Mateo 23 - Bulu Ntam Pɔpwɛ mʋ́a Israel Ɩlʋ

Mose Mbla Asunapʋ Pʋ́ Farisifɔ Tsiatɔ

¹ Asʋn anfɩ ɔma a, Yesu lɛbla ɔdɔm amʋ pʋ́ mʋ akasɩpʋ amʋ ɔbɛɛ,

² “Mose mbla Farisifɔ pʋ́ Mbla asunapʋ amʋ bʋdesuna.

³ Mʋ́ sʋ mlɩgyi amʋ́ asʋn blɩhɛ fɛ́ɛ́sʋ, tamɛ mlɩmátsia amʋ́ atsiabi. Tsufɛ bʋtamagyi amʋ́ onuto asʋn blɩhɛsʋ.

⁴ Bʋtɔpʋ atɔ dwindwin sʋra aha, tamɛ amʋ́ onuto bʋtamapʋ osrebi ɔkʋlɛ kʋraa tsa amʋ́ tsu.

⁵ Bʋtɔbwɛ amʋ́ togyitɔ aha ansɩsʋ. Bʋtɔwanlɩn Bulu asʋn dɩnka tati tɛɩhɛsʋ, pʋklɩ amʋ́ ɔsʋkpɩ pʋ́ amʋ́ bɩna ɩbasʋ. Bʋtɔlʋ nfɛ tɩntɩntɩn siansian amʋ́ atadɩɛ ɔnɔ.

⁶ Bʋtekle otsiakpa yile tsia nkɛ ogyikpa pʋ́ Yudafɔ Ofiakpa.

⁷ Bɛdalɩ yɔ dɩnsʋ a, bʋtekle bɛɛ aha bʋtɩ amʋ́ bɛɛ, ‘Asunapʋ,> abʋbun ha amʋ́ itsia.

⁸ Mlɩ fɛ́ɛ́ a, apio mlɩgyi. Mʋ́ sʋ mlɩmáha abʋtɩ mlɩtɔ ɔhaa osunapʋ. Ɔbakʋlɛ pɛ gyi mlɩ osunapʋ.

⁹ Alɩ kɛn mlɩmátɩ ɔhaa mlɩ sɩ ɔsʋlʋ anfɩsʋ nɩ. Tsufɛ Ɔsɩ ɔkʋlɛ pɛ mlɩbʋ, ɔbʋ ɔsʋsʋ.

¹⁰ Trahɛ-trahɛ a, mlɩtɔ ɔhaa máha abʋtɩ mʋ nkpa ogyapʋ. Tsufɛ nkpa ogyapʋ ɔkʋlɛ pɛ mlɩbʋ. Mʋgyi Kristo, (ɔha amʋʋ Bulu lada mʋ ofuli amʋ).

¹¹ Mlɩtɔ ɔhandɛ ɔbwɛ mlɩ osumpʋ.

¹² Tsufɛ fʋa fotsu ɩwɩ a, Bulu ɔbɛ́ba fʋ asɩ. Fʋa fɛba ɩwɩasɩ ɛ a, Bulu obótsu fʋ fʋa.

Apinabwɛbi Abwɛpʋ

^13-14 “Mlɩ Farisifɔ pʋ́ Mose mbla asunapʋ, apinabwɛbi abwɛpʋ, mlɩgyɔwɩ nɩ. Mlɩlatin Bulu iwiegyi amʋ ɔkpa wa aha. Mlɩ onuto mlɩmedekleá mlówie ɩnʋ, mlɩdɛ aha ánɩ́ bʋdɛ mbɔdɩ bɔá bówie ɩnʋ ɛ ɔkpa tin.

¹⁵ “Mlɩ Farisifɔ pʋ́ Mose mbla asunapʋ, apinabwɛbi abwɛpʋ, mlɩgyɔwɩ nɩ. Tsufɛ mlɩtɛfa ɩlɩn fa ɔpʋ, dʋ ɩbʋ kplɩ ɩbʋ ha ɔha tɛdamli klʋntɔ. Tamɛ nɩ ɔdamli klʋntɔ ta a, mlɩtɛlabwɛ mʋ otemli ɩsʋbɩtɩ ogya ánɩ́ ɩtamaduntɔ ɔyɔpʋ dʋn mlɩ onuto.

¹⁶ “Ansibi abwiepʋ ánɩ́ mlɩdɛ aha kpa, mlɩgyɔwɩ nɩ. Mlɩtɛblɩ mlɩaa, ‘Nɩ ɔkʋ ɔka Bulu ɔtswɛkpa obu amʋ ntam a, imehian ánɩ́ obégyi mʋ́sʋ. Tamɛ nɩ ɔka sika pɛpɛ atɔá ɩbʋ ɔtswɛkpa obuto ɩnʋ mʋ́ ntam a, ilehian ánɩ́ obégyi mʋ́sʋ.>

¹⁷ Ansibi abwiepʋ! Aha mimlahɛ! Mʋ́tɔ mɔmʋ bʋ labi dʋn? Sika pɛpɛ atɔ amʋ loo, ntɛ Bulu ɔtswɛkpa obu amʋʋ ɩlaha sika amʋ lamli Bulu klɛ amʋ?

¹⁸ Mlɩtɛtra blɩ mlɩaa, ‘Nɩ ɔkʋ ɔka afɔdɩɛ-ɔswɩ ntam a, imehian ánɩ́ obégyi mʋ́sʋ. Tamɛ nɩ ɔka afɔdɩɛ-abɔtɔ amʋ ntam mʋ́ a, ilehian ánɩ́ obégyi mʋ́sʋ.>

¹⁹ Ansibi abwiepʋ! Mʋ́tɔ mɔmʋ bʋ labi dʋn? Afɔdɩɛ-abɔtɔ amʋ ntɛ afɔdɩɛ-ɔswɩ amʋʋ ɩlaha mʋ́ ɩlamli Bulu klɛ amʋ?

²⁰ Nɩ fɛka afɔdɩɛ-ɔswɩ amʋ ntam a, faka ɔswɩ amʋ pʋ́ atɔá ɩdɩn mʋ́sʋ fɛ́ɛ́ ntam.

²¹ Nɩ fɛka Bulu ɔtswɛkpa amʋ ntam a, faka Bulu mʋa mʋ otsiakpa ntam.

²² Nɩ fɛka ɔsʋsʋ ntam a, faka Bulu mʋa mʋ owie obia ntam.

²³ “Mlɩ Farisifɔ pʋ́ Mose mbla asunapʋ, apinabwɛbi abwɛpʋ, mlɩgyɔwɩ nɩ. Mlɩteye mlɩ ɔtsʋtsʋ pʋ́ kpantankplama aná fɛ́ɛ́tɔ idu, pʋ idusɩ ha Bulu. Tamɛ mlɩmɛdɛ Bulu mbla amʋʋ ɩhɩɛ dehian, igyi asʋngyi ɔnɔkwalɩsʋ, aba nwewun pʋ́ ɔnɔkwalɩwa amʋsʋ gyi. Mʋ́dehian nɩ, tamɛ mlɩmákina iyetɔ dusɩ amʋ ɛ ha.

²⁴ Ansibi abwiepʋá mlɩdɛ aha kpa, mlɩgyɔwɩ nɩ. Mlɩtɔtsrɔ mbepi lɛ oputsutɔ, tamɛ mlɩtɛmɛ mbewun.

²⁵ “Mlɩ Farisifɔ pʋ́ Mose mbla asunapʋ, apinabwɛbi abwɛpʋ, mlɩgyɔwɩ nɩ. Tsufɛ mlɩtɔfwɩ mlɩ nwɛ pʋ́ mlɩ nlɛpɛ ɔma wanklaan, tamɛ atɔá mlɩlapʋ owi mʋ́a ɔnsɩpɛ swɩɩ aha sɔɔn bʋ mʋ́tɔ.

²⁶ Farisifɔ ansibi abwiepʋ, mlɩgyankpa fwɩ nwɛ mʋ́a nlɛpɛ amʋtɔ, mʋ́ ɔma ɛ bɛ́tɩn.

²⁷ “Mlɩ Farisifɔ pʋ́ Mose mbla asunapʋ, apinabwɛbi abwɛpʋ, mlɩgyɔwɩ nɩ. Mlɩlabwɛ fɛ ntsan ánɩ́ bakpa mʋ́ afa fututuutu, mʋ́ ɩwɩ lawa akɩlɛ. Tamɛ mʋ́tɔ mʋ́ a, afuli awú pʋ́ atɔ plɔhɛ sɔɔn bɔ mʋ́.

²⁸ Alɩ kɛn mlɩgyi nɩ. Aha bʋtɛkɩ mlɩ ánɩ́ mlɩgyi yile abwɛpʋ. Tamɛ mlɩ klʋntɔ mʋ́ a, apinabwɛbibwɛ mʋa lalahɛbwɛ sɔɔn bɔ mʋ́.

Bulu Ɩsʋbɩtɩ

^29-30 “Mlɩ Farisifɔ pʋ́ Mose mbla asunapʋ, apinabwɛbi abwɛpʋ, mlɩgyɔwɩ nɩ. Tsufɛ mlɩtɔpwɛ Bulu ɔnɔsʋ atɔɩpʋ pʋ́ yile abwɛpʋ amʋʋ betsia amʋ ntsan, la mʋ́ ɩwɩ wanklaan, blɩ mlɩaa, ‘Nɩ anɩletsia anɩ anain brɛsʋ asa bɔmɔ Bulu ɔnɔsʋ atɔɩpʋ anfɩ a, tɛkɩ anɩmɔwa ɩbɩ mʋ́tɔ.>

³¹ Mlɩ asʋn blɩhɛ anfɩ desuna ánɩ́ mlɩgyi Bulu ɔnɔsʋ atɔɩpʋ amɔpʋ amʋ abi-aná nɩ.

³² Mlɩwuna yɔ mʋ́sʋ, amlɩmɔ mlɩ anain bwɛhɛ amʋ ɔnɔ.

³³ Awɔ, abɛ abi-aná! Mlɛ́talɩ srɩ si ɩpɔn amʋʋ Bulu ɔbɛ́ha mlɩ, kpa mlɩ wa ɩsʋbɩtɩ ogya amʋʋ ɩtamaduntɔ amʋ?

³⁴ Mʋ́ sʋ ndɛ Bulu ɔnɔsʋ atɔɩpʋ, anyansapʋ pʋ́ Mose mbla asunapʋ wa sɩsɩ mlɩ. Tamɛ mlɔ́mɔ akʋ, da amʋ́tɔ akʋ manta oyikpalihɛsʋ. Mlɔ́nwɛn amʋ́tɔ akʋ mplɩ mlɩ ofiakpa, dɩnka akʋsʋ tsu awulusʋ yɔ awulusʋ.

³⁵ Ɩnɩ sʋ yile abwɛpʋ amʋʋ mlɩa mlɩ anain mlɩlamɔ tsu Habelsʋ bɔfʋn Sakaria, ogyi Barakia mʋ bi amʋʋ mlɩlɔmɔ Bulu ɔtswɛkpa obu mʋ́a afɔdɩɛ-ɔswɩ amʋ nsɩnɛ amʋ fɛ́ɛ́ obugya bɛ́ba mlɩsʋ.

³⁶ Ɔnɔkwalɩ ndɛ mlɩ bla. Ɩnɩ aná fɛ́ɛ́ sʋ Bulu ɩsʋbɩtɩ bɛ́ba mlɩ ndɛmba-abi anfɩsʋ nɩ.

Yerusalemfɔ Ɩwɩ Ɔdwɛ

³⁷ “Oo, Yerusalemfɔ, Yerusalemfɔ! Mlɩtɔmɔ Bulu ɔnɔsʋ atɔɩpʋ, da abi ánɩ́ Bulu lawa sɩsɩ mlɩ abwi mɔ nɩ. Ntekleá nóbun mlɩ abisʋ bregyibrɛ, fɛ alɩá batɛ tobun mʋ abisʋ, tamɛ mlɩtamaha mɩ ɔkpa.

³⁸ Mlɩkɩ, Bulu obési mlɩ ɔtswɛkpa tswɩ mlɩ, ɩbɛ́dɩ kpan.

³⁹ Tsufɛ ndɛ mlɩ bla mbɛɛ, mlɩmɛ́ɛtra wun mɩ ɛkɛkɛɛkɛ, yɔfʋn ɛkɛá mlɛblɩ mlɩaa, ‘Bulu oyula ɔha amʋʋ ɔba mʋ ɩdatɔ.> amʋ.”