Mateo 25 - Bulu Ntam Pɔpwɛ mʋ́a Israel Ɩlʋ

Mbitebi Du Akʋ Ɩwɩ Yebi

¹ “Bulu iwiegyi amʋ ɩbɔ́bwɛ fɛ mbitebi du akʋá botsu amʋ́ nkandɩɛ dalɩ beyefia ɔka pɔpwɛ otsiapʋ ɔkʋ.

² Amʋ́tɔ abanu bemimla, abanu ɛ bɛtɩn ansɩ.

³ Aha mimlahɛ amʋ botsu amʋ́ nkandɩɛ, tamɛ bʋmotsu nfɔ kʋkʋ kɩta.

⁴ Tamɛ atɩansɩpʋ amʋ botsu nfɔ wa atɔtɔ kɩta.

⁵ Ɔka otsiapʋ amʋ mɔkɔsɩ ba. Mʋ́ sʋ mbitebi amʋ fɛ́ɛ́ bɔgyɔsɩ, tsʋn mʋ́tɔ dɩdɩ.

⁶ “Ɔyɩ-nsɩnɛ a, ɔkʋ lɔsʋra okitikiti ɔbɛɛ, ‘Anɩ pɩ, ɔka otsiapʋ amʋ ɔba o! Mlɩdalɩ yefia mʋ!>

⁷ Ɩnʋ mbitebi amʋ fɛ́ɛ́ bɔkʋsʋ nywɛ amʋ́ nkandɩɛ.

⁸ Aha mimlahɛ amʋ bɛbla atɩansɩpʋ amʋ bɛɛ, ‘Anɩ nkandɩɛ dedun. Mʋ́ sʋ mlɩha anɩ nfɔ kpalobi awa anɩ klɛtɔ.>

⁹ Mʋʋ atɩansɩpʋ amʋ bɛbla amʋ́ bɛɛ, ‘O-o, ɩmɔtsɔ. Ɩmɔ́ɔfʋn anɩa mlɩnyɔ. Mlɩyɔ afɛpʋ wa, amlɩyɛhɔ mlɩ klɛ.>

¹⁰ Brɛá aha mimlahɛ amʋ bɔpʋ ɔkpa bɔyɔ a, ɔka otsiapʋ amʋ lɛba. Amʋ́ amʋʋ bɛda ɩwɩsʋ amʋ bobuo ɔka otsiapʋ amʋ wie ɔka otsiakpa ɩnʋ, oyin amʋ asumpʋ befin obu amʋ.

¹¹ “Mʋ́ ɔma a, mbitebi atrahɛ amʋ ɛ bɛba bɛlɩɩ klʋn ɔma, blɩ bɛɛ, ‘Anɩ sɩ, finki ha anɩ awie.>

¹² Tamɛ ɔka otsiapʋ amʋ lɛbla amʋ́ ɔbɛɛ, ‘Ɔnɔkwalɩ ndɛ mlɩ bla, mmeyin mlɩ ɔkpagyiɔkpasʋ.> ”

¹³ Yesu lɔmɔ mʋ́ ɔnɔ ɔbɛɛ, “Ɩnɩ sʋ mlɩda ɩwɩsʋ. Tsufɛ mɩ, Nyankpʋsa-Mʋ-Bi anfɩ nɛ́ba brɛá mlɩ ansɩ mɛdɩn mɩsʋ.

Asumpʋ Abasa Ɩwɩ Yebi

¹⁴ “Nyankpʋsa-Mʋ-Bi amʋ ɩbabɩ bɔ́bwɛ fɛ ɔkʋá ɔdɛ ɔkpa tu, ɔlɛtɩ mʋ asumpʋ, ye mʋ atɔ ha amʋ́ ɔbɛɛ, bʋkɩ mʋ́sʋ yaɩ mʋ.

¹⁵ Ɔlɔpʋ sika pɛpɛ akɛntɛ anu ha ɔkʋlɛ, pʋ akɛntɛ anyɔ ha onyɔsɩ; ɔlɔpʋ kɛntɛ kʋlɛ ɛ ha ɔsasɩ. Ɔlɛha okugyiɔkʋ mʋ ɔwʋnlɩn ɔnɔ asa ɔlɛnatɩ.

¹⁶ Osumpʋ amʋʋ olenya akɛntɛ anu amʋ lɔwa ɔsa pʋ kɔba amʋ fi ibiagyi asɩ. Mʋ́ sʋ ɩmɔwa ɔpá kʋkʋ, olenya akɛntɛ anu dɩnka mʋ́sʋ.

¹⁷ Onyɔsɩ amʋ ɛ lɛdamli ɩbɩ mʋ sika pɛpɛ akɛntɛ anyɔ amʋsʋ alɩ kɛn. Mʋ́ sʋ olenya akɛntɛ anyɔ dɩnka mʋ́sʋ.

¹⁸ Tamɛ ɔsasɩ amʋʋ olenya kɛntɛ kʋlɛ amʋ mʋ́ loyokwi ɔbɔ, pʋ mʋ wie sika pɛpɛ amʋ ŋain mʋ́tɔ.

¹⁹ “Ɩlɔwa ɔpá asa amʋ́ wie amʋ lotsu mʋ ɔkpa amʋ ba, ɔlɛtɩ amʋ́ ɔbɛɛ, mʋa amʋ́nyɔ bóbu akunta.

²⁰ Osumpʋ amʋʋ olenya sika pɛpɛ akɛntɛ anu amʋ lotsu mʋ́a mʋ́sʋ ɔdɩnka akɛntɛ anu amʋ ba mʋ wie, bɛbla mʋ ɔbɛɛ, ‘Mɩ wie, fɛha mɩ sika pɛpɛ akɛntɛ anu. Mɩ ɛ nanya akɛntɛ anu dɩnka mʋ́sʋ. Mʋ́ nɩ.>

²¹ Mʋ wie amʋ lɛda mʋ ɩpan, blɩ ɔbɛɛ, ‘Fabwɛ atɔ. Osumpʋ wanklaan fʋgyi. Ɩnɩá fawa ɔnɔkwalɩ atɔ tukuriibi anfɩtɔ sʋ a, nɔ́pʋ fʋ yaɩ mɩ atɔ tsɔtsɔɔtsɔ ɔnɔ. Ba afʋbetsia mɩ wa, anya ansigyi.>

²² “Osumpʋ onyɔsɩ amʋʋ olenya sika pɛpɛ akɛntɛ anyɔ amʋ ɛ lɛbla mʋ wie ɔbɛɛ, ‘Mɩ wie, sika pɛpɛ akɛntɛ anyɔ fɛha mɩ. Mɩ ɛ nanya anyɔ dɩnka mʋ́sʋ. Mʋ́ nɩ.>

²³ Mʋ wie amʋ lɛda mʋ ɩpan, blɩ ɔbɛɛ, ‘Fabwɛ atɔ. Osumpʋ ɔnɔkwalɩpʋ fʋgyi. Ɩnɩá fawa ɔnɔkwalɩ atɔ tukuriibi anfɩtɔ sʋ a, nɔ́pʋ fʋ yaɩ mɩ atɔ tsɔtsɔɔtsɔ ɔnɔ. Ba afʋbetsia mɩ wa, anya ansigyi.>

²⁴ “Mʋʋ osumpʋ amʋʋ olenya sika pɛpɛ kɛntɛ kʋlɛ amʋ ɛ lɛbɛbla mʋ wie ɔbɛɛ, ‘Mɩ wie, nyin ánɩ́ fʋ asʋn bʋ ɔnlɩn. Fʋtɔkpɔtɩ atɔ ɔtɩnɛá fʋmodu; fʋtɛkpa atɔ-abi ɔtɩnɛá fʋmɛfɩta.

²⁵ Mʋ́ sʋ nenya ifu pʋ fʋ sika pɛpɛ amʋ ŋain ɔbɔtɔ. Mʋ́ nɩ, hɔ fʋ atɔ.>

²⁶ “Ɩnʋ mʋ wie amʋ lɛbla mʋ ɔbɛɛ, ‘Osumpʋ lalahɛ, ɔwʋlɩyɔpʋ fʋgyi. Fʋyin ánɩ́ ntɔkpɔtɩ atɔ ɔtɩnɛá mmodu, ntɛkpa atɔ-abi ɔtɩnɛá mmɛfɩta atɔ.

²⁷ Ɩnɩá fʋyin mʋ́ alɩ a, tɛkɩ fɔpʋ yɔtswɩ sika ɔyaɩkpa. Ɩnɩá naba a, tɛkɩ nɔ́yɛhɔ mʋ́a mʋ́sʋ abi.>

²⁸ Mʋʋ oyin amʋ lɛbla mʋ asumpʋ amʋ ɔbɛɛ, ‘Mlɩswɩɩ mʋ sika pɛpɛ kɛntɛ kʋlɛ amʋ ha ɔmʋamʋʋ alanya akɛntɛ idu amʋ.

²⁹ Tsufɛ ɔha ánɩ́ ɔbʋ tsɔtsɔ a, bɛtra pʋ ɩkʋ tsɩa mʋ́tɔ ha mʋ, obénya tsɔtsɔɔtsɔ. Tamɛ ɔha ánɩ́ ɔma a, bɔ́swɩɩ mʋ kpalobibiá ɔbʋ,

³⁰ amlɩtswɩ osumpʋ anfɩ ɔma labi anfɩ wa okluntɔ. Ɩnʋ isu mʋ́a kpisi bʋ nɩ.>

Asʋngyi

³¹ “Nɩ mɩ, Nyankpʋsa-Mʋ-Bi anfɩ nɛba mɩ iwie ogyikpa, Bulu-abɔpʋ fɛ́ɛ́ bʋbuo mɩ a, nétsia mɩ ɔsʋsʋ numnyam owie obiasʋ.

³² Bɛ́kpa ɔyɩtɔ aha fɛ́ɛ́ befia mɩ ansɩtɔ. Ɩnʋ nɔ́tɔsɩ amʋ́tɔ, fɛ alɩá mbwɩ ɔkpapʋ tɔtɔsɩ akufa lɛ akpalatɔ.

³³ Fówun naha akufa amʋ balɩɩ mɩ gyɔpɩsʋ, akpala amʋ ɛ balɩɩ mɩ bɩnasʋ.

³⁴ Ɩnʋ mɩ anfɩ ngyi Owie anfɩ nɛ́bla aha amʋʋ bʋlɩɩ mɩ gyɔpɩsʋ amʋ mbɛɛ, ‘Mlɩ aha anfɩ mɩ Sɩ layula anfɩ mlɩba, amlɩbetsia iwiegyi amʋʋ ɔlɛla yaɩ ha mlɩ tsu ɔyɩ asɩtsuabɩ ɔpá amʋtɔ.

³⁵ Tsufɛ akʋn lɛkɩta mɩ a, mlɩlɛha mɩ atɔ negyi. Ɔmɛwʋlɩ lɛkɩta mɩ, mlɩlɛha mɩ ntsu nonun. Nɔbwɛ ɔfɔɔ, mlɩlɔhɔ mɩ ɔfɔɔ.

³⁶ Nɛnatɩ yaya, mlɩlɛha mɩ tati nɛdɩda. Nɔlɔ, mlɩlɛkɩ mɩ. Nɛdɩ obu, mlɩlɛba bɛkɩ mɩ.>

³⁷ “Ɩnʋ yile abwɛpʋ amʋ bɛfɩtɛ mɩ bɛɛ, ‘Anɩ Wie, ɔmɛnkɛ anɩlowun ánɩ́ akʋn dɛ fʋ, anɩlɛha fʋ atɔ fegyi? Ɔmɛwʋlɩ dɛ fʋ, anɩlɛha fʋ ntsu fonun?

³⁸ Fɔbwɛ ɔfɔɔ, anɩlɔhɔ fʋ ɔfɔɔ? Ɔmɛnkɛ fɛnatɩ yaya, anɩlɛha fʋ tati fɛdɩda?

³⁹ Ɔmɛnkɛ fɔlɔ, ntɛ fɛdɩ obu, anɩlɛba bɛkɩ fʋ?>

⁴⁰ “Ɩnʋ mɩ anfɩ ngyi Owie anfɩ nɛ́bla amʋ́ mbɛɛ, ‘Ɔnɔkwalɩ ndɛ mlɩ bla. Togyitɔá mlɩlɔbwɛ ha mɩ apio anfɩ aha bʋtamabu amʋ́ wa ahatɔ anfɩtɔ ɔkʋ a, mɩ mlɩlɔbwɛ mʋ́ ha a.>

⁴¹ “Ɩnʋ nɛ́bla aha amʋʋ bʋlɩɩ mɩ bɩnasʋ amʋ ɛ mbɛɛ, ‘Mlɩkpʋkpɛ tɛɩ nfɩ. Bulu lalwɩɩ mlɩ. Mlɩyɔ ogya amʋʋ ɩtamadun, Bulu lɛla yaɩ ha Ɔbʋnsam mʋa mʋ abɔpʋ amʋtɔ.

⁴² Tsufɛ akʋn lɛkɩta mɩ, mlɩmɛha mɩ atogyihɛ. Ɔmɛwʋlɩ lɛkɩta mɩ, mlɩmɛha mɩ ntsu annun.

⁴³ Nɔbwɛ ɔfɔɔ, mlɩmɔhɔ mɩ ɔfɔɔ. Nɛnatɩ yaya, mlɩmɛha mɩ tati andɩda. Nɔlɔ, nɛdɩ obu; mlɩmɛkɩ mɩ.>

⁴⁴ “Ɩnʋ amʋ́ ɛ bɛfɩtɛ mɩ bɛɛ, ‘Anɩ Wie, ɔmɛnkɛ anɩlowun ánɩ́ akʋn dɛ fʋ, ɔmɛwʋlɩ dɛ fʋ, fʋgyi ɔfɔɔ, fʋna yaya, fʋdɛlɔ ntɛ fʋda obu; anɩmɛbɛkɩ fʋ?>

⁴⁵ Ɩnʋ mɩ anfɩ ngyi Owie anfɩ nɛ́bla amʋ́ mbɛɛ, ‘Ɔnɔkwalɩ ndɛ mlɩ bla. Alɩ amʋʋ mlɩmɔbwɛ mʋ́ ha mɩ apio anfɩ aha bʋtamabu amʋ́ wa ahatɔ anfɩtɔ ɔkʋ a, mɩ mlɩmɔbwɛ ha a.>

⁴⁶ Bulu ɔbɛ́ha amʋ́ bɔ́yɔ ɩwɩɔsɩn ánɩ́ ɩtamatatɔ, tamɛ yile abwɛpʋ amʋ mʋ́ bénya nkpa ánɩ́ ɩtamata.”