Mateo 22 - Bulu Ntam Pɔpwɛ mʋ́a Israel Ɩlʋ

Ɔtsɩkpaɩn Ɩwɩ Yebi

^1-2 Yesu lɛtra bla Yudafɔ igyi ahapʋ pʋ́ Yudafɔ ahandɛ amʋ asʋn yebitɔ ɔbɛɛ, “Bulu iwiegyi amʋ igyi fɛ asʋn anfɩ. Owie ɔkʋ dɛ ɔtsɩ kpaɩn ha mʋ bi,

³ ɔlɛtɩ aha ɔbɛɛ, bʋba nkɛ amʋ asɩ. Brɛá owie amʋ lɔbwɛ ta a, ɔlɔwa mʋ asumpʋ ɔbɛɛ, bʋyɛtɩ aha amʋ abʋba, tamɛ bekina ba.

⁴ Mʋ́ sʋ ɔlɛlawa mʋ asumpʋ bamba ɔbɛɛ, ‘Mlɩtra yɛbla aha amʋ mlɩaa, nabwɛ togyitɔ ta. Bamɔ mɩ nnantswie akpɔnkpɔntɩ amʋ pʋ́ amʋ́á bawa nfɔ, nɩna atɔ amʋ fɛ́ɛ́ ta. Mʋ́ sʋ bʋba ɔtsɩ ɔkpaɩnkpa ɩnʋ.>

⁵ Tamɛ aha amʋʋ bɛyɛtɩ amʋ bʋmɛkpla amʋ́. Bɛnatɩ si amʋ́ yɔ amʋ́ agyʋmasʋ. Akʋ bɛnatɩ yɔ amʋ́ ndɔtɔ, akʋ ɛ bɛnatɩ yɔ amʋ́ ibia ogyikpa.

⁶ Amʋ́ atrahɛ bɛkɩta asumpʋ amʋ, da amʋ́, mɔ amʋ́.

⁷ Brɛá owie amʋ lonu asʋn anfɩ a, ɔblɔ lɛhɩɛ kɩta mʋ. Mʋ́ sʋ ɔlɔwa mʋ ɩsa akɔpʋ, bɔyɔmɔ aha amʋʋ bɔmɔ mʋ asumpʋ amʋ, wa amʋ́ wulu ogya.

⁸ Mʋʋ ɔlɛbla mʋ asumpʋ bamba ɔbɛɛ, ‘Banɩna ɔtsɩkpaɩn atogyihɛ amʋ ta, tamɛ aha amʋʋ nɛtɩ amʋ bʋmɔfʋn ha mɩ woyitɔ ba.

⁹ Mʋ́ sʋ mlɩwie awulutɔ, amlɩtɩ ɔhagyiɔha ánɩ́ mlówun, ɔba ɔtsɩ ɔkpaɩnkpa ɩnʋ.>

¹⁰ Ɩnʋ asumpʋ amʋ bowie awulutɔ. Bɛtɩ ɔhagyiɔha ánɩ́ bowun, aha wanklaan pʋ́ aha lalahɛ fɛ́ɛ́. Mʋ́ sʋ aha bɔbʋla ɔtsɩ ɔkpaɩnkpa ɩnʋ dɛdɛɛdɛ.

¹¹ “Tamɛ brɛá owie amʋ lɛbɛkɩ aha amʋʋ batɩ amʋ a, olowun oyin ɔkʋá ɔmɔwa ɔtsɩkpaɩn nkɛtɔ atadɩɛ.

¹² Mʋʋ ɔlɛfɩtɛ mʋ ɔbɛɛ, ‘Agya, nkalɩ ɩlɔbwɛ fʋmɔwa ɔtsɩkpaɩn nkɛtɔ atadɩɛ asa fɛba nfɩ?> Oyin amʋ mɛtalɩ lɛ mʋ́ ɔnɔ.

¹³ Mʋʋ owie amʋ lɛla bla mʋ asumpʋ ɔbɛɛ, ‘Mlɩklɩ mʋ ayabi pʋ́ mʋ ɩbɩ, amlɩtswɩ mʋ wa oklun amʋtɔ. Ɩnʋ isu mʋa kpisi bʋ nɩ.> ”

¹⁴ Yesu lɔmɔ mʋ asʋn ɔnɔ ɔbɛɛ, “Bulu tɛtɩ aha tsɔtsɔɔtsɔ, tamɛ aha kpalobi pɛ ɔtɛlɛ.”

Lampooka

¹⁵ Farisifɔ amʋ bɔyɛbwɛ ɔnɔ-ɔkʋlɛ ánɩ́ bɛtɛtɛ Yesu ɔnɔtɔ asʋn nu, abʋnya mʋ akɩtalɛ.

¹⁶ Mʋ́ sʋ bɔwa amʋ́ akasɩpʋ pʋ́ Owie Herode aha Yesu wa bɛɛ, bʋyɛfɩtɛ mʋ bɛɛ, “Osunapʋ, anɩyin ánɩ́ ɔnɔkwalɩpʋ fʋgyi, fʋtosuna Bulu asʋn amʋ ɛ ɔnɔkwalɩsʋ. Fʋtamaha ɔhaa ɔtsɛ fʋ agywɩɩn, tsufɛ fʋtamakɩ ɔhaa ansɩtɔ.

¹⁷ Mʋ́ sʋ anɩdɛ fʋ fɩtɛ anu. Anɩ mbla lɛha ɔkpa ánɩ́ aka lampoo ha Roma owie dɛhɛn Kaesare, ntɛ anɩmáka?”

¹⁸ Tamɛ Yesu lowun amʋ́ agywɩɩn lalahɛ amʋ. Mʋ́ sʋ ɔlɛfɩtɛ amʋ́ ɔbɛɛ, “Apinabwɛbi abwɛpʋ, ntogyi sʋ mlɩdɛ mɩ sɔ kɩ?

¹⁹ Mlɩtsu kɔba amʋʋ bʋtɔpʋka lampoo amʋ ɩkʋ ba mɩ ankɩ.” Bɔpʋba mʋ,

²⁰ ɔlɛfɩtɛ amʋ́ ɔbɛɛ, “Ma nwun pʋ́ mʋ ɩda dɩn mʋ́sʋ?”

²¹ Bɛlɛ mʋ́ ɔnɔ bɛɛ, “Kaesare.” Mʋʋ ɔlɛbla amʋ́ ɔbɛɛ, “Mʋmʋ mlɩpʋ tɔá igyi Kaesare klɛ ha Kaesare, amlɩpʋ mʋ́á igyi Bulu klɛ ɛ ha Bulu.”

²² Yesu mbuaɩ anfɩ lobwie amʋ́ ɔnɔ. Mʋ́ sʋ bɛnatɩ.

Kʋsʋ Tsu Afulitɔ Ɩwɩ Asʋn Fɩtɛhɛ

²³ Ɛkɛ amʋ kɛn a, Sadukifɔ akʋ bɛba Yesu wa. Bʋgyi ɔpasua kʋá bʋtɛblɩ bɛɛ, kʋsʋ tsu afulitɔ má ɩnʋ. Bɛfɩtɛ mʋ bɛɛ,

²⁴ “Osunapʋ, Mose lɔwanlɩn tswɩ anɩ ɔbɛɛ, ‘Nɩ ɔkʋ mʋa mʋ ka bʋmɔkwɩɩ asa olowu si mʋ ka amʋ a, mʋ pio otsu mʋ ka amʋ tsia, fɛkɩ ɔkwɩɩ ha owupʋ amʋ.>

²⁵ Oyin ɔkʋlɛ abi abasienɔ akʋ betsia. Amʋ́tɔ ogyankpapʋ letsia ɔka, tamɛ ɔmɔkwɩɩ asa olowu. Mʋ pio lotsu ɔsʋrapʋka amʋ tsia,

²⁶ tamɛ mʋ ɛ ɔmɔkwɩɩ. Ɔsasɩ lotsu ɔtsɩ amʋ tsia. Mʋ ɛ ɔmɔkwɩɩ. Alɩɩ yɔtʋ osienɔsɩ amʋ.

²⁷ Ɔma-ɔma a, ɔsʋrapʋ mʋ ɛ lobowu.

²⁸ Afuli ɔkʋsʋkɛ a, amʋ́tɔ ɔmɔmʋ ɔbɔ́bwɛ mʋ klu? Tsufɛ amʋ́ abasienɔ amʋ fɛ́ɛ́ betsia mʋ.”

²⁹ Mʋʋ Yesu lɛlɛ mʋ́ ɔnɔ ɔbɛɛ, “Megyi mlɩ ologyi. Mlɩmeyin Bulu asʋn wanlɩnhɛ amʋ ntɛ Bulu tumi.

³⁰ Nɩ afuli bɔkʋsʋ a, bɔ́bwɛ fɛ Bulu-abɔpʋ. Bʋméetsia aka mʋ́a aklu.

³¹ Mlɩmɔkʋkla asʋn ánɩ́ Bulu onuto lɛbla mlɩ tsu afulikʋsʋ ɩwɩ?

³² Bulu asʋn wanlɩnhɛ lɛblɩ ɔbɛɛ, ‘Mɩgyi mlɩ anain Abraham mʋa Isakɩ pʋ́ Yakob Bulu amʋ nɩ.> Ɩnɩ sʋ megyi awupʋ Bulu ogyi, akɩankpapʋ Bulu ogyi.”

³³ Brɛá ɔdɔm amʋ bonu asʋn anfɩ a, mʋ atosunahɛ anfɩ lɛha ɔnɔ lobwie amʋ́.

Bulu Mbla Amʋtɔ Mʋ́á Ɩdʋn

³⁴ Brɛá Farisifɔ bowun ánɩ́ Yesu lalɛ Sadukifɔ amʋ asʋn ɔnɔ, asʋn lawu wa amʋ́ ɔnɔ a, bɛkpa aba ya Yesu wa.

³⁵ Amʋ́tɔ ɔkʋlɛá ogyi mbla osunapʋ lɛfɩtɛ Yesu asʋn, ɔpʋsɔ mʋ kɩ.

³⁶ Ɔlɛfɩtɛ Yesu ɔbɛɛ, “Osunapʋ, Bulu mbla amʋtɔ mɔmʋ dʋn?”

³⁷ Yesu lɛbla mʋ ɔbɛɛ, “ ‘Pʋ fʋ klʋn, fʋ ɔkla pʋ́ fʋ agywɩɩn fɛ́ɛ́ dwɛ fʋ Wie Bulu.>

³⁸ Ɩnɩgyi mbla amʋtɔ gyankpapʋ ánɩ́ ɩdʋn mʋ́ fɛ́ɛ́ nɩ.

³⁹ Nyɔsɩ ɛ igyi fɛ mʋ́. ‘Dwɛ fʋ ba fɛ fʋ ɩwɩ.>

⁴⁰ Mose Mbla pʋ́ Bulu ɔnɔsʋ atɔɩpʋ amʋ atosunahɛ fɛ́ɛ́ ɩlɩɩ mbla anyɔ anfɩsʋ.”

Ma Gyi Kristo Amʋ?

⁴¹ Ɩnɩá Farisifɔ amʋ bebefia si bʋlɩɩ sʋ a, Yesu lɛfɩtɛ amʋ́ ɔbɛɛ,

⁴² “Nkalɩ mlɩdɛ Kristo, (ɔha amʋʋ Bulu lada mʋ ofuli amʋ) ɩwɩ gywɩɩn? Ma mʋ na nɩ?” Bɛbla mʋ bɛɛ, “Owie Dawid mʋ na nɩ.”

⁴³ Ɔlɛlafɩtɛ amʋ́ ɔbɛɛ, “Mʋ́ ntogyi sʋ Ɔŋɛ Wankɩhɛ lɛha Owie Dawid lɛtɩ mʋ ɔbɛɛ ‘Mɩ Wie?> Tsufɛ Owie Dawid lɛblɩ ɔbɛɛ,

⁴⁴ ‘Anɩ Wie Bulu lɛbla mɩ Wie ɔbɛɛ, Tsia mɩ gyɔpɩsʋ nfɩ, yɔfʋn brɛá nɛ́ha fɛ́tsatsa fʋ alupʋsʋ?>

⁴⁵ Nɩ Owie Dawid onuto lɛtɩ ɔha anfɩ Bulu lada ofuli anfɩ ɔbɛɛ, mʋ wie a, nkalɩ sʋ ɔtra ogyi mʋ na?”

⁴⁶ Amʋ́tɔ ɔkʋkʋ mɛtalɩ lɛ mʋ́ ɔnɔ. Tsu ɛkɛ amʋ a, ɔhaa mɛtra wa klʋn fɩtɛ mʋ asʋansʋ.