Mateo 16 - Bulu Ntam Pɔpwɛ mʋ́a Israel Ɩlʋ

Farisifɔ Bodunka Ofula

¹ Ɛkɛ ɔkʋ Farisifɔ pʋ́ Sadukifɔ akʋ bɛba Yesu ɔsɔkɩkpa. Mʋ́ sʋ bɛbla mʋ bɛɛ, ɔbwɛ osuna pʋsuna amʋ́ ánɩ́ lɛlɛ otsu Bulu wa.

² Yesu lɛbla amʋ́ ɔbɛɛ, “Nɩ owi ɩpɔn, nsaɩntɔ ɩpɛ a, mlɩtɛblɩ mlɩaa, ‘Ɔkɛ nsaɩntɔ bɛ́dɩ.>

³ Nɩ nyankpʋ obila tuun nyankɩ a, mlɩtɛblɩ mlɩaa, ‘Ndɛ nyankpʋ obótswie tsʋn afu.> Mlɩtɛtalɩ kɩ nsaɩntɔ, bɩ tɔá ɩbɛ́ba. Ntogyi sʋ mlɩmɛtalɩ nu tɔá mlɩdewun sei anfɩ mʋ́ asɩ.

⁴ Mlɩ ndɛmba-abi lalahɛ ánɩ́ mlɩladalɩ Bulu ɔma, mlɩdɛ osuna dunka amlɩwun, tamɛ mlɩmóowun kʋkʋʋkʋ dʋn Bulu ɔnɔsʋ ɔtɔɩpʋ Yona osuna amʋ odu.” Ɩnɩ sʋ ɔlɛnatɩ si amʋ́.

Farisifɔ Pʋ́ Sadukifɔ Bodobodotu-afa

⁵ Yesu akasɩpʋ amʋ bʋmɛkaɩn tsu bodobodo kɩta asa bɛfa ɔpʋ amʋ yɔ ɔbɩn.

⁶ Yesu lɛda amʋ́ ɔla ɔbɛɛ, “Mlɩkɩ wanklaan Farisifɔ pʋ́ Sadukifɔ bodobodotu-afasʋ.”

⁷ Akasɩpʋ amʋ bɛfɩtɛ aba bɛɛ, “Bodobodo amʋʋ anɩmɛdɛ amʋ sʋ ɔdɛ asʋn anfɩ blɩ loo?”

⁸ Yesu lonu asʋn ánɩ́ bʋdɛblɩ. Mʋʋ ɔlɛbla amʋ́ ɔbɛɛ, “Oo, mlɩ hogyi mɔtsɔ. Ntogyi sʋ mlɩdɛblɩ mlɩaa, bodobodo amʋʋ mlɩmɛdɛ amʋ sʋ?

⁹ Ɩmɔkʋwankɩ mlɩ kɩ? Mlɩlatan bodobodo apin anu amʋʋ nɛha aha mpɩm-nu (5,000) begyi amʋsʋ? Alakpa afɩnɩ lesian mlɩlɔtɔsɩ?

¹⁰ Ntɛ mlɩlatan bodobodo apin asienɔ amʋʋ nɛha aha mpɩm-na (4,000) begyi amʋsʋ? Alakpa afɩnɩ lesian mlɩlɔtɔsɩ?”

¹¹ Ntogyi sʋ ɩmɔkʋwankɩ mlɩ ánɩ́ megyi bodobodo ɩwɩ asʋn ndɛblɩ? Bla ndɛ mlɩ bla mbɛɛ, “Mlɩkɩ wanklaan Farisifɔ pʋ́ Sadukifɔ bodobodotu-afasʋ.”

¹² Ɩnʋ asa ɩlɔwankɩ amʋ́ ánɩ́ megyi Bodobodotu-afa asʋn ɔdɛblɩ, mboun amʋ́ atosunahɛ.

Ɔha Ánɩ́ Yesu Gyi

¹³ Brɛá Yesu lowie Kaesarea Filipi nsaɩntɔ a, ɔlɛfɩtɛ mʋ akasɩpʋ ɔbɛɛ, “Ma aha bɛɛ mɩ, Nyankpʋsa-Mʋ-Bi anfɩ ngyi?”

¹⁴ Bɛlɛ mʋ́ ɔnɔ bɛɛ, “Akʋ bɛɛ, fʋgyi Asu Ɔbɔpʋ Yohane. Akʋ bɛɛ, Bulu Ɔnɔsʋ Ɔtɔɩpʋ Elia. Akʋ ɛ bɛɛ, Yeremia ntɛ Bulu ɔnɔsʋ ɔtɔɩpʋ bamba ɔkʋ.”

¹⁵ Mʋʋ ɔlɛfɩtɛ amʋ́ ɔbɛɛ, “Mlɩ ɛ mɛ? Mlɩa mɩgyi ma?”

¹⁶ Simon Petro lɛlɛ mʋ́ ɔnɔ ɔbɛɛ, “Fʋgyi Kristo, (ɔha amʋʋ Bulu lada mʋ ofuli amʋ) nɩ. Bulu Ɔkɩankpapʋ amʋ mʋ Bi.”

¹⁷ Ɩnʋ Yesu lɛbla mʋ ɔbɛɛ, “Bulu layula fʋ Simon, Yona mʋ bi, tsufɛ megyi nyankpʋsa ɔkʋkʋ lɛlɛ ɔnɔkwalɩ anfɩ ɔwan suna fʋ. Mɩ Sɩ amʋʋ ɔbʋ ɔsʋsʋ amʋ nɩ.

¹⁸ Ɩnɩ sʋ mɩ ɛ ndɛ fʋ bla mbɛɛ, fʋ ɩda gyi Petro. Mʋ́ asɩ gyi, ‘Bʋta.> Bʋta anfɩsʋ néyi mɩ ɔpasua dɩnka nɩ. Lowu tumi mɛ́ɛtalɩ gyi mʋ́sʋ ɛkɛkɛɛkɛ.

¹⁹ Nɔ́pʋ Bulu iwiegyi amʋ asaafɩ wa fʋ ɩbɩtɔ. Asʋngyiasʋn ánɩ́ fékina ɔsʋlʋ anfɩsʋ a, Bulu ɛ obékina mʋ́ ɔsʋsʋ. Mʋ́á fótsula a, Bulu ɛ obótsula mʋ́sʋ ɔsʋsʋ.”

²⁰ Ɩnʋ ɔlɛda amʋ́ ɔla kpakpaakpa ɔbɛɛ, bʋmábla ɔhaa ánɩ́ mʋgyi Kristo amʋ.

Yesu Ɩwɩɔsɩn Pʋ́ Mʋ Lowu Ɩwɩ Asʋn Blɩ

²¹ Tsu brɛ amʋsʋ a, Yesu lefi asɩ ɔdɛ asʋntɔ lɛ suna amʋ́ ɔbɛɛ, “Ilehian ánɩ́ mɔ́yɔ Yerusalem yowun ɩwɩɔsɩn tsɔtsɔɔtsɔ Yudafɔ ahandɛ, Bulu igyi ahapʋ dɛhɛn pʋ́ Mose mbla asunapʋ ɩbɩtɔ. Bɔ́mɔ mʋ, tamɛ Bulu ɔbɛ́lakʋsʋa mʋ ɛkɛ sasɩ tsu afulitɔ.”

²² Mʋ́ sʋ Petro lɛtɩ mʋ ya ɩtsɛtɔ, yɛka mʋ itin ɔbɛɛ, “Mɩ Wie, Bulu ogya mʋ́ tɛɩa fʋ ɩwɩ. Ɩnɩ mába fʋsʋ ɛkɛkɛɛkɛ.”

²³ Ɩnʋ ɔlɛdamli bla Petro ɔbɛɛ, “Satan, natɩ tɛɩ mɩsʋ! Fʋdɛ mɩ ɔkpa tin. Megyi tɔá Bulu dɛgywɩɩn fʋdɛgywɩɩn, anyankpʋsa klɛ fʋdɛgywɩɩn.”

²⁴ Mʋʋ ɔlɛbla mʋ akasɩpʋ amʋ ɔbɛɛ, “Nɩ ɔkʋ dekleá obóbuo mɩ a, osi tɔá otekle bwɛ, otsu mʋ oyikpalihɛ bobuo mɩ.

²⁵ Tsufɛ nɩ ɔkʋ lɛprɩ mʋ nkpa a, ɩbɔ́hʋlɩ mʋ. Tamɛ nɩ ɔkʋ lesi mʋ nkpa ha mɩ sʋ a, ɔbɛ́lanya nkpa ánɩ́ ɩtamata.

²⁶ Nɩ ɔkʋ onya ɔyɩtɔ atɔ fɛ́ɛ́, tamɛ ɔhʋlɩ mʋ ɔkla a, labi mɔmʋ ɩlɔwa ha mʋ? Ntɛ ntɔ ɔha ɔbɛ́talɩ pʋtsɛ mʋ nkpa?

²⁷ Tsufɛ mɩ, Nyankpʋsa-Mʋ-Bi anfɩ nɛ́ba mɩ Sɩ numnyamtɔ, mɩa mʋ abɔpʋ. Ɩnʋ nɛ́ka ɔhagyiɔha ɩkɔ alɩá mʋ tsiatɔ gyi nɩ.

²⁸ Ɔnɔkwalɩ ndɛ mlɩ bla. Akʋ bʋbʋ mlɩtɔ nfɩá bʋmóowu, yɔfʋn brɛá bawun ánɩ́ mɩ, Nyankpʋsa-Mʋ-Bi anfɩ nɛba mɩ iwie ogyikpa.”