Mateo 18 - Bulu Ntam Pɔpwɛ mʋ́a Israel Ɩlʋ

Ma Ɔbɔ́bwɛ Ɔhandɛ?

¹ Bɛba Kapernaum wulutɔ, akasɩpʋ amʋ bɛba Yesu wa bɛfɩtɛ mʋ bɛɛ, “Ma gyi ɔhandɛ Bulu iwiegyi amʋtɔ?”

² Yesu lɛtɩ kebi ɔkʋ bɛlɩɩ amʋ́ ansɩtɔ,

³ ɔlɛblɩ ɔbɛɛ, “Ɔnɔkwalɩ ndɛ mlɩ bla. Nɩ mlɩmɛtsɛ, bwɛ ɩwɩ fɛ nyebi a, mlɩmóowie Bulu iwiegyi amʋtɔ.

⁴ Ɔhagyiɔha ánɩ́ ɔlɛba ɩwɩasɩ fɛ kebi anfɩ a, mʋgyi ɔhandɛ Bulu iwiegyi amʋtɔ nɩ.

⁵ Ɔhagyiɔha ánɩ́ ɔlɔhɔ kebiá ogyi alɩ mɩ ɩdatɔ lahɔ mɩ.

Ɔha Kpa Wa Lakpantɔ

⁶ “Nɩ ɔkʋ lɛha aha anfɩ bʋmɔkʋdan mɩsʋ hogyitɔ anfɩtɔ ɔkʋ lɔbwɛ lakpan a, nɩ bɛda nfuokwɛbʋ sian mʋ ɔmɛtɔ, tswɩ mʋ wa ɔpʋ okluklukpa, mɔ mʋ po a, ɩbʋ alɛ dʋn.

⁷ Ɔyɩtɔ atsiapʋ bʋgyɔwɩ nɩ. Tsufɛ ɩtɔá ɩtɛha ɔha tɔbwɛ lakpan bʋ ɩnʋ. Ɩbɛ́ba alɩ, tamɛ ɔha ánɩ́ ɩna mʋsʋ mʋ ba lɔbwɛ lakpan ɔgyɔwɩ nɩ.

⁸ “Mʋ́ sʋ nɩ fʋ ɩbɩ ntɛ fʋ yabi tɛha fʋtɛdɩda hogyitɔ a, ka mʋ́ lɛ, afʋtswɩ mʋ́ tsalɩfwɩ. Ɩbʋ alɛá fɔ́pʋ ɩbɩ kʋlɛ ntɛ yabi kʋlɛ nya nkpa ánɩ́ ɩtamata, dʋn ánɩ́ fɔ́pʋ ɩbɩ anyɔ ntɛ ayabi anyɔ wie ogya ánɩ́ ɩtamaduntɔ.

⁹ Nɩ fʋ nsibi tɛha fʋtɔbwɛ lakpan a, loti mʋ́ lɛ, afʋtswɩ mʋ́ tsalɩfwɩ. Ɩbʋ alɛá fɔ́pʋ nsibi kʋlɛ nya nkpa ánɩ́ ɩtamata, dʋn ánɩ́ fɔ́pʋ ansibi anyɔ wie ɩsʋbɩtɩ ogya ánɩ́ ɩtamaduntɔ.

Kufa Fwɩhɛ

^10-11 “Mlɩkɩ wanklaan ánɩ́ mlɩmɛ́ɛkɩ nyebi putuputu anfɩtɔ ɔkʋkʋ ansɩtɔ kotikoti. Ndɛ mlɩ bla mbɛɛ, bʋbʋ Bulu-abɔpʋá bʋtɔkɔsɩ pʋ amʋ́ asʋn ya mɩ Sɩ ɔsʋsʋ.

¹² “Mlɩyɔ asʋn anfɩtɔ amlɩkɩ. Nɩ ɔkʋ bʋ akufa lafakʋlɛ (100), amʋ́tɔ ɔkʋlɛ ɔfwɩ a, ntɔ ɔha amʋ tɔbwɛ? Megyi si otesi adukweba-kweba (99) atrahɛ amʋ lɩɩ okuku amʋsʋ, yodunka ɔkʋlɛ pɛ amʋʋ alafwɩ amʋ?

¹³ Ɔnɔkwalɩ ndɛ mlɩ bla. Nɩ owun mʋ a, mʋ ansɩ bégyi mʋ ɩwɩ dʋn adukweba-kweba atrahɛ amʋʋ bʋmɔfwɩ amʋ.

¹⁴ Alɩ kɛn mlɩ Sɩ amʋʋ ɔbʋ ɔsʋsʋ amʋ medekle ɔbɛɛ, nyebi putuputu anfɩtɔ ɔkʋkʋ ɛ ɔfwɩ nɩ.

Nɩ Fʋ Ba Ɔpʋ Ɩla Gyi Fʋ

¹⁵ “Nɩ fʋ ba ohogyipʋ ɔpʋ ɩla gyi fʋ a, yɔ mʋ wa, mlɩ abanyɔ pɛ amlɩblɩ mʋ́. Nɩ olonu ɩwɩasɩ a, falanya opio.

¹⁶ Tamɛ nɩ omonu ɩwɩasɩ a, kpa ɔbakʋlɛ ntɛ abanyɔ manta ɩwɩsʋ amlɩyɔ mʋ wa, mɛnɩ bégyi asʋngyiasʋn ánɩ́ mlɛblɩ ɩwɩ adansɩɛ fɛ alɩá Bulu asʋn lɛblɩ.

¹⁷ Nɩ omonu amʋ́ asʋn ɛ a, pʋ asʋn amʋ ya mlɩ ɔpasuafɔ. Tamɛ nɩ omonu amʋ́ asʋn ɛ a, mʋmʋ bu mʋ ɔmátɔyin ntɛ lampoo ɔhɔpʋ.

Asʋnkina Pʋ́ Mʋ́sʋ Tsula

¹⁸ “Ɔnɔkwalɩ ndɛ mlɩ bla. Asʋngyiasʋn ánɩ́ mlékina ɔsʋlʋ anfɩsʋ a, Bulu obékina mʋ́ ɔsʋsʋ. Mʋ́á mlótsula a, Bulu obótsula mʋ́sʋ ɔsʋsʋ.

¹⁹ “Ntra ndɛblɩ mbɛɛ, nɩ mlɩ abanyɔ mlɔbwɛ agywɩɩn kʋlɛ ɔsʋlʋ anfɩsʋ kʋlɩ tɔkʋ a, mɩ Sɩ amʋʋ ɔbʋ ɔsʋsʋ amʋ ɔbɔ́bwɛ mʋ́ ha mlɩ.

²⁰ Tsufɛ ɔtɩnɛgyiɔtɩnɛá aha abanyɔ-abasa befia mɩ ɩdatɔ a, mbʋ amʋ́ wa.”

Osumpʋ Owuntɔlɩnpʋ Ɩwɩ Yebi

²¹ Mʋʋ Petro lɛba bɛfɩtɛ Yesu ɔbɛɛ, “Mɩ Wie, tsefɩnɩ nsikie mɩ ba nɩ ɔpʋ ɩla gyi mɩ? Tse sienɔ loo?”

²² Yesu lɛbla mʋ ɔbɛɛ, “O-o, megyi tse sienɔ fésikie mʋ, tse aduesienɔ (70) aku asienɔ.

²³ Ɩnɩ sʋ Bulu iwiegyi amʋ igyi fɛ asʋn anfɩ. Owie ɔkʋ lɔbwɛ agywɩɩn ánɩ́ mʋa mʋ asumpʋ bóbu akunta.

²⁴ Brɛá olefi mʋ́ asɩ a, mʋ asumpʋ bɛkpa amʋ́tɔ ɔkʋá ɔdɛ mʋ ɩkɔ mpɩm-mpɩmtɔ ba mʋ.

²⁵ Tamɛ osumpʋ amʋ má tɔtɔá ɔbɔpʋka ɩkɔ amʋ sʋ a, owie amʋ lɛha ɔbɛɛ bʋfɛ mʋa mʋ ka, mʋ abi pʋ́ mʋ atɔ fɛ́ɛ́ pʋkɩta ɩkɔ amʋtɔ.

²⁶ Ɩnʋ a, osumpʋ amʋ lɔkʋsʋ da akpawunu owie amʋ ayabitɔ, bwii ɩpa ha mʋ ɔbɛɛ, ‘Mɩ Wie, nya klʋn ha mɩ. Ɩbwɛ nɛ́ka fʋ ɩkɔ amʋ fɛ́ɛ́.>

²⁷ Mʋ asʋn lɔwa mʋ wie amʋ nwɛ. Mʋ́ sʋ olesi ɩkɔ amʋ fɛ́ɛ́ kie mʋ, ha mʋ ɔlɛnatɩ.

²⁸ “Tamɛ brɛá osumpʋ amʋ lɛdalɩ ɩnʋ a, ɔlɔyɔtʋ mʋ osumba ɔkʋá ɔdɛ mʋ ɩkɔ kpalobi kʋ. Ɔlɛkɩta mʋ ba amʋ ɔmɛtɔ kinkiinkin, bla mʋ ɔbɛɛ, ‘Pʋ mɩ kɔba ha mɩ!>

²⁹ Mʋ osumba amʋ ɛ lɛda akpawunu bwii ɩpa ha mʋ, bla mʋ ɔbɛɛ, ‘Nya klʋn ha mɩ. Ɩbwɛ nɛka fʋ kɔ.>

³⁰ Tamɛ osumpʋ anfɩ mʋ́ motsula. Ɔlɛha ánɩ́ bʋpʋ mʋ yɛwa obu yɔfʋn ɛkɛá ɔbɛ́ka mʋ ɩkɔ amʋ.

³¹ Mʋ asumba bowun tɔá alapʋgyi mʋ ba amʋ a, ilowie amʋ́ ɩwɩtɔ. Mʋ́ sʋ bɔyɔ yɛbla amʋ́ wie asʋn amʋ fɛ́ɛ́.

³² Mʋʋ amʋ́ wie amʋ lɛha bɛtɩ osumpʋ amʋ ba, ɔlɛbla mʋ ɔbɛɛ, ‘Osumpʋ owuntɔlɩnpʋ, fʋ ɩpabwii sʋ nesi ɩkɔ tsɔtsɔɔtsɔ amʋʋ fʋdɛ mɩ amʋ fɛ́ɛ́ kie fʋ.

³³ Ɩma alɛá fʋ mʋ́ fówun fʋ ba amʋ nwɛ fɛ alɩá nowun fʋ nwɛ?>

³⁴ Ɔblɔ lɛkɩta owie amʋ. Mʋ́ sʋ ɔlɛha ɔbɛɛ, bʋwa mʋ obu, abʋpɩtɩ mʋ atɔ yɔfʋn ɛkɛá ɔbɛ́ka ɩkɔ amʋ fɛ́ɛ́.

³⁵ “Alɩ mɩ Sɩ amʋʋ ɔbʋ ɔsʋsʋ amʋ ɔbɔ́bwɛ mlɩtɔ okugyiɔkʋá omesi mʋ ba lakpan kie mʋ tsu mʋ klʋntɔ nɩ.”