Mateo 13 - Bulu Ntam Pɔpwɛ mʋ́a Israel Ɩlʋ

Atɔ-abi Owunyapʋ Ɩwɩ Yebi

¹ Ɛkɛ amʋ kɛn a, Yesu lɛdalɩ tsu woyitɔ yetsia ɔpʋ ɔnɔ.

² Ɔdɔm kpɔnkpɔɔnkpɔntɩ bɛba befia bomli mʋ. Mʋ́ sʋ ɔlɔdʋ wie ɔklʋntɔ, yetsia ɔpʋ amʋsʋ, aha amʋ ɛ bʋlɩɩ ɔpʋ ɔnɔ ɩnʋ.

³ Ɩnʋ olosuna amʋ́ atɔ tsɔtsɔɔtsɔ ayebitɔ ɔbɛɛ, “Ɔdɔtɔpʋ ɔkʋ lɔyɔ atɔ-abi owunyakpa.

⁴ Brɛá ɔdɛ mʋ́ wunya a, ɩkʋ lɔwʋlɩ ɔkpatɔ, mbubwi bɛba bɔtswɛtswɛ mʋ́ fɛ́ɛ́.

⁵ Ɩkʋ ɛ lɔwʋlɩ abʋtasʋ, ɔtɩnɛá ɩsɩ kpalobi dɩn. Mʋ́ sʋ ɩlɔwa ɔsa kwɛ,

⁶ tamɛ brɛá owi lɛlɩn a, ɩlɔtɔ mʋ́ mɔ, tsufɛ mʋ́ nlin mɔyɔ ɔtɔtɔ.

⁷ Abi amʋ kʋ lobun awutɔ, awu amʋ lɔbʋla kɩta mʋ́. Mʋ́ sʋ ɩmɛdan.

⁸ Tamɛ abi amʋ kʋ ɛ lobun ɔsʋlʋ wanklaansʋ, ɩlɔkwɛ, dan, swie abi. Ɩkʋ lafa (100), ɩkʋ aduesie (60), ɩkʋ ɛ adʋasa (30).”

⁹ Yesu lɔmɔ mʋ asʋn ɔnɔ ɔbɛɛ, “Ɔha ánɩ́ ɔbʋ asʋ onu!”

Tɔá Sʋá Yesu Lɔtɔɩ Ayebisʋ

¹⁰ Mʋ akasɩpʋ amʋ bɛba bɛfɩtɛ mʋ bɛɛ, “Ntogyi sʋ fʋdɛ amʋ́ asʋn bla ayebisʋ?”

¹¹ Mʋʋ ɔlɛlɛ mʋ́ ɔnɔ ɔbɛɛ, “Mlɩ mʋ́ a, Bulu laha mlɩ ɔkpa ɔbɛɛ, mlɩbɩ mʋ iwiegyi amʋ ɩwɩ asʋn ŋainhɛ, tamɛ ɔmɛha amʋ́ mʋ́ alɩ.

¹² Tsufɛ ɔha ánɩ́ odekleá obónu mɩ atosunahɛ amʋ asɩ a, Bulu ɔbɔ́pʋ ɩkʋ tsɩa mʋ́tɔ ha mʋ, mɛnɩ ɔbɛ́tra bɩ tsɩa mʋ́tɔ. Tamɛ ɔha ánɩ́ omedekleá obónu mʋ́ asɩ a, Bulu ɔbɔ́swɩɩ mʋ kpalobi amʋʋ alabɩ amʋ kʋraa.

¹³ Tɔá sʋá ndɛ amʋ́ asʋn bla ayebisʋ gyi, bʋdɛ mʋ́ nu, tamɛ bʋmɛdɛ mʋ́ asɩ nu. Bʋdɛ mʋ́ wun, tamɛ bʋmɛdɛ mʋ́ bɩ.

¹⁴ Aha anfɩ sʋ Bulu ɔnɔsʋ ɔtɔɩpʋ Yesaia asʋn ánɩ́ ɔlɛblɩ tswɩ laba mʋ́tɔ nɩ. Ɔbɛɛ, ‘Bónu lanu, tamɛ bʋmóonu mʋ́ asɩ. Bɛ́kɩ lakɩ, tamɛ bʋmóowun mʋ́.

¹⁵ Tsufɛ amʋ́ agywɩɩn lawu. Batila asʋ, bun ansibi ɛ. Ɩnɩ sʋ bʋmóonu, bʋmóowun ɛ. Nɩ megyi alɩ a, tɛkɩ bówun atɔ, bónu asʋn, amʋ́ agywɩɩn bóbwii, bɛ́damli ba mɩ wa, nɛ́tsa amʋ́ ɩlɔ.>

¹⁶ “Tamɛ mlɩ mʋ́ a, Bulu layula mlɩ. Mlɛ́talɩ pʋ ansibi wun atɔ, pʋ asʋ nu asʋn.

¹⁷ Ɔnɔkwalɩ ndɛ mlɩ bla. Bulu ɔnɔsʋ atɔɩpʋ pʋ́ yile abwɛpʋ tsɔtsɔɔtsɔ bekleá bɔ́pʋ amʋ́ ansibi wun atɔ anfɩ, abʋpʋ amʋ́ asʋ nu asʋn anfɩ mlɩdenu, tamɛ bʋmenya mʋ́ alɩ.

Atɔ-abi Owunyapʋ Yebi Amʋ Asɩ

¹⁸ “Mlɩnu atɔ-abi owunyapʋ yebi amʋ asɩ ngya.

¹⁹ Aha ánɩ́ bonu Bulu iwiegyi ɩwɩ asʋn amʋ, tamɛ bʋmonu mʋ́ asɩ a, bʋgyi fɛ abi amʋʋ ilobun ɔkpatɔ amʋ. Ɔbʋnsam tɛba bɛlɛ asʋn amʋʋ bodu wa amʋ́ klʋntɔ amʋ natɩ.

²⁰ Abi amʋʋ ɩlɔwʋlɩ abʋtasʋ amʋ gyi aha amʋʋ bonu asʋn amʋ pɛ, bahɔ mʋ́ ansigyisʋ,

²¹ tamɛ ɩnɩá bʋma nlin sʋ a, ɩtamatsia amʋ́tɔ yɔ. Mʋ́ sʋ nɩ bʋdɩn amʋ́sʋ ntɛ ɩwɩɔsɩn kʋ ɩtʋ amʋ́ asʋn amʋ sʋ a, ɩnʋnʋ bʋtɛdɩda.

²² Abi amʋʋ ɩlɔwʋlɩ awutɔ amʋ gyi aha amʋʋ bonu asʋn amʋ a, bahɔ mʋ́, tamɛ ɔyɩ anfɩtɔ atohianhɛ ɩwɩ gywɩɩn pʋ́ mʋ́tɔ atonyahɛ ɩwɩ ɔnsɩpɛ tegyi Bulu asʋn amʋsʋ. Ɩnɩ sʋ bʋtamaswie abi.

²³ Abi amʋʋ ɩlɔwʋlɩ ɔsʋlʋ wanklaansʋ amʋ gyi aha amʋʋ bʋtonu asʋn amʋ, nu mʋ́ asɩ. Ɩnɩ sʋ ɩtɛha bʋtɔbwɛ yile fɛ alɩá atɔ-abi amʋ loswie, ɩkʋ lafa (100), ɩkʋ aduesie (60), ɩkʋ ɛ adʋasa (30) amʋ.”

Atɔ-abi Wanklaan Pʋ́ Ɩfa Lalahɛ Ɩwɩ Yebi

²⁴ Yesu lɛtra ha aha amʋ yebi kʋ ɛ ɔbɛɛ, “Bulu iwiegyi amʋ igyi fɛ ɔdɔtɔpʋ ɔkʋá oloyodu ayo wanklaan mʋ ndɔtɔ.

²⁵ Tamɛ onye, brɛá aha bɛdɩ a, mʋ olupʋ loyodu ɩfa lalahɛ ánɩ́ ɩlɛlɩan ayo amʋ wa mʋ́tɔ, ɔlɛnatɩ.

²⁶ Brɛá ayo amʋ lɛdan, ɩdɛkwɩɩ a, ɩfa amʋ ɛ lɛlɩn ɔwan mʋ́tɔ.

²⁷ Ɔdɔtɔpʋ amʋ apafɔ botsu ndɔ amʋtɔ ba bɛfɩtɛ mʋ bɛɛ, ‘Anɩ wie, megyi ayo fodu wa fʋ ndɔ amʋtɔ? Nkʋnʋ ɩfa lalahɛ ɛ itsu mʋ́tɔ?>

²⁸ Mʋʋ ɔlɛbla amʋ́ ɔbɛɛ, ‘Mɩ olupʋ bwɛhɛ nɩ.> Ɩnʋ bɛbla mʋ bɛɛ, ‘Nɩ fótsula a, ha ayetsitsi mʋ́ lɛ ayo amʋtɔ.>

²⁹ Ɔlɛbla amʋ́ ɔbɛɛ, ‘O-o! Mlɩha mʋ́ itsia. Nɩ mlɩdɛ mʋ́ tsii a, mlétsii mɩ ayo amʋ ɛ kʋ tsitsa.

³⁰ Mlɩsi mʋ́ fɛ́ɛ́ ɩlɩɩ yɔfʋn mʋ́ tɩnbɩ. Nɩ ɩfʋn a, nɛ́bla mʋ́ atɩnpʋ mbɛɛ, bʋgyankpa saɩn ɩfa lalahɛ amʋ, abʋklɩ mʋ́ tswɩ ha mʋ́ ogya wa, asa abʋtɩn ayo amʋ yɛwa mɩ odudutɔ.> ”

Takyi-akpin Ibi Yebi

³¹ Yesu lɛtra ha amʋ́ yebi ɔbɛɛ, “Bulu iwiegyi amʋ igyi fɛ takyi-akpin ibi, oyin ɔkʋ lodu wa mʋ ndɔtɔ.

³² Mʋ́gyi tukuriibi nyi-abi fɛ́ɛ́tɔ nɩ, tamɛ nɩ ɩdan a, ɩtɔbwɛ ɩfa fʋahɛ dʋn ɩfa kugyikʋ. Mʋ́ abambi tekpikpli, mbubwi bʋtogyonka mʋ́sʋ.”

Bodobodotu-afa Yebi

³³ Yesu lɛtra ha amʋ́ yebi kʋ ɔbɛɛ, “Bulu iwiegyi amʋ igyi fɛ bodobodotu-afa ánɩ́ ɔtsɩ ɔkʋ lɔpʋtsɩa bodobodo nfuo kɛntɛ kʋlɛ, ɩlɛha mʋ́ lotu.”

Yesu Lɔtɔɩ Ayebisʋ

³⁴ Ayebi anfɩ odu tsɔtsɔɔtsɔ oletsia pʋbla ɔdɔm amʋ asʋn nɩ. Ɔmɛbla amʋ́ asʋn kʋkʋá imegyi ayebi ɔlɔpʋtɔɩ.

³⁵ Ɩnɩ lɛha asʋn amʋʋ Bulu ɔnɔsʋ ɔtɔɩpʋ ɔkʋ lɛblɩ yaɩ amʋ lɛba mʋ́tɔ. Ɔbɛɛ, “Nɔ́tɔɩ ayebisʋ pʋlɛ asʋn ánɩ́ Bulu lɔpʋŋain tsu ɔyɩ asɩtsuabɩ ɔwan.”

Ɩfa Lalahɛ Yebi Amʋ Asɩ

³⁶ Yesu lɛnatɩ ɔdɔm amʋ wa ba woyitɔ. Mʋʋ mʋ akasɩpʋ amʋ bɔyɔ mʋ wa yɛbla mʋ bɛɛ, “Lɛ ndɔ amʋtɔ ɩfa lalahɛ ɩwɩ yebi amʋ asɩ suna anɩ.”

³⁷ Mʋʋ Yesu lɛlɛ mʋ́ ɔnɔ ɔbɛɛ, “Mɩ, Nyankpʋsa-Mʋ-Bi anfɩ gyi atɔ-abi wanklaan odupʋ amʋ nɩ.

³⁸ Ndɔ amʋ gyi ɔyɩ anfɩ. Atɔ-abi wanklaan amʋ gyi Bulu iwiegyi amʋtɔ abi. Ɩfa lalahɛ amʋ gyi Ɔbʋnsam abi.

³⁹ Olupʋ amʋʋ olodu ɩfa lalahɛ abi amʋ gyi Ɔbʋnsam. Atɔtɩnbɩ amʋ gyi ɔyɩ ɔnɔmɔkɛ. Atɔ atɩnpʋ amʋ ɛ gyi Bulu-abɔpʋ.

⁴⁰ “Alɩ amʋʋ bɛsaɩn ɩfa lalahɛ amʋ wa mʋ́ ogya amʋ a, alɩ kɛn ɩbɛ́ba ha aha lalahɛ ɔyɩ ɔnɔmɔkɛ amʋ nɩ.

⁴¹ Mɩ, Nyankpʋsa-Mʋ-Bi anfɩ nɔ́wa mɩ abɔpʋ bɛ́kpa togyitɔá ɩtɛha ɔha tɔbwɛ lakpan pʋ́ lalahɛ abwɛpʋ fɛ́ɛ́ lɛ mɩ iwiegyi amʋtɔ.

⁴² Bɔ́tswɩ amʋ́ fɛ́ɛ́ wa ogya kpɔnkpɔntɩtɔ. Ɩnʋ isu mʋ́a kpisi bʋ nɩ.

⁴³ Tamɛ yile abwɛpʋ mʋ́ bɔ́wankɩ fɛ owi amʋ́ Sɩ Bulu iwie ogyikpa ɩnʋ. Ɔha ánɩ́ ɔbʋ asʋ onu.”

Siadɩɛ Mɛntɩhɛ Ɩwɩ Yebi

⁴⁴ Yesu lɛtra ha amʋ́ yebi kʋ ɛ ɔbɛɛ, “Bulu iwiegyi amʋ igyi fɛ siadɩɛ kʋá bopula ɔsʋlʋ kʋsʋ. Oyin ɔkʋ lɛyɛmɛntɩ mʋ́, laŋain mʋ́. Mʋ́ ɩwɩ ansigyi sʋ a, ɔlɛyɛfɛ mʋ atɔ fɛ́ɛ́ pʋbɔhɔ ɔsʋlʋ amʋ.”

Abuto Wʋlɩhɛ Ɩwɩ Yebi

⁴⁵ Bulu iwiegyi amʋ ɩtra gyi fɛ ibia ogyipʋ ɔkʋá ɔna ɔdɛ abuto wʋlɩhɛ dunka ɔhɔ.

⁴⁶ Brɛá olowun butobi wʋlɩhɛ kʋlɛ pɛá ɩhɩɛ bʋ ibia a, ɔlɛfɛ mʋ atɔ fɛ́ɛ́ pʋyɛhɔ butobi amʋ.

Asawu Ɩwɩ Yebi

⁴⁷ Bulu iwiegyi amʋ lɛla igyi fɛ asawu ánɩ́ bɔtswɩ wa ɔpʋtɔ lɛ aye ɔtsan-ɔtsan.

⁴⁸ Brɛá aye lɔbʋla mʋ́ a, aye alɛpʋ amʋ bɛbɩtɩa mʋ́ ba ɔpʋ ɔnɔ. Betsia asɩ, tɔsɩ gyihɛ amʋ wa blanwɛtɔ, tswɩ mʋ́á bʋtamagyi tsitsa.

⁴⁹ Alɩ ɩbɛ́ba ɔyɩ ɔnɔmɔkɛ amʋ nɩ. Bulu-abɔpʋ bɛ́ba bɔtɔsɩ aha lalahɛ lɛ aha wanklaantɔ.

⁵⁰ Fówun batswɩ aha lalahɛ amʋ wa ogya kpɔnkpɔntɩtɔ. Ɩnʋ isu mʋ́a kpisi bʋ nɩ.

Atonyahɛ Pɔpwɛ Mʋ́a Dada

⁵¹ Yesu lɛfɩtɛ mʋ akasɩpʋ ɔbɛɛ, “Mlɩlanu mʋ́ fɛ́ɛ́ asɩ?” Bɛɛ, “Ee, anɩlanu mʋ́ asɩ.”

⁵² Mʋʋ ɔlɛbla amʋ́ ɔbɛɛ, “Mʋmʋ mbla osunapʋ oduá alakasɩ Bulu iwiegyi amʋ ɩwɩ asʋn ɛ bɩ a, ogyi fɛ woyi mʋ wie oduá ɔtɛlɛ atɔ pɔpwɛ mʋ́a dada fɛ́ɛ́ tsu mʋ atɔ ɔyaɩkpa.”

Bʋmɔhɔ Yesu Mʋ Wulutɔ

⁵³ Yesu lenya mɔ mʋ ayebi amʋ ɔnɔ alɩ, ɔlɛnatɩ ɩnʋ.

⁵⁴ Oleyinki yɔ mʋ onuto wulutɔ Nasaret, oloyesuna atɔ Yudafɔ ofiakpa. Mʋ atosunahɛ lɛha ɔnɔ lobwie aha amʋ fɛ́ɛ́. Mʋ́ sʋ bɛfɩtɛ aba bɛɛ, “Nkʋnʋ olenya nyansa mʋ́a ofulabwɛ tumi anfɩ ɛ tsu?

⁵⁵ Megyi atɔ osrepʋ mʋ bi amʋ nɩ? Megyi mʋ yin gyi Maria, mʋ apio yinhɛ gyi Yakobo mʋa Yosef pʋ́ Simon mʋa Yuda?

⁵⁶ Yɛ anɩa mʋ apio tsɩhɛ tsie nfɩ a? Mʋʋ nkʋnʋ olenya ɩnɩ fɛ́ɛ́ tsu?”

⁵⁷ Ɩnɩ sʋ mʋ asʋn lɔkʋsʋ lɩɩ amʋ́sʋ. Yesu lɛbla amʋ́ ɔbɛɛ, “Aha bʋtobu Bulu ɔnɔsʋ ɔtɔɩpʋ ɔtɩnɛgyiɔtɩnɛ, tamɛ mʋ onuto wulutɔfɔ pʋ́ mʋ woyitɔ aha mʋ́ bʋtamabu mʋ.”

⁵⁸ Ɩnɩá bʋmɔhɔ mʋ gyi sʋ a, ofula kpalobi kʋ pɛ ɔlɔbwɛ ɩnʋ.