Mateo 12 - Bulu Ntam Pɔpwɛ mʋ́a Israel Ɩlʋ

Ɔkpʋnʋ Ɔdakɛ Mʋ Wie

¹ Yesu mʋa mʋ akasɩpʋ bɔtsʋn ayo ndɔ kʋtɔ ɔkpʋnʋ ɔdakɛ. Akʋn dɛ akasɩpʋ amʋ, sʋ bɔpʋsa ayo amʋ kʋ wɩ.

² Farisifɔ akʋ bowun amʋ́, bɛbla Yesu bɛɛ, “Kɩ, fʋ akasɩpʋ amʋ bʋdɛ tɔá mbla mɛha ɔkpa bwɛ ɔkpʋnʋ ɔdakɛ!”

³ Yesu lɛfɩtɛ amʋ́ ɔbɛɛ, “Mlɩmɔkʋkla nu tɔá Owie Dawid lɔbwɛ brɛá akʋn dɛ mʋa mʋ abuopʋ kɩ?

⁴ Olebitiwie Bulu osumkpa yotsu bodobodoá bapʋha Bulu igyi ba, mʋa mʋ abuopʋ amʋ begyi. Bulu igyi ahapʋ nkʋlɛ bɛha ɔkpa, bʋtegyi alɩ bodobodo amʋ.

⁵ Mlɩlakla Mose Mbla, nu ánɩ́ Bulu igyi ahapʋ amʋ bʋtɔyɔ agyʋma Bulu ɔtswɛkpa ɩnʋ ɔkpʋnʋ ɔdakɛ, tamɛ bʋtamaha amʋ́ ɩpɔn.

⁶ Ndɛ mlɩ bla mbɛɛ, ɔha ánɩ́ ɔdʋn Bulu ɔtswɛkpa amʋ bʋ nfɩ a.

⁷ Bulu asʋn lɛblɩ ɔbɛɛ, ‘Nwewun ntekle, megyi igyiha.> Nɩ mlɩyin mʋ́ asɩ a, tɛkɩ mlɩmɛ́ɛha aha anfɩ amʋ́ asʋn da ɔkpa anfɩ ɩpɔn.

⁸ Tsufɛ mɩ, Nyankpʋsa-Mʋ-Bi anfɩ gyi ɔkpʋnʋ ɔdakɛ mʋ wie nɩ.”

Ɩlɔtsa Ɔkpʋnʋ Ɔdakɛ

⁹ Yesu lɛnatɩ ɩnʋ, ɔlɔyɔ Yudafɔ ofiakpa.

¹⁰ Olowun oyin ɔkʋá mʋ ɩbɩ kʋlɛ lawu ɩnʋ. Farisifɔ amʋ bʋdɛ Yesu tɛ. Mʋ́ sʋ bɛfɩtɛ mʋ bɛɛ, “Mbla lɛha ɔkpa ánɩ́ bʋtsa ɩlɔ ɔkpʋnʋ ɔdakɛ?”

¹¹ Mʋʋ Yesu lɛfɩtɛ amʋ́ ɔbɛɛ, “Nɩ mlɩtɔ ɔkʋ bʋ kufa, alakpada wie ibuntɔ ɔkpʋnʋ ɔdakɛ a, ɔmɛ́ɛlɛ mʋ?

¹² Yɛ nyankpʋsa bʋ labi dʋn kufa a? Mʋ́ sʋ mbla lɛha ɔkpa ánɩ́ ɔha ɔbɔ́bwɛ yile ɔkpʋnʋ ɔdakɛ.”

¹³ Mʋʋ ɔlɛbla oyin amʋʋ mʋ ɩbɩ lawu amʋ ɔbɛɛ, “Tɩnkɩ fʋ ɩbɩ amʋ.” Olenya tɩnkɩ mʋ́ alɩ pɛ, ɔŋɛ lowie mʋ́tɔ fɛ nyɔsɩ amʋ.

¹⁴ Tamɛ mʋ́ o a, Farisifɔ amʋ bɛdalɩ yɛkɩta agywɩɩn alɩá bɔ́bwɛ bɔ́mɔ Yesu.

Osumbiá Bulu Lɛlɛ

¹⁵ Yesu lɛbɩ amʋ́ agywɩɩn. Mʋ́ sʋ ɔlɛnatɩ ɩnʋ. Ɔdɔm bobuo mʋ, ɔlɛtsa amʋ́tɔ alɔpʋ fɛ́ɛ́ ɩlɔ.

¹⁶ Mʋʋ ɔlɛda amʋ́ ɔla ɔbɛɛ, bʋmáha aha abʋbɩ mʋ.

¹⁷ Ɩnɩ lɛha asʋn amʋʋ Bulu ɔnɔsʋ ɔtɔɩpʋ Yesaia lɛblɩ yaɩ amʋ lɛba mʋ́tɔ nɩ.

¹⁸ Ɔbɛɛ, “Kɩ, mɩ osumpʋá nalɛ nɩ. Ntɔdwɛ mʋ, mɩ ansɩ tegyi mʋ ɩwɩ. Nɔ́pʋ mɩ Ɔŋɛ Wankɩhɛ wa mʋtɔ. Ɔbɛ́bla ɔmátɔfɔ ɔbɛɛ, ‘Négyi amʋ́ asʋn ɔnɔkwalɩsʋ.>

¹⁹ Oméegyi nwɛn, ɔmɔ́ɔkplʋn. Ɔhaa móonu mʋ ɔnɔ brɔnʋsʋ.

²⁰ Obénya klʋn ha aha ánɩ́ amʋ́ hogyi ɔnɔ ma ɔnlɩn, babwɛ fɛ oyiá ɩlata bia ta. Ɔbɔ́wa awɩtɔlɛ ha aha ánɩ́ bʋma ɔwʋnlɩn, babwɛ fɛ ɔkandɩɛá nfɔ lata mʋ́tɔ, yɔfʋn brɛá bɛ́bɩ ánɩ́ ntegyi asʋn ɔnɔkwalɩsʋ.

²¹ Aha ánɩ́ bʋmegyi Yudafɔ bɔ́pʋ ansɩ dɩnka mʋsʋ.”

Yesu Mʋa Beelsebul

²² Ɩnʋ bɔpʋ oyin ɔkʋ ba Yesu, ɔŋɛ lalahɛ bʋ mʋtɔ. Mʋ́ sʋ ɩlɛha mʋ ansibi lobwie; alatɔ omumu ɛ. Yesu lɛtsa mʋ ɩlɔ, ɔdɛ atɔ wun, ɔdɛtɔɩ ɛ.

²³ Ɔnɔ lobwie aha amʋ fɛ́ɛ́, bɛfɩtɛ bɛɛ, “Megyi Dawid mʋ na amʋ nɩ?”

²⁴ Tamɛ Farisifɔ amʋ bonu asʋn anfɩ a, bɛblɩ bɛɛ, “Ɔŋɛ lalahɛ owie Beelsebul tumi ɔdɛpʋgya ɔŋɛ lalahɛ lɛ ahatɔ.”

²⁵ Yesu lɛbɩ amʋ́ agywɩɩn. Mʋ́ sʋ ɔlɛbla amʋ́ ɔbɛɛ, “Iwie ogyikpa ánɩ́ ɩlaye anyɔ, bʋdɛ aba kɔ bɛ́dɩda. Alɩ kɛn wulu ntɛ woyi oduá mʋ́tɔ atsiapʋ bʋdɛ aba kɔ ɛ itobwie nɩ.

²⁶ Mʋ́ sʋ nɩ Ɔbʋnsam dɛ mʋ ɩwɩ gya a, mʋ iwiegyi bɛ́dɩda.

²⁷ Nɩ Beelsebul tumi ndɛpʋgya ɔŋɛ lalahɛ lɛ ahatɔ a, mʋmʋ ma tumi mlɩ abi ɛ bʋdɛpʋgya ɔŋɛ lalahɛ lɛ ahatɔ? Mlɩ abi amʋ onuto obégyi mlɩ asʋn.

²⁸ Tamɛ ɩnɩá Bulu Ɔŋɛ ndɛpʋgya ɔŋɛ lalahɛ sʋ a, mlɩbɩá Bulu iwiegyi amʋ laba mlɩ wa dodo.”

²⁹ Ɔhaa mɛ́ɛtalɩ wie ɔwʋnlɩnpʋ woyitɔ yɛkʋla mʋ atɔ, nkɛtɩ alagyankpa kɩklɩ mʋ tswɩ, asa ɔbɛ́talɩ kʋla mʋ atɔ fɛ́ɛ́.

³⁰ Ɔha ánɩ́ omobuo mɩ dɛ mɩ lu. Ɔha ánɩ́ ɔmɛdɛ mɩ tsa akpa aha ba Bulu ɛ dɛ amʋ́ gya tɛɩa mɩ.

³¹ Ɩnɩ sʋ ndɛ mlɩ bla mbɛɛ, Bulu obési aha lakpan pʋ́ abususʋ kugyikʋ kie amʋ́. Tamɛ nɩ ɔkʋ ɔblɩ Ɔŋɛ Wankɩhɛ amʋ ɩwɩ abususʋ a, Bulu méesikie mʋ ɛkɛkɛɛkɛ.

³² Nɩ ɔkʋ lɛblɩ mɩ, Nyankpʋsa-Mʋ-Bi anfɩ ɛ ɩwɩ asʋn lalahɛ a, Bulu ɔbɛ́talɩ sikie mʋ. Tamɛ nɩ ɔkʋ lɛblɩ Ɔŋɛ Wankɩhɛ amʋ ɩwɩ asʋn lalahɛ mʋ́ a, Bulu méesikie ɔha amʋ ndɛ ɔyɩkɛhɛ, ntɛ brɛ amʋʋ ɩba amʋtɔ.

Tsiatɔ Itsu Ɩklʋntɔ

³³ Oyi abi bʋtɔpʋbɩ mʋ́. Oyi wanklaan toswie abi wanklaan. Oyi lalahɛ ɛ toswie abi lalahɛ.

³⁴ Mlɩ awɔ abi-aná! Nkalɩ mlɩ aha lalahɛ mlɛtalɩ blɩ asʋn wanklaan? Tsufɛ tɔá ɩdʋn ɔha klʋn a, mʋ́tɛdalɩ tsu mʋ ɔnɔ.

³⁵ Ɔha wanklaan tɛblɩ asʋn wanklaan tsu mʋ klʋntɔ, ɔha lalahɛ ɛ tɛblɩ asʋn lalahɛ tsu mʋ klʋntɔ.

³⁶ Ndɛ mlɩ bla mbɛɛ, ɔhagyiɔha ɔbɛ́lɛ asʋn lalahɛ kugyikʋá ɔlɛblɩ ɔnɔ Bulu asʋn ogyikɛ amʋ.

³⁷ Tsufɛ ɔha asʋn blɩhɛ Bulu ɔbɔ́pʋha mʋ asʋ ntɛ ɩpɔn.

Bodunka Ofula

³⁸ Mʋʋ Farisifɔ pʋ́ Mose mbla asunapʋ amʋ akʋ bɛbla Yesu bɛɛ, “Osunapʋ, anɩdekle anɩaa fʋbwɛ osuna kʋ suna anɩ.”

³⁹ Ɔlɛbla amʋ́ ɔbɛɛ “Mlɩ ndɛmba-abi lalahɛá mlɩladalɩ Bulu ɔma. Mlɩdɛ osuna dunka amlɩwun, tamɛ mlɩmóowun kʋkʋʋkʋ dʋn Bulu ɔnɔsʋ ɔtɔɩpʋ Yona osuna amʋ.

⁴⁰ Alɩ amʋʋ Yona letsia bonsu ɩwɩtɔ nkɛnsa, ɔpa mʋ́a onye amʋ a, alɩ mɩ, Nyankpʋsa-Mʋ-Bi anfɩ ɛ nétsia ɔsʋlʋ ɔtɔtɔ nkɛnsa, ɔpa mʋ́a onye nɩ.

⁴¹ Niniwefɔ ɛ bɔ́kʋsʋ Bulu asʋn ogyikɛ amʋ, ha mlɩ ndɛmba-abi anfɩ ɩpɔn. Tsufɛ brɛá Yona lɛda Bulu asʋn ɔkan suna amʋ́ a, bɛdamli klʋntɔ ba Bulu wa. Mlɩkɩ, ɔha ánɩ́ ɔdʋn Yona onuto lɩɩ nfɩ a.

⁴² Seba owie tsɩhɛ ɔbɔ́kʋsʋ lɩɩ Bulu asʋn ogyikɛ, ha mlɩ ndɛmba-abi anfɩ ɩpɔn. Tsufɛ olotsu ɔsasɩ ɔmá ɩkʋtɔ kein gya ɔkpa ba, bonu Salomo nyansa atosunahɛ. Mlɩkɩ, ɔha ánɩ́ ɔdʋn Salomo lɩɩ nfɩ a.”

Ɔŋɛ Lalahɛ Yinki Ba Ɔhatɔ

⁴³ “Nɩ ɔŋɛ lalahɛ ɩdalɩ ɔhatɔ a, iteyeki ɔsʋlʋkpansʋ dunka ɔkpʋnʋ ɔdakpa, tamɛ ɩtamanya.

⁴⁴ Ɩnʋ ɩtɛblɩ ánɩ́ ibéyinki yɔ mʋ́ woyi dadatɔ. Nɩ ɩsanki yɔ a, itowun ánɩ́ bafɛɩ mʋ́tɔ, la mʋ́tɔ wanklaan, ɩda kpan.

⁴⁵ Iteyinki yɛkpa mʋ́ aba asienɔ ánɩ́ bʋtɔbwɛ lalahɛ dʋn mʋ́, bʋtɛba betsia ɩnʋ. Ɩnʋ ɔha amʋ tsiatɔ teyinta dʋn alɩá igyi yaɩ. Alɩ ɩbɛ́ba ha mlɩ ndɛmba-abi lalahɛ anfɩ nɩ.”

Yesu Abusuanfɔ Onuto

⁴⁶ Brɛá Yesu tra ɔdɛ aha amʋ asʋn bla a, mʋ yin mʋa mʋ apio bɛba bɛlɩɩ kpankpa, bʋdedunka ánɩ́ bɛ́bla mʋ asʋn.

⁴⁷ Aha amʋtɔ ɔkʋ lɛbla Yesu ɔbɛɛ, “Kɩ, fʋ yin mʋa fʋ apio bʋlɩɩ kpankpa. Bʋdɛ fʋ dunka, abʋbla fʋ asʋn.”

⁴⁸ Mʋʋ Yesu lɛfɩtɛ mʋ ɔbɛɛ, “Amɛndɩ gyi mɩ yin mʋ́a mɩ apio?”

⁴⁹ Ɩnʋ ɔlɛtɩnkɩ ɩbɩ sɩsɩ mʋ akasɩpʋ amʋ, blɩ ɔbɛɛ, “Mlɩkɩ, mɩ yin mʋ́a mɩ apio gyi aha anfɩ a.

⁵⁰ Ɔhagyiɔha ánɩ́ ɔtɔbwɛ mɩ Sɩ amʋʋ ɔbʋ ɔsʋsʋ amʋ apɛ a, mʋgyi mɩ yin mʋ́a mɩ pio nɩ.”