Marko 5 - Bulu Ntam Pɔpwɛ mʋ́a Israel Ɩlʋ

Ɔŋɛ Lalahɛ Gya Lɛ Ogbedepʋtɔ

¹ Brɛá Yesu mʋa mʋ akasɩpʋ amʋ bowie Galilea ɔpʋ amʋ ɔbɩn Gerasefɔ ɔsʋlʋsʋ a,

² olenya kplɩ dalɩ ɔklʋntɔ alɩ, oyin ɔkʋá ɔŋɛ lalahɛ bʋ mʋtɔ lɛdalɩ tsu afuli opulakpa befia mʋ.

³ Oyin anfɩ lapʋ afuli opulakpa ɩnʋ bwɛ mʋ otsiakpa. Ɔhɩɛ ɔbʋ ɩyɩn. Mʋ́ sʋ ɔhaa tamatra talɩ bwɛ mʋ otsia diin, ntɛ wa mʋ ɩkan.

⁴ Tsufɛ tɛkɩ betsia wa mʋ ayabi pʋ́ mʋ ɩbɩ ɩkan, tamɛ oletsia tɩn mʋ́, biabia ɩkan amʋ tsalɩfwɩ. Ɔhaa ɛ má ɔwʋnlɩn ánɩ́ ɔbɛ́talɩ pɔn mʋ.

⁵ Ekekegyiɛkɛ ɔpa mʋ́a onye fɛ́ɛ́ a, ɔbʋ afuli opulakpa ɩnʋ mʋ́a abʋsʋ, ɔdɛ okitikiti; ɔdɛpʋ abwi tsantsan ɩwɩ.

⁶ Olenya wun Yesu sɩsɩ alɩ, ɔlɛsrɩ yɛda akpawunu mʋ ayabitɔ.

⁷ Mʋʋ ɔlɔsʋra okitikiti kʋklʋkʋʋ ɔbɛɛ, “Ɔsʋsʋʋsʋ Bulu mʋ Bi Yesu, amansʋ igyi? Tanʋ Bulu ánɩ́ fʋmɛ́ɛpɩtɩ mɩ atɔ!”

⁸ Ɔlɛblɩ asʋn anfɩ, tsufɛ Yesu lɛbla mʋ ɔbɛɛ, “Ɔŋɛ lalahɛ, dalɩ oyin anfɩtɔ.”

⁹ Ɩnʋ Yesu lɛfɩtɛ mʋ ɔbɛɛ, “Nkalɩ bʋtɛtɩ fʋ?” Ɔlɛlɛ mʋ́ ɔnɔ ɔbɛɛ, “Mɩ ɩda gyi, ‘Ɔdɔm>, tsufɛ anɩhɩɛ anɩ tsɔ.”

¹⁰ Ɩnʋ ɔŋɛ lalahɛ amʋ bɛhɩɛ kokoli mʋ bɛɛ, ɔmagya amʋ́ lɛ Gerasefɔ ɔsʋlʋ amʋsʋ.

¹¹ Mprakuo tsɔtsɔɔtsɔ akʋ bʋdegyi okuku kʋsʋ ɩnʋ fʋn.

¹² Ɔŋɛ lalahɛ amʋ bokokoli mʋ bɛɛ, ɔha amʋ́ abʋyewie mprakuo amʋtɔ.

¹³ Mʋʋ ɔlɛha amʋ́ ɔkpa. Bɛdalɩ oyin amʋtɔ yowie mprakuoá bɔ́bwɛ fɛ mpɩm-anyɔtɔ (2,000). Amʋ́ fɛ́ɛ́ bɛsrɩ kplɩ okuku amʋ wie ɔpʋ amʋtɔ wuwu.

¹⁴ Mprakuo amʋ akpapʋ bɛsrɩ yɛblɩ asʋn anfɩ ɩlaba anfɩ awulusʋ pʋ́ nkudasɩ fɛ́ɛ́. Aha bɛdalɩ bɛɛ, bɛba bɛkɩ tɔá ɩlaba.

¹⁵ Brɛá bɛba bowie Yesu wa a, bowun ánɩ́ oyin amʋʋ ɔŋɛ lalahɛ betsia mʋtɔ amʋ ansɩtɔ ladɩ, alawa atadɩɛ otsie. Ɩlɔwa amʋ́ ifu.

¹⁶ Aha amʋʋ bowun tɔá ɩlɛba oyin amʋʋ tɛkɩ ɔŋɛ lalahɛ tsie mʋtɔ amʋ pʋ́ mprakuo amʋsʋ amʋ bɛbla amʋ́ tɔá ɩlaba fɛ́ɛ́.

¹⁷ Ɩnʋ bokokoli Yesu bɛɛ, ɔdalɩ amʋ́ ɔsʋlʋsʋ.

¹⁸ Brɛá olowie ɔklʋn amʋtɔ a, oyin amʋʋ tɛkɩ ɔŋɛ lalahɛ tsie mʋtɔ amʋ lokokoli mʋ ɔbɛɛ, ɔha amʋbuo mʋ natɩ.

¹⁹ Tamɛ Yesu mɛha mʋ ɔkpa. Mboun ɔlɛbla mʋ ɔbɛɛ, “Yinki yɔ fʋ apio wa woyitɔ, afʋyɛbla amʋ́ ɩtɔ yileá anɩ Wie Bulu labwɛ ha fʋ, pʋ alɩá alawun fʋ nwɛ.”

²⁰ Mʋ́ sʋ oyin amʋ lɛnatɩ tsʋntsʋn, ɔdɛ itoyile amʋʋ Yesu labwɛ ha mʋ amʋ blɩ Dekapoli awulu amʋ fɛ́ɛ́tɔ. Ɔnɔ lobwie aha amʋ fɛ́ɛ́.

Ɔhandɛ Ɔkʋ Mʋ Bi Mʋa Ɔtsɩ Ɔkʋ Ɩlɔ Tsa

²¹ Yesu lɛla fa ɔpʋ amʋ yɔ mʋ́ ɔbɩn. Brɛá ɔbʋ ɔpʋ ɔnɔ ɩnʋ a, ɔdɔm kpɔnkpɔɔnkpɔntɩ bɛba bobomli mʋ.

²² Ɩnʋ Yudafɔ ofiakpa ɔhandɛ ɔkʋá bʋtɛtɩ mʋ Yairo lɛba ɩnʋ. Brɛá olowun Yesu a, ɔlɛda akpawunu mʋ ayabitɔ,

²³ kokoli mʋ ɔbɛɛ, “Mɩ bi tsɩhɛ dewu. Ba afʋbɔpʋ ɩbɩ dɩnka mʋsʋ, mʋ awutɔ ɩwa mʋ ɔnlɩn, onya nkpa.”

²⁴ Mʋʋ mʋa Yesu bɛnatɩ bɔyɔ a. Ɔdɔm kpɔnkpɔɔnkpɔntɩ bɛkpla buo mʋ, kpa puta mʋ.

²⁵ Ɔtsɩ ɔkʋ ɛ bʋ aha amʋtɔ, obugya dɛ mʋ wʋlɩ nfi duanyɔ nɩ.

²⁶ Alahɩɛ wun ipian ɩlɔ atsapʋ tsɔtsɔɔtsɔ ɩbɩtɔ, hʋlɩ mʋ ɩwɩsʋ atɔ fɛ́ɛ́, tamɛ ɩlɔ amʋ ɩmɛkala bwɛ mʋ. Ɩyɩn ɩdɛwa tsɩa.

²⁷ Brɛá ɔtsɩ anfɩ lonu Yesu nka a, ɔlɔtsʋn yɔ mʋ ɔma, fifitiwie ɔdɔm amʋtɔ yɔpʋ ɩbɩ da Yesu atadɩɛ.

²⁸ Tsufɛ ɔlɛblɩ wa mʋ nwuntɔ ɔbɛɛ, “Nɩ nɔpʋ ɩbɩ da mʋ atadɩɛ kpan a, ɩlɔ amʋ ibési mɩ.”

²⁹ Olenya pʋ ɩbɩ da mʋ atadɩɛ amʋ alɩ, obugya amʋ lɛka itin. Olonu mʋ́ nka mʋ awutɔá ɩlɔ amʋ lasi mʋ.

³⁰ Ɩnʋ Yesu lonu mʋ́ nka mʋ awutɔ mʋ ɛ ánɩ́ ɔŋɛ kʋ ladalɩ mʋtɔ. Ɩnʋnʋ ɔlɛdamli kɩ ɔdɔm amʋ, ɔlɛfɩtɛ amʋ́ ɔbɛɛ, “Ma lapʋ ɩbɩ da mɩ atadɩɛ?”

³¹ Mʋʋ mʋ akasɩpʋ amʋ bɛfɩtɛ mʋ bɛɛ, “Fʋ onuto fawun ánɩ́ ɔdɔm bakpa puta fʋ. Mʋʋ fʋtra fʋdɛfɩtɛ fɛɛ, ‘Ma lapʋ ɩbɩ da mɩ?> ”

³² Yesu lɔwa ansɩ kɩ amʋ́tɔ fɛ́ɛ́, ɔdɛ ɔha ánɩ́ ɔlɔpʋ ɩbɩ da mʋ dunka.

³³ Ifu lɛkɩta ɔtsɩ amʋ. Mʋ́ sʋ ɔlɔwa kpɩnkɩ kpakpakpakpa bɩ, tsufɛ oyin tɔá alanya. Ɩnʋ ɔlɛba bɛda akpawunu Yesu ayabitɔ, bla mʋ ɔnɔkwalɩ amʋ fɛ́ɛ́.

³⁴ Yesu lɛbla mʋ ɔbɛɛ, “Mɩ bi, fʋ hogyi lahɔ fʋ nkpa. Natɩ iwilwiitɔ. Fʋ ɩlɔ amʋ ɩta.”

³⁵ Brɛá Yesu bʋ mʋ́sʋ ɔdɛtɔɩ a, aha akʋ botsu ofiakpa ɔhandɛ amʋ woyitɔ ba bɛbla mʋ bɛɛ, “Ɔhandɛ, fʋ bi tsɩhɛ amʋ ɔdɩkpa mɔwa alɛ. Mátepi tra wa osunapʋ tɔɩ.”

³⁶ Yesu mɛkpla asʋn amʋʋ bʋdɛblɩ amʋ. Mboun ɔlɛbla mʋ ɔbɛɛ, “Mánya ifu. Fʋ mʋ́ hogyi wʋlɛ.”

³⁷ Ɔmɛha ɔhaa ɔkpa obuo mʋ dʋn Petro pʋ́ Yakobo mʋa mʋ pio Yohane nkʋlɛ.

³⁸ Brɛá bowie ɔhandɛ amʋ woyitɔ a, Yesu lowun ánɩ́ aha babʋla ɩnʋ, bʋdesu, bʋdɛ okitikiti.

³⁹ Olowie ɩnʋ fɩtɛ amʋ́ ɔbɛɛ, “Ntogyi sʋ mlɩdɛ ipian wun, mlɩdɛ okitikiti alɩ? Otsibi amʋ mɔkʋwu, dɩdɩ ɔdɛ.”

⁴⁰ Aha amʋ bɔmɔsɩ mʋ. Mʋʋ olegya amʋ́ fɛ́ɛ́ dalɩ ba wunsɩnɛ, ɔlɛkpa obi amʋ akwɩɩpʋ pʋ́ mʋ akasɩpʋ amʋʋ bʋbuo mʋ amʋ bebitiwie obu amʋʋ otsibi amʋ da mʋ́tɔ amʋtɔ.

⁴¹ Ɩnʋ ɔlɛkɩta otsibi amʋ ɩbɩ, bla mʋ amʋ́ ɔblɩtɔ ɔbɛɛ, “Talita kuum!” (Mʋ́ asɩ gyi, “Obitebi, kʋsʋ!”)

⁴² Ɩnʋnʋ ɔlɔkʋsʋ ɔna. (Otsibi amʋ lahɔ nfi duanyɔ.) Ilobwie aha amʋ fɛ́ɛ́ ɔnɔ dafa.

⁴³ Mʋʋ ɔlɛda amʋ́ ɔla kinkiinkin ɔbɛɛ, bʋmábla ɔhaa asʋn anfɩ. Ɩnʋ ɔlɛbla amʋ́ ɔbɛɛ, bʋha kebi amʋ atɔ ogyi.