Marko 7 - Bulu Ntam Pɔpwɛ mʋ́a Israel Ɩlʋ

Atɩtɩfɔ Amandɩɛ

¹ Farisifɔ pʋ́ Mose mbla asunapʋ akʋ botsu Yerusalem ba befia Yesu wa.

² Mʋʋ bowun ánɩ́ mʋ akasɩpʋ amʋ akʋ bʋmɔfwɩ ɩbɩ amandɩɛ ɔkpasʋ asa bʋdɛ atɔ gyi.

³ (Tsufɛ Yudafɔ, titriu Farisifɔ bʋmɔkʋsi amʋ́ anain amandɩɛtɔ. Mʋ́ sʋ nɩ bʋmɔkʋfwɩ ɩbɩ amandɩɛ ɔkpasʋ a, bʋtamagyi atɔ.

⁴ Alɩ kɛn nɩ bʋmɔkʋgyʋra ɩwɩ a, bʋtamagyi tɔá bɔpʋtsua biasʋ ba nɩ. Amandɩɛ bamba kʋ aná ɛ bʋ ɩnʋ, bʋtra bʋdɛ mʋ́tɔ tsu nwɛ-nun-ntsu, nlɔ́ pʋ́ nlanka ɩwɩ.)

⁵ Mʋ́ sʋ amʋ́a Mose mbla asunapʋ bɛfɩtɛ Yesu bɛɛ, “Ntogyi sʋ fʋ akasɩpʋ amʋ bʋtamagyi anɩ anain amandɩɛsʋ, bʋmɔfwɩ ɩbɩ amandɩɛ ɔkpasʋ asa abʋgyi atɔ?”

⁶ Yesu lɛlɛ mʋ́ ɔnɔ ɔbɛɛ, “Ɔnɔkwalɩ Bulu ɔnɔsʋ ɔtɔɩpʋ Yesaia lɛblɩ tswɩ tsu mlɩ apinabwɛbi abwɛpʋ anfɩ ɩwɩ ɔbɛɛ, ‘Aha anfɩ bʋdɛpʋ amʋ́ ɔnɔ bu mɩ, tamɛ amʋ́ klʋn bʋ ɩfɔ mɩ wa.

⁷ Kpaalɩ bʋdɛ mɩ sum, tsufɛ basi Bulu mbla tswɩ, yɔ bʋdɛ anyankpʋsa mbla suna.>

⁸ “Mlɩlasi Bulu mbla amʋ tswɩ, mlɩdɛ mlɩ anain amandɩɛtɔ.”

⁹ Ɩnʋ ɔlɛbla amʋ́ ɔbɛɛ, “Mlɩlapina si Bulu mbla amʋ tswɩ nyansatɔ, mɛnɩ mlégyi mlɩ onuto amandɩɛsʋ.

¹⁰ Tsufɛ Mose lɔwanlɩn wa Bulu mbla amʋtɔ ɔbɛɛ, ‘Bu fʋ sɩ mʋ́a fʋ yin.> Ɔlɛtra wanlɩn ɔbɛɛ, ‘Nɩ ɔkʋ lɛblɩ asʋkpan tsu mʋ sɩ ntɛ mʋ yin ɩwɩ a, bʋmɔ mʋ.>

¹¹ Tamɛ mlɩ mʋ́ mlɩaa, ɔha ɔbɛ́talɩ bla mʋ sɩ ntɛ mʋ yin ɔbɛɛ, ‘Tɔá tɛkɩ nɔ́pʋha fʋ a, napʋbwɛ Koban.>

¹² Mlɩlaha aha bʋmɛdɛ tɔtɔ bwɛ ha amʋ́ akwɩɩpʋ.

¹³ Mlɩ anain amandɩɛ sʋ mlɩtra mlɩmɛdɛ Bulu mblasʋ gyi. Ntobi tsɔtsɔɔtsɔ ɛ bʋ ɩnʋá mlɩtra mlɩdɛbwɛ tsɩa ɩnɩtɔ.”

Tɔá Ɩtɔkpɔɩ Ɔha Bulu Ansɩtɔ

¹⁴ Yesu lɛtra tɩ ɔdɔm amʋ ba mʋ ɩwɩ wa, ɔlɛbla amʋ́ ɔbɛɛ, “Mlɩ fɛ́ɛ́ mlɩyaa asʋ amlɩnu ɩnɩ asɩ!

^15-16 Megyi tɔá ɔha tegyi tɔkpɔɩ mʋ Bulu ansɩtɔ. Mboun mʋ́á ɩtɛdalɩ tsu mʋ ɔnɔ.”

¹⁷ Brɛá ɔlɛnatɩ si ɔdɔm amʋ yɔ woyitɔ a, mʋ akasɩpʋ amʋ bɛfɩtɛ mʋ yebi anfɩ asɩ.

¹⁸ Ɔlɛlɛ mʋ́ ɔnɔ ɔbɛɛ, “Mlɩ ɛ mlɩtamanu asʋn asɩ? Mlɩmeyin ánɩ́ tɔá itowie ɔha ɔnɔ tamakpɔɩ mʋ Bulu ansɩtɔ?

¹⁹ Tsufɛ megyi mʋ klʋntɔ itowie, mboun mʋ iputɔ itowie, ɔtɛyɛlɛ mʋ́ wa ɔkpʋntɔ.” (Yesu lɛlɛ mʋ́tɔ pʋsuna ánɩ́ atogyihɛ kugyikʋ ɩwɩ lɛtɩn.)

²⁰ Ɩnʋ ɔlɛbla amʋ́ ɔbɛɛ, “Tɔá ɩtɛdalɩ tsu ɔha klʋntɔ tɔkpɔɩ mʋ Bulu ansɩtɔ.

²¹ Tsufɛ ɔha klʋntɔ agywɩɩn lalahɛ kugyikʋ tɛdalɩ tsu. Mʋ́tɛha mʋ ɔtɔwa atsɩ mʋ́a ayin asʋn, otowi atɔ, ɔtɔmɔ ɔha, ɔtɔtɔ mbʋa,

²² ɔtɔwa ɔnsɩpɛ, ɔtɔbwɛ lalahɛ, ɔtɛmlɛ aha, ɔtɔwa hakpan, ɔtɔwa olu, otetsii ɔha, ototsu ɩwɩ, ɔtɔbwɛ mimlala.

²³ Ɔha klʋntɔ, atɔ lalahɛ anfɩ fɛ́ɛ́ tɛdalɩ tsu. Mʋ́tɔkpɔɩ mʋ nɩ.”

Ɔtsɩ Ɔkʋá Omegyi Yudayin Hogyi

²⁴ Yesu lɛnatɩ ɩnʋ yɔ Tiro nsaɩntɔ, ɔlɔyɔswɩɩ woyi kʋtɔ. Omedekle ɔbɛɛ aha bʋbɩá maba ɩnʋ, tamɛ ɔmɛtalɩ ŋain mʋ ɩwɩ.

²⁵ Ɔŋɛ lalahɛ bʋ ɔtsɩ ɔkʋ mʋ bi tsɩhɛtɔ. Olenya nu Yesu nka alɩ, ɔlɔwa ɔsa bɛda akpawunu mʋ ayabitɔ.

²⁶ Grikiyintse ɔtsɩ anfɩ gyi. Bɔkwɩɩ mʋ Siro Foenike ɔsʋlʋsʋ. Olokokoli Yesu ɔbɛɛ, ogya ɔŋɛ lalahɛ amʋ lɛ mʋ bi amʋtɔ.

²⁷ Tamɛ Yesu lɛbla mʋ ɔbɛɛ, “Ha nyebi amʋ abʋmwɛ asa, tsufɛ ɩma alɛá fɔ́swɩɩ nyebi atogyihɛ pʋha akɩaɩ.”

²⁸ Ɔtsɩ amʋ lɛlɛ mʋ́ ɔnɔ ɔbɛɛ, “Owie, ɩbʋ mʋ́tɔ alɩ, tamɛ akɩaɩ ánɩ́ bʋda ɔpʋnʋ amʋ asɩ ɛ bʋtegyi nyebi atogyihɛ mpupubiá ɩtɛkpakpa bun amʋ́ ɔpʋnʋasɩ.”

²⁹ Mʋʋ Yesu lɛbla mʋ ɔbɛɛ, “Fabɩ lɛ mʋ́ ɔnɔ. Mʋ́ sʋ natɩ, ɔŋɛ lalahɛ amʋ ladalɩ fʋ bi tsɩhɛ amʋtɔ.”

³⁰ Brɛá ɔtsɩ amʋ lɔyɔ woyitɔ a, olowun ánɩ́ ɔŋɛ lalahɛ amʋ ladalɩ mʋ bi amʋtɔ, alasi ɔda mpasʋ.

Ɩsʋtin Ɔkʋá Ɔtamatɔɩ Wanklaan Tsa

³¹ Yesu lɛnatɩ Tiro ɩnʋ yɔ Sidon yobomli kplɩ ba Dekapoli awulu amʋ nsaɩntɔ asa ɔlɛladʋ yɔ Galilea ɔpʋ ɔnɔ.

³² Bɔpʋ ɩsʋtin ɔkʋ ba mʋ, ɔtamatalɩ tɔɩ wanklaan. Bokokoli mʋ bɛɛ, ɔpʋ ɩbɩ dɩnka mʋsʋ.

³³ Mʋʋ ɔlɛkpa oyin amʋ ya ɩfʋntɔ, pʋ mʋ asrebi wa oyin amʋ asʋtɔ, olotu atsʋnɔ dɩnka mʋ osrebisʋ, pʋda oyin amʋ ɔdandʋsʋ.

³⁴ Ɩnʋ olotsu ansɩ fʋa kɩ ɔsʋsʋ, lʋn ɔŋɛ fʋ. Mʋʋ ɔlɛblɩ ɔbɛɛ, “Hefata.” Hebri ɔblɩtɔ. Mʋ́ asɩ gyi, “Finki.”

³⁵ Ɩnʋnʋ mʋ asʋ lefinki, mʋ ɔdandʋ ɛ lɛsankɩ; ɔlɔtɔɩ wanklaan.

³⁶ Mʋʋ Yesu lɛda aha amʋ ɔla kpakpaakpa ɔbɛɛ, bʋmábla ɔhaa. Tamɛ tse dʋdʋʋdʋá ɔlɛda amʋ́ ɔla a, alɩ kɛn bɛda asʋn amʋ ɔkan nɩ.

³⁷ Ɔnɔ lɛhɩɛ bwie amʋ́, bɛblɩ bɛɛ, “Alabwɛ togyitɔ wanklaan. Alaha asʋtin bʋdɛ asʋn nu, amumu ɛ bʋdɛtɔɩ.”