Mateo 21 - Bulu Ntam Pɔpwɛ mʋ́a Israel Ɩlʋ

Bɔhɔ Yesu Fɛ Owie Yerusalem

^1-2 Brɛá Yesu mʋa mʋ akasɩpʋ bɛbɛn Yerusalem wulu, bɛta Betfage wuluá ɩbʋ Olif ɩbʋsʋ amʋ asɩ wie ta a, ɔlɔwa mʋ akasɩpʋ abanyɔ gyankpa. Ɔlɛbla amʋ́ ɔbɛɛ, “Mlɩyɔ wulu anfɩ ɩda mlɩ ansɩtɔ anfɩsʋ. Nɩ mlowie wulu amʋ ɔnɔ a, mlówun afrimu tsɩhɛ ɔkʋá ɔda ɔfɛtɔ, mʋ bi lɩɩ mʋ wa. Mlɩsankɩ mʋ, amlɩkpa amʋ́ ba mɩ.

³ Nɩ ɔkʋ ɔfɩtɛ mlɩ asʋankʋ a, mlɩbla mʋ mlɩaa, ‘Anɩ Wie dɛ amʋ́ hian.> Ɩnʋnʋ ɔbɛ́ha mlɔ́pʋ amʋ́ ba mɩ.”

⁴ Ɩnɩ lɛha Bulu asʋn amʋʋ ɔlɛblɩ tsʋn mʋ ɔnɔsʋ ɔtɔɩpʋsʋ amʋ lɛba mʋ́tɔ. Ɔbɛɛ,

⁵ “Mlɩbla Sionfɔ mlɩaa, Mlɩkɩ, mlɩ Wie ɔba mlɩ wa. Ololwii, ɔdɩn afrimusʋ. Ɔdɩn afrimu ibi yinhɛsʋ ɔba.”

⁶ Yesu akasɩpʋ abanyɔ amʋ bɔyɛbwɛ alɩ amʋʋ Yesu lɛbla amʋ́ amʋ.

⁷ Bɛkpa afrimu mʋa mʋ bi amʋ ba, bɛyaɩ amʋ́ atati dɩnka amʋ́sʋ, ɔlɔdʋ bian mʋsʋ.

⁸ Ɔdɔm kpɔnkpɔɔnkpɔntɩ bɛyaɩ amʋ́ atati tswɩ ɔkpatɔ, akʋ ɛ bebiabia afɩta bunbun ɔkpa amʋtɔ.

⁹ Ɔdɔm amʋʋ bʋgya Yesu nkpa mʋ́a ɔma amʋ bɔsʋra okitikiti bɛɛ, “Hosiana ha Dawid mʋ na amʋ! Bulu oyula owie anfɩ ɔba mʋ ɩdatɔ anfɩ! Hosiana bʋ ɔsʋsʋʋsʋ!”

¹⁰ Brɛá Yesu lowie Yerusalem a, wulu amʋtɔ fɛ́ɛ́ lɛda kpokiti, bʋdɛfɩtɛ bɛɛ, “Ma gyi ɔha anfɩ?”

¹¹ Ɔdɔm amʋʋ bʋbuo mʋ amʋ bɛlɛ mʋ́ ɔnɔ bɛɛ, “Ɔ́nɩ gyi Yesu, Bulu ɔnɔsʋ ɔtɔɩpʋ amʋʋ otsu Nasaret wuluá ɩbʋ Galilea ɔmátɔ amʋ nɩ.”

Yesu Bulu Ɔtswɛkpa Yɔ

¹² Mʋʋ Yesu lɔyɔ Bulu ɔtswɛkpa wunsɩnɛsʋ ɩnʋ, yegya atɔ afɛpʋ pʋ́ atɔ ahɔpʋ fɛ́ɛ́ dalɩ. Olowuwuta kɔba atsɛpʋ mpʋnʋ da, sunsunki alɔpɔ afɛpʋ ɛ mbia da.

¹³ Ɔlɛbla amʋ́ ɔbɛɛ, “Bɔwanlɩn wa Bulu asʋn amʋtɔ bɛɛ, ‘Bɛtɩ mɩ ɔtswɛkpa bɛɛ, mpaɩ ɔbɔkpa.> Tamɛ mlɩlapʋ ɩnʋ mli awikplu oŋainkpa.”

¹⁴ Ansibi abwiepʋ pʋ́ abubupʋ akʋ bɛba mʋ wa Bulu ɔtswɛkpa wunsɩnɛsʋ ɩnʋ, ɔlɛtsa amʋ́ ɩlɔ.

¹⁵ Brɛá Bulu igyi ahapʋ dɛhɛn pʋ́ Mose mbla asunapʋ amʋ bowun ofula ánɩ́ Yesu dɛbwɛ, pʋ́ alɩá nyebi bʋdɛkplʋn Bulu ɔtswɛkpa wunsɩnɛsʋ ɩnʋ bɛɛ, “Hosiana ha Dawid mʋ na amʋ!” a, ɔblɔ lɛkɩta amʋ́.

¹⁶ Mʋ́ sʋ bɛfɩtɛ Yesu bɛɛ, “Fʋmedenu asʋn ánɩ́ nyebi anfɩ bʋdɛblɩ?” Yesu lɛlɛ mʋ́ ɔnɔ ɔbɛɛ, “Ndenu. Mlɩmɔkʋkla asʋn ánɩ́ Bulu asʋn wanlɩnhɛ amʋ lɛblɩ? Ɔbɛɛ, ‘Fasuna nyebi pʋ́ amʋ́á bʋmɔkʋtɩn nyɔpʋ alɩá bʋkanfʋ fʋ.> ”

¹⁷ Yesu lɛdalɩ wulu amʋtɔ si amʋ́ yɔ Betania. Ɩnʋ ɔlɛdɩ ɛkɛ amʋ nɩ.

Pɔntɔ Oyi Lwɩɩ

¹⁸ Ɔyɩ kɛhɛ nyankɩ, brɛá Yesu leyinki ɔba Yerusalem a, akʋn dɛ mʋ.

¹⁹ Mʋ́ sʋ brɛá olowun pɔntɔ kʋá ɩlɩɩ manta ɔkpa a, ɔlɛbaɩ yɔ mʋ́ asɩ. Ɔlɔyɔ a, omowun abi kʋkʋ mʋ́tɔ. Afɩta sɔɔn bʋ mʋ́sʋ. Ɩnʋ ɔlɛbla pɔntɔ amʋ ɔbɛɛ, “Tsu ndɛ, fʋmɛ́ɛtra swie abi ɛkɛkɛɛkɛ!” Ɩnʋnʋ oyi amʋ lowu.

²⁰ Mʋ akasɩpʋ amʋ bowun alɩá oyi amʋ labwɛ a, ɔnɔ lobwie amʋ́. Mʋ́ sʋ bɛfɩtɛ bɛɛ “Ntogyi sʋ oyi anfɩ lawu ɔtsawʋlɛ pɛ alɩ?”

²¹ Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Nɩ mlɔhɔ Bulu gyi, mlɩmegyi nwɛn a, mlɛ́talɩ bwɛ ɩtɔ anfɩ nabwɛ oyi anfɩ pʋ́ mʋ́á ɩdʋn mʋ́. Mlɛ́talɩ bla ɩbʋ anfɩ mlɩaa, ‘Puli yowie ɔpʋtɔ.> Ibópuli yɔ.

²² Nɩ mlɔhɔ Bulu gyi, mlɔkʋlɩ mʋ togyitɔ a, mlɩ ɩbɩ bɛ́da mʋ́.”

Yesu Tumi Ɩwɩ Asʋn Fɩtɛhɛ

²³ Yesu leyinki bowie Bulu ɔtswɛkpa wunsɩnɛsʋ ɩnʋ. Brɛá ɔdɛ atɔ suna a, Bulu igyi ahapʋ dɛhɛn pʋ́ Yudafɔ ahandɛ amʋ bɛba mʋ wa. Bɛfɩtɛ mʋ bɛɛ, “Ma lɛha fʋ ɔkpa, fʋdɛ ntobi anfɩ bwɛ? Ma lɛha fʋ tumi?”

²⁴ Yesu lɛlɛ mʋ́ ɔnɔ ɔbɛɛ, “Mɩ ɛ nfɩtɛ mlɩ asʋn kuakʋlɛ. Nɩ mlɛlɛ mʋ́ ɔnɔ a, nɛ́bla mlɩ tumi oduá ndɛpʋbwɛ ntobi anfɩ.

²⁵ Bulu wa Asu Ɔbɔpʋ Yohane lenya tumi pʋbɔ aha asu, ntɛ nyankpʋsa?” Amʋ́ wʋlɛwʋlɛ bɔyɔ asʋn anfɩtɔ bɛɛ, “Nɩ ablɩ anɩaa itsu Bulu wa a, ɔbɛ́fɩtɛ anɩ ɔbɛɛ, mʋ́ ntogyi sʋ anɩmɔhɔ mʋ gyi?

²⁶ Ntɛ ablɩ anɩaa, anyankpʋsa wa itsu?” Tamɛ bʋdɛ tɔá ɔdɔm amʋ bɔ́bwɛ amʋ́ ifu nya. Tsufɛ amʋ́ fɛ́ɛ́ bohogyi ánɩ́ Bulu ɔnɔsʋ ɔtɔɩpʋ Yohane gyi.

²⁷ Mʋ́ sʋ bɛlɛ mʋ́ ɔnɔ bɛɛ, “Ohwee! Anɩmeyin ɔtɩnɛá olenya mʋ tumi tsu.” Mʋʋ Yesu ɛ lɛbla amʋ́ ɔbɛɛ, “Mʋmʋ mɩ ɛ mmɛ́ɛbla mlɩ tumi oduá ndɛpʋbwɛ ntobi anfɩ.”

Oyin Ɔkʋ Abi Anyɔ Ɩwɩ Yebi

²⁸ “Mlɩyɔ asʋn anfɩtɔ amlɩkɩ. Oyin ɔkʋ mʋa mʋ abi anyɔ betsia. Ɛkɛ ɔkʋ ɔlɔyɔ yɛbla ɔdɛhɛn ɔbɛɛ, ‘Mɩ bi, ndɛ yɔyɔ agyʋma mɩ ndɔtɔ ha mɩ.>

²⁹ Ɔlɛbla mʋ sɩ ɔbɛɛ, ‘Mmɔ́ɔyɔ.> Mʋ́ ɔma a, ɔlɛlatsɛ mʋ agywɩɩn, yɔ ndɔ amʋtɔ.

³⁰ Amʋ́ sɩ lɛnatɩ yɔ ɔkʋsʋ amʋ ɛ wa yɛbla mʋ alɩ kɛn. Ɔkʋsʋ amʋ lotsula ɔbɛɛ, ‘Mɩ sɩ, nɔ́yɔ.> Tamɛ ɔmɔyɔ.”

³¹ Ɩnʋ Yesu lɛfɩtɛ aha amʋ ɔbɛɛ, “Abi anyɔ anfɩtɔ ɔmɔmʋ lɔbwɛ dɩnka mʋ sɩ asʋnsʋ?” Yudafɔ igyi ahapʋ dɛhɛn pʋ́ Yudafɔ ahandɛ amʋ bɛbla mʋ bɛɛ, “Ɔdɛhɛn amʋ.” Mʋʋ Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Lampoo ahɔpʋ pʋ́ obu-ɔnɔ atsiapʋ bówie Bulu iwiegyi amʋtɔ si mlɩ.

³² Tsufɛ Asu Ɔbɔpʋ Yohane lobosuna mlɩ tsiatɔ oduá ɩda ɔkpa Bulu ansɩtɔ, tamɛ mlɩmɔhɔ mʋ gyi. Lampoo ahɔpʋ pʋ́ obu-ɔnɔ atsiapʋ bɔhɔ mʋ gyi. Ɔma mlɩlowun ánɩ́ amʋ́ kʋraa batsɛ a, mlɩmɛtsɛ mlɩ agywɩɩn hɔ mʋ gyi.

Apafɔ Lalahɛ Akʋ

³³ “Mlɩnu yebi ɩkʋ ɛ. Ɔdɔtɔpʋ ɔkʋ lɔdɔ waɩn ndɔ. Olegyi ɩban bomli mʋ́. Olokwi waɩn amʋ onyimɛkpa. Ɔlɔpwɛ obu fʋahɛ kʋ ha ndɔ amʋ agyopʋ. Mʋʋ ɔlɔpʋ ndɔ amʋ wa apafɔ ɩbɩtɔ, olotu ɔkpa yɔ ɔmá ɩkʋtɔ.

³⁴ Brɛá waɩn-abi amʋ kpɔtɩbɩ lɔfʋn a, ɔlɔwa mʋ asumpʋ apafɔ amʋ wa ɔbɛɛ, bʋyɛhɔ mʋ ogyikpa ba mʋ.

³⁵ Tamɛ apafɔ amʋ bɛkɩta amʋ́, da ɔkʋlɛ, mɔ ɔkʋlɛ, da ɔkʋlɛ ɛ abwi.

³⁶ Ndɔ mʋ wie amʋ lɛtra wa mʋ asumpʋ bamba ánɩ́ bʋtsɔ dʋn agyankpapʋ amʋ. Apafɔ amʋ bɔbwɛ amʋ́ ɛ alɩ kɛn.

³⁷ Mʋ́ trahɛ kʋraa a, ɔlɛblɩ ɔbɛɛ, ‘Oo, bóbu mɩ bi kwɩɩhɛ mʋ́.> Mʋ́ sʋ ɔlɔwa mʋ ɛ.

³⁸ Tamɛ brɛá apafɔ amʋ bowun mʋ bi amʋ sɩsɩ a, bɛbla aba bɛɛ, ‘Ɔ́nɩ obégyi mʋ sɩ atɔ nɩ. Mlɩha amɔ mʋ, mɛnɩ ndɔ amʋ ibémli anɩ klɛ.>

³⁹ Mʋ́ sʋ bɛkɩta mʋ, bɩtɩa mʋ dalɩ ndɔ amʋtɔ yɔmɔ mʋ.”

⁴⁰ “Nɩ ndɔ mʋ wie ɔba a, ntɔ mlɩlahogyi mlɩaa, ɔbɔ́bwɛ apafɔ anfɩ?”

⁴¹ Yudafɔ igyi ahapʋ dɛhɛn pʋ́ Yudafɔ ahandɛ amʋ bɛlɛ mʋ́ ɔnɔ bɛɛ, “Ɔbɛ́ha aha lalahɛ anfɩ bówu lowu-sɩnsɩn, ɔbɛ́lapʋ ndɔ amʋ wa apafɔ bamba ɩbɩtɔ. Amʋ́á bétsia pʋ mʋ atɔ-abi ba mʋ mʋ́ kpɔtɩbɩ.”

⁴² Mʋʋ Yesu lɛfɩtɛ amʋ́ ɔbɛɛ, “Ntɛ mlɩmɔkʋkla Bulu asʋn wanlɩnhɛ amʋ kɩ? Bɔwanlɩn bɛɛ, ‘Ibwi amʋʋ obu ayipʋ bekina amʋ lebemli okonkisʋbwi nɩ. Bulu lɔbwɛ mʋ́ alɩ, ɩbʋ wanwan.>

⁴³ “Mʋ́ sʋ ndɛ mlɩ bla mbɛɛ, Bulu ɔbɔ́hɔ mʋ iwiegyi amʋ lɛ mlɩ ɩbɩtɔ pʋha ɔmá ánɩ́ bɔ́bwɛ tɔá otekle.

⁴⁴ “Ɩnɩ sʋ ɔha ánɩ́ ɔlɛdɩda ibwi amʋsʋ obébiabia blublublublu. Nɩ ibwi amʋ isunki da ɔkʋsʋ ɛ a, ɩbɔ́kwɛ mʋ fɩkɔfɩkɔfɩkɔ fɛ nfuo.”

⁴⁵ Brɛá Bulu igyi ahapʋ dɛhɛn pʋ́ Farisifɔ amʋ bonu Yesu ayebi anfɩ a, ɩlɔwankɩ amʋ́ ánɩ́ amʋ́ ɔdɛ.

⁴⁶ Tɛkɩ bekleá bɛ́kɩta mʋ, tamɛ benya ifu, tsufɛ ɔdɔm amʋ bʋtobu Yesu ánɩ́ Bulu ɔnɔsʋ ɔtɔɩpʋ ogyi.