Mateo 10 - Bulu Ntam Pɔpwɛ mʋ́a Israel Ɩlʋ

Akasɩpʋ Amʋ Ada

¹ Yesu lɛtɩ mʋ akasɩpʋ duanyɔ amʋ, ɔlɛha amʋ́ tumi ánɩ́ bʋgyi ɔŋɛ lalahɛsʋ. Bʋgya amʋ́ lɛ ahatɔ, abʋtsa ɩlɔ mʋ́a ɩwɩɔsɩn kugyikʋ.

² Sumbi ayɔpʋ duanyɔ amʋ ada nɩ: Ogyankpapʋ gyi Simon ánɩ́ bʋtɛtɩ mʋ Petro mʋa mʋ pio Andrea. Yakobo mʋa mʋ pio Yohane ánɩ́ bʋgyi Sebedeo abi;

³ Filipo, Bartolomeo, Toma, lampoo ɔhɔpʋ Mateo, Alfeo mʋ bi Yakobo, Tadeo,

⁴ Simon ánɩ́ ogyi ɩwɩsʋtsia adunkapʋ ɔpasuatɔ ɔha pʋ́ Yuda Iskariot ánɩ́ ɔlɛlɛ Yesu ha.

Akasɩpʋ Duanyɔ Amʋ Sumbiwa

⁵ Ɔlɔwa sumbi ayɔpʋ duanyɔ amʋ sɩsɩ, wa mbla ha amʋ́ ɔbɛɛ, “Mlɩmáyɔ aha ánɩ́ bʋmegyi Yudafɔ ɔsʋlʋ pʋ́ Samariafɔ awulu kʋkʋsʋ.

⁶ Mboun mlɩyɔ Israelfɔ wa. Bʋgyi fɛ akufa ánɩ́ bafwɩ.

⁷ Nɩ mlɔyɔ a, mlɩda asʋn amʋ ɔkan mlɩaa, ‘Bulu iwiegyi amʋ lawie woyi ta.>

⁸ Mlɩtsa ɩlɔ, amlɩtsinki afuli. Mlɩtsa ɩlɔ pɛpɛ alɔpʋ, amlɩgya ɔŋɛ lalahɛ lɛ ahatɔ. Mlɩmáhɔ amʋ́ tɔtɔ. Mlɩbwɛ mʋ́ pʋkie amʋ́, fɛ alɩá napʋkie mlɩ.

⁹ Mlɩmátsu sika kʋkʋʋkʋ wa mlɩ akɛntɛtɔ.

¹⁰ Mlɩmátsu akpankogyo ánɩ́ mlɔ́pʋ atɔ wa mʋ́tɔ ha ɔkpa amʋ tu. Mlɩmátsu atadɩɛ nyɔsɩ, ntʋkʋta pʋ́ oyi yiahɛ. Tsufɛ agyʋma ɔyɔpʋ bʋtɛha atogyihɛ.

¹¹ “Nɩ mlɔyɔswɩɩ wulu kugyikʋsʋ a, mlɩdunka ɔha wanklaan, amlɩswɩɩ mʋ wa. Mlɩtsia ɩnʋ kpɛfʋn ɛkɛá mlɛ́natɩ.

^12-13 Nɩ mlowie-woyitɔ ɩnʋ a, mlɩha amʋ́ itsia mlɩaa, ‘Bulu ɔha mlɩ iwilwii.> Nɩ woyi amʋtɔfɔ bɔhɔ mlɩ a, mlɩ oyula amʋ isin amʋ́sʋ. Tamɛ nɩ bʋmɔhɔ mlɩ a, mʋmʋ mlɩ oyula amʋ ɩsanki ba mlɩsʋ.

¹⁴ Nɩ bʋmɔhɔ mlɩ, ntɛ nu mlɩ asʋn a, mlɩdalɩ woyi ntɛ wulu amʋtɔ, amlɩkpakpa mlɩ ayabitɔ-ɩsɩ wʋlɩ ɩnʋ.

¹⁵ Ɔnɔkwalɩ ndɛ mlɩ bla mbɛɛ, Bulu ɔbɛ́bɩtɩ amʋ́ ɩsʋ dʋn Sodom mʋ́a Gomorafɔ mʋ asʋn ogyikɛ amʋ.”

Ɩwɩɔsɩn Ánɩ́ Ɩbɛ́ba Sumbi Ayɔpʋ Amʋsʋ

¹⁶ Ɔlɛtra bla amʋ́ ɔbɛɛ, “Mlɩbɩá ndɛ mlɩ wa fɛ akufa ánɩ́ bɔyɔ nkpatakutɔ. Mlɩfwifwi ansɩ fɛ awɔ, amlɩha mlɩ ɩwɩ ɩtɩn fɛ alɔpɔ.

¹⁷ Mlɩkɩ mlɩ ɩwɩ wanklaan anyankpʋsasʋ. Tsufɛ bɛ́kɩta mlɩ yaa asʋn ogyikpa, nwɛn mlɩ atɔ amʋ́ ofiakpa.

¹⁸ Mɩ sʋ bɛ́kpa mlɩ ya ɔmásʋ agyipʋ pʋ́ awie ansɩtɔ, mɛnɩ mlégyi mɩ ɩwɩ adansɩɛ suna amʋ́a ɔmátɔfɔ.

¹⁹ Nɩ bɛkɩta mlɩ ya a, mlɩmágywɩɩn asʋn ánɩ́ mlɛ́blɩ pʋ́ alɩá mlɛ́lɛ mʋ́ ɔnɔ. Bɔ́pʋ asʋn ánɩ́ mlɛ́blɩ brɛ amʋtɔ wa mlɩ ɔnɔ.

²⁰ Tsufɛ megyi mlɩ ɔbɔ́tɔɩ. Mlɩ Sɩ Ɔŋɛ amʋ ɔbɔ́tɔɩ tsʋn mlɩsʋ.

²¹ “Apio bɛ́lɛ amʋ́ apio ha lowu. Abi asɩ bɛ́lɛ amʋ́ abi ha. Abi ɛ bɔ́kʋsʋ lɩɩ amʋ́ akwɩɩpʋsʋ, ha bɔ́mɔ amʋ́.

²² Mɩ sʋ aha fɛ́ɛ́ bólu mlɩ, tamɛ nɩ mlɛ́talɩ wa klʋn lɩɩ kinkiinkin yɔfʋn mʋ́ ɔnɔmɔ a, Bulu ɔbɔ́hɔ mlɩ nkpa.

²³ Nɩ bʋdɩn mlɩsʋ wulu kʋtɔ a, mlɩsrɩ yɔ wulu bambatɔ. Ɔnɔkwalɩ ndɛ mlɩ bla. Mlɩméeki Israel awulu amʋ fɛ́ɛ́sʋ ta asa mɩ, Nyankpʋsa-Mʋ-Bi anfɩ néyinki ba.

²⁴ “Ɔkasɩpʋ tamadʋn mʋ osunapʋ. Osumpʋ ɛ tamadʋn mʋ wie.

²⁵ Ɩbɔ́wa alɛ nɩ ɔkasɩpʋ ɔbɔ́bwɛ fɛ mʋ osunapʋ, osumpʋ ɛ ɔbɔ́bwɛ fɛ mʋ wie. Nɩ batalɩ bʋdɛ woyi mʋ wie amʋ tɩ bɛɛ, ‘Ɔbʋnsam> ntɛ ‘Beelsebul> a, mʋmʋ ɩda lalahɛ mɔmʋ bʋmɔ́ɔpʋtɩ mʋ woyitɔ atsiapʋ mʋ́?

Ɔha Ánɩ́ Abénya Ifu

²⁶ “Tamɛ mlɩmánya ifu. Tɔtɔ má ɩnʋá babun atɔ mʋ́sʋ ánɩ́ Bulu móobwii mʋ́sʋ. Togyitɔ ɛ ma ɩnʋá ileŋain ánɩ́ ɩmɛ́ɛlɩn ɔwan.

²⁷ Nɩ nɛlɛ atɔ suna mlɩ onye a, mlɩkplʋn blɩ mʋ́ ɔpa. Mlɩda asʋn ánɩ́ nɛbla mlɩ nklobitɔ ɛ ɔkan.

²⁸ Mlɩmánya nyankpʋsa ifu. Ɔbɛ́talɩ mɔ mlɩ ɔyʋlʋ, tamɛ ɔmɛ́ɛtalɩ mɔ mlɩ ɔkla. Mboun ɔha ánɩ́ mlɩnya ifu gyi Bulu. Mʋ ɔbɛ́talɩ yinta ɔyʋlʋ mʋ́a ɔkla amʋ fɛ́ɛ́ ɩsʋbɩtɩ ogya ánɩ́ ɩtamaduntɔ.

²⁹ Megyi kaplɛ bʋtɛfɛ akensire anyɔ kɛkɛ? Tamɛ amʋ́tɔ ɔkʋkʋ tamakpada ɔsʋlʋtɔ ánɩ́ mlɩ Sɩ amʋ meyin mʋ́ ɩwɩ.

³⁰ Tsufɛ Bulu yin mlɩ nwunsʋ-imi kʋraa klatɔ.

³¹ Mʋ́ sʋ mlɩmánya ifu, tsufɛ mlɩbʋ ibia dʋn akensire tsɔtsɔɔtsɔ.”

Adansɩɛgyi Pʋ́ Asʋnkina

³² “Nɩ ɔkʋ lɛtalɩ gyi mɩ ɩwɩ adansɩɛ ahatɔ a, mɩ ɛ négyi mʋ ɩwɩ adansɩɛ suna mɩ Sɩ ɔsʋsʋ.

³³ Tamɛ nɩ ɔkʋ lekina mɩ ahatɔ a, mɩ ɛ nékina mʋ mɩ Sɩ ansɩtɔ ɔsʋsʋ.

Ipian Yesu Lɔpʋba, Megyi Iwilwii

³⁴ “Ɩmábwɛ mlɩ fɛ iwilwii nɔpʋba ɔsʋlʋ anfɩsʋ. Megyi iwilwii, mboun ɔdayi ɩya anyɔ nɔpʋba.

³⁵ Tsufɛ abi yinhɛ mʋ́a amʋ́ asɩ nsɩnɛ béyinta. Abi tsɩhɛ mʋ́a amʋ́ ayin ɛ nsɩnɛ béyinta. Osia tsɩhɛ mʋ́a mʋ sia tsɩhɛnyɔ ɛ nsɩnɛ béyinta.

³⁶ Ɔha alupʋ bótsu mʋ woyitɔ.

³⁷ “Ɔha ánɩ́ ɔtɔdwɛ mʋ sɩ ntɛ mʋ yin dʋn mɩ mɔfʋn ánɩ́ ɔbɔ́bwɛ mɩ ɔkasɩpʋ. Ɔha ánɩ́ ɔtɔdwɛ mʋ bi tsɩhɛ, ntɛ mʋ bi yinhɛ dʋn mɩ ɛ mɔfʋn ánɩ́ ɔbɔ́bwɛ mɩ ɔkasɩpʋ.

³⁸ Ɔha ánɩ́ omotsu mʋ oyikpalihɛ bobuo mɩ ɛ mɔfʋn ánɩ́ ɔbɔ́bwɛ mɩ ɔkasɩpʋ.

³⁹ Nɩ ɔkʋ lɛprɩ mʋ nkpa a, ɔbɔ́hʋlɩ mʋ́. Nɩ ɔkʋ ɛ lɔhʋlɩ mʋ nkpa mɩ sʋ a, obénya mʋ́.

Yilebwɛ Ɩwɩ Ɩkɔka

⁴⁰ “Ɔha ánɩ́ ɔlɔhɔ mlɩ lahɔ mɩ. Nɩ ɔkʋ lɔhɔ mɩ ɛ a, alahɔ mɩ Sɩ amʋʋ ɔlɔwa mɩ amʋ.

⁴¹ Nɩ fɔhɔ Bulu ɔnɔsʋ ɔtɔɩpʋ ɔfɔɔ a, Bulu ɔnɔsʋ ɔtɔɩpʋ oyula fénya. Ɔha ánɩ́ ɔlɔhɔ yile ɔbwɛpʋ ɛ ɔfɔɔ obénya yile ɔbwɛpʋ oyula.

⁴² Ɔnɔkwalɩ ndɛ mlɩ bla. Ɔhagyiɔha ánɩ́ ɔlɛha mɩ akasɩpʋtɔ ɔkʋsʋ kʋraa ntsu-owebi ɔbɔ olonun a, ɔmɔ́ɔhʋlɩ mʋ ɩpan.”