Mateo 11 - Bulu Ntam Pɔpwɛ mʋ́a Israel Ɩlʋ

Yesu Mʋa Asu Ɔbɔpʋ Yohane

¹ Brɛá Yesu lɔpʋ agyʋma anfɩ wa mʋ akasɩpʋ duanyɔ amʋ ɩbɩtɔ ta a, ɔlɔyɔ yeki Galilea awulusʋ, suna aha atɔ, da asʋn amʋ ɛ ɔkan.

^2-3 Asu Ɔbɔpʋ Yohane da obu, olonu Kristo bwɛhɛ. Mʋ́ sʋ ɔlɔwa mʋ akasɩpʋ abanyɔ sɩsɩ Yesu ɔbɛɛ, bʋyɛfɩtɛ mʋ bɛɛ, “Fʋgyi ɔha amʋʋ ɔbɛ́ba amʋ nɩ, ntɛ akɩ ɔha bamba ɔkpa?”

⁴ Yesu lɛbla amʋ́ ɔbɛɛ, “Mlɩyinki yɛbla Yohane asʋn ánɩ́ mlɩlabonu pʋ́ atɔá mlɩlabowun.

⁵ Mlɩlabowun ánɩ́ ansibi abwiepʋ bʋdɛ atɔ wun, abɔ bʋna. Ɩlɔ pɛpɛ alɔpʋ ɩwɩ dɛplɩ. Ɩsʋ atinpʋ bʋdɛ asʋn nu. Afuli bʋdetsinki, ahianfɔ ɛ bʋdɛ asʋn wanklaan amʋ nu.

⁶ Bulu obóyula ɔha ánɩ́ mɩ bwɛhɛ ɩmɔkʋsʋ lɩɩ mʋsʋ.”

⁷ Brɛá Yohane akasɩpʋ amʋ beyinki bɔyɔ a, Yesu lɔwa tɔɩ tsu Yohane ɩwɩ suna ɔdɔm amʋ bɩ. Ɔbɛɛ, “Brɛá mlɩlɛdalɩ yɔ ɔsʋlʋkpansʋ ɩnʋ a, ntɔ ɔkɩkpa mlɩlɔyɔ? Fɩta ánɩ́ afu dɛ mʋ́ tsʋn loo? Ɛkɛkɛɛkɛ!

⁸ Nɩ megyi mʋ́ a, ntɔ koun ɔkɩkpa mlɩlɔyɔ? Ɔha ánɩ́ ɔdɩdɩ ntsrim? Ɛkɛkɛɛkɛ! Awie woyi atati amʋ odu adɩdapʋ bʋtetsia.

⁹ Mlɩbla mɩ! Bulu ɔnɔsʋ ɔtɔɩpʋ mlɩlɛdalɩ yɛkɩ? Ee, Yohane nɩ. Ɔdʋn Bulu ɔnɔsʋ ɔtɔɩpʋ.

¹⁰ Mʋ ɩwɩ asʋn Bulu lɛblɩ bɔwanlɩn mʋ́ tswɩ bɛɛ, ‘Kɩ, ndɛ obi wa gya fʋ nkpa. Mʋ ɔbɛ́la ɔkpa ha fʋ nɩ.>

¹¹ Ɔnɔkwalɩ ndɛ mlɩ bla mbɛɛ, ɔhagyiɔha ánɩ́ ɔha tsɩhɛ lakɛn kwɩɩ mɔfʋn Asu Ɔbɔpʋ Yohane, tamɛ mʋ ɛ ɔmɔfʋn Bulu iwiegyi amʋtɔ ɔkʋsʋ kʋraa.

¹² Tsu Yohane brɛsʋ bɔtʋ ndɛ a, aha bʋdɛ Bulu iwiegyi amʋ prɩ ɔwʋnlɩnsʋ. Awʋnlɩnpʋ bʋdɛ mʋ́ prɩ.

¹³ Tsufɛ Bulu ɔnɔsʋ atɔɩpʋ amʋ pʋ́ Mose Mbla ánɩ́ ɩda bɔfʋn Yohanesʋ fɛ́ɛ́ bɔtɔɩ tsu Bulu iwiegyi amʋ ɩwɩ.

¹⁴ Nɩ mlɔ́hɔ asʋn amʋ gyi a, mʋmʋ mlɛ́bɩ ánɩ́ mʋgyi Elia. Mʋ ɔbɛ́ba nɩ.

¹⁵ Ɔha ánɩ́ ɔbʋ asʋ onu.

¹⁶ “Sei anfɩ a, amɛndɩ nɔ́pʋ ndɛmba-abi anfɩ kapʋ? Bʋgyi fɛ nyebiá bʋtsie dɩnsʋ bʋdɛ aba kpoli,

¹⁷ blɩ bɛɛ, ‘Anɩlaplei ansigyisʋ, mlɩmɛtsa. Mʋ́ sʋ anɩlala wa awɩrɛhɔ ɩlʋ, tamɛ mlɩmosu.>

¹⁸ Mlɩgyi fɛ nyebi anfɩ, tsufɛ Yohane lɛba a, oletsia klɩ ɔnɔ, omonun nta, tamɛ mlɩaa, ‘Ɔŋɛ lalahɛ bʋ mʋtɔ!>

¹⁹ Tamɛ mɩ, Nyankpʋsa-Mʋ-Bi anfɩ mʋ́ naba ndɛ atɔ gyi, ndɛ nta nun. Mʋ́ ɛ mlɩaa, ‘Mlɩkɩ opotsuapʋ pʋ́ nta ɔbʋpʋ, lakpan abwɛpʋ pʋ́ lampoo ahɔpʋ onyawie.> Tamɛ Bulu ɔha tsiatɔ tɛlɛ mʋ nyansa ɔwan.”

Aha Ánɩ́ Bʋmɛdamli Klʋntɔ Asʋngyi

²⁰ Yesu lɔpʋ ɔblɔ tɔɩ tsu awulu akʋ ɩwɩ. Awulu amʋá ɔlɔbwɛ ofula akpɔnkpɔntɩ mʋ́tɔ, tamɛ bʋmɛdamli klʋntɔ amʋ.

²¹ Ɔbɛɛ, “Korasinfɔ, mlɩgyɔwɩ. Betsaidafɔ, mlɩgyɔwɩ nɩ. Nɩ Tiro pʋ́ Sidon awulu lalahɛ amʋtɔ nɔbwɛ ofula akpɔnkpɔntɩ anfɩ nɔbwɛ mlɩtɔ a, tɛkɩ bɛdamli klʋntɔ dodoodo. Tɛkɩ bʋda akpekpetɔ, bakpa nsuo wa nwuntɔ pʋsuna ánɩ́ badamli klʋntɔ.

²² Mlɩbɩá Bulu ɔbɛ́bɩtɩ mlɩ ɩsʋ mʋ asʋn ogyikɛ dʋn Tiro mʋ́a Sidonfɔ.

²³ Mlɩ Kapernaumfɔ, mlɩdekle mlɩaa mlotsu ɩwɩ fʋa alɩɩ yɔwɔ ɔsʋsʋ? Ɛkɛkɛɛkɛ! Bulu ɔbɛ́ba mlɩ asɩ yowie afulitɔ. Tsufɛ nɩ Sodom wulutɔ nɔbwɛ ofula akpɔnkpɔntɩ anfɩ odu a, tɛkɩ wulu amʋ ɩtra bʋ ɩnʋ bɔtʋ ndɛ.

²⁴ Mlɩkaɩn ánɩ́ Bulu obówun Sodomfɔ nwɛ asʋn ogyikɛ amʋ dʋn mlɩ.”

Mlɩbɛda Ɔkpʋnʋ Mɩ Wa

²⁵ Alɩ brɛ amʋtɔ a, Yesu lɔbɔ mpaɩ blɩ ɔbɛɛ, “Mɩ Sɩ, ɔsʋ mʋ́a asɩ Owie! Nɛda fʋ ɩpan ánɩ́ falɛ tɔá fɔpʋŋain anyansapʋ pʋ́ asʋn abɩpʋ ɔwan suna aha ánɩ́ bʋmeyin ɔlala, bʋgyi fɛ nyebi.

²⁶ Ee, Mɩ Sɩ! Alɩ fʋdekle fɛɛ ɩba mʋ́tɔ nɩ.”

²⁷ “Mɩ Sɩ lɔpʋ togyitɔ wa mɩ ɩbɩtɔ. Ɔhaa meyin Obi amʋ, nkɛtɩ Ɔsɩ amʋ nkʋlɛ. Ɔhaa meyin Ɔsɩ amʋ ɛ, nkɛtɩ Obi amʋ pʋ́ ɔha ánɩ́ Obi amʋ latsula ánɩ́ ɔbɛ́lɛ mʋ suna.”

²⁸ “Mlɩba mɩ wa, mlɩ aha ánɩ́ ɩlapian mlɩ, mlɩ atɔ sʋrahɛ dɛ mlɩ dʋn. Nɛ́ha mlɛ́da ɔkpʋnʋ.

²⁹ Mlɩba ɩwɩasɩ ha mɩ, amlɩsuan mɩ, tsufɛ nɛba ɩwɩasɩ, nolwii, mɛnɩ mlénya iwilwii.

³⁰ Tsufɛ mɩ wa tsia ɩbʋ atsialɛ. Mɩ atɔ sʋrahɛ ɛ mɔ́ɔdʋn mlɩ sʋra.”