Mateo 1 - Bulu Ntam Pɔpwɛ mʋ́a Israel Ɩlʋ

Yesu Anain Otuntufla

¹ Yesu Kristo, Owie Dawid mʋ na, Abraham mʋ na amʋ otuntufla nɩ.

² Abraham lɔkwɩɩ Isakɩ. Isakɩ lɔkwɩɩ Yakob. Yakob lɔkwɩɩ Yuda mʋa mʋ apio yinhɛ

³ Yuda lɔkwɩɩ Peres mʋa Sera. Amʋ́ yin gyi Tamar. Peres lɔkwɩɩ Hesron. Hesron lɔkwɩɩ Ram.

⁴ Ram lɔkwɩɩ Aminadab. Aminadab lɔkwɩɩ Nahson. Nahson lɔkwɩɩ Salmon.

⁵ Salmon lɔkwɩɩ Boas. Boas mʋ yin gyi Rahab. Boas lɔkwɩɩ Obed. Obed mʋ yin gyi Rut. Obed lɔkwɩɩ Yisai.

⁶ Yisai lɔkwɩɩ Owie Dawid. Owie Dawid lɔkwɩɩ Salomo. Salomo mʋ yin gyi ɔtsɩ ɔkʋá tɛkɩ ogyi Uria mʋ ka.

⁷ Salomo lɔkwɩɩ Rehabeam. Rehabeam lɔkwɩɩ Abia. Abia lɔkwɩɩ Asa.

⁸ Asa lɔkwɩɩ Yehosafat. Yehosafat lɔkwɩɩ Yoram. Yoram lɔkwɩɩ Usia.

⁹ Usia lɔkwɩɩ Yotam. Yotam lɔkwɩɩ Ahas. Ahas lɔkwɩɩ Hiskia.

¹⁰ Hiskia lɔkwɩɩ Manase. Manase lɔkwɩɩ Amon. Amon lɔkwɩɩ Yosia.

¹¹ Yosia lɔkwɩɩ Yekonia mʋa mʋ apio yinhɛ. Mʋ brɛsʋ bɛkɩta Israelfɔ, hɩɛ amʋ́ bɛɛ bʋyetsia Babilon ɔmátɔ nɩ.

¹² Amʋ́ Babilon yɔtɔ a, Yekonia lɔkwɩɩ Sealtiel. Sealtiel lɔkwɩɩ Serubabel.

¹³ Serubabel lɔkwɩɩ Abihud. Abihud lɔkwɩɩ Eliakim. Eliakim lɔkwɩɩ Asor.

¹⁴ Asor lɔkwɩɩ Sadok. Sadok lɔkwɩɩ Akim. Akim lɔkwɩɩ Elihud.

¹⁵ Elihud lɔkwɩɩ Eleasar. Eleasar lɔkwɩɩ Matan. Matan lɔkwɩɩ Yakob.

¹⁶ Yakob lɔkwɩɩ Yosef, Yosef letsia Maria. Maria lɔkwɩɩ Yesu. Yesu gyi Kristo, (ɔha amʋʋ Bulu lada mʋ ofuli amʋ) nɩ.

¹⁷ Mʋ́ sʋ tsu Abrahamsʋ bɔtʋ Owie Dawidsʋ bʋgyi anain otuntufla duana. Tsu Dawidsʋ bɔtʋ brɛá bɔyɔ Babilon ɔmátɔ ɛ bʋgyi anain otuntufla duana. Asa tsu amʋ́ Babilon yɔtɔ bɔtʋ Kristo, (ɔha amʋʋ Bulu lada mʋ ofuli amʋ) kwɩɩsʋ ɛ bʋgyi anain otuntufla duana.

Yesu Kristo Kwɩɩ

¹⁸ Ɔkpa anfɩsʋ Yesu Kristo kwɩɩ lɔtsʋn nɩ. Bɔpʋ Maria ha Yosef bɛɛ otsia. Tamɛ asa bétsia, abʋfia ɔtsɩ mʋa oyin a, bowun ánɩ́ Maria dɛ ɔmɛ́ Ɔŋɛ Wankɩhɛ tumitɔ.

¹⁹ Mʋ klu Yosef a, mʋ asʋn da ɔkpa, tamɛ omekleá ɔbɔ́wa mʋ pɛlɩtɔ. Mʋ́ sʋ ɔlɔbwɛ agywɩɩn ánɩ́ obékina mʋ ŋaintɔ.

²⁰ Tamɛ brɛá ɔdɛ mʋ́ agywɩɩn bwɛ a, kɩ, Bulu-ɔbɔpʋ ɔkʋ lɛlɛ ɩwɩ ɔwan suna mʋ okudetɔ, bla mʋ ɔbɛɛ, “Yosef, Dawid mʋ na, mánya pɛlɩá fɛ́kpa fʋ ka Maria ba fʋ wa, tsufɛ ɔmɛ́ amʋʋ ɔdɛ amʋ itsu Ɔŋɛ Wankɩhɛ tumitɔ.

²¹ Ɔbɔ́kwɩɩ obiyimbi, bɛ́dɩnka mʋ ɩda Yesu. (Mʋ́ asɩ gyi, ‘Ɔlɛpʋ.>) Tsufɛ mʋ ɔbɛ́lɛ mʋ aha tsu amʋ́ lakpantɔ nɩ.”

²² Ɩnɩ lɛha Bulu asʋn amʋʋ ɔlɛblɩ tsʋn mʋ ɔnɔsʋ ɔtɔɩpʋsʋ amʋ ɩlɛba mʋ́tɔ.

²³ Ɔbɛɛ, “Kɩ, obitebiá ɔmɔkʋyɔ oyin wa kɩ obénya ɔmɛ́. Ɔbɔ́kwɩɩ obiyimbi, bɛ́dɩnka mʋ ɩda Imanuel.” (Mʋ́ asɩ gyi, “Bulu bʋ anɩ wa.”)

²⁴ Brɛá Yosef letsinki a, olegyi asʋn amʋʋ Bulu-ɔbɔpʋ amʋ lɛbla mʋ amʋsʋ. Oletsia Maria, kpaɩn mʋ.

²⁵ Tamɛ ɔmɔpʋ ɩbɩ da Maria, kpɛfʋn brɛá ɔlɔkwɩɩ mʋ bi yinhɛ gyankpapʋ, ɔlɛdɩnka mʋ ɩda Yesu.