Mateo 20 - Bulu Ntam Pɔpwɛ mʋ́a Israel Ɩlʋ

Ndɔtɔ Agyʋma Ayɔpʋ Ɩwɩ Yebi

¹ Yesu lɛtra bla amʋ́ ɔbɛɛ, “Mʋ́ sʋ Bulu iwiegyi amʋ igyi fɛ asʋn anfɩ. Ɔdɔtɔpʋ ɔkʋ letsia. Ɛkɛ ɔkʋ ɔlɔkʋsʋ nyankɩ-nyankɩ ɔyɔ ɩpa agyipʋ odunkakpa, abʋyɛyɔ agyʋma mʋ ndɔtɔ.

² Mʋa amʋ́nyɔ begyi bia ánɩ́ ɔbɛ́ka amʋ́ alɩá bʋtɔhɔ ɛkɛwʋlɛ, ɔlɔpʋ amʋ́ sɩsɩ agyʋma amʋ ɔyɔkpa.

³ Dokwebatɔ a, ɔlɛdalɩ yɔ dɩnsʋ, oloyowun akʋ ɛ bʋlɩɩ, bʋmɛdɛ tɔtɔ bwɛ.

⁴ Olotsu amʋ́ ɛ ɔbɛɛ, bʋyɔyɔ agyʋma mʋ ndɔtɔ ha mʋ. Ɩbwɛ ɔbɛ́ka amʋ́ tɔá ɩbʋ alɛ. Mʋ́ sʋ bɔyɔ.

⁵ Doduanyɔ pʋ́ dɔsatɔ ɛ a, ɔlɛtra pʋ akʋ sɩsɩ ndɔ amʋtɔ.

⁶ Ntʋpwɛ donutɔ brɛá ɔlɛdalɩ a, ɔlɛtra wun akʋá bʋlɩɩ kpaalɩ. Mʋʋ ɔlɛfɩtɛ amʋ́ ɔbɛɛ, ‘Ntogyi sʋ ndɛ fɛ́ɛ́ mlɩlɩɩ nfɩ, mlɩmɛdɛ tɔtɔ bwɛ?>

⁷ Bɛbla mʋ bɛɛ, ‘Ɔhaa mɔkʋbɔ anɩ ɩpa.> Mʋʋ ɔlɛbla amʋ́ ɔbɛɛ, ‘Mʋmʋ mlɩ ɛ mlɩbɔtsʋn yɔyɔ agyʋma mɩ ndɔtɔ.>

⁸ “Brɛá owi lɔpɔn a, ɔdɔtɔpʋ amʋ lɛtɩ mʋ agyʋmasʋ ɔkɩpʋ bla mʋ ɔbɛɛ, ɔtɩ ɩpa agyipʋ amʋ fɛ́ɛ́, ɔka amʋ́ akɔ. Ɔka amʋ́ tsu amapʋ amʋsʋ alɩɩ bɔtʋ agyankpapʋ amʋ.

⁹ Brɛá ɩpa agyipʋ amʋ bɛba a, agyʋmasʋ ɔkɩpʋ amʋ lɛka aha amʋʋ bɔyɔ donutɔ amʋ alɩá bʋtɔhɔ ɛkɛwʋlɛ.

¹⁰ Brɛá ɩlɔtʋ agyankpapʋ amʋ a, bʋkɩ bɛɛ bénya dʋn alɩ, tamɛ alɩ kɛn ɔlɛka amʋ́ ɛ nɩ.

¹¹ Mʋ́ sʋ ɔlɛka amʋ́ akɔ ta a, agyankpapʋ amʋ bɔwa tɔtɔɩ ɔdɔtɔpʋ amʋsʋ bɩ.

¹² Bɛblɩ bɛɛ, ‘Amapʋ anfɩ mʋ́ a, dɔnhwɩrɩ kʋlɛ pɛ bɔyɔ agyʋma. Anɩ mʋ́ anɩlalɩɩ owi-kpankpli anfɩsʋ yɔ agyʋma, tamɛ faka anɩa amʋ́nyɔ fɛ́ɛ́ akɔ kʋlɛ.>

¹³ “Ɔdɔtɔpʋ amʋ lɛbla amʋ́tɔ ɔkʋlɛ ɔbɛɛ, ‘Agya, yɛ mmɔkʋtafa fʋ o! Megyi ɩtɔ amʋʋ mɩa fʋnyɔ anɩlɛblɩ amʋ napʋha fʋ a?

¹⁴ Pʋ fʋ atɔ natɩ. Mɩdekle mbɛɛ, nɛ́ha amapʋ amʋ alɩá naka fʋ.

¹⁵ Mma ɔkpa pʋ mɩ kɔba bwɛ tɔá ndekle? Ntɛ mɩ awɩtɔlɛwa dɛ fʋ ɩwɩtɔ wie?>

¹⁶ “Alɩ amapʋ bɔ́bwɛ agyankpapʋ, agyankpapʋ ɛ bɔ́bwɛ amapʋ nɩ.”

Yesu Lowu Ɩwɩ Asʋn Blɩ Otse Sasɩ

¹⁷ Brɛá Yesu ɔyɔ Yerusalem a, ɔlɛkpa akasɩpʋ duanyɔ amʋ ya ɩtsɛtɔ bla amʋ́ ɔbɛɛ,

¹⁸ “Mlɩnu! Ayɔ Yerusalem. Ɩnʋ a, bɛlɛ mɩ, Nyankpʋsa-Mʋ-Bi anfɩ ha Bulu igyi ahapʋ dɛhɛn pʋ́ Mose mbla asunapʋ. Bɛha mɩ lowu ɩpɔn.

¹⁹ Bɔ́pʋ mɩ wa aha ánɩ́ bʋmegyi Yudafɔ ɩbɩtɔ bɔ́bwɛ mɩ ahinla, nwɛn mɩ mplɩ, da mɩ manta oyikpalihɛsʋ. Tamɛ Bulu ɔbɛ́lakʋsʋa mɩ ɛkɛ sasɩ tsu afulitɔ.”

Abi Oyin Ɔkʋ Atɔ Kʋlɩhɛ

²⁰ Mʋʋ Sebedeo mʋ ka lɛkpa mʋ abi anyɔ bɛba. Ɔlɛda akpawunu Yesu ayabitɔ, kʋlɩ mʋ ɔbɛɛ, ɔbwɛ tɔkʋ ha mʋ.

²¹ Yesu lɛfɩtɛ mʋ ɔbɛɛ, “Ntɔ fʋdekle?” Ɔtsɩ amʋ lɛbla mʋ ɔbɛɛ, “Ha mɩ abi anyɔ anfɩtɔ ɔkʋlɛ otsia fʋ gyɔpɩsʋ, ɔkʋlɛ ɛ otsia fʋ bɩnasʋ brɛá fʋdɛ iwie gyi.”

²² Yesu lɛbla amʋ́ ɔbɛɛ, “Mlɩmeyin tɔá mlɩdɛkʋlɩ.” Ɔlɛfɩtɛ Yohane mʋa Yakobo ɔbɛɛ, “Mlɛ́talɩ wun ɩwɩɔsɩn amʋʋ nɛba bowun amʋ?” Bɛbla mʋ bɛɛ, “Ee, abɛ́talɩ.”

²³ Mʋʋ ɔlɛbla amʋ́ ɔbɛɛ, “Mlówun ɩwɩɔsɩn amʋ mʋ́, tamɛ mma tumiá nɛ́lɛ aha ánɩ́ bétsia mɩ gyɔpɩsʋ ntɛ mɩ bɩnasʋ. Otsiakpa ɩnʋ ɩda gyo aha amʋʋ mɩ Sɩ Bulu lala ɩnʋ yaɩ ha amʋ.”

²⁴ Brɛá akasɩpʋ du atrahɛ amʋ bonu asʋn anfɩ a, Yakobo mʋa Yohane ɩwɩ lɔwa amʋ́ ɔblɔ.

²⁵ Mʋʋ Yesu lɛtɩ amʋ́, bla amʋ́ ɔbɛɛ, “Mlɩyin ánɩ́ ɔmátɔfɔsʋ agyipʋ bʋtɛhɩɛ amʋ́ aha, amʋ́ ahandɛ ɛ bʋtenya tumi amʋ́sʋ.

²⁶ Tamɛ mlɩtɔ mʋ́ a, ɩmába alɩ. Ɔhagyiɔha ánɩ́ odekleá ɔbɔ́bwɛ mlɩtɔ ɔhandɛ ɔbwɛ mʋ ɩwɩ osumpʋ ha mʋ aba atrahɛ.

²⁷ Ɔha ánɩ́ odekleá ɔbɔ́bwɛ mlɩ nkpa ogyapʋ ɔbwɛ mlɩ ɔkpábi.

²⁸ Alɩ kɛn mɩ, Nyankpʋsa-Mʋ-Bi anfɩ ɛ mmɛba mbɛɛ, bʋsum mɩ nɩ. Aha osumkpa nɛba, ampʋ mɩ nkpa hɔ aha tsɔtsɔɔtsɔ nkpa.”

Ansibi Abwiepʋ Abanyɔ Ɩlɔ Tsa

²⁹ Brɛá Yesu mʋa mʋ akasɩpʋ bʋdɛdalɩ Yeriko wulutɔ bɔyɔ a, ɔdɔm kpɔnkpɔɔnkpɔntɩ bobuo amʋ́.

³⁰ Ansibi abwiepʋ abanyɔ akʋ bʋtsie ɔkpa amʋtɔ, bonuá Yesu dɛtsʋn. Ɩnʋ bɔkplʋn blɩ bɛɛ, “Anɩ Wie, Dawid mʋ na, wun anɩ nwɛ.”

³¹ Ɔdɔm amʋ bɔkplʋn wa amʋ́ bɛɛ, bʋkpa ɔnɔ bun. Tamɛ bɛlakplʋn dʋn alɩ bɛɛ, “Anɩ Wie, Dawid mʋ na, wun anɩ nwɛ!”

³² Mʋʋ Yesu lesi lɩɩ, tɩ amʋ́, ɔlɛfɩtɛ amʋ́ ɔbɛɛ, “Ntɔ mlɩdekle mlɩaa, mbwɛ ha mlɩ?”

³³ Bɛbla mʋ bɛɛ, “Anɩ Wie, ha anɩ awun atɔ.”

³⁴ Ɩnʋ amʋ́ asʋn lɔwa Yesu nwɛ, ɔlɔpʋ mʋ ɩbɩ dada amʋ́ ansibi. Ɩnʋnʋ bowun atɔ, bɛkpla buo mʋ.