Mateo 14 - Bulu Ntam Pɔpwɛ mʋ́a Israel Ɩlʋ

Asu Ɔbɔpʋ Yohane Lowu

¹ Galilea ɔmásʋ ogyipʋ Herode lonu Yesu ɩwɩ asʋn alɩ brɛ amʋtɔ.

² Mʋʋ ɔlɛbla mʋ asumpʋ ɔbɛɛ, “Asu Ɔbɔpʋ Yohane amʋ nɩ. Mʋlakʋsʋ tsu afulitɔ. Mʋ́ sʋ ɔdɛ ofula anfɩ odu bwɛ nɩ.”

^3-4 Brɛ kʋtɔ a, Yohane letsia bla Owie Herode ɔbɛɛ, mbla mɛha ɔkpa ánɩ́ otsia mʋ pio Filipo mʋ ka Herodia. Ɩnɩ sʋ Herode lɛha bɛkɩta Yohane, wa mʋ ɩkan, pʋ mʋ wa obu.

⁵ Ɔlɔbwɛ agywɩɩn ánɩ́ ɔbɔ́mɔ Yohane, tamɛ olenya aha amʋ ifu, tsufɛ bʋtobu Yohane ánɩ́ Bulu ɔnɔsʋ ɔtɔɩpʋ ogyi.

⁶ Tamɛ ɛkɛ ɔkʋá Owie Herode dɛ mʋ ɔkwɩɩkɛ gyi a, mʋ ka Herodia mʋ bi tsɩhɛ lobowie ɔbʋntɔ tsa Herode mʋa mʋ ahandɛ ansɩtɔ. Mʋ tsa amʋ lɔwa owie amʋ ansigyi.

⁷ Mʋ́ sʋ ɔlɛka ntam ɔbɛɛ, ɔbɛ́ha mʋ togyitɔá odekle.

⁸ Otsibi amʋ mʋ yin lɛha mʋ ɔlɛbla Herode ɔbɛɛ, “Ndekleá fʋpʋ Asu Ɔbɔpʋ Yohane nwun dɩnka ɩlɩnsʋ ha mɩ seseesei.”

⁹ Asʋn anfɩ lɛhɩɛ han Herode, tamɛ mʋ ntam amʋʋ ɔlɛka, pʋ́ aha amʋʋ bʋbʋ ɩnʋ amʋ sʋ a, ɔlɛha mʋ aha ɔtɩnpʋ ɔkpa ɔbɛɛ, ɔbwɛ tɔá otsibi amʋ lafɩtɛ ha mʋ.

¹⁰ Aha ɔtɩnpʋ amʋ lɛyɛtɩn Yohane nwun obu ɔdɩkpa ɩnʋ.

¹¹ Mʋʋ ɔlɔpʋ nwun amʋ dɩnka ɩlɩnsʋ ba otsibi amʋ, mʋ ɛ ɔlɔpʋya mʋ yin Herodia.

¹² Asu Ɔbɔpʋ Yohane akasɩpʋ bɛba botsu mʋ satin yopula. Mʋ́ ɔma a, bɔyɔ yɛbla Yesu asʋn ánɩ́ ɩlaba.

Aha Mpɩm-nu Atogyihɛ Ha

¹³ Yesu lenya nu asʋn amʋ alɩ, olowie ɔklʋntɔ, fa ntsu yetsia ɔtɩnɛkʋ mʋ nkʋlɛ. Tamɛ ɔdɔm amʋ bɛbɩ ɔtɩnɛá ɔyɔ. Mʋ́ sʋ bɛnatɩ ayabitɔ tsu amʋ́ awulusʋ gya mʋ nkpa.

¹⁴ Brɛá ɔlɛkplɩ dalɩ ɔklʋn amʋtɔ, wun ɔdɔm kpɔnkpɔɔnkpɔntɩ a, amʋ́ asʋn lɔwa mʋ nwɛ. Mʋ́ sʋ ɔlɛtsa amʋ́tɔ alɔpʋ.

¹⁵ Owi lɔpɔn a, akasɩpʋ amʋ bɛba mʋ wa bɛbla mʋ bɛɛ, “Dimbisʋ nfɩ gyi, owi ɛ dɛta. Mʋ́ sʋ ha amʋ́ abʋyɔ awuluá ɩbʋ bomli nfɩ asɩ yɛhɔ tɔkʋ gyi.”

¹⁶ Tamɛ Yesu lɛlɛ mʋ́ ɔnɔ ɔbɛɛ, “Imehian ánɩ́ bɔ́yɔ. Mlɩdunka tɔkʋ ha amʋ́ abʋgyi.”

¹⁷ Mʋ akasɩpʋ amʋ bɛbla mʋ bɛɛ, “Tɔá anɩbʋ fɛ́ɛ́ gyi bodobodo apin anu pʋ́ ntsutso iye bwahɛ anyɔ pɛ.”

¹⁸ Yesu lɛbla amʋ́ ɔbɛɛ, “Mlɩtsu ba mɩ.”

¹⁹ Mʋʋ ɔlɛha aha amʋ betsiatsia ɩfa bɔbwɛ amʋsʋ. Ɩnʋ olotsu bodobodo anu pʋ́ ntsutso iye bwahɛ anyɔ amʋ. Olotsu ansɩ fʋa kɩ ɔsʋsʋ, ɔlɛda Bulu ɩpan. Mʋʋ olebiabia bodobodo amʋtɔ ha akasɩpʋ amʋ, amʋ́ ɛ beye mʋ́ ha aha amʋ fɛ́ɛ́.

²⁰ Amʋ́ fɛ́ɛ́ begyi mwɛ sian. Akasɩpʋ amʋ bɔtɔsɩ sianhɛ amʋ. Ɩlɔbʋla alakpa duanyɔ.

²¹ Ayin ánɩ́ begyi atɔ amʋ nkʋlɛ bʋgyi fɛ mpɩm-nu (5,000). Bʋmɛkla atsɩ mʋ́a nyebi mʋ́.

Ɔpʋsʋ Natɩ

²² Mʋʋ Yesu lɛha akasɩpʋ amʋ ɔbɛɛ, bʋwie ɔklʋntɔ, abʋgyankpa fa ɔpʋ amʋ yɔ mʋ́ ɔbɩn. Mʋ mʋ́ olesin ɔma si aha amʋ ɔkpa.

²³ Brɛá olesi amʋ́ ɔkpa ta a, ɔlɔdʋ yɔ bʋsʋ yɔbɔ mpaɩ. Mʋ nkʋlɛ oletsia ɩnʋ yɔfʋn owi tahɛ.

²⁴ Alɩ brɛ amʋtɔ a, ɔklʋn amʋ lawie ntsu nsɩnɛ. Ilefia afu kpɔnkpɔntɩ kʋ, ɔpʋ amʋ lɔwa dabɩ.

²⁵ Bakɛ-bakɛ a, Yesu lɛnatɩ ntsu amʋsʋ ayabitɔ buo amʋ́.

²⁶ Brɛá bowun mʋ, ɔna ɔpʋ amʋsʋ a, benya ifu sʋra okitikiti, blɩ bɛɛ, “Fuli ogyi.”

²⁷ Tamɛ ɔlɔwa ɔsa bla amʋ́ ɔbɛɛ, “Mlɩwa klʋn. Mɩ nɩ. Mlɩmánya ifu.”

²⁸ Petro lɛbla Yesu ɔbɛɛ, “Mɩ Wie, nɩ fʋ nɩ mʋ́ a, ha mɩ ɛ annatɩ ɔpʋ amʋsʋ bɔtʋ fʋ.”

²⁹ Yesu lɛbla mʋ ɔbɛɛ, “Natɩ ba.” Petro lɛdalɩ ɔklʋn amʋtɔ ɔna ɔpʋ amʋsʋ ɔyɔ Yesu wa.

³⁰ Tamɛ brɛá olowun alɩá afu amʋ ɔnɔ bʋ ɔnlɩn a, ifu lowie mʋ ayetɔ. Mʋ́ sʋ ɔlɔwa mɛ bɩ. Mʋʋ ɔlɔkplʋn kpoli Yesu ɔbɛɛ, “Mɩ Wie, hɔ mɩ!”

³¹ Ɩnʋnʋ Yesu lɛtɩnkɩ ɩbɩ kɩta mʋ, bla mʋ ɔbɛɛ, “Fʋ hogyi mɔtsɔ. Ntogyi sʋ fʋdɛ nwɛn gyi?”

³² Benya dʋ wie ɔklʋn amʋtɔ alɩ, afu amʋ lɛka itin.

³³ Ɩnʋ aha amʋʋ bʋbʋ ɔklʋn amʋtɔ amʋ bɛda akpawunu Yesu ayabitɔ, blɩ bɛɛ, “Lɛlɛ, Bulu mʋ Bi fʋgyi.”

Genesaretfɔ Alɔpʋ Tsa

³⁴ Yesu mʋa amʋ́nyɔ bɛfa ɔpʋ amʋ yesi Genesaret otsubunɔ.

³⁵ Brɛá ɩnʋfɔ bɛbɩá mʋ nɩ a, bɔwa abi ya amʋ́ awulu fɛ́ɛ́sʋ, ha amʋ́ bɔpʋ alɔpʋ fɛ́ɛ́ ba mʋ.

³⁶ Bokokoli Yesu bɛɛ, ɔha alɔpʋ amʋ abʋpʋ ɩbɩ da mʋ atadɩɛ ɔdanʋ kpan. Amʋ́á bɔpʋ ɩbɩ da mʋ́ fɛ́ɛ́ benya ɩlɔtsa.