Mateo 19 - Bulu Ntam Pɔpwɛ mʋ́a Israel Ɩlʋ

Ɔkakina Ɩwɩ Atosunahɛ

¹ Brɛá Yesu lɔtɔɩ ta a, ɔlɛnatɩ Galilea ɔmátɔ yɔ Yudea ɔmátɔ Yordan ntsu amʋ ɔbɩn.

² Ɔdɔm kpɔnkpɔɔnkpɔntɩ bobuo mʋ, ɔlɛtsa amʋ́ ɩlɔ ɩnʋ.

³ Farisifɔ akʋ bɛba mʋ wa bɔsɔ mʋ kɩ, fɩtɛ mʋ bɛɛ, “Anɩ Mbla lɛha ɔkpa ánɩ́ oyin ɔbɛ́talɩ kina mʋ ka ɔkpagyiɔkpasʋ?”

⁴ Yesu lɛbla amʋ́ ɔbɛɛ, “Mlɩmɔkʋkla Bulu asʋn amʋ kɩ ánɩ́ brɛ amʋʋ Bulu lefi ɔyɩ asɩ a, ɔtsɩ mʋ́a oyin ɔlɔbwɛ?

⁵ Bulu lɛblɩ ɔbɛɛ, ‘Ɩnɩ sʋ oyin obótu si mʋ sɩ mʋa mʋ yin yɛmanta mʋ kasʋ, amʋ́ abanyɔ bɔ́bwɛ ɔyʋlʋ kʋlɛ nɩ.>

⁶ Mʋ́ sʋ ndɛ mlɩ bla mbɛɛ, bʋtra bʋmegyi abanyɔ, tamɛ babwɛ ɔbakʋlɛ. Aha ánɩ́ Bulu labwɛ amʋ́ ɩkʋlɛ a, ɔhaa mámaɩn amʋ́ abasʋ.”

⁷ Farisifɔ amʋ bɛfɩtɛ mʋ bɛɛ, “Ntogyi sʋ Mose lɔwa mbla ɔbɛɛ, oyin ɔbɛ́talɩ wanlɩn ɔkakina ɔwʋlʋ pʋkina mʋ ka?”

⁸ Yesu lɛbla amʋ́ ɔbɛɛ, “Mlɩ klʋntɔ odwin sʋ Mose lɛha mlɩ ɔkpa ɔbɛɛ, mlɩkina mlɩ aka. Tɛkɩ megyi alɩ Bulu lɔbwɛ mʋ́ brɛá olefi ɔyɩ amʋ asɩ nɩ.

⁹ Tamɛ ndɛ mlɩ bla mbɛɛ, nɩ oyin okina mʋ ka layetsia ɔtsɩ bamba a, alatɔ mbʋa. Ɔkpa oduá sʋá oyin ɔbɛ́talɩ kina mʋ ka pɛ gyi aladalɩ mʋ ɔma.”

¹⁰ Mʋʋ mʋ akasɩpʋ amʋ bɛblɩ bɛɛ, “Nɩ alɩ oklu mʋ́a ɔka abatsiatɔ asʋn igyi nɩ mʋ́ a, mʋmʋ ɩma alɛá oyin mʋa ɔtsɩ bétsia aba po.”

¹¹ Yesu lɛbla amʋ́ ɔbɛɛ, “Megyi aha fɛ́ɛ́ ɔbɛ́talɩ hɔ atosunahɛ anfɩ. Nkɛtɩ aha ánɩ́ Bulu lɔpʋha amʋ́ pɛ.

¹² Tsufɛ ɩna ɔkpa tsɔtsɔɔtsɔsʋ ayin akʋ bʋtamatsia aka. Ayin amʋ akʋ a, alɩ bɔkwɩɩ amʋ́ nɩ. Akʋ ɛ anyankpʋsa laflo amʋ́. Akʋ ɛ basin kpankʋ Bulu iwiegyi amʋ sʋ. Ɔha ánɩ́ ɔbɛ́talɩ a, ɔhɔ mɩ atosunahɛ anfɩ.”

Nyebi Yula

¹³ Aha akʋ bɛkpa nyebi ba Yesu bɛɛ, ɔpʋ ɩbɩ dɩnka amʋ́sʋ, ɔkʋlɩ Bulu oyula ha amʋ́. Tamɛ akasɩpʋ amʋ bɔwa ɩyɩn wa amʋ́.

¹⁴ Mʋʋ Yesu lɛbla akasɩpʋ amʋ ɔbɛɛ, “Mlɩha nyebi amʋ ɔkpa abʋba mɩ wa. Mlɩmátin amʋ́ ɔkpa, tsufɛ aha anfɩ odu bʋ Bulu iwiegyi amʋ nɩ.”

¹⁵ Mʋʋ ɔlɔpʋ ɩbɩ dɩndɩnka amʋ́sʋ, ɔlɛnatɩ ɩnʋ a.

Atonyahɛ Ɩwɩ Atosunahɛ

¹⁶ Ɛkɛ ɔkʋ oyin ɔkʋ lɛba Yesu wa bɛfɩtɛ mʋ ɔbɛɛ, “Osunapʋ, yile mɔmʋ nɔ́bwɛ asa nénya nkpa ánɩ́ ɩtamata?”

¹⁷ Yesu lɛfɩtɛ mʋ ɔbɛɛ, “Ntogyi sʋ fʋdɛ mɩ yile ɩwɩ asʋn fɩtɛ? Ɔbakʋlɛ pɛ gyi ɔha yile. Mʋgyi Bulu. Tamɛ nɩ fʋdekleá fʋnya nkpa ánɩ́ ɩtamata a, mʋmʋ gyi Bulu mbla asʋn amʋsʋ.”

¹⁸ Oyin amʋ lɛlafɩtɛ mʋ ɔbɛɛ, “Mʋ́tɔ mɔmʋ?” Yesu lɛbla mʋ ɔbɛɛ, “Mámɔ ɔha, mátɔ mbʋa, máwi atɔ, máka asʋn dɩnka fʋ basʋ.

¹⁹ Bu fʋ sɩ mʋ́a fʋ yin, afʋdwɛ fʋ ba fɛ fʋ ɩwɩ.”

²⁰ Ɔyasubi amʋ lɛbla Yesu ɔbɛɛ, “Ntegyi mʋ́ fɛ́ɛ́sʋ. Ntɔ ɛ ntra bwɛ?”

²¹ Yesu lɛbla mʋ ɔbɛɛ, “Nɩ fʋdekleá fɔ́fʋn mʋ́ a, yɛfɛ fʋ ɩwɩsʋ atɔ fɛ́ɛ́, afʋye kɔba amʋ ha ahianfɔ; mɛnɩ fénya siadɩɛ ɔsʋsʋ. Fɔbwɛ mʋ́ ta a, ba afʋbobuo mɩ.”

²² Brɛá ɔyasubi amʋ lonu asʋn anfɩ a, ɩlɛhɩɛ han mʋ, ɔlɛnatɩ diin, tsufɛ ɔhɩɛ ɔbʋ atɔ.

²³ Mʋʋ Yesu lɛbla mʋ akasɩpʋ ɔbɛɛ, “Ɔnɔkwalɩ ndɛ mlɩ bla mbɛɛ, ɩbɛ́hɩɛ wa ɔnlɩn asa ɩwɩ onyapʋ obówie Bulu iwiegyi amʋtɔ.

²⁴ Ntra ndɛ mlɩ bla mbɛɛ, ɩlɔpɔn ha kpɔsɔ ánɩ́ ɔbɔ́tsʋn ɔbɩn-atɔ ɔbɔtɔ, dʋn ánɩ́ ɩwɩ onyapʋ obówie Bulu iwiegyi amʋtɔ.”

²⁵ Akasɩpʋ amʋ bonu asʋn anfɩ a, ɔnɔ lobwie amʋ́. Ɩnɩ sʋ bɛfɩtɛ bɛɛ, “Mʋmʋ ma mɛɛ Bulu ɔbɔ́hɔ nkpa?”

²⁶ Ɩnʋ Yesu lɛlɩɩ kɩ amʋ́ alɩɩ. Mʋʋ ɔlɛbla amʋ́ ɔbɛɛ, “Anyankpʋsatɔ mʋ́ a, ɔhaa mɛ́ɛtalɩ bwɛ ɩnɩ, tamɛ Bulu mʋ́ tɛtalɩ bwɛ togyitɔ.”

²⁷ Mʋʋ Petro lɛfɩtɛ mʋ ɔbɛɛ, “Ɩnɩá anɩlasi togyitɔ tswɩ bobuo fʋ a, ntɔ abénya tsu fʋ buotɔ?”

²⁸ Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Brɛá Bulu ɔbwɛ ɔyɩ pɔpwɛ amʋ, mɩ, Nyankpʋsa-Mʋ-Bi anfɩ netsia mɩ numnyam owie obia amʋsʋ a, mlɩ aha anfɩ mlɩbuo mɩ anfɩ ɛ mlétsia awie mbia duanyɔsʋ, gyi Israel abusuan duanyɔ amʋ asʋn.

²⁹ Ɔhagyiɔha ánɩ́ alanatɩ si mʋ woyi, mʋ apio, mʋ sɩ mʋa mʋ yin, mʋ abi ntɛ ɔsʋlʋ mɩ sʋ a, Bulu ɔbɛ́la ha mʋ mʋ́ tse du tse lafa, tra laha mʋ nkpa ánɩ́ ɩtamata.

³⁰ Tamɛ agyankpapʋ akʋ bɛba bemli amapʋ, amapʋ amʋ akʋ ɛ bébemli agyankpapʋ.”