Mateo 24 - Bulu Ntam Pɔpwɛ mʋ́a Israel Ɩlʋ

Bulu Ɔtswɛkpa Amʋ Bwie

¹ Brɛá Yesu lɛdalɩ Bulu ɔtswɛkpa ɩnʋ ɔyɔ a, mʋ akasɩpʋ amʋ bɛnatɩ yɔtʋ mʋ, suna mʋ ɔtswɛkpa ɩnʋ mbu amʋ.

² Mʋʋ ɔlɛbla amʋ́ ɔbɛɛ, “Mlɩlawun mbu akpɔnkpɔɔnkpɔntɩ anfɩ fɛ́ɛ́? Ɔnɔkwalɩ ndɛ mlɩ bla. Bóbwie mʋ́ fɛ́ɛ́ bun. Ibwi kʋlɛ kʋraa méesian dɩnka mʋ́ basʋ.”

Ɩwɩɔsɩn Mʋ́a Ɩkplan

³ Brɛá Yesu tsie Olif ɩbʋ amʋsʋ, ɔdɛ Bulu ɔtswɛkpa amʋ kɩ a, mʋ akasɩpʋ amʋ nkʋlɛ bɛfɩtɛ mʋ bɛɛ, “Bla anɩ, brɛ mɔmʋtɔ ɩnɩ fɛ́ɛ́ bɛ́ba? Osuna mɔmʋ ɛ ɔbɛ́ba, ibósuna ánɩ́ fʋ babɩ pʋ́ ɔyɩ ɔnɔmɔkɛ lafʋn?”

⁴ Ɩnʋ Yesu lɛlɛ mʋ́ ɔnɔ ɔbɛɛ, “Mlɩkɩ wanklaan, mɛnɩ ɔhaa mɛ́ɛmlɛ mlɩ.

⁵ Tsufɛ aha tsɔtsɔɔtsɔ bɔ́pʋ mɩ ɩda ba bɛɛ, amʋ́gyi Kristo, (ɔha amʋʋ Bulu lada mʋ ofuli amʋ) nɩ. Bɛ́mlɛ aha tsɔtsɔɔtsɔ bɔ́fwɩ ɔkpa.

⁶ Nɩ mlonuá ɩsa lada manta mlɩ ntɛ ɔtɩnɛkʋ a, opuni mátsii mlɩ. Tsufɛ lehian ánɩ́ ɩnɩ aná fɛ́ɛ́ bɛ́ba, tamɛ imedesuna ánɩ́ ɔyɩ ɔnɔmɔkɛ amʋ lafʋn.

⁷ Tsufɛ ɔmá bɔ́kɔ aba. Awie bɔ́kʋsʋ lɩɩ abasʋ. Akʋn bɛ́ba, ɔsʋlʋ bɛ́kpɩnkɩ ntɩnɛ-ntɩnɛ.

⁸ Ɩnɩ fɛ́ɛ́ igyi fɛ ɩwɩɔsɩn ánɩ́ ɔtsɩ towun brɛá ɩkwɩɩ dɛ mʋ dwiin.

⁹ “Alɩ brɛ amʋtɔ a, mɩ sʋ ɔmá-ɔmá bólu mlɩ. Bɛ́dɩnka mlɩsʋ, pʋ mlɩ ha bɔ́wa mlɩ amʋmʋyɔ, mɔ mlɩ.

¹⁰ Mlɩtɔ aha tsɔtsɔɔtsɔ bɛ́dɩda hogyitɔ. Bólu aba, lɛ aba ha.

¹¹ Afunu awapʋá bɛ́blɩ bɛɛ, Bulu ɔnɔsʋ atɔɩpʋ bʋgyi tsɔtsɔɔtsɔ bɛ́ba bɛmlɛ aha tsɔtsɔɔtsɔ, ha amʋ́ bɔ́fwɩ ɔkpa.

¹² Lalahɛbwɛ bómoni. Mʋ́ sʋ aha tsɔtsɔɔtsɔ bʋmɛ́ɛtra dwɛ aba.

¹³ Tamɛ ɔha ánɩ́ ɔlɛtalɩ lɩɩ kinkiinkin yɔfʋn ɔyɩ ɔnɔmɔkɛ a, Bulu ɔbɔ́hɔ mʋ nkpa.

¹⁴ Mʋ́ oo a, aha bɛ́da Bulu iwiegyi amʋ ɩwɩ asʋn wanklaan anfɩ ɔkan ɔyɩtɔ fɛ́ɛ́, mɛnɩ aha fɛ́ɛ́ bónu mʋ́ asa ɔyɩ bɔ́mɔ ɔnɔ.

Ɩwɩɔsɩn Wunbɩ

¹⁵ “Nɩ mlowun akisitɔá itobwie ɔmá, ɩda Ɔwankɩkpa ɩnʋ, ɩdɛ Bulu ɔtswɛkpa ɩnʋ kpɔɩ, fɛ alɩá Bulu ɔnɔsʋ ɔtɔɩpʋ Daniel lɛblɩ tswɩ a,---Aklapʋ, mlɩnu mʋ́ asɩ!---

¹⁶ Mʋmʋ aha ánɩ́ bʋbʋ Yudea ɔmátɔ bʋsrɩ yɔ abʋsʋ.

¹⁷ Ɔha ánɩ́ ɔdɩn obusʋ mákplɩ ɔbɛɛ, móyotsu tɔtɔ obuto.

¹⁸ Ɔha ánɩ́ ɔbʋ ndɔtɔ ɛ ɔmáyinki ba woyitɔ botsu mʋ tati.

¹⁹ Amenyapʋ pʋ́ abi-ayín ánɩ́ bʋpia abi bɔbwɛ alɩ brɛ amʋtɔ bʋgyɔwɩ nɩ.

²⁰ Mlɩkokoli Bulu mlɩaa, mlɩ ɔsrɩkɛ amʋ ɩmábwɛ nyankpʋ mʋ́a atsalɩbɩ ntɛ ɔkpʋnʋ ɔdakɛ.

²¹ Tsufɛ tsu ɔyɩ asɩtsuabɩ a, asʋn wunhɛ ánɩ́ ɩbɛ́ba alɩ brɛ amʋtɔ odu kʋkʋ mɔkʋba kɩ. Mʋ́ odu kʋkʋ ɛ mɛ́ɛtra ba ɛkɛkɛɛkɛ.

²² Nɩ Bulu mɛdɩnkɩ nkɛ amʋsʋ a, tɛkɩ ɔhaa méesian ɔyɩtɔ. Tamɛ aha amʋʋ alalɛ pʋbwɛ mʋ klɛ amʋ sʋ aladɩnkɩ nkɛ amʋsʋ.

²³ “Alɩ brɛ amʋtɔ a, nɩ ɔkʋ lɛbla fʋ ɔbɛɛ, ‘Kɩ, Kristo (ɔha amʋʋ Bulu lada mʋ ofuli amʋ) bʋ nfɩ ntɛ nana> a, máhogyi.

²⁴ Tsufɛ aha ánɩ́ bɛɛ amʋ́gyi Kristo amʋ pʋ́ aha ánɩ́ bɔ́wa afunu bɛɛ, Bulu ɔnɔsʋ atɔɩpʋ bʋgyi tsɔtsɔɔtsɔ bɛ́ba ɔyɩtɔ. Bɔ́bwɛ ofula pʋ́ osuna akpɔnkpɔntɩ pʋmlɛ aha. Nɩ bɛ́talɩ kʋraa a, bɛ́mlɛ aha amʋʋ Bulu lalɛ amʋ ɛ.

²⁵ Mlɩnu, ndɛ mlɩ ɔla da yaɩ asa ɩba.

²⁶ “Nɩ ɔkʋ ɔbla mlɩ ɔbɛɛ, ‘Kɩ, Kristo amʋ laba ɔbʋ ɔsʋlʋkpansʋ> a, mlɩmádalɩ yɛkɩ. Alɩ kɛn nɩ bɛblɩ bɛɛ, ‘Ɔbʋ obutotɔ> ɛ a, mlɩmáhogyi nɩ.

²⁷ Tsufɛ mɩ, Nyankpʋsa-Mʋ-Bi anfɩ ɔbakɛ ɩbɔ́bwɛ fɛ alɩ amʋʋ nyankpʋ tɔfwɩ ɩbɩ, bʋtowun mʋ́ tsu owi ɔdalɩkpa yɛdalɩ owi ɔkplɩwiekpa amʋ.

²⁸ “Ɔtɩnɛá ɩtɔ wuhɛ da a, ɩnʋ alasa bʋtefia.

Nyankpʋsa-Mʋ-Bi Amʋ Ɩbabɩ

²⁹ “Ɩwɩɔsɩn-wun amʋ ɔma a, owi ɔbɛ́ta, ɔtsra ɛ ɔmɛ́ɛtra fɛɩ. Ntsrakpabi bɛ́kpa tsu ɔsʋsʋ bɛda. Nwʋlʋta mʋ́a mʋ́tɔ atɔ fɛ́ɛ́ bɛ́kpɩnkɩ.

³⁰ Mʋ́ ɔma a, mlówun mɩ, Nyankpʋsa-Mʋ-Bi anfɩ ɩba ɩwɩ osuna ɔsʋsʋ. Ɔyɩtɔ aha fɛ́ɛ́ bósu. Ɔhagyiɔha obówun ánɩ́ mɩ, Nyankpʋsa-Mʋ-Bi anfɩ napʋ tumi mʋ́a numnyam kpɔnkpɔntɩ mbʋ nwʋlʋtatɔ tsu ɔsʋsʋ nɛba.

³¹ Ɩnʋ a, ɔkpɛ kʋ ɩbɛ́lɩn kʋklʋkʋʋ, Bulu ɔbɔ́wa mʋ abɔpʋ bɛ́yɛkpa mʋ aha amʋʋ alalɛ amʋ tsu ɔyɩ afʋnka ana amʋ fɛ́ɛ́sʋ.

Ɔyɩ Ɔnɔmɔ Ɩwɩ Osuna

³² “Mlɩpʋkɩ pɔntɔ oyi. Nɩ mʋ́ abambi dɛpɔɩ, ɩdɛ atɛ pɔpwɛ lɛ a, mlɩtɛbɩ ánɩ́ awikpan brɛ lafʋn.

³³ Alɩ kɛn, nɩ mlowun ánɩ́ ntobi anfɩ fɛ́ɛ́ ɩdɛ mʋ́tɔ ba a, mlɛbɩ ánɩ́ mɩ, Nyankpʋsa-Mʋ-Bi anfɩ ɩbabɩ lafʋn ta nɩ. Nawie woyi amʋ ɔnɔ ta.

³⁴ Ɔnɔkwalɩ ndɛ mlɩ bla mbɛɛ, ndɛmba-abi anfɩ fɛ́ɛ́ bʋmóowu ta asa ɩnɩ fɛ́ɛ́ bɛba mʋ́tɔ.

³⁵ Ɔsʋ mʋa asɩ fɛ́ɛ́ bɔ́tsʋn, tamɛ mɩ asʋn blɩhɛ mɔ́ɔtsʋn ɛkɛkɛɛkɛ.

Nyankpʋsa-Mʋ-Bi Amʋ Ɔbakɛ

³⁶ “Ɔhaa meyin ɛkɛ ntɛ brɛá ntobi anfɩ fɛ́ɛ́ ɩbɛ́ba. Bulu-abɔpʋ bʋmeyin. Bulu mʋ Bi amʋ ɛ meyin, nkɛtɩ anɩ Sɩ amʋʋ ɔbʋ ɔsʋsʋ amʋ nkʋlɛ pɛ yin.

³⁷ Alɩ amʋʋ ilegyi Noa brɛsʋ amʋ a, alɩ ibégyi mɩ, Nyankpʋsa-Mʋ-Bi anfɩ ɛ ɩbabɩ nɩ.

³⁸ Tsufɛ asa ntsubʋlabɩ amʋ lɔfʋn a, aha betsia bʋdɛ atɔ gyi, bʋdɛ nta nun, bʋdɛ aka tsia, bʋdɛ atsɩ kɩta ha aklu alɩɩ yɔfʋn ɛkɛá Noa lowie mʋ daka kpɔnkpɔɔnkpɔntɩ amʋtɔ.

³⁹ Ɔhaa mɛbɩ tɔá ɩdɛ mʋ́sʋ yɔ, kpɛfʋn brɛá ntsu amʋ lɔbʋla sʋra amʋ́ fɛ́ɛ́ natɩ. Alɩ kɛn bʋmɛ́ɛbɩ mɩ, Nyankpʋsa-Mʋ-Bi anfɩ ɩbabɩ nɩ.

⁴⁰ Alɩ brɛ amʋtɔ a, nɩ ayin abanyɔ bʋlɩɩ ndɔ kʋlɛtɔ bʋdɛ agyʋma yɔ a, Bulu obótsu ɔkʋlɛ si ɔkʋlɛ.

⁴¹ Nɩ atsɩ abanyɔ bʋdɛ nfuo kwɛ a, Bulu obótsu ɔkʋlɛ si ɔkʋlɛ.

⁴² “Mlɩdɩnka ansɩ ɩwɩsʋ, tsufɛ mlɩmeyin ɛkɛá mlɩ Wie ɔbɛ́ba.

⁴³ Tamɛ mlɩnu asʋn anfɩ. Nɩ woyi mʋ wie yin onye brɛá owikplu ɔbɛ́ba mʋ woyitɔ a, tɛkɩ ologyo mʋ woyi, owikplu mobwie wie, wi mʋ atɔ.

⁴⁴ Mʋ́ sʋ mlɩ ɛ mlɩgyo, tsufɛ mɩ, Nyankpʋsa-Mʋ-Bi anfɩ nɛ́ba brɛá mlɩ ansɩ mɛdɩn mɩsʋ.

Osumpʋ Wanklaan Pʋ́ Ɔlalahɛ

⁴⁵ “Ma mɛɛ gyi osumpʋá ɔlɛtɩn ansɩ, ɔbʋ ɔnɔkwalɩ? Mʋ ɩbɩtɔ mʋ wie tɔpʋ mʋ aba atrahɛ wa, ɔbɛɛ ɔha amʋ́ atogyihɛ dɩnka brɛsʋ.

⁴⁶ Ansɩ bégyi osumpʋ amʋ, nɩ mʋ wie amʋ ɔba bowun ánɩ́ lɛlɛ ɔdɛ mʋ́ bwɛ.

⁴⁷ Ɔnɔkwalɩ ndɛ mlɩ bla. Mʋ wie amʋ ɔbɔ́pʋ mʋ atɔ fɛ́ɛ́ wa mʋ ɩbɩtɔ.

⁴⁸ Tamɛ nɩ osumpʋ lalahɛ ogyi, ɔlɛblɩ wa nwuntɔ ɔbɛɛ, ‘Mɩ wie mɛ́ɛba sei.>

⁴⁹ Ɩnɩ sʋ olefi asɩ ɔdɛ mʋ aba asumpʋ da, mʋa nta abʋpʋ bʋdɛ atɔ gyi si amʋ́, bʋdɛ nta nun bʋ a,

⁵⁰ mʋ wie amʋ ɔbɛ́ba bofwie mʋtɔ ɛkɛá ɔmɛdɩn ansɩ.

⁵¹ Mʋ wie amʋ ɔbɛ́hɩɛ tɩtɩ mʋtɔ, tra bɩtɩ mʋa apinabwɛbifɔ amʋ asʋ kɛkɛ. Ɩnʋ isu mʋ́a kpisi bʋ nɩ.