Marko 6 - Bulu Ntam Pɔpwɛ mʋ́a Israel Ɩlʋ

Bʋmɔhɔ Yesu Mʋ Wulutɔ

¹ Yesu mʋa mʋ akasɩpʋ bɛdalɩ ɔmá amʋtɔ yinki yɔ mʋ wulutɔ.

² Ɔkpʋnʋ ɔdakɛ lenya fʋn alɩ ɔlɔyɔ ɔdɛ atɔ suna Yudafɔ ofiakpa. Mʋ atosunahɛ lɛha ɔnɔ lobwie aha tsɔtsɔɔtsɔá bonu mʋ́. Mʋ́ sʋ bɛfɩtɛ aba bɛɛ, “Nkʋnʋ olenya nyansa mʋ́a ofulabwɛ tumi anfɩ ɛ tsu?

³ Megyi atɔ osrepʋ amʋ nɩ. Megyi mʋ yin gyi Maria, mʋ apio yinhɛ gyi Yakobo, Yosef, Yuda pʋ́ Simon? Yɛ anɩa mʋ apio tsɩhɛ ɛ tsie nfɩ a?” Benya ɔblɔ mʋsʋ.

⁴ Yesu lɛbla amʋ́ ɔbɛɛ, “Aha bʋtobu Bulu ɔnɔsʋ ɔtɔɩpʋ ɔtɩnɛgyiɔtɩnɛ. Tamɛ mʋ wulutɔfɔ, mʋ abusuanfɔ pʋ́ mʋ woyitɔ aha mʋ́ bʋtamabu mʋ.”

⁵ Ɩnɩá bʋmɔhɔ mʋ gyi sʋ a, ɔmɛtalɩ bwɛ ofula kʋkʋ, dʋn aha kpalobi akʋsʋ ɔlɔpʋ ɩbɩ dɩnka tsa amʋ́ ɩlɔ.

⁶ Ɩlɔwa mʋ ifu ánɩ́ bʋmɔhɔ mʋ gyi. Yesu leki nkuda ánɩ́ ɩbʋ bomli ɩnʋ asɩ, ɔdɛ atɔ suna.

Akasɩpʋ Duanyɔ Amʋ Sumbiwa

⁷ Ɩnʋ ɔlɛtɩ akasɩpʋ duanyɔ amʋ ba mʋ ɩwɩ wa. Mʋʋ ɔlɔwa amʋ́ sumbi abanyɔ-abanyɔ. Ɔlɛha amʋ́ tumiá bɔ́pʋgyi ɔŋɛ lalahɛsʋ.

⁸ Ɔlɛda amʋ́ ɔla ɔbɛɛ, “Mlɩmátsu tɔtɔ kɩta yɔ ɔkpa amʋ, dʋn mlɩ oyi yiahɛ! Mlɩmátsu atogyihɛ ntɛ akpankogyo, ntɛ kɔba kɩta!

⁹ Mlɩwa ntʋkʋta, tamɛ mlɩmátsu atadɩɛ nyɔsɩ kɩta!

¹⁰ Woyigyiwoyiá mlɔ́swɩɩ mʋ́tɔ a, mlɩtsia ɩnʋ yɔfʋn brɛá mlɛdalɩ wulu amʋtɔ.

¹¹ Nɩ mlɔyɔ wulu kʋsʋ, bʋmɔhɔ mlɩ ntɛ bʋmekleá bónu mlɩ atosunahɛ, mlɩdɛdalɩ mʋ́tɔ mlɔyɔ a, mlɩkpakpa mlɩ ayabitɔ-ɩsɩ wʋlɩ ɩnʋ, isuna ánɩ́ bʋmɛbɩ bwɛ.”

¹² Mʋ́ sʋ bɔyɔ yɛda asʋn amʋ ɔkan bɛɛ, aha bʋdamli klʋntɔ.

¹³ Begya ɔŋɛ lalahɛ tsɔtsɔɔtsɔ lɛ ahatɔ, bɛkpa alɔpʋ tsɔtsɔɔtsɔ ɛ ofobi, tsa amʋ́ ɩlɔ.

Asu Ɔbɔpʋ Yohane Lowu

¹⁴ Galilea ɔmásʋ ogyipʋ Herode lonu Yesu ɩwɩ asʋn anfɩ, tsufɛ mʋ ɩdayile dɛ ɔtɩnɛgyiɔtɩnɛ. Akʋ bʋdɛblɩ bɛɛ, “Asu Ɔbɔpʋ Yohane lakʋsʋ tsu afulitɔ. Mʋ́ sʋ ɔdɛ ofula anfɩ odu bwɛ nɩ.”

¹⁵ Tamɛ akʋ ɛ bɛɛ, “Bulu ɔnɔsʋ ɔtɔɩpʋ dada Elia nɩ.” Akʋ ɛ bɛɛ, “Bulu ɔnɔsʋ atɔɩpʋ dada amʋtɔ ɔkʋ nɩ.”

¹⁶ Brɛá Herode lonu asʋn amʋ a, ɔlɛblɩ ɔbɛɛ, “Yohane amʋʋ nɛha bɛtɩn amʋ latsinki tsu afulitɔ.”

^17-18 Herode lɛha bɛkɩta Yohane wa mʋ ɩkan, wa mʋ obu. Tsufɛ oletsia bla Herode ɔbɛɛ, mbla mɛha ɔkpa ánɩ́ obétsia mʋ pio Filipo mʋ ka Herodia amʋʋ otsia amʋ.

¹⁹ Mʋ́ sʋ Herodia lɔhɔ Yohane asʋn wa ɩwɩtɔ. Ɔlɔbwɛ agywɩɩn ánɩ́ ɔbɔ́mɔ mʋ, tamɛ ɔmɛtalɩ, tsufɛ Herode mɛha mʋ́ ɔkpa.

²⁰ Herode yin ánɩ́ Yohane asʋn da ɔkpa, ogyi ɔha wankɩhɛ. Mʋ́ sʋ olenya mʋ ifu, ɔlɛkɩ mʋsʋ wanklaan ánɩ́ tɔtɔ mɔ́ɔbwɛ mʋ. Ɩbʋ mʋ́tɔá Yohane asʋn blɩhɛ tɛhan Herode, tamɛ otekle mʋ́ nu.

²¹ Tɔá Herodia dedunka lɛba mʋ́tɔ ha mʋ. Ɛkɛ ɔkʋá Herode dɛ mʋ ɔkwɩɩkɛ gyi a, ɔlɔtswɩ ɔpʋnʋ, tɩ ahandɛ, ɩsa akɔpʋ dɛhɛn pʋ́ Galileafɔ ahandɛ ba atɔ amʋ ogyikpa.

²² Brɛá Herodia mʋ bi tsɩhɛ lobowie ɔbʋntɔ tsa a, ɩlɔwa Herode mʋa ahandɛ amʋ fɛ́ɛ́ ansigyi. Herode lɛbla mʋ ɔbɛɛ, “Fɩtɛ mɩ togyitɔá fʋdekle, nɛ́ha fʋ.”

²³ Ɩnʋ ɔlɛka ntam ha mʋ ɔbɛɛ, “Nɛ́ha fʋ togyitɔá fɛfɩtɛ mɩ. Nɩ igyi mɩ iwie ogyikpa ɩfʋn kʋraa.”

²⁴ Otsibi amʋ lɛdalɩ yɛfɩtɛ mʋ yin ɔbɛɛ, “Ntɔ nfɩtɛ?” Mʋ yin lɛbla mʋ ɔbɛɛ, “Fɩtɛ Asu Ɔbɔpʋ Yohane nwun.”

²⁵ Ɔsasʋ otsibi amʋ lɛba bɛbla Herode ɔbɛɛ, “Ndekleá fʋpʋ Asu Ɔbɔpʋ Yohane nwun dɩnka ɩlɩnsʋ ha mɩ seseesei.”

²⁶ Asʋn anfɩ lɛhɩɛ han owie amʋ, tamɛ mʋ ntam amʋʋ ɔlɛka, pʋ́ aha amʋʋ bʋbʋ ɩnʋ amʋ sʋ omekleá ɔbɔ́tʋn ntam amʋ.

²⁷ Ɩnʋnʋ ɔlɔwa mʋ aha ɔtɩnpʋ ɔbɛɛ, ɔyɛtɩn Yohane nwun ba mʋ. Ɔlɔyɔ yɛtɩn Yohane nwun obu ɔdɩkpa ɩnʋ.

²⁸ Mʋʋ ɔlɔpʋ nwun amʋ dɩnka ɩlɩnsʋ ba otsibi amʋ, mʋ ɛ ɔlɔpʋya mʋ yin Herodia.

²⁹ Brɛá Yohane akasɩpʋ bonu asʋn anfɩ a, bɛba botsu mʋ satin yopula.

Aha Mpɩm-nu Atogyihɛ Ha

³⁰ Yesu sumbi ayɔpʋ amʋ beyinki ba bɛbla mʋ tɔá bayɛbwɛ pʋ́ mʋ́á bayesuna fɛ́ɛ́.

³¹ Mʋ́ ɔma a, aha bʋna amʋ́ wa alɩɩ, bʋmenya ɔkpa gyi atɔ kʋraa. Mʋ́ sʋ ɔlɛbla amʋ́ ɔbɛɛ, “Mlɩha ayɔ ɩtsɛtɔ flɛɛn, ayɛda ɔkpʋnʋ.”

³² Ɩnʋ bowie ɔklʋntɔ, pʋ ɔkpa bɔyɔ ɩtsɛtɔ ɔtɩnɛkʋ.

³³ Tamɛ aha tsɔtsɔɔtsɔ bowun amʋ́, bɩ ɔtɩnɛá bɔyɔ. Mʋ́ sʋ botsu awulu amʋ fɛ́ɛ́sʋ, tsii ɔsrɩ gyankpa yowie ɔtɩnɛ amʋʋ Yesu aná bɔyɔ amʋ.

³⁴ Brɛá Yesu lɛkplɩ dalɩ ɔklʋn amʋtɔ, wun ɔdɔm kpɔnkpɔɔnkpɔntɩ amʋ a, amʋ́ asʋn lɔwa mʋ nwɛ, tsufɛ bʋgyi fɛ akufa ánɩ́ bʋma ɔkpapʋ. Mʋ́ sʋ olosuna amʋ́ atɔ tsɔtsɔɔtsɔ.

³⁵ Owi lɔpɔn a, akasɩpʋ amʋ bɛba mʋ wa bɛbla mʋ bɛɛ, “Ɩtsɛtɔ nfɩ gyi, owi ɛ lata.

³⁶ Ha amʋ́ abʋyɔ nkuda mʋ́a awuluá ɩbʋ bomli nfɩ asɩ yodunka tɔkʋ gyi.”

³⁷ Tamɛ Yesu lɛlɛ mʋ́ ɔnɔ ɔbɛɛ, “Mlɩdunka atɔ ha amʋ́ abʋgyi.” Mʋʋ bɛfɩtɛ mʋ bɛɛ, “Abɛ́talɩ nya sika hɔ atɔ ha aha anfɩ fɛ́ɛ́ bégyi?”

³⁸ Yesu lɛfɩtɛ amʋ́ ɔbɛɛ, “Bodobodo apin afɩnɩ mlɩbʋ? Mlɩyɔ amlɩyɛkɩ!” Beyinki bɛbla mʋ bɛɛ, “Bodobodo apin anu pʋ́ ntsutso iye bwahɛ anyɔ bʋ ɩnʋ.”

³⁹ Yesu lɛbla amʋ́ ɔbɛɛ, “Mlɩha amʋ́ abʋtsiatsia ɩfa bɔbwɛ amʋsʋ.”

⁴⁰ Betsia asɩ akusʋ-akusʋ, akʋ lafa (100), akʋ ɛ aduenu (50).

⁴¹ Ɩnʋ olotsu bodobodo anu pʋ́ ntsutso iye bwahɛ anyɔ amʋ. Mʋʋ olotsu ansɩ fʋa kɩ ɔsʋsʋ, ɔlɛda Bulu ɩpan. Ɩnʋ olebiabia bodobodo amʋ ha mʋ akasɩpʋ amʋ ɔbɛɛ, bʋye ha amʋ́. Oleye iye bwahɛ anyɔ amʋ ɛ ha amʋ́, bɔpʋha aha amʋ.

⁴² Amʋ́ fɛ́ɛ́ begyi mwɛ sian.

⁴³ Akasɩpʋ amʋ bɔtɔsɩ bodobodo mʋ́a iye sianhɛ amʋ a, ɩlɔbʋla alakpa duanyɔ.

⁴⁴ Ayin ánɩ́ begyi atɔ amʋ nkʋlɛ bʋgyi mpɩm-nu (5,000).

Ɔpʋsʋ Natɩ

⁴⁵ Benya gyi atɔ amʋ ta alɩ, Yesu lɛbla akasɩpʋ amʋ ɔbɛɛ, bʋwie ɔklʋntɔ abʋgyankpa fa ɔpʋ amʋ yɔ Betsaida wulutɔ. Mʋ mʋ́ olesin ɔma si ɔdɔm amʋ ɔkpa.

⁴⁶ Brɛá olesi amʋ́ ɔkpa ta a, ɔlɔdʋ yɔ ɩbʋsʋ yɔbɔ mpaɩ.

⁴⁷ Brɛá owi lɛta, ɔklʋn amʋ lawie ntsu nsɩnɛ a, ilesi Yesu nkʋlɛ ɩbʋ amʋsʋ.

⁴⁸ Ɩnʋ olowun ánɩ́ ɔklʋn amʋ pla dɛ ɔnlɩn wa wa akasɩpʋ amʋ, tsufɛ afu kpɔnkpɔntɩ dɛtsʋn fia amʋ́. Bakɛ-bakɛ a, Yesu lɛnatɩ ntsu amʋsʋ ayabitɔ buo amʋ́, odekle ɔtsʋn amʋ́sʋ.

⁴⁹ Tamɛ brɛá bowun mʋ a, bʋkɩ bɛɛ fuli ogyi. Mʋ́ sʋ bɔsʋra okitikiti.

⁵⁰ Opuni letsii amʋ́ fɛ́ɛ́. Tamɛ ɔlɔwa ɔsa bla amʋ́ ɔbɛɛ, “Mlɩwa klʋn. Mɩ nɩ, mlɩmánya ifu.”

⁵¹ Mʋʋ ɔlɔdʋ wie ɔklʋn amʋtɔ, afu amʋ lɛka itin a. Asʋn anfɩ lɔwa amʋ́ wanwan.

⁵² Amʋ́ klʋntɔ-odwin sʋ bʋmɔkʋnya nu bodobodo ɩwɩ asʋn amʋ asɩ.

Genesaretfɔ Alɔpʋ Tsa

⁵³ Yesu mʋa amʋ́nyɔ bɛfa ɔpʋ amʋ yesi Genesaret otsubunɔ, bɔwa ɔfɛ kɩta ɔklʋn amʋ.

⁵⁴ Benya kplɩ dalɩ ɔklʋn amʋtɔ alɩ aha bowun Yesu, bɩ mʋ ɔtsawʋlɛ pɛ.

⁵⁵ Mʋ́ sʋ bɛsrɩ yotsu amʋ́ alɔpʋ sʋra akpasʋ, tsu ntɩnɛ-ntɩnɛ bɔtʋ mʋ ɩnʋ.

⁵⁶ Ɔtɩnɛgyiɔtɩnɛá Yesu lɔyɔ, igyi wulutɔ ntɛ akuda o a, bɔpʋ amʋ́ alɔpʋ bɔtswɩ brɔnʋsʋ, kokoli mʋ bɛɛ, ɔha alɔpʋ amʋ abʋpʋ ɩbɩ da mʋ atadɩɛ ɔdanʋ kpan. Amʋ́á bɔpʋ ɩbɩ da mʋ́ fɛ́ɛ́ benya ɩlɔtsa.