɛ amʋ yaɩ ɩnʋ.

²⁰ Brɛá nsaɩntɔ deklun a, Yesu mʋa mʋ akasɩpʋ bɛba betsia ɔpʋnʋ amʋ asɩ.

²¹ Atɔ amʋ ogyikpa a, Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla, mlɩtɔ ɔkʋlɛ ɔbɛ́lɛ mɩ ha.”

²² Asʋn anfɩ lɛhɩɛ han akasɩpʋ amʋ. Mʋ́ sʋ befi asɩ bʋdɛ mʋ fɩtɛ ɩkʋlɛ-kʋlɛ bɛɛ, “Mɩ Wie, mɩ nɩ loo?”

²³ Yesu lɛbla amʋ́ ɔbɛɛ, “Ɔha amʋʋ mɩa mʋnyɔ anɩdɛ ɩbɩ wa ɔlɛpɛ ɔkʋlɛtɔ amʋ ɔbɛ́lɛ mɩ ha.

²⁴ Mɩ, Nyankpʋsa-Mʋ-Bi anfɩ nówu fɛ alɩá bɔwanlɩn tswɩ, tamɛ ɔha amʋʋ ɔbɛ́lɛ mɩ ha amʋ ɔgyɔwɩ nɩ. Nɩ bʋmetepi kwɩɩ mʋ kʋraa a, tɛkɩ ɩbʋ alɛ ha mʋ.”

²⁵ Yuda Iskariot amʋʋ ɔlɛlɛ mʋ ha amʋ ɛ lɛfɩtɛ mʋ ɔbɛɛ, “Osunapʋ, mɩ nɩ loo?” Mʋʋ Yesu lɛbla mʋ ɔbɛɛ, “Ee, fablɩ.”

Yesu Ntʋpwɛ Atogyihɛ Trahɛ

²⁶ Brɛá bʋdɛ atɔ amʋ gyi a, Yesu lɛlɛ bodobodo ipin, ɔlɛda Bulu ɩpan, biabia mʋ́tɔ pʋha mʋ akasɩpʋ amʋ, blɩ ɔbɛɛ, “Mlɩhɔ amlɩgyi. Mɩ ɔyʋlʋ nɩ.”

²⁷ Ɩnʋ olotsu nta-ɛwɛ, ɔlɛda Bulu ɩpan, pʋha amʋ́ ɔbɛɛ, “Mlɩ fɛ́ɛ́ mlɩhɔ amlɩnun.

²⁸ Mɩ obugya nɩ. Mʋ́ Bulu dɛpʋsi mʋ ntam ánɩ́ alaka ha ahasʋ nɩ. Bɛ́tsɛɩ mʋ́ wʋlɩ asɩ, mɛnɩ obési aha tsɔtsɔɔtsɔ lakpan kie amʋ́.

²⁹ Ndɛ mlɩ bla mbɛɛ, mmɛ́ɛtra nun waɩn-abi nta anfɩ alɩɩ yɔfʋn ɛkɛá mɩa mlɩnyɔ abɛ́lanun mʋ́ pɔpwɛ mɩ Sɩ iwiegyi amʋtɔ.”

³⁰ Benya wa ɩlʋ da Bulu ɩpan ta alɩ, bɛnatɩ yɔ Olif ɩbʋ amʋsʋ.

Petro Ɔbɔ́swɩɩ Ɔbɛɛ, Mʋmeyin Yesu

³¹ Brɛá bowie Nfɔ-nyibʋ amʋsʋ a, Yesu lɛbla amʋ́ ɔbɛɛ “Mlɩ fɛ́ɛ́ mléyinki mɩ ɔma onyenɩ. Tsufɛ bɔwanlɩn wa Bulu asʋn amʋtɔ bɛɛ, ‘Nɛ́da akufa ɔkpapʋ amʋ lɛda, mʋ akufa bɛ́dasaɩn.> ”

³² Mʋʋ ɔlɛtra blɩ ɔbɛɛ, “Tamɛ nɩ Bulu ɔkʋsʋa mɩ tsu afulitɔ a, négya mlɩ nkpa yɔ Galilea ɔmátɔ. Ɩnʋ mlɔ́bɔtʋ mɩ nɩ.”

³³ Petro lɛbla mʋ ɔbɛɛ, “Nɩ amʋ́ fɛ́ɛ́ beyinki fʋ ɔma kʋraa a, mɩ mʋ́ mméeyinki ɛkɛkɛɛkɛ.”

³⁴ Yesu lɛbla mʋ ɔbɛɛ, “Ɔnɔkwalɩ ndɛ fʋ bla. Onyenɩ, asa batɛ ɔbɛ́lɛ ɔnɔ a, fɔ́swɩɩ pʋ ɩbɩ wa ogya tse sa fɛɛ fʋmeyin mɩ.”

³⁵ Ɩnʋ Petro lɛbla mʋ ɔbɛɛ, “Nɩ lowu igyi kʋraa a, mméekina fʋ ɛkɛkɛɛkɛ.” Alɩ kɛn akasɩpʋ atrahɛ amʋ ɛ bɛblɩ nɩ.

Mpaɩbɔ Getsemane

³⁶ Yesu mʋa mʋ akasɩpʋ bɔyɔ ɔtɩnɛkʋá bʋtɛtɩ ɩnʋ Getsemane. Brɛá bowie ɩnʋ a, ɔlɛbla amʋ́ ɔbɛɛ, “Mlɩtsia nfɩ, nɔyɔ nkpa yɔbɔ mpaɩ.”

³⁷ Ɔlɛkpa Sebedeo abi anyɔ, bʋgyi Yakobo mʋa mʋ pio Yohane pʋ́ Petro ya. Ɩnʋ asʋn lɛhɩɛ han mʋ, mʋ ansɩ lɛpɛ.

³⁸ Mʋʋ ɔlɛbla amʋ́ ɔbɛɛ, “Asʋn ɩhɩɛ dɛ mɩ han, idekle ɩmɔ mɩ. Mlɩtsia nfɩ, mɩa mlɩnyɔ agyo.”

³⁹ Ɩnʋ ɔlɛnatɩ yɔ nkpa kpalobi, ɔlɛda akpawunu pʋ ansɩtɔ bun ɔsʋlʋtɔ, kokoli Bulu ɔbɛɛ, “Mɩ Sɩ, nɩ bɔ́wa alɛ a, ha nta-ɛwɛ anfɩ ɩtsʋn mɩsʋ. Tamɛ megyi tɔá ndekle, mboun mʋ́á fʋdekle ɩba mʋ́tɔ.”

⁴⁰ Mʋʋ oleyinki ba akasɩpʋ amʋ wa bowun ánɩ́ bʋdɛdɩdɩ. Ɩnɩ sʋ ɔlɛfɩtɛ Petro ɔbɛɛ, “Mʋ́ sʋ mlɩmɛtalɩ tsia, mɩa mlɩnyɔ agyo dɔnhwɩrɩ kʋlɛ kpan?

⁴¹ Mlɩgyo amlɩkokoli Bulu, mɛnɩ mlɩmóowie ɩsɔkɩtɔ, tsufɛ mlɩ ɔŋɛ dekle, tamɛ nyankpʋsa-oyi lɔpɔn.”

⁴² Yesu lɛtra yokokoli Bulu ɔbɛɛ, “Mɩ Sɩ, nɩ nta-ɛwɛ anfɩ mɔ́ɔtsʋn mɩsʋ, ɩbwɛ alɩágyialɩá nónun mʋ́ a, mʋmʋ tɔá fʋdekle ɩba mʋ́tɔ.”

⁴³ Ɔlɛtra yinki ba bowun ánɩ́ akasɩpʋ amʋ bʋtra bʋdɛdɩdɩ, tsufɛ dɩdɩ dɛ amʋ́ bʋ.

⁴⁴ Mʋ́ sʋ ɔlɛnatɩ si amʋ́, tra yokokoli Bulu otse sasɩ, blɩ asʋn amʋ kɛn.

⁴⁵ Oleyinki ba akasɩpʋ amʋ wa, bɛfɩtɛ amʋ́ ɔbɛɛ, “Mlɩlatra si mlɩda mlɩdɛ ɔkpʋnʋ da? Mlɩkɩ, brɛ amʋ lafʋn ánɩ́ bɔ́pʋ mɩ, Nyankpʋsa-Mʋ-Bi anfɩ wa lakpan abwɛpʋ ɩbɩtɔ.

⁴⁶ Mlɩkʋsʋ ayɔ. Mlɩkɩ, ɔha amʋʋ ɔdɛ mɩ lɛ ha amʋ na a.”

Yesu Kɩta

⁴⁷ Yesu ɔnɔ mesi asa akasɩpʋ duanyɔ amʋtɔ ɔkʋlɛ bʋtɛtɩ mʋ Yuda lobowie ɩnʋ. Ɔdɔm kpɔnkpɔɔnkpɔntɩá bʋdɛ ndayi pʋ́ nkpoti bʋbuo mʋ. Bulu igyi ahapʋ dɛhɛn pʋ́ Yudafɔ ahandɛ amʋ lɔwa amʋ́.

⁴⁸ Yuda amʋʋ ɔbɛ́lɛ Yesu ha amʋ lɛbla ɔdɔm amʋ yaɩ ɔbɛɛ, “Ɔha amʋʋ nɛ́lata puta amʋ gyi ɔha amʋ nɩ. Mlɩkɩta mʋ.”

⁴⁹ Ɩnɩ sʋ ɔlɛnatɩ laa yɛha Yesu itsia ɔbɛɛ, “Osunapʋ, tsia nɩ!” Ɔlɛlata mʋ puta.

⁵⁰ Mʋʋ Yesu lɛbla mʋ ɔbɛɛ, “Agya, bwɛ tɔá ɔbwɛkpa fɛba.” Ɩnʋ aha amʋ bɛnatɩ tʋ Yesu, kɩta mʋ kinkiinkin.

⁵¹ Ɩnʋ Yesu akasɩpʋ amʋtɔ ɔkʋlɛ lɔtswɩ mʋ ɔdayi, kpa Bulu igyi ɔhapʋ dɛhɛn osumbi ɔkʋ ɩsʋ lɛ.

⁵² Mʋʋ Yesu lɛbla mʋ ɔbɛɛ, “Yinkia fʋ ɔdayi wa mʋ́ ɔflɛtɔ. Tsufɛ ɔha ánɩ́ ɔtɛnatɩ kɩta ɔdayi a, ɔdayi ɔnɔ otesin.

⁵³ Fʋmeyin fɛɛ, nɛ́talɩ kokoli mɩ Sɩ ɔbɛ́ha mʋ abɔpʋ tsɔtsɔɔtsɔ aku duanyɔ bɛ́ba bɔkɔ hɔ mɩ?

⁵⁴ Tamɛ nɩ ɩba alɩ a, nkalɩ ɩbɔ́bwɛ asa Bulu asʋn wanlɩnhɛ amʋ ɩbɛ́ba mʋ́tɔ?”

⁵⁵ Ɩnʋ Yesu lɛfɩtɛ amʋ́ ɔbɛɛ, “Ogyo otswapʋ ngyi, sʋ mlɩlatsu nkpoti pʋ́ ndayi mlɛba mɩ ɔkɩtakpa? Ntsie mlɩ wa Bulu ɔtswɛkpa ɩnʋ ekekegyiɛkɛ ndɛ mlɩ atɔ suna, mlɩmɛkɩta mɩ ɛkɛkɛɛkɛ.

⁵⁶ Tamɛ ɩnɩ fɛ́ɛ́ laba mʋ́tɔ, mɛnɩ Bulu ɔnɔsʋ atɔɩpʋ asʋn wanlɩnhɛ amʋ ɩbɛ́ba mʋ́tɔ.” Ɩnʋ akasɩpʋ amʋ fɛ́ɛ́ bɛsrɩ si mʋ.

Yudafɔ Ahandɛ Ansɩtɔ Lɩɩ

⁵⁷ Mʋʋ Yesu akɩtapʋ amʋ bɛkpa mʋ ya Bulu igyi ɔhapʋ dɛhɛn Kaiafa. Ɩnʋ mʋa Mose mbla asunapʋ pʋ́ Yudafɔ ahandɛ amʋ befia nɩ.

⁵⁸ Tamɛ Petro lɛpɛtɩ obuo amʋ́ ɔma tsutsuutsu alɩɩ bowie igyi ɔhapʋ dɛhɛn woyitɔ ɩnʋ. Oleyetsia amʋ́ agyopʋ wa, mɛnɩ obówun alɩá asʋn amʋ ɩbɔ́mɔ ɔnɔ.

⁵⁹ Ɩnʋ Bulu igyi ɔhapʋ dɛhɛn amʋ mʋa Yudafɔ asʋn agyipʋ amʋ fɛ́ɛ́ bodunka aha ánɩ́ bɛka asʋn dɩnka Yesusʋ, mɛnɩ bɛ́lɩɩ mʋ́sʋ mɔ mʋ.

⁶⁰ Afunupʋ tsɔtsɔɔtsɔ bɛdalɩ ba, tamɛ amʋ́ fɛ́ɛ́ ɔnɔ lɔtsʋn ɔtsan. Mʋ́ ɔma a, aha abanyɔ bɛdalɩ bɛlɩɩ ahandɛ amʋ ansɩtɔ,

⁶¹ blɩ bɛɛ, “Oyin anfɩ lɛblɩ ɔbɛɛ, ‘Nɛ́talɩ bwie Bulu ɔtswɛkpa amʋ, lapʋ nkɛnsa yi mʋ́.> ”

⁶² Mʋʋ Bulu igyi ɔhapʋ dɛhɛn amʋ lɔkʋsʋ lɩɩ fɩtɛ Yesu ɔbɛɛ, “Fʋma ɔnɔ lɛ? Fʋma asʋansʋ blɩ pʋlɛ fʋ ɩwɩ?”

⁶³ Tamɛ Yesu mobwii ɔnɔ. Bulu igyi ɔhapʋ dɛhɛn amʋ lɛla bla Yesu ɔbɛɛ, “Nɛka Bulu Ɔkɩankpapʋ amʋ, nɩ fʋgyi Kristo, (ɔha amʋʋ Bulu lada mʋ ofuli), ogyi Bulu mʋ Bi amʋ a, bla anɩ.”

⁶⁴ Mʋʋ Yesu lɛbla mʋ ɔbɛɛ, “Mʋ́ fablɩ a. Tamɛ mlɩbɩá tsu ndɛ pʋya a, mlówun mɩ, Nyankpʋsa-Mʋ-Bi anfɩ ntsie Bulu Otumipʋ gyɔpɩsʋ anfɩ ndɩn ɔsʋsʋ nwʋlʋtasʋ nɛba.”

⁶⁵ Mʋʋ Bulu igyi ɔhapʋ dɛhɛn amʋ lɛkɩta mʋ atadɩɛ balɩ mʋ́ kɩaan, blɩ ɔbɛɛ “Alabɔ mbusuo! Adansɩɛ mɔmʋ anɩtra anɩgyo? Yɛ mlɩlanu abususʋ ánɩ́ alablɩ.

⁶⁶ Nkalɩ gyi mlɩ agywɩɩn?” Bɛbla mʋ bɛɛ, “Ilehian ánɩ́ obówu!”

⁶⁷ Ɩnʋ botutu atsʋnɔ wʋlɩ mʋ ansɩtɔ, wɔwɔ mʋ atswɛ. Akʋ ɛ bɛdada mʋ asʋtɔ,

⁶⁸ fɩtɛ mʋ bɛɛ, “Bulu ɔnɔsʋ ɔtɔɩpʋ Kristo, ma lada fʋ? Bla anɩ.”

Petro Lɔswɩɩ Ɔbɛɛ Mʋmeyin Yesu

⁶⁹ Petro tsie wunsɩnɛsʋ ɩnʋ, otsibi ɔkʋ lɔbɔtʋ mʋ bla mʋ ɔbɛɛ, “Fʋa Yesu Galileayin amʋ nyɔ na.”

⁷⁰ Tamɛ Petro lɔwa ɔnɔlɩ aha amʋ fɛ́ɛ́ ansɩtɔ ɔbɛɛ, “Mmeyin asʋn anfɩ fʋdɛblɩ anfɩ ɩwɩ kʋkʋʋkʋ.”

⁷¹ Mʋ́ ɔma woyi-ɔnɔ ɩnʋ ɛ a, otsibi ɔkʋ ɛ lɛbɩ Petro. Mʋ́ sʋ ɔlɛbla aha ánɩ́ bʋlɩɩ ɩnʋ ɔbɛɛ, “Oyin anfɩ mʋa Yesu Nasaretyin amʋ nyɔ tɛnatɩ.”

⁷² Ɩnʋ Petro lɔpʋ ɔnɔlɩ ka ntam, blɩ ɔbɛɛ, “Mmeyin mʋ.”

⁷³ Mʋ́ ɔma a, aha amʋʋ bʋlɩɩ ɩnʋ amʋtɔ akʋ bɛba bɛbla Petro bɛɛ, “Lɛlɛ mʋ́ a, anɩyin ánɩ́ fʋa Yesunyɔ na, tsufɛ fʋ tɔɩtɔ dɛ anɩ suna alɩ.”

⁷⁴ Ɩnʋ Petro lɔwa ntam kaka bɩ ɔbɛɛ, “Nɛka togyitɔ, mmeyin oyin amʋʋ mlɩdɛ mʋ ɩwɩ asʋn blɩ amʋ!” Ɩnʋnʋ batɛ lɔbɔn.

⁷⁵ Petro lɛkaɩn ánɩ́ Yesu lɛbla mʋ ɔbɛɛ, “Fɔ́swɩɩ tse sa fɛɛ fʋmeyin mɩ asa batɛ ɔbɛ́lɛ ɔnɔ.” Ɩnʋ ɔlɛdalɩ hɩɛ yesu.